Moving (2023) தென்கொரியா சூப்பர் ஹீரோ டிராமா - வலைத்தொடர்

உயர்நிலைப் பள்ளியில் படிக்கும் மாணவன். அவன் உணர்ச்சிவசப்பட்டால், காற்றில் பறக்கிறான். அதனால் அவனுடைய அம்மா கனமான பைகளை கொடுத்தனுப்புகிறார். அம்மா உணவகம் ஒன்றை நடத்தி வருகிறார்.

விரைவிலேயே இன்னொரு மாணவியும் பள்ளிக்கு வந்து சேர்கிறார். அவளுக்கு காயம் ஏற்பட்டால் விரைவில் குணமாகும் சக்தி இருக்கிறது. நாயகனும், இந்த மாணவியும் நண்பர்களாகிறார்கள்.

பிறகு மெல்ல மெல்ல கதை விரிகிறது. இவர்களுடைய பெற்றோர்களுக்கு இருக்கிற விசேச சக்தி பிள்ளைகளுக்கு கிடைத்திருக்கிறது. ஒவ்வொரு பெற்றோருக்கும் ஒரு தனிக்கதை இருக்கிறது. காதல், கல்யாணம், கலாட்டா என போகிறது.

கூடுதலாக அரசு, அரசியல், பக்கத்து நாட்டு எதிரி எல்லாமும் கலந்து கட்டி வருகிறது. பிறகு என்ன ஆனது என்பதை சுவாரசியமாக சொல்லியிருக்கிறார்கள்.

***

அமெரிக்காவிற்கு சூப்பர் ஹீரோ கதைகள் இப்பொழுது மெல்ல மெல்ல பல நாடுகளில் பரவ துவங்கியிருக்கிறது. இது கொரியா வகை சூப்பர் ஹீரோ படம். ஆனால் அமளி துமளியாக சண்டை காட்சிகள், சாகசம் என்றில்லாமல் கொரியாக்காரர்களுக்குரிய அதில் குடும்பம், செண்டிமெண்ட் என சரியாக கலந்து கட்டி எடுத்திருக்கிறார்கள். முன்பு இதே வகையிலான Witch (2018) பாகம் ஒன்றை எடுத்திருந்தார்கள். அதுவும் நன்றாக இருக்கும்.

நம் நாட்டிற்கு எதிரியாக ஒரு நாட்டை வழக்கமாய் காட்டுவது போல, தென்கொரியா என்பதால், வடகொரியாவை எதிரியாக காட்டுகிறார்கள். வடகொரியாவை காட்டினாலே, இவர்களுக்கு குஷியாகிவிடுகிறது.

எல்லா நடிகர்களும் பொருத்தமாக இருக்கிறார்கள். சூப்பர் ஹீரோ படம் பிடிப்பவர்கள் பார்க்கலாம்.

20 அத்தியாயங்கள். ஒவ்வொன்றும் ஒரு மணி நேரம். ஹாட் ஸ்டாரில் ஆங்கில சப்டைட்டிலோடு இருக்கிறது. இப்பொழுது வரை ஏன் தமிழில் டப் செய்யாமல் இருக்கிறார்கள் என்பது ஆச்சர்யமாக இருக்கிறது

முத்து என்கிற காட்டான் (2026) வலைத்தொடர்

 

மதுரை மாவட்டத்தின் கிராமத்தில் உள்ள ஸ்டேசனில் மூன்று ஆண்டுகளாக வழக்குகள் ஏதும் பதியவில்லை என்பதால்,  தூக்குவதற்கு எல்லா ஏற்பாடுகளும் நடந்து வருகிறது.  இந்த சமயத்தில் எல்லைப் புறத்தில் ஒரு வெட்டப்பட்ட தலை மட்டும் கிடைக்கிறது.

 

மெல்ல மெல்ல நூல் பிடித்து நகரும் விசாரணையில், முத்து என்பவரின் தலை தான் என கண்டுபிடிக்கிறார்கள்.  ஊர் ஊராக பயணித்திருக்கிறார். ஒரு நடனக்குழுவோடு இருந்திருக்கிறார். பிறகு கேரளாவில் ஒரு டிரஸ்டில் வேலை செய்திருக்கிறார்.

 

பிறகு இந்த கொலை எதற்காக என்பதை கண்டறியும் பொழுது ஆச்சரியப்படுகிறார்கள்.

 

*****

 

அத்தனை சுவாரசியமில்லை என இரண்டு பேர் சொன்னதை கேட்டும், இந்த தொடரை பார்த்ததற்கு இரண்டு பேர் தான் காரணம். முதலில் இயக்குநர் மணிகண்டன் (இணைந்து அஜித்குமாரும்). இரண்டாவது விஜய் சேதுபதி.

 

முத்து ஊர் ஊராக சுற்றியதற்கான மூல காரணம் என சொல்லப்படுவது எல்லாம் அத்தனை அழுத்தமாகவும், தெளிவாகவும் சொல்லப்படவில்லை.  அதனால் எல்லாமும் பலவீனமாய் தெரிகிறது. மிகவும் மெதுவாக போகிறது என்பதெல்லாம் காரணம் ஒருபக்கம். திரைக்கதையே மிகவும் பலவீனம். அது தான் காரணம்.

 

ஓடிடி வெளியீடு என்பதால்,  கேரளாவிற்கும் கதை செல்கிறது. இன்னும் கொஞ்சம் ஜியோ அழுத்தம் கொடுத்திருந்தால், ஆந்திரா, கர்நாடகாவிலும் கூட முத்துவை சுத்த விட்டிருப்பார்கள் போல!

