நமக்கு குழு (Team) அவசியம்

சமீபத்தில் 70+ வயதில் இருக்கும் ஒர் நிறுவனத்தின் நிர்வாகியைச் சந்தித்தேன். அவர் “உங்களை நேரில் வரவழைத்தது… அறிவு பலருக்கும் இருக்கும். செய்யும் தொழிலில் சின்சியராக இருக்கிறீர்களா? என பார்க்கத்தான் அழைத்தேன் ” என்றார்.  பிறகு எனக்கு நிறுவனத்தின் வேலையை கொடுத்தார்.

 

இன்னொரு முறை சந்திக்கும் பொழுது… “எப்பொழுதும் நமக்கு குழு அவசியம். இல்லையென்றால்,  இனியாவது உருவாக்கிக்கொள்ளுங்கள். அது வளர்ச்சிக்கு மிக அவசியம்” என ஆலோசனை தந்தார்.

 

நமது உறுப்பினர் ஒருவரிடம் இதைப் பற்றி சொன்னேன்.  அவர் இரவு 12 மணியெல்லாம் வாடிக்கையாளர்களிடம் பேசி, வேலைகளை செய்துக்கொண்டிருந்தார்.

 

நமது தலைவரிடம் 17 பேர் நல்ல ஆற்றலுடன் இருந்தவர்களை வேலைக்கு வைத்து இருந்திருக்கிறார்.  நல்ல சம்பளம். வருடத்திற்கு இரண்டு, மூன்று போனஸ் என நன்றாகவும் கவனித்திருக்கிறார். அவரும் குழு என்பது அவசியம்.  எத்தனை ஆற்றலாக இருந்தாலும், தனிநபரின் வளர்ச்சிக்கு ஒரு வரம்பு இருக்கிறது என்பார்.

 

ஒரு வரி ஆலோசகர் வேலைகளை கொண்டு வருவதிலும், தமது குழுவினருக்கு அறிவை பகிர்ந்துகொண்டே இருக்கவேண்டும். சரியாக வேலையை செய்கிறார்களா என கவனித்துக்கொள்ளவேண்டும் என பேசிக்கொண்டிருந்தோம்.

 

இப்பொழுது அவர் இரவு வேலையை கொஞ்சம் கொஞ்சமாக குறைத்துக்கொண்டார்.  வேலைக்கு ஒரு பெண் பணியாளரை நியமித்துக்கொண்டார்.

 

57வது ஜி.எஸ்.டி கவுன்சில் தந்த மாற்றங்களை… கொஞ்சம் உற்றுக் கவனித்து, இரண்டு பேருக்கு தெரிவித்ததில்… இரண்டு பேரும் ஜி.எஸ்.டி எடுத்து தாருங்கள் என சொன்னதை உற்சாகமாக பகிர்ந்துகொண்டார்.

 

அவர் உணரந்து சொன்னது இது தான். நிறுவனத்தை வளர்க்கவேண்டுமென்றால், நாம் 15 மணி நேரம் வேலை செய்து உழன்று கொண்டே இருக்கக்கூடாது. நமக்கான குழுவை உருவாக்கவேண்டும் என்பதை புரிந்துகொண்டேன் என்றார்.

 

- இரா. முனியசாமி

பஞ்சாப் நேஷனல் வங்கி (PNB) - சைபர் பாதுகாப்பு விழிப்புணர்வுச் செய்தியின் முக்கிய அம்சங்கள்

 

இது வங்கியில் இருந்து ஆங்கிலத்தில் வந்தது. அதை தமிழில் தந்திருக்கிறேன்.

சமகாலத்தில் டிஜிட்டல் தொடர்பான குற்றங்கள், மோசடிகள் அதிகரித்து கொண்டே செல்கின்றன. அரசு டிஜிட்டல்மயத்தை வேக வேகமாக அமுல்படுத்திவருகின்றன. ஆனால் மக்கள் டிஜிட்டல்மயத்தை புரிந்துகொண்டார்களா, அதனை கற்றுக்கொண்டார்களா என்பது கேள்விக்குறி.

