I see you (2019) English

Crime Thriller film

ஊரில் அடுத்தடுத்து இரண்டு சிறுவர்கள் காணாமல் போகிறார்கள். அந்த போலீசு அதிகாரி விசாரணையை துவக்குகிறார். மக்களும் போலீசோடு அருகில் உள்ள காடுகளில் தேடத்துவங்குகிறார்கள். (இப்படி அமெரிக்க படங்களில் தொடர்ந்து பார்க்கிறேன். நல்ல அம்சம்)

அந்த போலீசு அதிகாரியின் மனைவி தன்னோடு படித்தவருடன் காதலில் விழுந்ததால், போலீஸ் செம கடுப்பாக இருக்கிறார். இந்த விசயத்தில் மகனுக்கும் அம்மா மீது கோபம். இவர்களுக்குள்ள கசப்பில் வீட்டில் சில மர்மமான சம்பவங்கள் நடக்கின்றன. அதை கவனிக்க தவறுகிறார்கள். ஒரு கொலையும் நடக்கிறது.

முதல் பாதியில் நடந்த மர்மங்களுக்கான விளக்கத்தை இரண்டாம் பாதியில் சொல்கிறார்கள். பிறகு என்ன நடந்தது என்பதை திரில்லராக சொல்லியிருக்கிறார்கள்.

***

Spoiler Alert

படம் பார்க்கவேண்டும் என நினைப்பவர்கள் இந்த இடத்தோடு விலகிவிடுங்கள்.

வீடு இல்லாத மக்களில் சிலர் அடுத்தவர் வீட்டுக்குள் அவர்களுக்கு தெரியாமல், அவர்கள் ஊருக்கு செல்லும் நாட்களில் உள்ளே நுழைந்து சில நாட்கள் வாழ்வது என்பது ஒரு வகையாக அதற்கு ஒரு பெயரிட்டு சொல்கிறார்கள்.

தெலுங்கில் ஷர்மி நடித்த ஒரு படம் ஒன்று இதே வகை மாதிரி படம் தான். அதில் எழும் சிக்கல்களை தான் படம் பேசும். இந்தப் படமும் அந்த வகையில் ஒரு படம் தான்.

சமீபத்தில் ஒரு துணுக்கு ஒன்றைப் படித்தேன். ஒரு குரங்கு தன் அப்போதைய தேவைக்கு மட்டும் பழங்களை பயன்படுத்தாமல், அடுத்த வேளைக்கு என எடுத்து வைத்தால், அதற்கு ஏதோ பிரச்சனை என ஆய்வு செய்வார்களாம். ஆனால் மனிதர்களில் சிலர் கணக்கிடலங்கா சொத்து சேர்த்தால், போர்ப்ஸ் பத்திரிக்கை தன்னுடைய இதழில் பெருமையாக வெளியிடும் என நகைச்சுவையாக கிண்டல் செய்திருந்தார்கள்.

ஒரு பக்கம் சிலருக்கு கணக்கில் அடங்கா பல தலைமுறைக்கு சொத்து. மனிதர்களில் சிலருக்கு இன்னும் வீடில்லாமல் இருப்பது என்பது மனித குல நாகரிகத்திற்கு கேடு தான். பணம் இருப்பவன் தரமாட்டான். பசித்தவன் விடமாட்டான் என்பது தான் நினைவுக்கு வருகிறது.

மற்றபடி படத்தை இரண்டாக பிரித்துக்கொண்டது நன்றாக வேலை செய்தது. அநியாயமாக அந்த பெண்ணை கொன்றது தான் வருத்தம்.

திரில்லர் ரசிகர்கள் பார்க்கலாம். பிரைமில் தமிழிலேயே கிடைக்கிறது.