 

படத்தில் கொஞ்சும் சுறுசுறுப்பான காட்சிகளை எல்லாம் தொகுத்து டிரைலராய் மாற்றியிருக்கிறார்கள்.  அதைப் பார்த்துவிட்டு தொடரை பார்ப்பதற்கு மிகவும் ஏமாற்றமாய் தான் நிச்சயம் இருக்கும்.

 

மற்றபடி நடிகர்கள் அவரவர் பங்கை சிறப்பாக செய்திருக்கிறார்கள். ஜியோ ஹாட் ஸ்டாரில் இருக்கிறது. நேரம் நிறைய இருப்பவர்கள் முயலலாம்.

Hanna – தொலைக்காட்சி தொடர் (2019 – 2021) உணர்ச்சிகள் கலந்த அதிரடி தொடர்

குழந்தை வேண்டாம் என கலைக்க வருபவர்களை அணுகி, நல்ல பணம் கொடுத்து வாங்கிக்கொள்கிறார்கள். இதில் ஒரு அம்மா தன் பிள்ளை தனக்கு வேண்டும் என அடம்பிடிக்கிறார். அதிலிருந்து கதை துவங்குகிறது.

அமெரிக்க சி.ஐ.ஏ வெளி உலகுக்கு தெரியாமல் ஒரு திட்டத்தை அமுல்படுத்துகிறார்கள். குழந்தைகளை சின்ன வயதில் இருந்தே உடல் ரீதியாகவும், உள ரீதியாகவும் மருந்துகள் கொடுத்து, ஆய்வுகள் செய்து, பயிற்சிகள் கொடுத்து அவர்களை தாங்கள் சொல்லும் வேலைகளை எந்த மறுப்பும் இல்லாமல் செய்ய தயார்படுத்துகிறார்கள்.

அங்கிருந்து ஒரு குழந்தையை (நாயகி) எடுத்துக்கொண்டு ஓட… துரத்துகிறார்கள். அம்மா இந்த போராட்டத்தில் இறந்துவிட, அப்பா அந்த குழந்தையை காட்டில் வைத்து வளர்க்கிறார். நல்ல பயிற்சி தருகிறார்.

ஒரு கட்டத்தில் காட்டை விட்டு வெளியே வந்து, அந்த திட்டத்துக்கு வளர்க்கப்படும் (நாயகியைப் போலவே) பெண்களை காக்க, அந்த திட்டத்தை முறியடிக்க அப்பாவும், மகளுமாய் தங்களுக்கு துணை நிற்பவர்களோடு இணைந்து ஆட்கள், ஆயுதங்கள், அதிகாரம் என வலுவாய் இருப்பவர்களோடு மல்லுக்கட்டுகிறார்கள்.

பிறகு என்ன ஆனது என்பதை உணர்வுபூர்வமாகவும், சண்டைகள் மூலமாகவும் நம்மை கவர முயல்கிறார்கள்.

****

அமெரிக்க சி.ஐ.ஏ. உலகம் முழுவதும் தங்களது எதிர்ப்பாளர்களை எப்படி ஆளைத் தூக்குகிறார்கள் என்பது உலகம் அறிந்த வரலாறு. இந்த கதையின் மையம் இன்னும் அபாயம். வருங்காலத்தில் தங்கள் அரசியலை, அதிகாரத்தை யாரெல்லாம் கேள்வி கேட்பார்களோ அவர்களை எல்லாம் இளைஞர்களாக இருக்கும் பொழுதே தூக்குவதற்கு ஆட்களை தயார் செய்வது தான் கதையே. ஆகையால் அதோடு நம்மால் ஒன்ற முடிகிறது.

பொதுவாக இப்படிப்பட்ட படங்கள் முழுக்க ஆக்சனை மட்டுமே வைத்து நகர்கிற படங்களாக இருக்கும். இந்தப் படம் குடும்பத்தைப் பிரிந்து வாழும் குழந்தைகள், அன்புக்காக ஏங்குபவர்கள், குற்ற உணர்வு என பல உணர்வுகளையும் சரியான விகிதத்தில் கலந்து எடுத்திருப்பது நன்றாக இருந்தது.

எல்லா தொடர்களில் இருக்கும் ஒற்றுமை… சம்பந்தப்பட்ட பாத்திரங்கள் தான் நம்ப கூடியவர்களிடமே விளக்கமாய் பேச மறுக்கிறார்கள். அதிலும் குறிப்பாக இதன் பின்னணி மிக மோசமாக இருப்பதால், இன்னும் இறுக்கம் அதிகம். அதனாலேயே நிறைய சிக்கல்களையும் எதிர்கொள்கிறார்கள்.

எல்லா தொடர்களையும் போலவே ஆங்காங்கே மெல்ல மெல்ல நகர்கிறார்கள். கடைசி இரண்டு, மூன்று அத்தியாயங்களில் சுறுசுறுப்பாக நகர்த்துகிறார்கள். 2011ல் இதே பெயரில் ஒரு படமாகவும் எடுத்திருக்கிறார்கள்.

பெரும்பாலும் எல்லா பாத்திரங்களும் நினைவில் நிற்கிறார்கள். நாயகி கொஞ்சம் உணர்ச்சிகளை காட்டாத இறுக்கமான முகம். ஆனால் சண்டைக் காட்சிகளில் சுறுசுறுப்பாக இருக்கிறார். படத்தில் அவரே சொல்வது போல, ”எனக்கு சண்டைப் போடத்தான் தெரியும்.” என்பது உண்மை தான். அந்த இளம் பெண்களில் ஜூல்ஸ் என வருபவர் நன்றாக ஈர்க்கிறார்.

இந்த மாதிரி தொலைக்காட்சித் தொடர்களில், வலைத்தொடர்களில் எனக்கு ஒரு வியப்பு. நிறைய இயக்குநர்கள் மாறினாலும், படம் எடுக்கும் முறை, உணர்வு எல்லாம் ஒரே மாதிரியாக இருப்பது ஆச்சர்யமாக இருக்கிறது.

