I Am a Cat - புத்தக அறிமுகம்

 I Am a Cat  என்பது Natsume Sōseki எழுதிய மிகப் புகழ்பெற்ற நாவல்களில் ஒன்று. 

இது 1905–1906 காலகட்டத்தில் தொடர்கதையாக வெளியாகி, பின்னர் நூலாக வெளிவந்தது. இந்தப் படைப்பே சோசேகியை ஜப்பானின் தலைசிறந்த நாவலாசிரியர்களில் ஒருவராக உயர்த்தியது.

நாவலின் தனிச்சிறப்பு

இந்தக் கதையைச் சொல்வது ஒரு பெயரற்ற வீட்டுப் பூனை. அது தன்னைப் பற்றி முதல் வரியிலேயே இவ்வாறு அறிமுகப்படுத்துகிறது:

> "நான் ஒரு பூனை. இன்னும் எனக்குப் பெயரே இல்லை."

இந்த ஒரு வரியே உலக இலக்கியத்தின் மிகவும் புகழ்பெற்ற தொடக்க வரிகளில் ஒன்றாகக் கருதப்படுகிறது.

கதை என்ன?"

ஒரு பள்ளி ஆசிரியரின் வீட்டில் வசிக்கும் பூனை, அங்கு வரும் மனிதர்களையும், அவர்களது பேச்சுகளையும், பழக்கவழக்கங்களையும் அமைதியாகக் கவனிக்கிறது.

அதன் பார்வையில்:

மனிதர்களின் தற்பெருமை

அறிவுஜீவிகளின் ஆணவம்

சமூகத்தின் போலித்தனம்

மேற்கத்திய நாகரிகத்தை கண்மூடித்தனமாகப் பின்பற்றும் மனப்போக்கு

மனிதர்களின் முரண்பாடுகள்

= ஆகியவை நகைச்சுவையுடனும் கூர்மையான விமர்சனத்துடனும் சித்தரிக்கப்படுகின்றன.

ஏன் பூனை?

சோசேகி மனிதனின் குறைகளை நேரடியாகச் சொல்லவில்லை. அதற்குப் பதிலாக, எந்தப் பக்கச்சார்பும் இல்லாத ஒரு பூனையின் கண்களைத் தேர்ந்தெடுத்தார்.

பூனை:

யாரையும் மகிழ்விக்க முயல்வதில்லை.

எதையும் மறைக்காமல் கவனிக்கிறது.

மனிதர்களின் செயல்களில் உள்ள முரண்பாடுகளை எளிதில் கண்டுபிடிக்கிறது.

இதனால் வாசகர்கள் சிரித்துக்கொண்டே தங்களைப் பற்றிச் சிந்திக்கத் தொடங்குகிறார்கள்.

நாவலின் மையக் கருத்து

இந்த நாவல் பூனையைப் பற்றியதல்ல; மனிதர்களைப் பற்றியது.

ஒரு பூனையின் பார்வையில் மனித சமுதாயத்தைப் பார்த்தால், நாம் இயல்பாகக் கருதும் பல விஷயங்கள் எவ்வளவு விசித்திரமாக இருக்கின்றன என்பதை இந்த நூல் உணர்த்துகிறது.

உலக இலக்கியத்தில் இடம்

இந்த நாவல்:  ஜப்பானிய நவீன இலக்கியத்தின் அடித்தளப் படைப்புகளில் ஒன்றாகக் கருதப்படுகிறது.

பல மொழிகளில் மொழிபெயர்க்கப்பட்டுள்ளது. இன்று வரை பல பல்கலைக்கழகங்களில் இலக்கியப் பாடமாகப் படிக்கப்படுகிறது.

இறுதியாக...

I Am a Cat என்பது பூனையை மையமாகக் கொண்ட நகைச்சுவை நாவல் மட்டுமல்ல. மனிதர்கள் தங்களைப் பற்றி சிந்திக்கச் செய்யும் நையாண்டி நிறைந்த தத்துவப் படைப்பு. ஒரு சிறிய பூனையின் அமைதியான பார்வையின் மூலம், மனித சமுதாயத்தின் பெரும் முரண்பாடுகளை வெளிச்சம் போட்டு காட்டும் அபூர்வமான இலக்கியமாக இது இன்றும் வாசகர்களை ஈர்த்துக்கொண்டே இருக்கிறது.