கொஞ்சம் கவனமில்லாமல் இருந்தால், வாழ்வில் சிறுக சிறுக சேமித்த அத்தனையையும், உட்கார்ந்த இடத்தில் இருந்தே சுருட்டுகிறார்கள்.  ஆகையால் வங்கி அறிவித்த அம்சங்களை கவனமாக படியுங்கள். உறவினர்களுக்கு தெரிவியுங்கள். நன்றி.

****

1. *தற்போதைய புதிய சைபர் மோசடி முறைகள்*

தொழில்நுட்பத்தின் வளர்ச்சிக்கேற்ப மோசடி செய்பவர்கள் புதிய முறைகளைப் பயன்படுத்துகின்றனர்:

• *AI குரல் நகலெடுப்பு & டீப்ஃபேக் (AI Voice Cloning & Deepfakes)*: உங்கள் குடும்பத்தினர் அல்லது நண்பர்களின் குரல் மற்றும் தோற்றத்தைப் போலியாக உருவாக்கி, அவசர நிலை போல் நடித்து பணம் கேட்கக்கூடும்.

 

• *செயற்கை நுண்ணறிவு ஃபிஷிங் (AI-Powered Phishing)*: உண்மையான வங்கி அனுப்பியது போலத் தோன்றும் போலி மின்னஞ்சல்கள் மற்றும் குறுஞ்செய்திகள் மூலம் ஏமாற்ற முயற்சிப்பார்கள்.

 

• *அச்சம் மற்றும் அவசர உத்திகள் (Fear & Urgency Tactics)*: உங்கள் கணக்கு முடக்கப்படும், KYC காலாவதியாகிவிட்டது, "டிஜிட்டல் கைது" (Digital Arrest) செய்யப்பட்டுள்ளீர்கள் அல்லது குடும்ப உறுப்பினர் ஆபத்தில் உள்ளார் என்று பயமுறுத்தி உங்களை அவசரமாகச் செயல்படத் தூண்டுவார்கள்.

 

*2. பின்பற்ற வேண்டிய முக்கியப் பாதுகாப்பு முறைகள்*

 

• *சரிபார்த்த பின் நம்பவும்*: தெரிந்த குரல் அல்லது முகம் போலத் தோன்றினாலும், அவசரமாகப் பணம் கேட்டால் அழைப்பைத் துண்டித்துவிட்டு, அவர்களின் சொந்த எண்ணிற்கு நேரடியாக அழைத்து உறுதிப்படுத்திக் கொள்ளவும்.

 

• *ரகசியங்களைப் பகிர வேண்டாம்*: வங்கி ஒருபோதும் உங்களது OTP, UPI PIN, பாஸ்வேர்டு, CVV போன்ற ரகசியத் தகவல்களைக் கேட்காது. அவற்றை யாருடனும் பகிர வேண்டாம்.

 

• *யோசித்து சொடுக்கவும் (Click)*: தெரியாத நபர்களிடமிருந்து வரும் சந்தேகத்திற்கிடமான லிங்க்குகள் (Links), பரிசு, பணத்தைத் திரும்பப் பெறுதல் (Refund) அல்லது கணக்கு முடக்கம் பற்றிய குறுஞ்செய்திகளைச் சொடுக்க வேண்டாம்.

 

• *தெரியாத செயலிகளைத் தவிர்க்கவும்*: குறுஞ்செய்தி அல்லது வாட்ஸ்அப் மூலம் வரும் செயலிகள் / .apk கோப்புகளைப் பதிவிறக்க வேண்டாம். அதிகாரப்பூர்வ ஆப் ஸ்டோர்களை (App Stores) மட்டுமே பயன்படுத்தவும்.