இது தான் காட்சி. இது தான் கேமரா கோணம். இதை எடுத்துக்கொடுங்கள் என சொல்லிவிடுவார்களா என சந்தேகம் வருகிறது. உங்களுக்கு இப்படித் தோன்றிருக்கிறதா?

முதல் சீசன் 8, இரண்டாவது சீசன் 8, மூன்றாவது சீசன் 6 மொத்தம் 22 அத்தியாயங்கள் இருக்கின்றன. ஒவ்வொன்றும் 45 நிமிடங்களைத் தாண்டுகிறது. நிறைய நேரம் இருப்பவர்கள் பாருங்கள். இது பிரைமில் ஆங்கிலத்தில் இருக்கிறது. ஆறுதலாக தமிழ் சப் டைட்டிலுடன் கிடைக்கிறது. பெரிய எதிர்பார்ப்பு இல்லாமல் பாருங்கள். உங்களுக்கும் பிடிக்கும்.

Khauf (2025) வெப் சீரிஸ்

நாயகி ஒரு இளம்பெண் குவாலியரில் இருந்து தலைநகர் தில்லி வருகிறாள். அவளுக்கு பொருளாதார நெருக்கடி. ஆகையால், தில்லியை ஒட்டியுள்ள காட்டுப்பகுதிக்குள் ஒதுக்குப்புறமாக இருக்கும் வேலைக்கு செல்லும் பெண்களுக்கான அந்த விடுதிக்கு வந்து சேர்கிறாள்.

அந்த விடுதியில், குறிப்பாக மாடியில் உள்ள தளத்தில் பக்கத்து அறைகளில் நான்கு பெண்கள் அறைகளில் இருக்கிறார்கள். அவளின் தோழி ஒருத்தி அறையில் தங்கி இருந்தவள், ஒரு சாலை விபத்தில் இறந்து போகிறாள். ஆகையால், அந்த அறையை யாருக்கும் வாடகைக்கு விடக்கூடாது என வார்டனோடு மல்லுக்கு நிற்கிறார்கள். அவர்கள் தொடர்ந்து சில மாதங்களாக விடுதியை விட்டு வெளியே செல்லாமல் அடைந்து கிடைக்கிறார்கள்.

நாயகிக்கு வேலை கிடைக்கிறது. அந்த அறையில் அமானுஷ்யமாக சில விசயங்கள் நடக்கின்றன. நாயகிக்கு கல்லூரியில் நடந்த பாலியல் அத்துமீறல் ஒரு கெட்ட கனவாக துரத்திக்கொண்டே இருக்கின்றன. இந்த அமானுஷ்யங்களும் இணைந்து அவளை வாட்டி வதைக்கின்றன.

ஒரு வயதான மருத்துவன் பெண்களை கடத்தி கொன்று தனது பலத்தை அதிகரிப்பதற்காக முயன்று கொண்டே இருக்கிறார். இதன் தொடர்ச்சியில் நாயகியை குறிவைக்கிறார்.

நடுத்தர வயது பெண் காவலர் தன் காணாமல் போன பையனைத் தேடி விசாரித்துக்கொண்டே இருக்கிறாள்.

மேலே சொன்ன எல்லா நிகழ்வுகளும் ஒரு முனையில் சங்கமிக்கும் பொழுது, களேபரங்கள் நடக்கின்றன.

***

பேய், அமானுஷ்யம் என்ற வகையில் இதன் கதையின் நகர்வு இருந்தாலும் இரண்டாவது குழந்தையும் பெண் குழந்தையென்றால், குழந்தையை வயிற்றிலேயே கலைத்துவிட நினைக்கும் கணவன், பெருமைக்காக தன் காதலியுடன் தனியாக இருக்கும் இடத்தை சொல்லும் காதலன், ஏன் தன் கணவனைப் பிரிந்தேன் என சொல்லும் பெண் காவலர் என பெண்களின் பிரச்சனையை எதிர்கொள்ளும் சிக்கல்களை படம் முழுவதும் சொல்லிச் சென்றது சிறப்பு.

சமீபத்தில் சோரி2 என ஒரு ஹாரர் படம் பார்த்தேன். அதிலும் குழந்தை திருமணம் தவறு என சொல்லிச் சென்றாலும், படம் பார்க்கும்படி இல்லை. ஆனால் இந்த சீரிஸ் சரியாக தொட்டு சென்றிருக்கிறது.

கதையில் வரும் சின்ன பாத்திரங்கள் கூட ஏதோ வகையில் மனதில் நிற்பது சிறப்பு. ஒளிப்பதிவு, பின்னணி இசை என எல்லாமும் துணை நின்றிருக்கின்றன. அதனால் சிறப்பா என்றால்… எட்டு அத்தியாயங்களை கொஞ்சம் கத்திரிப் போட்டு ஆறு அத்தியாயங்களாக இருந்திருந்தால் நன்றாக இருந்திருக்கும்.

பேய் படத்தில் லாஜிக் பார்ப்பது சிக்கல் என்றாலும், நிஜத்திலும் மிக மோசமாக நடந்துகொண்ட ஆண், செத்தப் பின்பும் உக்கிரமான ஆவியாக கொல்வது எல்லாம் ஏற்கமுடியாதது. (சீரிஸ் பாருங்கள். நான் சொல்வது புரியும். விலாவரியாக சொன்னால்… ஸ்பாய்லராகிவிடும்).

முதல் வலைத்தொடர். மொத்தம் 8 அத்தியாயங்கள். ஒவ்வொரு அத்தியாயமும் 45லிருந்து 50 நிமிடங்கள். பிரைமில் தமிழில் கிடைக்கிறது. பெரிய எதிர்பார்ப்பு இல்லாமல் பாருங்கள். உங்களுக்கும் பிடிக்கலாம்.