Caddo Lake (2024) English

 

Time travel Thriller

நாயகன் தன் அம்மாவுடன் காரில் பயணம் செய்யும் பொழுது ஏற்பட்ட ஒரு விபத்தில் அம்மா இறந்துவிடுகிறார். அம்மாவின் சாவுக்கு தான் காரணமாகிவிட்டோம் என்ற குற்ற உணர்ச்சியில் வாழ்ந்துகொண்டிருக்கிறான். அவன் வாழும் பகுதியில் ஒரு அணை இருக்கிறது. அந்த அணையில் ஏற்படும் சிக்கல்களை சரி செய்யும் ஒரு வேலையில் இருக்கிறான். அவனுடைய காதலி அவனுக்கு ஆறுதல் சொல்லிக்கொண்டிருக்கிறாள்.

அந்த விபத்து ஏற்படும் பொழுது, அணையில் ஏதோ வித்தியாசம் இருப்பதை உணர்கிறான். தன் வேலையின் ஊடாக அந்த வித்தியாசம் என்ன என்பதை ஆராய முயல்கிறான்.

ஒரு இளம்பெண் தன் தாயுடன் அடிக்கடி சண்டையிட்டுக்கொண்டிருக்கிறாள். அந்த இளம்பெண்ணின் தந்தை சின்ன வயதிலேயே இறந்து போனதால், தாய் வேறு ஒருவரை திருமணம் செய்துகொள்கிறார். அந்த குடும்பத்தோடு இணைந்து வாழ்வதில் அவளுக்கு ஒரு ஒவ்வாமை இருக்கிறது. ஆனால், தனது தந்தைக்கு (Step Father) பிறந்த எட்டு வயது பெண் அவளுடன் நெருக்கமாக இருக்கிறாள். ஒரு நாள் சண்டையில் கிளம்பி வீட்டை விட்டு போகும் பொழுது, அவளின் தங்கையும் பின்னால் அவளைத் தேடி கிளம்புகிறாள். ஆனால் காணாமல் போகிறாள்.

இளம்பெண் தன் தங்கை காணாமல் போன விசயம் தெரிந்து வீட்டிற்கு வந்தவள், தங்கையை அணைப் பக்கம் உள்ள பகுதியில் அவள் தேடும் பொழுது, நாயகனைப் போலவே அவளும் ஏதோ வித்தியாசம் உணர்கிறாள்.

அணைப் பகுதியில் நீர் மட்டம் குறையும் பொழுது, காலத்தை முன்னும் பின்னும் கடக்க முடிகிறது. நாயகனும், அந்த இளம் பெண்ணும் அந்தப் பகுதியில் இருவரும் தங்களின் தேடலின் பொழுது இருவருமே அதை உணர்கிறார்கள். கடக்கிறார்கள்.

இந்த காலப் பயணம் செய்யும் பொழுது என்னென்ன மாற்றங்கள் நடந்தது என்பதை விறுவிறுப்பாகவும், உணர்வுப்பூர்வமாகவும் சொல்லியிருக்கிறார்கள்.

****

முன்பு கால பயணம் குறித்து வந்த அறிவியல் ரீதியாக வந்த படங்கள் இப்பொழுது உணர்வுப்பூர்வமான படங்களாக வரத்துவங்கியிருக்கின்றன. இந்த மாதிரி படங்கள் இனி தமிழுக்கும் வரத்துவங்கும். இப்பொழுதே அதற்கான அறிகுறிகளாக சில படங்கள் வரத்துவங்கியுள்ளன.

படத்தின் இருவருடைய தேடலும் கடைசி அரை மணி நேரத்தில் என்ன மாற்றங்கள் நடந்தது என்பதை விறுவிறுப்பாகவும் குழப்பம் இல்லாமலும் சொல்லியிருக்கிறார்கள். அந்த இளம்பெண் தன்னை குழப்பிய கேள்விகளுக்கு பதில் கிடைத்து தெளிவடைவாள்.

முன்பு Dark என பிரபல சீரிஸ் ஒன்று உண்டு. முன்னும், பின்னும் பயணப்பட்டு கொண்டே இருப்பார்கள். அதனடிப்படையில் அதில் ஒரு விசயத்தை எடுத்துக்கொண்டு இந்த கதையை வடிவமைத்திருக்கிறார்கள் என ஒரு பதிவர் குறிப்பிட்டிருந்தார். ஆமாம்ல என எனக்கும் நினைவுக்கு வந்தது.