- இரா. முனியசாமி

“கற்பது உலகளவு” - கல்வியாளர் தா. நெடுஞ்செழியன்

 

“கற்பது உலகளவு”

— கல்வியாளர் தா. நெடுஞ்செழியன்

 

கல்வி குறித்து நாம் அடிக்கடி பேசுகிறோம். ஆனால் கல்வியை மதிப்பெண்கள், பட்டங்கள், வேலைவாய்ப்புகள் என்ற எல்லைக்குள் மட்டுமே பார்க்காமல், ஒரு மனிதரின் சிந்தனையையும் வாழ்க்கைப் பார்வையையும் வடிவமைக்கும் சக்தியாகப் பார்க்கச் சொல்லும் நூல்கள் அரிது.

 

அப்படிப்பட்ட நூல்களில் ஒன்றாக கல்வியாளர் தா. நெடுஞ்செழியன் விகடனில் தொடர்ந்து தொடராக எழுதிய* கற்பது உலகளவு*  அமைந்துள்ளது.

 

உயர்கல்வி, தொழில் வழிகாட்டல், எதிர்காலக் கல்வி வாய்ப்புகள் ஆகிய துறைகளில் நீண்டகாலமாக மாணவர்கள் மற்றும் பெற்றோருக்கு வழிகாட்டி வரும் தா. நெடுஞ்செழியன், கல்வியை ஒரு தேர்வு முடிவாக அல்ல, வாழ்நாள் பயணமாக அணுக வேண்டும் என்ற கருத்தை தொடர்ந்து வலியுறுத்தி வருகிறார். அந்த அனுபவங்களின் சுருக்கமாகவே இந்த நூலைப் பார்க்கலாம்.

 

இந்நூல், எந்தப் படிப்பைத் தேர்வு செய்வது என்ற கேள்விக்கு மட்டும் பதில் தேடுவதில்லை. ஒரு மாணவர் தனது திறமையை எப்படி அறிந்துகொள்வது, மாறிவரும் உலகில் கல்வியின் பங்கு என்ன, எதிர்கால வாய்ப்புகளை எப்படி அணுகுவது, கற்றலை எவ்வாறு தொடர்ச்சியான பழக்கமாக மாற்றுவது போன்ற பல முக்கியமான சிந்தனைகளை முன்வைக்கிறது.

 

இன்று தகவல்களுக்குக் குறைவில்லை. இணையத்தில் சில நிமிடங்களில் ஆயிரக்கணக்கான தகவல்களைப் பெற முடிகிறது. ஆனால் எந்தத் தகவல் நமக்குப் பொருத்தமானது, எந்தப் பாதை நமக்குச் சரியானது என்பதைத் தீர்மானிக்கத் தேவையான பார்வையே முக்கியம். அந்தப் பார்வையை உருவாக்க முயலும் நூலாக கற்பது உலகளவு திகழ்கிறது.

 

இந்த நூலை மாணவர்கள் மட்டும் அல்லாமல், பெற்றோர், ஆசிரியர்கள், கல்வித் துறையில் ஆர்வமுள்ளவர்கள், இளம் தலைமுறையின் எதிர்காலம் குறித்து அக்கறை கொண்ட அனைவரும் வாசிக்கலாம்.

 

கல்வி என்பது வாழ்க்கைக்கான தயாரிப்பு அல்ல.
கல்வியே வாழ்க்கையின் ஒரு பகுதியாக மாறும் போது, கற்றலுக்கு எல்லைகள் இருப்பதில்லை.

 

கற்பது உலகளவு என்ற தலைப்பைப் போலவே, கற்றலின் எல்லைகளை விரிவுபடுத்தவும், கல்வியை புதிய கோணத்தில் சிந்திக்கவும் அழைக்கும் ஒரு பயனுள்ள நூலாக இது அறிமுகமாகிறது.

 

-          இரா. முனியசாமி

 

வெளியீடு : விகடன் பிரசுரம்

விலை : ரூ. 400

 

*பின்குறிப்பு*: தேர்வு முடிவுகள் வெளிவந்துவிட்டன.  கல்லூரி படிக்கிற மாணவர்களுக்கும், மேற்கொண்டு என்ன படிக்கலாம் என்பதற்கான வழிகாட்டி நூல். அவசியம் வாசிக்கவேண்டும்.  தேவையானவர்களுக்கு பரிந்துரை செய்யுங்கள்.

