பஞ்சாப் நேஷனல் வங்கி (PNB) - சைபர் பாதுகாப்பு விழிப்புணர்வுச் செய்தியின் முக்கிய அம்சங்கள்

 

இது வங்கியில் இருந்து ஆங்கிலத்தில் வந்தது. அதை தமிழில் தந்திருக்கிறேன்.

சமகாலத்தில் டிஜிட்டல் தொடர்பான குற்றங்கள், மோசடிகள் அதிகரித்து கொண்டே செல்கின்றன. அரசு டிஜிட்டல்மயத்தை வேக வேகமாக அமுல்படுத்திவருகின்றன. ஆனால் மக்கள் டிஜிட்டல்மயத்தை புரிந்துகொண்டார்களா, அதனை கற்றுக்கொண்டார்களா என்பது கேள்விக்குறி.

கொஞ்சம் கவனமில்லாமல் இருந்தால், வாழ்வில் சிறுக சிறுக சேமித்த அத்தனையையும், உட்கார்ந்த இடத்தில் இருந்தே சுருட்டுகிறார்கள்.  ஆகையால் வங்கி அறிவித்த அம்சங்களை கவனமாக படியுங்கள். உறவினர்களுக்கு தெரிவியுங்கள். நன்றி.

****

1. *தற்போதைய புதிய சைபர் மோசடி முறைகள்*

தொழில்நுட்பத்தின் வளர்ச்சிக்கேற்ப மோசடி செய்பவர்கள் புதிய முறைகளைப் பயன்படுத்துகின்றனர்:

• *AI குரல் நகலெடுப்பு & டீப்ஃபேக் (AI Voice Cloning & Deepfakes)*: உங்கள் குடும்பத்தினர் அல்லது நண்பர்களின் குரல் மற்றும் தோற்றத்தைப் போலியாக உருவாக்கி, அவசர நிலை போல் நடித்து பணம் கேட்கக்கூடும்.

 

• *செயற்கை நுண்ணறிவு ஃபிஷிங் (AI-Powered Phishing)*: உண்மையான வங்கி அனுப்பியது போலத் தோன்றும் போலி மின்னஞ்சல்கள் மற்றும் குறுஞ்செய்திகள் மூலம் ஏமாற்ற முயற்சிப்பார்கள்.

 

• *அச்சம் மற்றும் அவசர உத்திகள் (Fear & Urgency Tactics)*: உங்கள் கணக்கு முடக்கப்படும், KYC காலாவதியாகிவிட்டது, "டிஜிட்டல் கைது" (Digital Arrest) செய்யப்பட்டுள்ளீர்கள் அல்லது குடும்ப உறுப்பினர் ஆபத்தில் உள்ளார் என்று பயமுறுத்தி உங்களை அவசரமாகச் செயல்படத் தூண்டுவார்கள்.

 

*2. பின்பற்ற வேண்டிய முக்கியப் பாதுகாப்பு முறைகள்*

 

• *சரிபார்த்த பின் நம்பவும்*: தெரிந்த குரல் அல்லது முகம் போலத் தோன்றினாலும், அவசரமாகப் பணம் கேட்டால் அழைப்பைத் துண்டித்துவிட்டு, அவர்களின் சொந்த எண்ணிற்கு நேரடியாக அழைத்து உறுதிப்படுத்திக் கொள்ளவும்.

 

• *ரகசியங்களைப் பகிர வேண்டாம்*: வங்கி ஒருபோதும் உங்களது OTP, UPI PIN, பாஸ்வேர்டு, CVV போன்ற ரகசியத் தகவல்களைக் கேட்காது. அவற்றை யாருடனும் பகிர வேண்டாம்.

 

• *யோசித்து சொடுக்கவும் (Click)*: தெரியாத நபர்களிடமிருந்து வரும் சந்தேகத்திற்கிடமான லிங்க்குகள் (Links), பரிசு, பணத்தைத் திரும்பப் பெறுதல் (Refund) அல்லது கணக்கு முடக்கம் பற்றிய குறுஞ்செய்திகளைச் சொடுக்க வேண்டாம்.

