இ.எஸ்.ஐ, பி.எப் குறித்த ஒரு இணைய (Zoom) வழிக்கூட்டம் சம்பந்தமாக!

நண்பர்களுக்கு,

கடந்த பதினைந்து ஆண்டுகளுக்கும் மேலாக முன்பு விற்பனை வரி, இப்பொழுது ஜி.எஸ்.டி, பி.எப், இ.எஸ்.ஐ செய்கிற ஒரு வரி ஆலோசகராக (Tax Consultant)யாக இருக்கிறேன் என நீங்கள் அறிவீர்கள்.

குறிப்பாக, கடந்த பதினைந்து ஆண்டுகளில், புதிய நிறுவனங்கள் 40க்கும் மேலாக புதிதாக பி.எப், இ.எஸ்.ஐ களில் பதிவு செய்து தந்திருக்கிறேன். பல நிறுவனங்களுக்கும் இ.எஸ்.ஐ, பி.எப் மாதாந்திர ரிட்டன்கள் தாக்கல் செய்து கொடுத்துவருகிறேன். நிறுவனங்கள் பி.எப். , இ.எஸ்.ஐ தணிக்கைகள் நடைபெறும் பொழுது, இறுதி வரை உடன் நின்றிருக்கிறேன்.

உங்களில் சிலர் தனிப்பட்ட முறையில், இ.எஸ்.ஐ, பி.எப் குறித்த சந்தேகங்களை கேட்டு தெளிவு பெற்றுள்ளீர்கள். பி.எப் பணத்தை பெறுவதற்கும் ஆலோசனைகளை தந்திருக்கிறேன். சிலருக்கு விண்ணப்பித்து பணத்தைப் பெற்றும் தந்திருக்கிறேன்.

சென்னையில் GSTPS என்ற சொசைட்டி ஒன்று இயங்கிவருகிறது. அதில் ஜி.எஸ்.டி, வருமான வரி குறித்த கூட்டங்களை தொடர்ந்து நடத்திவருகிறார்கள். அதில் ஒரு உறுப்பினராகவும் இருக்கிறேன்.

அதன் தொடர்ச்சியில் இந்த வாரம் சனிக்கிழமை 12/08/2023 அன்று காலை 10.30 மணியளவில் இ.எஸ்.ஐ, பி.எப்பில் தொழிலாளர்களுக்கும், முதலாளிகளுக்கும் கிடைக்கும் பலன்கள் குறித்து ஒரு மணி நேரம் பேச இருக்கிறேன்.

ஒரு மணி நேரம் மட்டுமே என்பதால், மிக விரிவாக பேச இயலாது. சில அடிப்படை புரிதல்களை இந்தக் கூட்டத்தில் கலந்துகொள்பவர்களுக்கு உருவாக்க முடியும் என நம்புகிறேன்.

ஆகையால் இந்தக் கூட்டத்தில் கலந்துகொள்ளுங்கள். உங்களுக்கு ஏதேனும் சந்தேகம் இருந்தால், இப்பொழுது கூட கேள்விகளை அனுப்பி வையுங்கள். என் உரையில் உங்கள் கேள்விக்கு பதில் அளிக்க முயல்கிறேன். இல்லையெனில், அதற்கு பிறகு அரை மணி நேரம் கேள்வி பதிலுக்காக ஒதுக்கியிருக்கிறோம். அதிலும் கேள்வி கேட்கலாம்.

உரைக்கு முன்பும், பின்பும், இனி இ.எஸ்.ஐ, பி.எப் குறித்த அடிப்படை புரிதல்களை உருவாக்குவதற்கு, கேள்வி பதில் வடிவத்தில் பேஸ்புக்கிலும், எனது தளமான குருத்திலும் http://socratesjr2007.blogspot.com தொடர்ந்து எழுத முயல்கிறேன்.

நன்றி.

Limitless (2011)

நாயகன் நாவல் எழுதவேண்டும் என வேலையை விட்டுவிட்டு வீட்டில் இருக்கிறான் ஆனால் கவிழ்ந்தடித்து தூங்கி வழிந்தபடி நாட்கள் நகர்கிறதே ஒழிய, ஒரு வார்த்தை கூட எழுதவில்லை. காதலியும் “ஆளை விடுடா சாமி” என சொல்லிவிட்டு நகர்கிறாள்.