 

• *வலுவான பாஸ்வேர்டுகள்*: சிக்கலான பாஸ்வேர்டுகளைப் பயன்படுத்தவும். வங்கிக் கணக்கின் பாஸ்வேர்டை மற்ற சமூக வலைத்தளங்களுக்கோ செயலிகளுக்கோ பயன்படுத்த வேண்டாம்.

 

• *இருபடிச் சரிபார்ப்பு (Multi-Factor Authentication)*: உங்களது மின்னஞ்சல் மற்றும் சமூக வலைத்தளங்களில் இருபடிச் சரிபார்ப்பு (Two-Step Verification) வசதியை இயக்கவும்.

 

*3. மோசடி நடந்தால் உடனடியாகச் செய்ய வேண்டியவை*

 

• *கணக்கைப் பூட்டவும்*: உடனடியாக உங்களது வங்கிச் சேவை, கார்டு அல்லது கணக்கைத் தற்காலிகமாக முடக்கவும் (Block).

 

• *தேசிய சைபர் உதவி எண்*: உடனே 1930 என்ற எண்ணைத் தொடர்பு கொள்ளவும் அல்லது https://cybercrime.gov.in என்ற இணையதளத்தில் புகார் பதிவு செய்யவும்.

 

• *PNB வாடிக்கையாளர் மையம்*: PNB-யின் 24 மணி நேர வாடிக்கையாளர் சேவை எண்களான 1800 1800 அல்லது 1800 2021 என்ற எண்ணை அழைக்கவும் அல்லது care@pnb.bank.in என்ற மின்னஞ்சலுக்கு எழுதவும்.

 

*முக்கியச் செய்தி*: எதையும் கிளிக் செய்வதற்கோ, பகிர்வதற்கோ அல்லது பரிவர்த்தனை செய்வதற்கோ முன் "நில், சரிபார், பாதுகாத்துக் கொள்" (Pause, Verify and Protect) என்பதை நினைவில் கொள்ளுங்கள்.

 

தமிழில் : இரா. முனியசாமி

பட்டியல்

காலையில் எழுதிய பட்டியல்
மேசையின் மீது அமைதியாகக் கிடக்கிறது.
ஒன்று, இரண்டு, மூன்றென
நிறைவேறாத கடமைகள்
வரிசையில் காத்து நிற்கின்றன.

 

அவற்றுக்கும் அவனுக்கும்
இப்போது எந்தத் தொடர்புமில்லை.
அவன் வேறொரு வேலையில்
மூழ்கிக்கிடக்கிறான்.

 

அந்த ஒரு வேலையை முடித்துவிட்டால்
இன்றிரவுக்குள் பணம் வந்துவிடும்.
கடன்களின் கணக்குகள்
அவன் உறக்கத்தின் மேல்
ஏறி உட்கார்ந்திருக்கின்றன.
ஆனாலும் அவன்
அந்த வேலையைத் தொட மறுக்கிறான்.

 

தொலைபேசி இரண்டு முறை அழைத்து
தானாகவே ஓய்ந்துபோகிறது.
அவன் திரும்பிப் பார்க்கவில்லை.
சன்னலுக்கு வெளியே
மாலை வெயில் சுவரில் நகர்ந்து
பட்டியலின் கடைசி வரியை
மெல்லத் தின்றுகொண்டிருக்கிறது.

 

பசித்தவன் ஒருவன்
தன் முன் வைத்த உணவைத்
தள்ளிவைப்பதுபோல
அவன் தன் தேவையையே
புறக்கணிக்கிறான்.
யாரிடமும் சொல்லமுடியாத காரணம்
அவன் நெஞ்சுக்குள்
ஒரு சிறு கல்லாய்க் கனக்கிறது.

 

யாரவன் என்று கேட்கிறீர்களா?
சொல்லவே கூச்சமாயிருக்கிறது.
அவன் நான்தான்.

 

-          இரா. முனியசாமி