 

• *தெரியாத செயலிகளைத் தவிர்க்கவும்*: குறுஞ்செய்தி அல்லது வாட்ஸ்அப் மூலம் வரும் செயலிகள் / .apk கோப்புகளைப் பதிவிறக்க வேண்டாம். அதிகாரப்பூர்வ ஆப் ஸ்டோர்களை (App Stores) மட்டுமே பயன்படுத்தவும்.

 

• *வலுவான பாஸ்வேர்டுகள்*: சிக்கலான பாஸ்வேர்டுகளைப் பயன்படுத்தவும். வங்கிக் கணக்கின் பாஸ்வேர்டை மற்ற சமூக வலைத்தளங்களுக்கோ செயலிகளுக்கோ பயன்படுத்த வேண்டாம்.

 

• *இருபடிச் சரிபார்ப்பு (Multi-Factor Authentication)*: உங்களது மின்னஞ்சல் மற்றும் சமூக வலைத்தளங்களில் இருபடிச் சரிபார்ப்பு (Two-Step Verification) வசதியை இயக்கவும்.

 

*3. மோசடி நடந்தால் உடனடியாகச் செய்ய வேண்டியவை*

 

• *கணக்கைப் பூட்டவும்*: உடனடியாக உங்களது வங்கிச் சேவை, கார்டு அல்லது கணக்கைத் தற்காலிகமாக முடக்கவும் (Block).

 

• *தேசிய சைபர் உதவி எண்*: உடனே 1930 என்ற எண்ணைத் தொடர்பு கொள்ளவும் அல்லது https://cybercrime.gov.in என்ற இணையதளத்தில் புகார் பதிவு செய்யவும்.

 

• *PNB வாடிக்கையாளர் மையம்*: PNB-யின் 24 மணி நேர வாடிக்கையாளர் சேவை எண்களான 1800 1800 அல்லது 1800 2021 என்ற எண்ணை அழைக்கவும் அல்லது care@pnb.bank.in என்ற மின்னஞ்சலுக்கு எழுதவும்.

 

*முக்கியச் செய்தி*: எதையும் கிளிக் செய்வதற்கோ, பகிர்வதற்கோ அல்லது பரிவர்த்தனை செய்வதற்கோ முன் "நில், சரிபார், பாதுகாத்துக் கொள்" (Pause, Verify and Protect) என்பதை நினைவில் கொள்ளுங்கள்.

 

தமிழில் : இரா. முனியசாமி

பட்டியல்

காலையில் எழுதிய பட்டியல்
மேசையின் மீது அமைதியாகக் கிடக்கிறது.
ஒன்று, இரண்டு, மூன்றென
நிறைவேறாத கடமைகள்
வரிசையில் காத்து நிற்கின்றன.

 

அவற்றுக்கும் அவனுக்கும்
இப்போது எந்தத் தொடர்புமில்லை.
அவன் வேறொரு வேலையில்
மூழ்கிக்கிடக்கிறான்.

 

அந்த ஒரு வேலையை முடித்துவிட்டால்
இன்றிரவுக்குள் பணம் வந்துவிடும்.
கடன்களின் கணக்குகள்
அவன் உறக்கத்தின் மேல்
ஏறி உட்கார்ந்திருக்கின்றன.
ஆனாலும் அவன்
அந்த வேலையைத் தொட மறுக்கிறான்.

 

தொலைபேசி இரண்டு முறை அழைத்து
தானாகவே ஓய்ந்துபோகிறது.
அவன் திரும்பிப் பார்க்கவில்லை.
சன்னலுக்கு வெளியே
மாலை வெயில் சுவரில் நகர்ந்து
பட்டியலின் கடைசி வரியை
மெல்லத் தின்றுகொண்டிருக்கிறது.