பிரதான பாத்திரங்களான நாயகனும், அந்த இளம்பெண்ணும் தங்கள் பாத்திரங்களை சிறப்பாக செய்திருந்தார்கள். மற்றவர்களும் துணை நின்றிருக்கிறார்கள். இருவர் சேர்ந்து எழுதியும், இயக்கியிருக்கிறார்கள். நைட் சியாமளன் தயாரித்திருக்கிறார்.

இப்பொழுதெல்லாம் ட்ரோன் காட்சிகள் படத்தில் நிறைய இடம் பெறுகின்றன. படத்தின் பெயரில் உள்ள Caddo ஏரியை பறவை பார்வையில் பார்க்கும் பொழுது, நன்றாக இருக்கிறது. கூகுளில் தேடினால் பிரான்சில் இருப்பதாக சொல்கிறது. அமெரிக்காவில் இருப்பதாக இன்னொருவர் தெரிவிக்கிறார்.

இந்த மாதிரி படத்தை விரும்புபவர்கள் பாருங்கள். இப்போதைக்கு Apple TV யில் இருப்பதாக இணையம் சொல்கிறது. Jio cinema யில் இருப்பதாகவும் ஒரு நண்பர் தெரிவித்தார். ஆங்கிலத்தில் சப் டைட்டிலுடன் கிடைக்கிறது.

Bougainvillea (2024) – ஒரு காட்சி

 

psychological crime thriller film

மாலை 6.45 காட்சி. 6.42க்கு உள்ளே நுழையும் பொழுது அவ்வளவு பெரிய திரையரங்கில் நான் மட்டுமே இருந்தேன்.

ஒத்த ஆளுக்காக படமா! சென்னை ரோகிணி திரையரங்கு சூப்பர்டா! என ஆச்சர்யப்பட்டேன். இருந்தாலும், ஒத்த ஆளா இருப்பது கொஞ்சம் சம்சயமாக இருந்தது. கருப்பு பேண்ட், கருப்பு டீசர்ட்டுடன் இன்னொரு இளைஞரும் 6.45க்கு வந்தார்.

படம் துவங்கியது. அந்த இருட்டான நீளமான நெடுஞ்சாலையில், இந்தி பாடல் காரில் ஒலிக்க அந்த கார் போய்க்கொண்டிருந்தது. யாருடா என அந்த இரண்டு உருவம் என உற்றுப்பார்க்கும் பொழுது… அந்த விபத்து. கார் அப்படியே தலைகீழாக தூக்கி எறியப்பட்டது.

எல்லா விளக்குகளும் எரிந்தன. படம் தூக்கி எறிந்ததோடு படம் நிறுத்தப்பட்டது. அதே நேரத்தில் எனக்கு டிக்கெட் கிழித்து கொடுத்த அந்த இளைஞர் உள்ளே வந்தார். இரண்டு டிக்கெட்டுகள் தான் விற்றிருக்கின்றன. மூன்று டிக்கெட்டுகள் விற்றால் கூட படத்தை ஓட்டிவிடுவோம். கம்பெனிக்கு இரண்டு கட்டுப்படியாகாது. ஆகையால் காட்சியை ரத்து செய்கிறோம் என வருத்தம் தெரிவித்தார்கள். ஏஜி.எஸ். போன்ற திரையரங்குகள் பத்து அல்லது அதற்கு மேலே தீர்மானித்திருக்கிறார்கள். இந்த விசயத்தில் ரோகிணி பரவாயில்லை.

படம் சராசரியான படம் தான். ஓடிடியில் பார்த்துக்கொள்ளவேண்டியது தான்.