Crash landing on you (2019) தென்கொரியா – ஒரு அறிமுகம்

காதலும் கலாட்டாக்களும்!

நாயகியின் குடும்பம் ஒரு பெரிய பிசினஸ் குடும்பம். வீட்டை விட்டு வெளியேறி தனக்கென ஒரு நிறுவனத்தைத் துவங்கி வெற்றிகரமாகவும் நடத்திக்கொண்டிருக்கிறாள். அப்பாவிற்கு இரண்டு பையன்கள். ஒரு நெருக்கடியில் தன் மகளை அழைத்து பெரும் நிறுவனத்தின் பொறுப்பேற்க சொல்கிறார். பசங்க செம வெறுப்படைகிறார்கள்.

இந்த சமயத்தில் வானத்தில் பறக்கும் பாராகிளைடிங் செய்யும் பொழுது எதிர்பாராதவிதமாக புயலடித்து தென்கொரியாவிலிருந்து வட கொரியாவின் பகுதிக்கு சென்று விழுகிறாள். நாயகன் அங்கு இராணுவ அதிகாரி. உயர் பொறுப்பில் உள்ள அதிகாரியின் மகனுமாக இருக்கிறான்.

தென் கொரியா, வட கொரியா - இரண்டு நாடுகளுக்குமான முரண் உலகம் அறிந்தது. பிறகு என்ன நடந்தது என்பதை காதலும், கலாட்டாவுமாக கல்லா கட்டும் நோக்கத்தோடு கமர்சியலான ஒரு தொடராக நகர்த்தியிருக்கிறார்கள்.

நெட் பிளிக்சிலும், பிரைமிலும் இருப்பதாக just watch தளம் சொல்கிறது. ஒரு தொடர் 16 அத்தியாயங்கள். தொலைக்காட்சி என்பதால், கொஞ்சம் நிதானமாக கதைச் சொல்லியிருக்கிறார்கள். ஒவ்வொரு அத்தியாயமும் 1 மணி நேரத்திற்கு மேல் போகிறது. இப்பொழுது இரண்டு அத்தியாயங்கள் பார்த்திருக்கிறேன். தினம் ஒன்று என்றால் கூட நான் முடிக்க இன்னும் இரண்டு வார காலம் ஆகும்.

நேரம் நிறைய இருப்பவர்கள் பீல் குட் சீரிஸ் பிடித்தால் இதைப் பார்க்கலாம். இந்த தொடர் கொரியன் வலைத்தொடர்களில் பிரபலம் என்கிறார்கள். நான் சமீபத்தில் தான் கேள்விப்பட்டேன். நீங்கள் யாராவது கேள்விப்பட்டிருக்கிறீர்களா?

இன்ஸ்பெக்டர் ரிஷி (2024) முதல் சீசன் 10 அத்தியாயங்கள்

தேன்காடு என காடுகளோடு இருக்கக்கூடிய ஒரு மலைகிராமம். ஒரு குகையில் வன தேவதையை வணங்கி, மலைவாழ் மக்கள் பூஜை செய்கிறார்கள். 25 அடிக்கு ஒரு பெரிய குழி வெட்டி, அதில் நெருப்பு கொழுந்துவிட்டு எரிகிறது. அங்கு வந்த அத்தனை பேரும் குழந்தைகள் உட்பட இரண்டிரண்டு பேராக உள்ளே குதிக்கிறார்கள். இது தான் முதல் காட்சி.

நிற்க. சமகாலத்தில் ஒரு புகைப்படக்காரர் மர்மமான முறையில் காட்டில் இறந்துகிடக்கிறார். மக்கள் வனரட்சி தேவதை ஆங்காங்கே உலாவுவதாக பயத்துடன் பேசிக்கொள்கிறார்கள்.

துப்பு துலக்க நாயகனான இன்ஸ்பெக்டர் ரிஷி அந்தப் பகுதிக்கு வருகிறார். இறுக்கமாக இருக்கிறார். முன்பு தன் தொழில் ரீதியான ஒரு துப்பாக்கிச் சூட்டில் அவருக்கு ஒரு கண் போய்விடுகிறது. ஒற்றைக்கண்ணொடு தான் சமாளிக்கிறார். அவருக்கு இரண்டு சப் இன்ஸ்பெக்டர்கள் உதவிக்கு வருகிறார்கள்.

கொலைகள் எந்த தடயமும் இல்லாமல் நடக்கிறது. எங்கு விசாரணை துவங்கினாலும், ஒரு கட்டத்தில் ஒரு முட்டுச் சந்தில் கொண்டு போய் நிற்கிறார்கள். ஆனால் ஆட்கள் மர்மமான முறையில் இறப்பது தொடர்கிறது. தொடர்ந்து ஆட்கள் சாவதால், அந்த பகுதியில் நடைபெறும் பல ”வளர்ச்சி” வேலைகள் தடைபடுகிறது.

காட்டை காக்க வனரட்சி தேவதை தான் கொலைகள் செய்கிறதா? அல்லது அதன் பின்னணியில் யாராவது இருக்கிறார்களா? என்பதை காட்டின் பின்னணியில் சுவாரசியமாக சொல்லியிருக்கிறார்கள்.

****

காட்டின் பின்னணியில்… அடிக்கிற கன வெயிலுக்கு இதமாக… கண்ணுக்கு குளிர்ச்சியாய் பார்க்கவே அழகாக இருக்கிறது. ஆங்காங்கே சிஜியில் வரும் விலங்குகளும் அருமையாக இருக்கின்றன.