ஆப்பிரிக்க இலக்கியத்தின் ஜாம்பவான் நுகி வா தியாங்கோ காலமானார்!

”எதிர்ப்பு தான்

உயிருடன் இறப்பதற்கு சிறந்த வழி”

   -  நுகி வா தியாங்கோ

 

25 ஆண்டுகளுக்கு முன்பு ஒரு நாவல் படித்தது இன்னும் நினைவின் இடுக்குகளில் தங்கியிருக்கிறது. அந்த நாவலின் பெயர் “சிலுவையின் தொங்கும் சாத்தான்”.  

 

ஏகாதிபத்தியங்கள் கென்யாவில் தங்களுக்கு ”சிறந்த” சேவை வழங்கும் பிரதிநிதிகளை தேர்ந்தெடுக்க வருகிறார்கள். அவர்களுக்கு முன்னால்   கென்யாவின் மக்களை எப்படியெல்லாம் திறமையாக ஏமாற்றினோம் என்பதை ஒவ்வொருவராக வந்து தங்களின் கடந்த கால செயல்பாடுகளை விளக்கி நான் தான் ”சிறந்த சேவகன்” என வாதாடுவார்கள்.

 

கடைசியில் மக்கள் எழுச்சிக்கொண்டு எல்லோரையும் துரத்தி அடிப்பது போல முடியும்.   சில நாவல்கள் தான் காலம் கடந்தும் நினைவில் தங்கும்.  அப்ப்டி இந்த நாவல் என் நினைவின் இடுக்குகளில் தங்கிவிட்டது.

 

கென்யாவிற்கு எழுதப்பட்ட இந்த நாவல், அதன் வடிவத்தை எடுத்துக்கொண்டு அப்படியே இந்தியாவிற்கு பொருத்தமுடியும். 1990களில் எளிமையான வடிவத்தில் சிறு சிறு நாடகங்களாக நண்பர்களோடு இணைந்து மேடையேற்றிக்கொண்டிருந்தோம்.   அதன் வரிசையில் இந்த நாடகத்தையும் நிறைவேற்ற முயன்றோம். ஆனால் இயலாது போனது.

”கார்டியன்” இதழில்  அவர் இறந்த செய்தி நேற்று வெளியாகியிருக்கிறது. 1995ல் புற்று நோய் தாக்கி, 2019ல் இதய அறுவை சிகிச்சை செய்துள்ளார். 87 87 வயதாகிறது. நேற்று அவர் இறந்ததாக அவருடைய மகள் அறிவித்துள்ளார்.

1938ல் கென்யாவில் பிறந்துள்ளார். அவருடைய அப்பாவிற்கு நான்கு மனைவிகள். 28 குழந்தைகளில் ஒருவர் இவர். ”கிகி”யூ தான் தாய்மொழி. ஒரு பல்கலை கழகத்தில்  ஆங்கில துறையில் விரிவுரையாளராக பணிபுரிந்திருக்கிறார்.  சிறுகதைகள், நாடகம், நாவல் என பல எழுதியுள்ளார்.   ஒரு நாடகத்தில் இணை ஆசிரியராக பணியாற்றியதற்காக, சிறையில் தள்ளப்பட்டுள்ளார்.

 

ஓராண்டு காலம் தடுப்புக் காவல் சிறையில் இருந்த பொழுது தான் மலம் துடைக்கும் தாளில் ”சிலுவையில் தொங்கும் சாத்தான்” நாவலை எழுதியுள்ளார்.

 

1978ல் சிறையில் இருந்து விடுவிக்கப்பட்டு, 1982ல் நாடு கடத்தப்பட்டுள்ளார்.  இங்கிலாந்துக்கு சென்றவர் பிறகு அமெரிக்காவிற்கு இடம் பெயர்கிறார். அரசியல், பொருளாதார, பண்பாட்டு விடுதலைக்காக தொடர்ந்து சிந்தித்தவர். எழுதியவர், செயல்பட்டவர்.

 

அவருடைய பிற நாவல்கள் அழாதே குழந்தாய் (Weep not child), இடைப்பட்ட ஆறு (The river between), கோதுமை தானியமணி (Grain of Wheat), இரத்த இதழ்கள் (Petals of Blood).

 

உலக நாடுகளை தன் அரசியல், பொருளாதார, பண்பாட்டு நடவடிக்கைகளால் ஆக்கிரமிப்பு செய்யும் ஏகாதிபத்திய நாடுகளை எதிர்த்து நிற்கும் மக்கள் போராட்டங்களில் நிச்சயம் இவருடைய படைப்புகள் முக்கிய ஆயுதம்.