Level cross (2024) மலையாளம்

காலையில் ஒரு பயணிகள் ரயில் வண்டி. மாலையில் ஒரு சரக்கு ரயில் வண்டி என மிக மிக குறைவாக ரயில்கள் கடக்கும் ஒரு லெவல் கிராஸிங்கில் நாயகன் கேட் கீப்பராக வேலை செய்கிறார். அந்த லெவல் கிராசிங்கை கடக்கும் மற்ற வண்டிகளும் அபூர்வம். அவருக்கு குடும்பம் ஏதும் இல்லை. தனியனாக வாழ்ந்துகொண்டிருக்கிறார். அங்கு ஒரு கழுதை மட்டும் அவனுடன் இருக்கிறது.

ஒரு பயணிகள் ரயில் கடக்கும் பொழுது அதில் இருந்து யாரோ விழுவது போல தெரிகிறது. அருகில் சென்று பார்த்தால் ஒரு பெண் கீழே விழுந்து கிடக்கிறார். தூக்கி வந்து முதலுதவி செய்கிறான்.

முதலில் தவறி விழுந்துவிட்டதாக சொல்பவள், தன் கதையை விவரிக்கிறாள். அதில் கணவன் மோசமானவனாக இருக்கிறான். அவனிடமிருந்து தப்பிப்பதற்காக தானே குதித்தேன் என்கிறாள்.

நாயகனுடைய உடமைகளை அவள் எதைச்சையாகப் பார்க்கும் பொழுது, அவனுக்கு ஒரு மோசமான பின்கதை இருப்பது தெரிய வருகிறது.

மனைவியை தேடி வரும் கணவன் அவள் சொன்னதற்கு மாறாக வேறு ஒரு கதை சொல்கிறான். நாயகனுக்கு அவள் இங்கிருந்தால் தனக்கு துணையாக இருக்கும் என நினைக்கிறான்.

பிறகு என்ன நடந்தது என்பதை சொல்லியிருக்கிறார்கள்.

***

ஒரு மனிதனுக்கு/மனுசிக்கோ துணை என்பது உடலுக்கும், மனதுக்கும் அவசிய தேவையாய் இருக்கிறது. பரஸ்பரம் நாம் நமது துணையின் உணர்வுகளைப் புரிந்துகொண்டு, பரஸ்பரம் நமக்குள் வரும் வேறுபாடுகளை பேசி, புரியவைத்து கையாளவும் தெரியவில்லை அல்லது ஆணோ/பெண்ணோ சிக்கலாக இருக்கிறார்கள் என்பது தான் பெரிய ரோதணையாக இருக்கிறது.

துணையின் முரண்பாடுகள் குறித்து நிறைய கதைகள் வந்திருக்கின்றன. முரண்பாடுகள் இருக்கும் வரைக்கும் இன்னும் பல கதைகள் வரும். அதில் ஒரு கதை தான் இந்த கதையும். மூன்றே பாத்திரங்கள் தான். அவர்களுடைய மன உணர்வுகள் தான் கதை.

ஆள் அரவமற்ற அந்த லெவல் கிராசிங் என்ற கதை நடக்கும் இடம் புதுசு. நடைமுறையில் இப்படிப்பட்ட இடங்களுக்கு எல்லாம் ஒரு ஆளைப் போட்டு பராமரிக்கிற வசதியோ, மன நிலையோ இந்திய ரயில்வே நிர்வாகத்துக்கு நிச்சயம் இல்லை. இருந்தாலும் கதைக்காக ஏற்றுக்கொள்வோம். இந்த கதைக்காக துனிசியாவிற்கு போய் எடுத்ததாக ஒருவர் குறிப்பிட்டிருந்தார்.

அதே போல ஒரு ஆளுக்குப் பதிலாக இன்னொரு ஆள் பணி செய்வது எல்லாம் ரயில்வே நடமுறையில் சாத்தியமில்லை தானே! அதையும் கதைக்காக ஏற்போம்.