சுற்றுப்புற சூழலில் அக்கறை இல்லாமல், லாபம் என்ற ஒரே நோக்கத்தில் சட்ட ரீதியாகவோ, சட்டத்துக்கு புறம்பாகவோ உலகம் முழுவதும் காடுகள் அழிக்கப்படுகின்றன. அதன் பின்னணியில் கதை அமைத்திருக்கிறார்கள். காடுகளோடு அந்த மலை வாழ் மக்கள் எத்தனை ஒன்றி வாழ்கிறார்கள் என்பதையும் உணர்வுப்பூர்வமாக காட்டியிருக்கிறார்கள். அதை இன்னும் கொஞ்சம் காட்டியிருந்தாலும், இன்னும் கொஞ்சம் கதைக்கு அழுத்தம் கிடைத்திருக்கும்.

திறமையான இன்ஸ்பெக்டர் என அறிமுகப்படுத்தினாலும், இயக்குநர் ஒன்பது அத்தியாயம் வரை அவரை கட்டிபோட்டு வைத்திருந்து… கடைசி அத்தியாயத்தில் தான் சரசரவென அதன் புதிர்களை அவிழ்க்கிறார். இந்த மாதிரி வலைத்தொடர்களில் அடுத்த தொடருக்கான ஒரு விதையையும் விட்டு வைப்பார்கள். இதிலும் அப்படியே!

நாயகன் நவீன் சந்திரா (சமீபத்தில் ஜிகர்தண்டா டபுள்எக்ஸ்-ல் பார்த்த நினைவு) கொடுத்தப் பாத்திரத்தில் அருமையாக பொருந்தியிருக்கிறார். இரண்டு உதவி ஆய்வாளராக வருபவர்களும் சிறப்பு. ஒருவர் ரவிகண்ணா சமீபத்தில் சில படங்களில் பார்த்து வருகிறேன். இன்னொருவர் நளினி ஜீவரத்தினம்.

நாயக பிம்பம் என வழக்கமாக திரையில் காட்டுவதை வலைத்தொடர்களில் உடைத்து வருவதை கவனிக்கிறேன். இதில் முதன்மை பாத்திரங்களாக வரும் மூவருடைய தனிநபர் வாழ்க்கையையும் இயல்பாக, சிக்கல்களை எதிர்கொள்பவர்களாக காட்டியிருக்கிறார்கள்.

கொஞ்சம் இளைத்து நாயகி சுனைனா தொடர் முழுவதும் வருகிறார். அவரும் சிறப்பு. மேலும், குமாரவேல், மைம் கோபி, வேல ராமமூர்த்தி என அவர்களும் பொருத்தமாக வருகிறார்கள். தென்னிந்திய மொழிகளில் கூடுதலாக இந்தியில் மொழிமாற்றம் செய்திருப்பதால், பிற மொழி நடிகர்களும் கலந்து கட்டி நடித்திருக்கிறார்கள். சின்ன சின்ன பாத்திரங்களில் வருபவர்களும் நினைவில் நிற்கிறார்கள்.

”திரு திரு துறு துறு” என ஒரு படம். 2009ல் வந்தது. நன்றாக ஓடியதாகவும் நினைவு. அதை இயக்கியவர் நந்தினி. ஆனால் அதற்கு பிறகு காணாமல் போய்விட்டார். இப்பொழுது இந்த தொடர் மூலம் தயாரிப்பாளராகவும், இயக்குநராகவும் வந்து இருக்கிறார். வாழ்த்துகள்.

இந்தத் தொடர் அமேசான் பிரைமில் வெளியாகியிருக்கிறது. பாருங்கள்.

மத்தகம் – வலைத்தொடர் ஒரு நல்ல திரில்லர்

“போலீசு கையிலும் துப்பாக்கி. நம்ம கையிலும் துப்பாக்கி. நாம் டிரிக்கரை அழுத்தினா போதும். சுட்டுவிடலாம். அவர்கள் சுடுவதற்கான ஆணை வரும் வரை காத்திருக்கவேண்டும்”

*****

நாயகன் போலீசில் உயரதிகாரி. இரவில் வழக்கமான சோதனையின் பொழுது, ஒரு கிரிமினல் மாட்டுகிறான். அவனை விசாரிக்கும் பொழுது ஒரு பெரிய சதித்திட்டம் உருவாகப் போகிறது என தெரிய வருகிறது.

சென்னையில் ஓரிடத்தில் தொழிற்முறை குற்றவாளிகளை எல்லாம் ஒரு விருந்துக்கு வரச்சொல்லி ஏற்பாடு நடக்கிறது. அது ஒரு வழக்கமான விருந்து அல்ல! ஒரு பெரிய குற்ற செயல் அரங்கேறுவதற்கான முன்னேற்பாடு என தெரிய வருகிறது. இதை முறியடிக்க நாயகன் அதற்கான விசாரணைகளை, சில முன்னேற்பாடுகளை செய்கிறார்.

மறுபுறம் படாளம் சேகர் என ஒரு தேர்ந்த கிரிமினல். சில மாதங்களுக்கு முன் ஒரு விபத்தில் செத்துப்போன ஆள். இப்பொழுது இந்த விருந்துக்கான ஏற்பாட்டை செய்கிற ஆளே அவன் தான். விருந்துக்கு கிரிமினல்களை அழைக்கிறான். வர மறுப்பவர்களை மிரட்டி வரவழைக்கிறான்.

ஒரு பக்கம் நாயகன் அவர்களின் திட்டம் என்ன? யார் இதன் பின்னணியில் இருக்கிறார்கள் என அறிய முன்னேறுகிறான். இன்னொரு பக்கம் வில்லன் விருந்து வெற்றிபெற்றே தீரவேண்டும் என ஒவ்வொரு ஏற்பாட்டையும் கவனமாக செய்கிறான்.