 

அவருக்கு நமது அஞ்சலி!

 

#Ngugi wa thiongo (1938 – 2025)

 

”சிலுவையில் தொங்கும் சாத்தன்” நாவலை அமரந்த்தா – சிங்கராயர் தமிழில் அருமையாக மாற்றம் செய்துள்ளார்கள். பக்கங்கள் 432. 

 

”ஜி.எஸ்.டி. (GST) குறித்து அதிகம் தெரிந்துகொள்ளுங்கள்!” - என்னுடைய உரை

”ஜி.எஸ்.டி. (GST) குறித்து அதிகம் தெரிந்துகொள்ளுங்கள்!” 

தொகுப்பாசிரியர் - செ. செந்தமிழ்ச்செல்வன்

புத்தக வெளியீட்டு விழா!

 

கடந்த சனிக்கிழமையன்று (11/01/2025) மாலையில் புத்தக அறிமுக விழா சென்னை இந்துஸ்தான் சேம்பரில் திரளான மக்களுடன் நிகழ்வு நடந்தேறியது.

 

15 நிமிட என்னுடைய உரையின் சுருக்கம்…!

 

“200 பக்கங்களில் பிழைத்திருத்தம் செய்தேன் என்பதற்காக கோவை பெருமாள் சாரோடு என்னையும் விமர்சன உரை என்ற பெயரில் அழைப்பிதழில் இணைத்திருக்கிறார்கள்.  உறுப்பினர்கள் சார்பாக வாழ்த்த வந்திருக்கிறேன் என சொல்லலாம்.

 

ஒரு புத்தகம் உருவாக்குவத்தில் பல படி நிலைகள் இருக்கின்றன. ஜி.எஸ்.டி சட்ட அறிவு, ஆங்கில அறிவு, தமிழ் அறிவு, பல ஆண்டுகளின் நடைமுறை அனுபவம், புத்தகத்தை கொண்டு வருவதற்கான பொருளாதாரம்,  வளர்ந்து வரும் ஆலோசகர்கள் மீதான அக்கறை, வணிகர்களுக்கும் சட்டம் புரிய வேண்டும் என்ற அடிப்படையில் தான் எளிமையான கேள்வி பதில் வடிவத்தில் தந்திருக்கிறார்.  இன்னும் முக்கியமானது இன்றைய தேதி வரைக்கும் அப்டேட் செய்திருக்கிறார். பதிப்பகத்தார் தட்டச்சு செய்து தரும் பிரதிகளை பல பகல் இரவுகள் தனது துணைவியாரின் உதவியுடன் பிழைத்திருத்தங்கள் பார்த்திருக்கிறார்.

 

இத்தனை உழைப்புக்கு பிறகு புத்தகங்களை விற்கும் சிரமத்தையும் அவருக்கு தந்துவிடக்கூடாது. நமது உறுப்பினர்களும், சக வரி ஆலோசகர்களும் முயற்சிகள் செய்தால், எளிதாய் உரியவர்களுக்கு கொண்டு சேர்த்துவிடலாம். 

 

இதெல்லாம் மத்திய, மாநில அரசுகள்  செந்தமிழ்ச்செல்வன் போன்ற மூத்த வரி ஆலோசகர்களிடம்  சில லட்சங்களை கொடுத்து இந்த வேலையை செய்து வணிகர்களிடம் கொண்டு சேர்திருக்கவேண்டும்.  அரசுகள் செய்யவேண்டியதை தனிநபராக தனது சக வரி ஆலோசகர்களின் துணையுடன் கொண்டு வருகிறார் என்பது தான் முக்கியமானது.” என பேசினேன்.

 

நிகழ்வு சிறப்பாக நடைபெற்றது.  

நன்றி

 

புத்தகங்கள் தேவைப்படுவர்கள் : தொடர்புகொள்ளுங்கள் 9551291721

 

விண்ணளந்த சிறகு - சு. தியடோர் பாஸ்கரன் இயற்கை சார்ந்த கட்டுரைகள்

திரை விமர்சகர், சுற்றுச்சூழல் ஆர்வலர் என தியடோர் பாஸ்கரன் பற்றி வெவ்வேறு இடங்களில் படித்து கேள்விப்பட்டிருக்கிறேன். ஆனால் அவருடைய புத்தகம் எதுவும் வாசித்ததில்லை. அந்த ஆர்வத்தில், கடந்த புத்தக திருவிழாவில், இந்தப் புத்தகம் கண்ணில்பட்டது. வாங்கினேன்.