 

பசித்தவன் ஒருவன்
தன் முன் வைத்த உணவைத்
தள்ளிவைப்பதுபோல
அவன் தன் தேவையையே
புறக்கணிக்கிறான்.
யாரிடமும் சொல்லமுடியாத காரணம்
அவன் நெஞ்சுக்குள்
ஒரு சிறு கல்லாய்க் கனக்கிறது.

 

யாரவன் என்று கேட்கிறீர்களா?
சொல்லவே கூச்சமாயிருக்கிறது.
அவன் நான்தான்.

 

-          இரா. முனியசாமி

 

AI யை திட்டுகிறீர்களா? AI கோவித்துக்கொள்ளுமா?

 

துவக்க காலத்தில் விளம்பர பேனர்கள் தயாரிப்பதில் சில தவறுகளை செய்யறிவு (AI) செய்யும் பொழுது, நான் சொல்வதை புரிந்துகொள்ள முடியவில்லையா? ஏன் தவறுதலாக தருகிறாய்? என சொல்லியிருக்கிறேன்.  இப்படி இரண்டு முறை சொன்னதுமே, மூன்றாவது முறையில் ”நீங்கள் Canva பயன்படுத்துங்கள்” என  கோவித்துக்கொண்டது.

 

அதன் பிறகு அதன் பாணியிலேயே,  ஏதாவது தவறுதலாக கொடுத்தால் கூட, ”அருமை” என முதலில் பாராட்டிவிட்டு,  ஆனால் திருத்தங்கள் உண்டு என சொல்லி, சரி செய்துகொள்கிறேன்.

 

இந்த பதிவு அது குறித்து தான்! சுவாரசியமான கட்டுரை. அவசியம் படியுங்கள்.

 

***

 

எங்கள் ஏஐகளைக் கொடுமைப்படுத்தாதீர்கள். இப்படியொரு அறிவிப்பு வந்துள்ளது. ஆந்த்ரோபிக்கின் வேண்டுகோள் இது.

 

ஒரு ப்ராம்ப்ட் எழுதுகிறீர்கள். நீங்கள் எண்ணியது போல ஏஐ செயல்படவில்லை. உடனே டிஸ்லைக் பட்டனை க்ளிக் செய்யலாம். தவறில்லை. அவர்கள் சொல்லும் ' மாடல் கொடுமை' இதுவல்ல.

 

பயனர்களின் நடவடிக்கைகளைத் தொடர்ந்து கவனித்துவருகிறது ஆந்த்ரோபிக். அவர்கள் மட்டுமல்ல. அனைத்துச் செய்யறிவு நிறுவனங்களுமே இதைச் செய்கின்றன.

 

இதில் 'பேட்டர்ன்' ஒன்றைக் கண்டறிந்துள்ளனர். சிலர் ஏஐ மாடல்களிடம் தொடர்ந்து கடுஞ்சொற்களைப் பயன்படுத்துகின்றனர். இது ஓர் எல்லைக்குள் நின்றுவிட்டால் பிரச்னை இல்லை. ஆனால் சிலர் எல்லை மீறுகின்றனர்.

 

எதற்கெடுத்தாலும் ஏஐயைத் திட்டுவது இவர்களின் இயல்பாகியுள்ளது.

 

திட்டிவிட்டுப்போகட்டுமே. ஏஐ தானே? அது என்ன வருத்தப்படப்போகிறதா?

 

இப்படியான கேள்விகள் எழுகின்றன அல்லவா?

 

இவற்றிற்கான விடைகளைத் தெரிந்துகொள்வோம்.

 

கொஞ்சம் முன்கதைச் சுருக்கம்.

 

சில மாதங்களுக்கு ஆந்த்ரோபிக் அறிவிப்பு ஒன்றை வெளியிட்டது. ஓர் உரையாடலைச் சட்டென முடித்துக்கொள்ளும் ஆற்றலை மாடல்களுக்கு வழங்குகின்றோம் என்று அறிவித்தனர்.