இந்த முதல் வலைத்தொடரில் இந்த எலியும் பூனை விளையாட்டை சுவாரசியமாக துவங்கியிருக்கிறார்கள். இனி என்னாக போகிறது என்பதை அடுத்தடுத்த சீசனில் பார்க்க போகிறோம்.

****

ஒரு பக்கம் போலீஸ். இன்னொரு பக்கம் குற்றக்கும்பல். இரண்டும் எதிரெதிர் என கட்டமைக்கிறார்கள். அதில் ஆளும் கட்சியைச் சார்ந்த அந்த மந்திரியை நம். 2 என அழைக்கிறார்கள். அதிகாரத்தில் இருந்து கொண்டு, எதிரெதிர் என சொல்லக்கூடிய இரண்டு ஆட்களையுமே தன் அதிகாரத்தை தக்கவைக்க அவர் தான் இயக்குகிறார் என்பது நாம் கவனமாக கவனித்தக்க விசயம்.

இந்த எலி பூனை விளையாட்டை எத்தனை சுவாரசியப்படுத்துகிறார்கள் என்பது தான் இந்த வலைத்தொடரின் சுவாரசியம். “கிடாரி” இயக்கி கவனிக்க வைத்தவர் இவர்.… பிறகு ஜெயலலிதாவின் வாழ்வு என ”குயின்” இயக்கிய பிரசாத் முருகேசன் தான் இதையும் இயக்கியிருக்கிறார்.

யார் இயக்கியது என கவனிக்காமல் பத்து நிமிடம் பார்ப்போம். பிறகு மெல்ல பார்க்கலாம் என பார்க்க துவங்கினேன். எல்லா அத்தியாயங்களையும் மூன்று மணி நேரம் பார்த்துவிட்டு தான் வேறு வேலைக்கே போக முடிந்தது. ”மத்தகம்” என்றால்… யானையின் நெற்றிப்பொட்டு என்கிறார்கள். நல்ல வார்த்தை அறிமுகம். அதில் என்ன சிறப்பு என தேடவேண்டும். படத்தில் நிறைய இடங்களில் இங்கிலீஷ். குறிப்பாக உயர் அதிகாரியிடத்தில்! இயல்பில் அப்படி பேசினாலும், தமிழ் பேச வைத்திருக்கலாம்.

நாயகனாக அதர்வா. கொடுத்த பாத்திரத்தை சரியாக செய்திருந்தாலும், இன்னும் கொஞ்சம் அழுத்தமாக செய்திருக்கலாம். வில்லனாக குட் நைட் மணிகண்டன். அவரைப் பற்றிய முந்தைய படங்கள் நினைவுக்கு வந்தாலும், கொஞ்சம் கொஞ்சமாக அந்த பாத்திரமாக இணைந்துவிட்டார். வாழ்த்துகள். நிறைய புதிய பாத்திரங்கள் ஆங்காங்கே வந்தாலும் கூட நம் நினைவில் நிற்பது ஆச்சர்யம். சில படங்களில் தான் அப்படி அமையும். இதில் அமைந்திருக்கிறது.

முதல் சீசன் ஐந்து அத்தியாயங்களோடு துவங்கியிருக்கிறது. இனி அடுத்தடுத்த சீசன் இதே மாதிரி சுவாரசியமாக இருக்கிறதா என பொறுத்திருந்து பார்ப்போம். ஹாட் ஸ்டாரில் வெளியாகியிருக்கிறது. பாருங்கள்.

Farzi – இந்தி வலைத்தொடர்

 

”ஒருவர் உயரத்தில் இருந்து விழும் போது முதலில் பறப்பது போல் தோன்றும்”

- படத்தில் இருந்து....!

நாயகனின் தாத்தா “Kranti” என்னும் புரட்சிகர இதழ் ஒன்றை சொந்தமாக நடத்திவருகிறார். ஆனால் பெரும்கடனில் இருக்கிறது. இன்றைக்கு மூடுவதா, நாளைக்கு மூடுவதா என நொண்டிக்கொண்டிருக்கிறது.

தாத்தா அருமையான ஓவியர். நாயகனுக்கு சிறு வயதில் இருந்து கற்பிக்கிறார். அவன் எந்தவொரு ஓவியத்தையும் அச்சு பிசகாமல், வரையக் கூடிய ஆளாக இருக்கிறான். ஓவியம் வரைந்து குறைவான வருமானத்தில் வாழ்க்கையை கடத்துகிறான்.

அவன் தன் தாத்தா போல அவனில்லை. அவனின் ஓவியத் திறன், அச்சுத் தொழிலில் கில்லாடியான நண்பன். தாத்தாவின் அச்சகம். கள்ள நோட்டு அடித்தால் என்ன என யோசிக்க துவங்குகிறான். ஒத்த சிந்தனை உள்ள நண்பனும் ஒத்துக்கொள்கிறான். தாத்தாவிடம் வேலை செய்யும் ஒரு முக்கிய நபரையும் உள்ளிழுத்து, நோட்டை அடிக்க துவங்குகிறார்கள். முதலில் கொஞ்சம் சொதப்பினாலும், தேர்ந்த நோட்டை அடிக்க துவங்கி, உள்ளூரில் கைமாற்றிவிடுகிறார்கள்.

இது புறம் நடக்க, உலக அளவில் இன்னொரு பெரிய கள்ள நோட்டு மாபியா கும்பல் பெரிய வலைப்பின்னலுடன் இயங்கிவருகிறது. இந்திய அதிகாரிகள் அவனைப் பிடிக்க பல வழிகளில் முயன்று வருகிறார்கள்.