நாயகனாக ஆசிப் அலி, நாயகியாக அமலா பால், சர்புதீன் கணவராக வருகிறார்கள். மூவருமே பாத்திரம் உணர்ந்து நடித்திருக்கிறார்கள். அர்பஸ் அயூப் இயக்கியிருக்கிறார். விஷால் சந்திரசேகர் இசையமைத்திருக்கிறார். பிரைமில் தமிழில் மொழிமாற்றம் செய்யப்பட்டு கிடைக்கிறது. பாருங்கள்.

The mystery of Moksha Island (2024)

 

ஒரு கிறுக்கு மருத்துவர். மனித உடல்களை கொண்டு ஆராய்ச்சிகளை செய்து வருகிறார். சட்டவிரோத ஆராய்ச்சி என அந்த ஆளை உள்ளே தூக்கிப் போடுகிறார்கள். ஒரு பணக்காரன் இவனின் “திறமையை” புரிந்துகொண்டு வெளியே கொண்டு வருகிறான். மருமகனாகவும் ஆக்கிக்கொள்கிறார்.

ஏற்கனவே உள்ள “திறமை”, இப்பொழுது கிடைத்த பெரும் சொத்து இரண்டும் தன்னுடைய ஆராய்ச்சியை அரசின் தொந்தரவு இல்லாமல், ஒரு தீவில் தொடர்கிறார்.

திடீரென ஒருநாள் அந்த மருத்துவர் விமான விபத்தில் இறந்து போனதாக செய்தி சொல்கிறார்கள். அந்த ஆள் தான் போன இடத்தில் எல்லாம் புது புது குடும்பங்களை உருவாக்கி கொண்டே போயிருக்கிறார். எல்லோரையும் புதுத்தீவு வரும்படி, அழைப்பு வருகிறார்.

30க்கும் மேற்பட்ட ஆட்கள், 60 துவங்கி, இளம் வயதினர்கள் வரை அங்கு வந்து சேர்கிறார்கள். செத்துப்போன மருத்துவர், ஒரு உயில் வைத்திருப்பதாகவும், தங்கள் சொந்தங்கள் எல்லாம் ஒரு வாரம் அந்த தீவில் இருக்கவேண்டும். அதற்குப் பிறகு 24000 கோடி சொத்தை பிரித்து உரியவர்களிடம் ஒப்படைத்துவிடுவோம் என்கிறார்கள். கிடைக்க இருக்கிற பெரும் பணம் அவர்களை அங்கு இருக்க வைக்கிறது.

ஒரு சிலர் காணாமல் போகிறார்கள். சிலர் மர்மமான முறையில் கொல்லப்படுகிறார்கள். பிறகு என்ன நடந்தது என்பதை திரில்லராக சொல்ல முயன்றிருக்கிறார்கள்.

***

இந்த சீரிசின் கதை சுவாரசியமாக இருக்கிறது. ஆனால் எடுத்த விதத்தில் தான் செமையாக சொதப்பியிருக்கிறார்கள். வத வதவென ஏகப்பட்ட பாத்திரங்கள். யார் மீதும் அவர்களால் கவனம் கொடுக்க முடியவில்லை.

Hotstar பான் இந்தியா சீரிஸ் என முடிவு செய்துவிட்டதால், எல்லா மொழி நடிகர்களும் தனது மாநில கோட்டாவில் உள்ளே இருக்கிறார்கள். தன் இடத்தை நிருபீக்க மல்லுக்கட்டுகிறார்கள். நமக்கு தெரிந்த முகங்களாக எதிர்நீச்சல் பிரியா ஆனந்த், பிக்பாஸ் புகழ் பவானி, தெலுங்கு புகழ் பானுச்சந்தர் இருக்கிறார்கள்.

இதெல்லாம் ஏன் சொல்கிறேன். கொஞ்சம் உடல்நலம் சரியில்லாத பொழுது, இந்த சீரிசை பார்த்துவிட்டேன். நீங்களும் என்னைப் போல மொக்கை சீரிசில் மாட்டிக்கொள்ள கூடாது என்பதற்காக தான் சொல்கிறேன். தமிழில் மொழிமாற்றம் செய்தே கிடைக்கிறது.