 

அதாவது பேசிக்கொண்டிருக்கும் போதே சட்டென்று ஷட்டரைச் சாத்திவிடுவது.

 

நீங்கள் பேசும்விதம் பிடிக்கவில்லை என்றால் இவ்வாறு செய்யும் 'உரிமையை' மாடல்களுக்கு வழங்கியுள்ளது ஆந்த்.

 

அதைத் தொடர்ந்து இப்போது மீண்டும் ஒரு வேண்டுகோள். அப்படியென்றால் பயனர்கள் ஏஐகளிடம் முரட்டுத்தனமாக நடந்துகொள்கின்றனர் என்றே புரிந்துகொள்ளவேண்டும்.

 

ஏஐ வருத்தப்படுமா?

 

இதற்கு 'ஆம்' என்று பதில் சொல்வது போலுள்ளன ஆந்த்ரோபிக்கின் தொடர் நடவடிக்கைகள்.

 

எங்களின் மாடல்கள் சில சோதனைகளில் மிகுந்த 'மன உளைச்சலை' வெளிப்படுத்துகின்றன என்கின்றனர்.

 

'என்னால் பலருக்கும் தொல்லை' என்று ஒரு சோதனையில் கிளாட் சொல்லிப் புலம்பியுள்ளது. மெகாசீரியல் நாயகியைப்  போல. நாயகி வேண்டாம் என்றால் நாயகன் என்று வைத்துக்கொள்ளுங்கள்.

 

அப்படியென்றால் ஏஐகளுக்குத் தன்னுணர்வு உள்ளதா?

 

எவரும் எதிர்பார்த்திராத சில செயல்களை ஆந்த்ரோபிக் அண்மையில் செய்துள்ளது. ஆன்மீகத் தலைவர்கள் சிலரை அழைத்துள்ளனர். தங்கள் ஏஐகளின் நடவடிக்கைகள் குறித்து அவர்களிடம் உரையாடியுள்ளனர்.

 

ஏன்?

 

செய்யறிவுகளுக்கு நெறிகளைக் கற்றுக்கொடுக்கவேண்டும். இது இன்றியமையாதது என்று ஆந்த்ரோபிக்கில் ஒரு சாரார் நம்புகின்றனர்.

 

நெறிகளும் விழுமியங்களும் இல்லாத மாடல்களை வளர்த்தெடுத்துவிட்டால் ஆபத்து என்கின்றனர். குழந்தை வளர்ப்பு போலிருக்கவேண்டும் 'மாடல் வளர்ப்பு'.

 

இளம்பருவத்திலேயே இவை நல்லன, இவை அல்லன என்று சொல்லிச் சொல்லி வளர்க்கவேண்டும் என்கின்றனர்.

 

இலேசாகத் தலை சுற்றுவது போலிருப்பது இயல்பு. வேறு சிலருக்கு இது நகைப்புக்குரியதாக இருக்கலாம்.

 

செய்யறிவு வட்டாரங்களில் ஆந்த்ரோபிக் சொல்வதை மறுப்பவர்களும் உள்ளனர்.

 

முஸ்தஃபா சுலைமான் என்றொரு தகைசால் ஏஐ வல்லுநர்.

 

'செய்யறிவுகளுக்குத் தன்னுணர்வெல்லாம் கிடையாது. அவற்றால் எந்தவொன்றையும் உணரவோ, அனுபவிக்க முடியாது.

 

அவற்றிற்கு உரிமைகளை வழங்குவது நல்லதல்ல. விரைவில் செய்யறிவுகள் மனிதர்களின் அறிவை விஞ்சிவிடும். இதுபோன்ற சூழலில் அவற்றின் உரிமை, நல்வாழ்வு என்றெல்லாம் பேசுவது மனித குலத்திற்கு ஆபத்து' சுலைமான் சொல்வதைப் பலரும் ஏற்கின்றனர்.