ஒரு கட்டத்தில் நாயகனும், மாபியா கும்பலும் நோட்டு அடிப்பதில் ஒன்றிணைகிறார்கள். அச்சு அசலாக 2000 நோட்டுகளாக 12000 கோடி அடித்து இந்தியாவிற்குள் சாதுரியமாக கொண்டு வருகிறார்கள்.

இந்த பெரும் பணத்தை இந்திய சந்தையில் இறக்குவதற்குள் அதிகாரிகள் அவர்களைப் பிடித்தார்களா என்பதை முழு நீளக் கதையில் விவரித்து இருக்கிறார்கள்.

தாத்தா 70 காலத்தை சேர்ந்த லட்சியவாதி. சமூகத்தை மாற்றவேண்டும் என்ற உறுதியில், அவரும் அவர் வயதில் உள்ள ஊழியர்களும் வறுமையில் கூட உற்சாகமாய் வேலை செய்கிறார்கள். ஆனால் நாயகனான பேரனோ எல்லா விழுமியங்களை தொலைத்து நிற்கிற ஒரு இளைஞன். கிராந்தியின் நிழலில் வளர்ந்தாலும், அதன் சித்தாந்தம் தன் மேல் விழாமல் வளர்கிறான். என்ன செய்தாவது குறுக்கு வழிகளில் முன்னேறவேண்டும் என துடிக்கிறான். படத்தில் இவன் புத்தி தான் வில்லன். ஆனால் கதையின் நாயகனாக வேறு இருப்பதால், கதையை கொண்டு செலுத்துவதில் கொஞ்சம் ஆங்காங்கே திணறித்தான் போயிருக்கிறார்கள்.

அந்த அரசியல்வாதி முக்கியமான ஆள். நிஜ அரசியல்வாதியை போலவே உருவாக்கியிருக்கிறார்கள். தேர்தல் தான் முக்கியம். தன் புகழ், தனக்கான இடம் தான் முக்கியம். நாடு எக்கேடு கெட்டால் எனக்கென்ன என பளிச்சென காட்டுகிறார்.

அந்த அதிகாரியும் சுத்தமான ஆளில்லை. தனக்கான ஒரு குழு. அதிகாரம். அதற்காக அரசியல்வாதியின் பலவீனத்தை சொல்லி சொல்லியே, இதைச் செய்வதால் அரசியல்வாதிக்கு என்ன பலன் என சொல்லி சொல்லியே தனக்கான வேலையை செய்கிறார்.

”ஒவ்வொருவருக்குள்ளும் ஒரு திருடன் இருக்கிறான், வாய்ப்புக்காக மட்டுமே காத்திருக்கிறான்” என படத்தில் வசனம் வருகிறது. இந்தச் சமூகத்தை எங்கு கொண்டு நிறுத்தியிருக்கிறார்கள். இப்படியும் சொல்லலாம். எல்லா திருடர்களும் இப்படி தங்களை நியாயப்படுத்திக்கொள்கிறார்கள்.

Farzi என்றால் போலி என அர்த்தம். கள்ள நோட்டு மட்டுமா போலி. பிரதமர் போலி. கவர்னர் போலி. இன்னபிற அரசியல்வாதிகள், அதிகாரிகள் என எங்கும் போலி மயமாய் தான் பரந்து விரிந்து இருக்கிறார்கள். இவங்க எங்க கள்ள நோட்டு கும்பலை பிடிச்சு, நாட்டைக் காப்பத்தறது என பார்க்கும் நமக்கு தான் ஆயாசமாக இருக்கிறது. இதையும் மீறி இந்த எலி, பூனை விளையாட்டை சுவாரசியப்படுத்தியிருக்கிறார்கள்.

இந்தியாவில் கள்ள நோட்டு என்பது ஒரு பெரிய பிரச்சனை. இன்றைக்கு கூட ஒரு வழக்கறிஞர் 50 லட்சம் அடித்து, ஓய்வு பெற்ற இராணுவ வீரர் என இருவரும் மாட்டியிருக்கிறார்கள்.

இந்தியாவில் கள்ள நோட்டு எவ்வளவு புழங்குகிறது என தகவல்களை தேடிப்பார்த்தால், ஆர்.பி.ஐ. சொல்லும் அதிகாரப்பூர்வ தகவலே மிக அதிகமாக இருக்கிறது. உண்மையில் எவ்வளவு சுற்றும் என யோசித்தாலே தலைச் சுற்றுகிறது. இப்பொழுது உள்ள பலவீனமான சிஸ்டத்தை வைத்துக்கொண்டு எப்படி பிடிக்க போகிறார்கள் என்பது கவலை தரும் விசயம்.

“பேமிலி மேன்” இயக்குநர்களான Raj & DK தான் இந்த சீரிஸையும் இயக்கியிருக்கிறார்கள். அவர்களுக்கு கிராப்ட் நன்றாக கைகூடி வந்திருக்கிறது. இதிலும் அவர்களின் வளர்ச்சி நன்றாக தெரிகிறது.

கதையின் நாயகர்களின் குடும்பத்தை பொதுவாக நமது படங்களில் குழப்பம் செய்வதில்லை. விதிவிலக்காக சில படங்கள் இருக்கலாம். ஆனால் இவர்களின் நாயகர்கள் வீட்டில் குழப்பம் இருப்பதை இயல்பாக காட்டியிருக்கிறார்கள். பேமிலிமேனில் கொஞ்சம் குழப்பமாய் காண்பித்தவர்கள், இந்த சீரிசில் கொஞ்சம் வளர்ந்து, அதிகாரியும் அவன் மனைவியும் விவாகரத்து செய்கிறார்கள். வளர்ச்சி தான்.

மற்றபடி, ”நாயகனாக” ஷாகித் கபூர், அதிகாரியாக நம்ம விஜய் சேதுபதி, பெரிய வில்லனாக கே.கே. மேனன், ஆர்.பி. ஐ அதிகாரியாக ராசி கண்ணா என எல்லோரும் சிறப்பாக செய்திருக்கிறார்கள்.