அவர் தமிழ் இந்துவின் இணைப்பு இதழில் தொடர்ந்து எழுதிய கட்டுரைகளைப் புள்ளினங்கள், பாலூட்டிகள், தாவரங்கள், ஆளுமைகள், கருத்தாக்கங்கள் என தலைப்புகொடுத்து 35 கட்டுரைகளை தொகுத்து வெளியிட்டிருக்கிறார்கள்.

ஒரு பறவைப் பார்வையில் தமிழ்நாட்டில் (குறிஞ்சி மலர்) துவங்கி, குஜராத்தில் (காங்க்ரேஜ் மாடுகளைப் பற்றி) தொட்டுப்பேசி, இந்தியா முழுவதும் சுற்றி, பிறகு பரவலாக உலகமும் சுற்றி (ஆடுகளை லாவகமாக மேய்க்கும் ஆஸ்திரேலியா நாய்) வந்துவிடுகிறார்.

ஒவ்வொரு கட்டுரையிலும் நிறைய அடர்த்தியான செய்திகள் இருக்கின்றன. நகர்ப்புறத்தில் பிறந்து வளர்ந்ததினால், எல்லோருக்கும் தெரிந்த தாவரங்கள், விலங்கினங்கள் தான் நாம் அறிந்தவை. ஆசிரியர் ஒவ்வொரு தாவரத்தையும், விலங்கினத்தையும், பறவைகளையும் நம்மை உற்றுப் பார்க்க வைக்கிறார். கற்றுக்கொள்ள தூண்டுகிறார்.

எப்பொழுதும் சுதந்திரத்தின் மீது கவனமாய் இருப்பதால், பறவைகளை கூண்டில் பார்க்கும் பொழுது எரிச்சல் வரும். இதில் காதல் பறவைகள் என்று வேறு பாசம் காட்டுவார்கள். பறவைகள் பறந்தால் தான் அழகு. ஆசிரியர் ஒன்றை சுட்டிக்காட்டுகிறார்.

”சந்தைக்கு வரும் ஒவ்வொரு பறவைக்குப் பின்னாலும், ஒன்பது பறவைகளாவது உயிரிழந்திருக்கும். அதாவது பத்தில் ஒன்று தான் பிழைக்கிறது. மரங்களின் ஆழமான பொந்துகளில் அடைகாத்து குஞ்சு பொரிக்கும் பறவைகளைப் பிடிக்க மரத்தையே திருட்டுத்தனமாக வெட்டிவிடுகிறார்கள்”.

ஓரிடத்தில் “யாரொருவர் பறவைகளை கவனிக்க ஆரம்பிக்கிறாரோ, அவருக்கு புற உலகைப் பற்றிய ஒரு விழிப்பு ஏற்படும். அத்தகைய பிரக்ஞை இயற்கை சார்ந்த பல தளங்களுக்கு அவரை இட்டுச் செல்லும்”என்கிறார்.

கணக்கு வழக்கு இல்லாமல் காடுகளை அழிப்பதும், அதன் மூலம் பல உயிரினங்கள் மெல்ல மெல்ல அழிந்து வருவதையும் இந்தக் கட்டுரைகளின் மூலம் அழுத்தமாக பதிவு செய்திருக்கிறார். அதற்காக கவனப்படுத்தும், போராடும் மனிதர்களையும் அறிமுகப்படுத்துகிறார். இயற்கை எல்லோருக்குமானதால், எல்லோருக்கும் இந்த அக்கறை அவசியம். இந்த அக்கறை இல்லையென்றால், இயற்கையின் ஒரு பகுதி தானே மனிதன். அவன் மட்டும் ஆரோக்கியமாக வாழ்ந்துவிட முடியுமா என்ன?

ஆசிரியருக்கு நல்ல தமிழ் புலமை இருப்பதால், அவர் எழுதுவதைப் படிக்கையில் அத்தனை ஆசை ஆசையாய் இருக்கிறது. அடுத்தடுத்து அவர் எழுதிய புத்தகங்களை படிக்கவேண்டும் என ஆவல் வருகிறது. ஆங்கிலத்தில் நல்ல புத்தகங்களை மோசமாக மொழிப்பெயர்த்து கொன்றுவிட்டார்கள் என வருத்தப்படுகிறார். ஒரு நல்லப் புத்தகத்தைப் பார்த்ததும், இது அவர்களிடம் சிக்காமல் இருக்கவேண்டுமே என உண்மையிலேயே கவலைப்படுகிறார்.