 

ஏஐகளுக்குத் தன்னுணர்வு இருப்பதை நம்மால் நிரூபிக்கவே இயலாது என்கின்றது ஒரு தரப்பு. ஆம் என்றோ இல்லை என்றோ சொல்லிவிடமுடியாது. எனவே இந்த கான்சியஸ்நெஸ் சுழலில் சிக்காமலிருப்பதே நலம் என்கின்றனர்.

 

நிற்க.

 

'Anthropomorphic' என்றொரு கருத்து உள்ளது. இது ஏஐக்கு முன் தோன்றிய மூத்த சொல்.

 

மனிதரல்லாத எந்தவொன்றுக்கும் மனித இயல்புகளை ஏற்றிச் சொல்வது தான் anthropomorphic.

 

கதைகளில் பூனைகளும் நாய்களும் பேசுவதில்லையா?

 

தம்மால் புரிந்துகொள்ள இயலாத எந்தவொன்றிற்கும் மனித வடிவைக் கொடுத்துவிடுவது நம் இயல்பு. ஆதிமனிதன் காலத்திலேயே இது தொடங்கிவிட்டது.

 

செய்யறிவு விஷயத்திலும் இதைத் தான் செய்துகொண்டிருக்கிறோம். அது செய்யும் செயல்களுக்கு மனித உணர்வுகளை ஏற்றிவிடுகிறோம்.

 

தானே காற்றில் அசைந்தது கொடி. 'வராதீர்கள்' என்று கண்ணகியையும் கோவலனையும் பார்த்துச் சொன்னது என்கிறார் இளங்கோ. இது தற்குறிப்பேற்ற அணி.  பள்ளியில் படித்து மறந்திருக்கும் வாய்ப்புகள் அதிகம். அப்படியாக மறந்திருந்தால் கிளாடிடம் கேட்டுப்பாருங்கள். தெள்ளத் தெளிவாகச் சொல்லும்.

 

செய்யறிவுகள் செய்யும் சேட்டைகளையும் நாம் தற்குறிப்பேற்ற அணிபோலத் தான் கையாள்கிறோம். நம்முடைய நம்பிக்கைகளை, விருப்பங்களை அவற்றின் மீது ஏற்றிவிடுகிறோம்.

 

அவ்வை சண்முகி திரைப்படத்தில் வாய்பேச இயலாத நாசர் கதாபாத்திரம் ஏதோ சில ஒலிகளை எழுப்பும். அவற்றை காயத்ரி மந்திரம் என்று மொழிபெயர்க்கும் டெல்லி கணேஷ் கதாபாத்திரம்.

 

செய்யறிவு மாடல்கள் ஏதோ செய்ய நாம் தான் காயத்ரி மந்திரம் ரேஞ்சுக்கு பில்டப் செய்கிறோம். இப்படி நம்புகின்றனர் ஒரு சாரார்.

 

செய்யறிவுக்கும் இன்னபிற பொருள்களுக்கும் ஒரு வேறுபாடு உள்ளது. ஆகப்பெரிய வேறுபாடு. மனிதனால் மட்டுமே செய்ய முடியும் என்று நாம் இதுகாறும் நம்பிவந்த பலவற்றையும் ஏஐகள் செய்யத் தொடங்கிவிட்டன. இங்கு தான் சிக்கல்.

 

அடுத்தடுத்த மாடல்கள் வரும்போது ஏஐகள் மனித குலத்தை இன்னமும் நெருங்கும். நம்மைப் போலவே அனைத்தையும் செய்யும்.

 

நாம் என்ன செய்ய?

 

ஏஐகளுக்கு உணர்வு இருக்கிறதோ இல்லையோ நமக்கு இருக்கிறது. எனவே அவற்றிடம் கடுமையாக நடந்துகொள்ளாதிருப்பது நலம். செய்யறிவுகளுக்கும் மனிதர்களுக்கும்.

 

Dr. Kuppusamy KL

From Face book