வெப் சீரிஸ்க்கு இன்னும் சென்சார் வரவில்லை என நன்றாக தெரிகிறது. ஏகப்பட்ட கெட்ட வார்த்தைகள் சரளமாய் புழங்குகிறது.

அமேசான் பிரைமில், ஒரு சீசன். எட்டு அத்தியாயங்கள் என மொத்தம் ஆறு மணி நேரம் என விரிகிறது. தமிழிலும் மொழிமாற்றம் செய்திருக்கிறார்கள். இந்த சீசன் வெற்றியடைந்துவிட்டதால், மீண்டும் இன்னொரு சீசனோடு இவர்கள் வர நிறைய வாய்ப்பிருக்கிறது.

இருதுருவம் (2019) பார்க்க கூடிய திரில்லர்

முதல் வலைத்தொடர் (Web series)

9 அத்தியாயங்கள் (Episodes)

கதை. நாயகன் ஒரு போலீஸ் ஆய்வாளர். தனது குட்டிப்பெண்ணுடன் வாழ்ந்துவருகிறார். அவருடைய துணைவியார் திடீரென ஆறு மாதத்திற்கு முன்பு காணாமல் போய்விடுகிறார். போலீஸ் இந்த வழக்கை விரைவுப்படுத்தாமல், கிடப்பில் போட்டுவிட்டதால், கடுப்பில் சில மாதங்களாக விடுப்பு எடுத்துக்கொண்டு ஸ்டிரைக் செய்கிறார்.

இதற்கிடையில், ஒரு பெண்ணை சேரில் கட்டிபோட்டு வாயை கிழித்து கொடூரமாக கொலை செய்யப்படுகிறாள். “உன்னால மட்டும் தான் இந்த கொலையாளியை கண்டுபிடிக்க முடியும். வேலைக்கு வாங்க!” என மிகையாக ஏதும் சொல்லாமல், ”துறையில் ஆள் பற்றாக்குறையாக இருக்கிறது. உன் துணைவியார் காணாமல் போன வழக்கை விரைவுப்படுத்த பேசுகிறேன். இந்த கொலை வழக்கை விசாரி” என பேசுகிறார் உயரதிகாரி. “பொண்டாட்டியை இவனே கொன்னுட்டு சீனை போடுறான்” என சக போலீசுகாரர்களே அவனுக்கு பின்னால் சிலர் பேசுகிறார்கள்.

ஏற்றுக்கொண்டு துப்புத்துலக்க ஆரம்பிக்கிறான். கொலை செய்த இடத்தில் ஒரு கைப்பட எழுதி வைத்த திருக்குறள் ஒன்று கிடைக்கிறது. இதை விசாரித்துக்கொண்டு இருக்கும் பொழுதே, இதே போல இன்னொரு கொலையும், திருக்குறளும் கிடைக்கிறது. இந்த முறை கண்களை மோசமாக சிதைத்து இருக்கிறான்.

நாயகன் மெல்ல மெல்ல முன்னேறுகிறான். அடுத்தடுத்து கொலைகள் என்பதால் மேலிருந்து வரும் அழுத்தத்தால், வழக்கை அவனிடமிருந்து வேறு ஒருவருக்கு கைமாற்ற உத்தரவிடுகிறார்கள்.

இறுதியில் கொலையாளியை பிடித்தார்களா என்பதை சீரிஸ் பார்த்து தெரிந்துகொள்ளுங்கள்.

******

நாயகனாக நந்தா. பொண்டாட்டி காணாமல் போனதால், தொடர் முழுவதுமே இறுக்கமான முகத்துடனே வருகிறார். நாயகனின் நினைவலைகளில் அவ்வப்பொழுது பிக்பாஸ் அபிராமி தலை காட்டுகிறார். அவருக்கு உதவியாக இருக்கும் துணை ஆய்வாளர் கலகலப்புக்கும், வழக்கை விசாரிக்கவும் உதவுகிறார்.

தொடர் கொலைகள். விசாரணை என்பது வழக்கமானது தான் என்றாலும், விசாரணையை எதார்த்தமாகவும், தொடர் கொலையாளியை கொஞ்சம் புத்திசாலியாகவும் காட்டியிருப்பதால், எலியும், பூனையும் விளையாட்டு கொஞ்சம் சுவாரசியமாக இருக்கிறது.

திருக்குறள் ஒரு ஆளை செம்மைப்படுத்தும். ஆனால், கொலையாளி திருக்குறளை பயன்படுத்துகிறான். முரண் தான்.

அதே போல வெப் சீரிஸ் என்பதால், சென்சார் இல்லாமல் இருக்கிறது. சென்சார் தேவை. ஆனால், ஆட்சியாளர்கள் அரசியல் காரணங்களுக்காக சென்சாரை விரைவில் கொண்டு வர இருக்கிறார்கள். அப்படி கொண்டுவந்தால், ஆளும் ஆட்சியாளர்களின் கொள்கைகளை விமர்சிக்கும் சீரிஸ்கள் இனி வருமா என்பது சந்தேகம் தான். பார்க்கலாம்.

ஒவ்வொரு அத்தியாயமும் 30 நிமிடங்களுக்குள் இருக்கிறது. இரண்டாவது தொடருக்கான ஏற்பாடுகளையும் இறுதியில் வைத்திருக்கிறார்கள். இந்த தொடர் வெற்றி பெற்றிருப்பதால், இரண்டாவது தொடர் வருவதற்கு நிறையை வாய்ப்பிருக்கிறது. பார்க்க கூடிய தொடர். பாருங்கள். SonyLivல் இருக்கிறது. பாருங்கள்.