வாங்கிப் படிக்க பரிந்துரைக்கிறேன்.

வெளியிடு : தமிழ் திசை

பக்கங்கள் : 122

விலை : ரூ. 150

சுளுந்தீ நாவல்

எளிய மக்களோடு கலந்த பண்டுவம் படித்த நாவிதன் ஒருவனது வாழ்வைப் பதிவாக்கியிருக்கும் முத்துநாகுவின் முதல் நாவல் ‘சுளுந்தீ’ என்கிறார்கள்.

ஒரு பேரரசு மறையும் நேரத்தில் நாட்டில் நிலவும் நிறைய குழப்பங்கள், ஆட்சியதிகாரப் போட்டிகள் எப்படி இருக்கும் என்கிற கேள்விக்கு பதிலாய் ‘சுளுந்தீ’ 18 ம் நூற்றாண்டின் பின்னணியில் விஜயநகரப் பேரரசு வீழ்ச்சியடைய, வடுக மக்களின் தமிழக குடியேற்றம், நாயக்கர்களின் ஆட்சியின் கீழ் ‘கன்னிவாடி’ எனும் பாளையத்தின் மையம், பாண்டியத் தலைநகரின் மாற்றத்தின் பின்னணி, எதிர்க் கேள்விக் கேட்டவர்கள் ‘குலநீக்கம்’ செய்யப்பட்டு, அடிப்படை உரிமைகள் மறுக்கப்பட்டு வனங்களில், மலைகளில் சொந்த நாட்டிலேயே அகதிகளைப் போல வாழும் அவலம் என்கிற பின்புலத்தோடு எழுதப்பட்ட ‘சுளுந்தீ’ , நூலுக்காக மிக அதிகமாக உழைத்திருப்பதை நாவலில் சொல்லப்பட்டிருக்கும் வரலாறும், நுட்பமாய் சொல்லப்பட்டிருக்கும் பல அம்சங்களும் அதை நிரூபிக்கின்றன.

பொதுவான தமிழிலேயே படித்துவிட்டு, வட்டார வழக்கு என படிக்கும் பொழுது நான் மிகவும் சிரமப்படுவேன். முதன் முதலில் கோபால்ல கிராமத்தில் அதை உணர்ந்தேன். பிறகு ஜெயமோகனின் ஒரு நாவலை படிக்கும் பொழுது ஒரு சோர்வு ஏற்பட்டது. முத்துநாகு அரண்மனையை வியந்து பார்க்கும் பார்வையாக இல்லாமல், எளிய மக்களின் வாழ்க்கையை சொல்வதாக எழுதியிருப்பது வட்டார வழக்காக இருந்தாலும் எந்தவித தொந்தரவும் செய்யவில்லை.

நாவலில் சித்தர் ஒருவர் வருகிறார். அவருக்கு உதவும் பாத்திரத்தில் ராமன் வருகிறார். பல இடங்களில் நோய்களுக்கு நிறைய மருத்துவ குறிப்புகள் எழுதியுள்ளார். ஏன் இவ்வளவு விவரிக்கிறார் என தோன்றிக்கொண்டேயிருந்தது. அவர் போகிற போக்கில் அதை கவனமாக எழுதியிருக்கிறார் என்பதை புரிந்துகொள்ள முடிகிறது.

நாவலில் குலநீக்கம் செய்யப்பட்டவர்களின் வாழ்க்கை கடுமையாக இருக்கிறது. அதற்கான பரிகாரம் அதைவிட பயங்கரமாக இருக்கிறது. இப்படி குலநீக்கம் செய்யப்பட்டவர்கள் எல்லாம் ஒன்றாய் இணைந்து தங்களுக்கு தேவையானதை உழவு செய்வது, அதற்கு தேவையான கிணறு தோண்டுவது, அதற்காக வெடிமருந்தை அரண்மனையில் இருந்து எடுத்து பயன்படுத்தியது தெரிந்ததும் பதறிப்போகிறது. இனி இப்படி ஒரு சம்பவம் நடந்து விடக்கூடாது என்பதில் அடுத்தடுத்த உத்தரவுகள் பறக்கின்றன.