”எதைத் தின்றால் பித்தம் தெளியும்” என நாயகன் இருக்கும் சமயத்தில், பழைய சகா ஒருவனைப் பார்க்கிறான். அவன் “சிறப்பான” மாத்திரைகளை விற்றுக்கொண்டிருக்கிறான். அந்த மருந்து மூளையின் நரம்புகளை விசேசமாக தூண்டுகிறது. இதனால் சிந்திக்கும் திறனும், செயல்படும் திறனும் பல மடங்கு அதிகரிக்கும். இன்னும் சந்தைக்கு வரவில்லை. இன்னும் சோதித்துக்கொண்டு தான் இருக்கிறார்கள். இதன் விலை அதிகம். ”உனக்காக இந்தா ஒன்று!” என தந்துவிட்டுப் போகிறான்.

பிகு செய்துவிட்டு, பிறகு வாங்கி சாப்பிடுகிறான். “வாடகை கொடுக்க வக்கில்லாதவனே!” என கன்னாபின்னாவென்று திட்டிய வீட்டு பெண் ஓனரை பேசி, மயக்கி படுக்கைக்கு தள்ளிக்கொண்டு போகிறான். மிக மோசமான முறையில் தனது வீட்டுப் பொருட்களை ஒரே நாளில் சரி செய்துவிடுகிறான்.

”தெய்வமே” என சகாவை மீண்டும் தேடிப்போகிறான். ஆனால், அங்கு அவன் கொலை செய்யப்பட்டு கிடக்கிறான். போலீஸ் வருவதற்குள் வீட்டுக்குள் தேடினால், சிறப்பு மாத்திரைகள் நிறைய கிடைக்கிறது. எடுத்துக்கொண்டு வந்துவிடுகிறான்

மாத்திரைகள் உள்ளே போகப் போக, நாலே நாளில் ஒரு நாவலை எழுதிவிடுகிறான்.

ஒரு மொழியை எளிதாக கற்றுவிடுகிறான். இதெல்லாம் தேறாது என பங்கு சந்தையில் நுழைகிறான். இரண்டு, மூன்று நாளில் மில்லியன்களில் பணத்தை அள்ளுகிறான்.

இப்படி நிறைய நல்லதுகள் நடந்தாலும், கெட்டவைகளும் விடாமல் துரத்துகின்றன. மாத்திரையின் பக்கவிளைவுகள் சிக்கல் செய்கின்றன. விசாரித்தால், இந்த மாத்திரையை உண்டவர்கள் சிலர் பரலோகம் போயிருக்கிறார்கள். சிலர் ஐசியூவில் இருக்கிறார்கள். ஒரு கட்டத்தில், ” ஆளை விடுங்கடா” என தற்கொலை வரைக்கு போய்விடுகிறான்.

பிறகு என்ன ஆனது என்பதை ட்விஸ்டுடன் முடித்திருக்கிறார்கள்.

*****

மனித மூளையின் திறனை மனிதன் தன் வாழ்நாலில் முழுமையாக பயன்படுத்துவதில்லை. விஞ்ஞானிகள், அறிவாளிகள் கூட அதிகப்பட்சம் பத்து சதவிகிதத்தைத் தான் தொட்டிருக்கிறார்கள் என்கிறார்கள். இந்தப் படம் பார்த்த பொழுது, Lucy படம் நினைவுக்கும் வந்து போனது.

அப்படி மூளையின் நரம்புகளைத் தூண்டினால், என்ன நடக்கும் என்ற சுவாரசியமான கற்பனை தான் இந்தப் படம். படம் ஆஹா ஓஹோ என இல்லாவிட்டாலும், கடைசி வரை பார்க்க வைத்திருக்கிறார்கள். மாத்திரை எடுத்துக்கொள்ளாத பொழுது அவன் நிலையையும், எடுத்த பிறகு இருக்கும் நிலையையும் ஒளிப்பதிவில் நன்றாக வித்தியாசம் காட்டியிருக்கிறார்கள்.

நெய்ல் பர்கர் இயக்கியிருக்கிறார். இவர் இயக்கியதில் 2006ல் வெளிவந்த illusionist ஒரு மேஜிக் மேன் பற்றிய படம். அருமையாக இருக்கும். வாய்ப்பிருந்தால் பாருங்கள்.