நாவலின் ஓரிடத்தில் பஞ்சம் வருகிறது. அதில் வரும் செய்திகள் எல்லாம் நம்மை உலுக்குகின்றன. புளியங்கொட்டைகளை அரைத்து குடித்து காலத்தை கடத்தியிருக்கிறார்கள். அரண்மனை காவல் படை வசூல் என்ற பெயரில் மக்களை கொள்ளையடித்திருக்கிறார்கள்.

பாதிரியார், அவர் சார்ந்த மதம் வருகிறது. அவருக்கு வேலை அரண்மனையை எதிர்த்து குல நீக்கம் செய்யப்பட்டவர்கள் அதிகாரத்தை எதிர்த்து போரிட்டு விடக்கூடாது என்ற இலக்கில், அவர்களை ஏசுவின் பெயரால் சாந்தப்படுத்தும் வேலையை பக்காவாக செய்கிறார்.

வண்ணான் தொழில் குறிப்புகளும் நாவலில் வந்து போகின்றன. வெள்ளாவி வைக்கும் பொழுது, துணியை அடுதடுத்து அடுக்கும் பொழுதே, சமூகத்தின் வர்க்க அடுக்களையும் புரிந்துகொள்ள முடிகிறது. அதில் மேலே உள்ள துணி யாருடையது என்றால்… பார்ப்பனர்களின் துணி. கீழே உள்ளவர்களின் துணி கடுமையாக உழைக்கும் “சூத்திர” மக்களின் துணி.

நாவலாசிரியரிடம் கேள்விகள் கேட்டு, பதில்களையும் அன்பாதவன் பெற்றிருக்கிறார். அதில் சில சுவாரசியமான கேள்விகளும், பதில்களும்.

சுளுந்தீ புதினத்தின் களம் வரலாறும் புனைவும் கலந்தது..எனில் வரலாற்றுக் காலம் எது?

நாயக்க மன்னர் சொக்கநாத நாயக்கரின் காலமான 1650 முதல் 1680 வரை

இந்த நாவலை எழுத எத்தனை ஊருக்கு அலைந்தீர்கள்..எவ்வளவு காலம் ஆயிற்று?

தமிழகம், கருநாடகம், கேரளம், பகுதிகளுக்கு சென்று வந்தேன். காலம் நான் குறிப்பிட்டால் மிகையாக இருக்கும் என்பதால் பதிலை தவிர்க்கிறேன்.

திண்டுக்கல் தோல் பட்டறைகள் இந்நாவல் நிகழும் காலத்தில் பயன்பாட்டுக்கு வந்துவிட்டனவா?

ஆம். நாயக்கர் ஆட்சியின் துவக்க காலமான திருமலை நாயக்கர் காலத்திலே தோல் பதனிடும் பட்டறைகள் வந்து விட்டது. மன்னர் சொக்கநாதநாயக்கர் ஆட்சியிலே அது பெருக்கம் கண்டது.

பன்றிமலைச் சித்தர் தங்கியிருந்த குகைதான் கொடைக்கானல் குணா குகையா?

இல்லை. சித்தர் பொடவு என்ற சிறுகுகை பன்றிமலையில் உள்ளது. நீங்கள் குறிப்பிடும் பகுதியில் பிரிட்டீஷார் ஆட்சியிலே மனித நடமாட்டம் ஏற்பட்டது.

இந்த நாவலில் அரசு அதிகாரம், படை, மக்களின் வாழ்க்கை, பண்பாடு என கற்றுக்கொள்வதற்கு நிறைய இருக்கின்றன. நாவலில் அம்சங்களை எடுத்துக்கொண்டு விவாதிப்பதற்கும் நிறைய இருக்கின்றன. இப்பொழுது தான் படித்து இருப்பதால், இது தொடர்பாக நிறைய படிக்க வேண்டியிருக்கிறது. அதற்கு பிறகு அசைப் போட்டு நாவல் குறித்த அறிமுகம் ஒன்றை விரிவாக எழுதுவது இன்னும் பொருத்தமாக இருக்கும் என கருதுகிறேன். மீண்டும் ஒருமுறை பிறகு எழுதுகிறேன்.

பக்கங்கள் : 480

விலை : ரூ. 450 (நான்காம் பதிப்பு)

வெளியீடு : ஆதி பதிப்பகம்.