Bradley Charles Cooper தான் மொத்தப் படத்தையும் தாங்கியிருக்கிறார். இரண்டு நிலைகளுக்கும் நன்றாக வித்தியாசம் காட்டியிருக்கிறார். மற்றவர்களும் சிறப்பு. இப்போதைக்கு எந்த ஓடிடியிலும் இல்லை என இணையம் சொல்கிறது. வேறு வழிகளில் தேடிப்பாருங்கள்.

Kohrra (2023) பஞ்சாபி

நாளைக்கு கல்யாணம். முதல்நாள் மாப்பிள்ளை மர்மமான முறையில் கொலை செய்யப்படுகிறார். அவருடன் இருந்த பிரிட்டிஷ் குடிமகனான நண்பனும் காணாமல் போகிறார்.

செத்துப் போன மாப்பிள்ளை பெரிய இடத்து ஆள். இன்னொருவர் பிரிட்டிஷ் குடிமகன் இரண்டு பேரும் செல்வாக்கு உள்ள ஆள் என்பதால், மேலிடத்தில் இருந்து அழுத்தம் பெரிதாக இருக்கிறது.

இந்த வழக்கை விசாரிக்கிற இரண்டு அதிகாரிகளும் மெல்ல மெல்ல துப்பு துலக்க ஆரம்பிக்கிறார்கள். பங்காளி குடும்பத்தில் சொத்துப் பிரச்சனை, செத்துப் போன, காணாமல் போன இருவருக்கும் போதைப் பழக்கம் இருக்கிறது. கல்யாணம் செய்யப்போகிற பெண்ணை “உயிருக்கு உயிராக” காதலித்த காதலன் என ஒவ்வொன்றாக விசாரிக்க துவங்குகிறார்கள்.

இறுதியில் கொலையாளியைக் கண்டுப்பிடித்தார்களா , கொலை எதற்காக நடந்தது என்பதை சொல்லியிருக்கிறார்கள்.

***

ஒரு சீரிஸ். 6 அத்தியயாங்கள். ஒவ்வொரு அத்தியாயமும் சராசரியாக 45 நிமிடங்கள்.

பெரிய இடம் . உள்ளேயே பஞ்சாயத்து. ஆனால் அவர்களை விசாரிக்க முடியவில்லை. ஆளை தூக்கிக்கொண்டு ஸ்டேசனுக்கு வந்தால், உடனே மேலிடத்தில் இருந்து ”உடனே ஆளை விடுவி!” என அழுத்தம் கொடுக்கிறார்கள். ஒரு வசதியில்லாத பையன் இடையில் சிக்கினால், அவனே கொன்னான்னு வழக்கை முடி! ஏன் இழுக்கிற! என கையை முறுக்கி எழுத வைக்கிறார்கள். இரண்டு மூன்று இடத்தில் அந்த விசாரணை அதிகாரி வாய்விட்டே புலம்புகிறார்.

பஞ்சாபில் மாணவர்கள், இளைஞர்களிடையே போதைப் பழக்கம் கடந்த சில ஆண்டுகளாக நீடித்து வருவதையும், ஆங்காங்கே தொட்டுச் சென்றிருக்கிறார்கள். போலீஸ் எப்படி வன்முறையை கையாள்கிறது என்பதையும் நன்றாக பதிந்திருக்கிறார்கள். அதிகாரம், செல்வாக்கு எப்படி எல்லா இடத்திலும் வேலை செய்கிறது என்பதையும் நன்றாக பதிந்திருக்கிறார்கள்.

கதையின் பிரதானமான ஒன்றாய் ”காதல்” தான் இருக்கிறது. எல்லா கிளைக்கதையிலும் காதல் இழையோடி இருக்கிறது. காதல், அதில் உள்ள முரண்கள், உறவுச் சிக்கல்கள் என மொத்த தொடரிலும் காதல் தான் பின்னி பிணைந்திருக்கிறது. இதை விவரித்துச் சொன்னால் ஸ்பாயிலராகிவிடும். ஆகையால் இத்துடன் நிறுத்திக்கொள்கிறேன்.

எல்லா பாத்திரங்களும் கொடுத்ததை சரியாக செய்திருக்கிறார்கள். பார்க்கலாம். நெட்பிளிக்சில் நல்ல தமிழ் டப்பிங்கில் கிடைக்கிறது. பாருங்கள்.