ஓய்வு பெற்ற பிறகும் ஏன் பலர் வேலைக்கு செல்கிறார்கள்?

 

ஓய்வு பெற்ற பிறகும் ஏன் பலர் வேலைக்கு செல்கிறார்கள்?

 

முன்குறிப்பு :   இன்று நமது மூத்த உறுப்பினர் ஒருவரிடம் பேசிக்கொண்டிருந்தேன்.  அவருடைய மகன் நல்ல வேலை, நல்ல சம்பளத்தில் இருக்கிறார். ஓய்வெடுங்கள். இனி நான் எல்லாவற்றையும் பார்த்து கொள்கிறேன் என சொல்வதாக தெரிவித்தார். அன்பான, பொறுப்பான பையன். இப்படி சொல்லும் பிள்ளைகள் கிடைப்பது பெற்றோருக்கு பாக்கியம்.  ஆனால் ”நான் தான் வயது 60  கடந்தாலும், வரி ஆலோசகர் தொழிலை செய்துவருகிறேன்” என்றார்.

****

 

58, 60 வயது ஓய்வு  பெறுகிற வயது.  ஒரு மனிதன் தன் தேவைக்கும், குடும்பத்தின் தேவைக்கும் உழைத்து களைத்து போகிற மனுசன்.   ஆனால் அதற்கு பிறகும் வேலைக்கு ஏன் மக்கள் செல்கிறார்கள். பலருக்கு பொருளாதார தேவைகள் இருந்தாலும் (இதுப் பற்றி தனியாக அவசியம் விவாதிக்கவேண்டும்), சிலர் பொருளாதாரத்தில் நன்றாக இருந்தாலும் ஏன் தான் செய்த தொழிலை தொடர்ச்சியாக செய்கிறார்கள் என்ற யோசனை வந்தது. இன்று அதைப் பற்றி இன்று பேசலாம்.

 

இந்த தலைப்பை 60 வயது கடந்தவர்களுக்கு மட்டுமில்லை.  30ல், 40ல் இருப்பவரும் இது குறித்து சிந்திக்கவேண்டும். நவீன காலத்தில் 40 வயதுக்குள் வேலை செய்து, வாழ்நாள் தேவைக்கு சம்பாதித்துவிட்டு, பிறகு நமக்கு பிடித்த வாழ்வை வாழ திட்டமிடுகிறார்கள். வாழவும் துவங்கியுள்ளார்கள்.

***

 

நம்ம ஊரில் ஒரு சுவாரசியமான காட்சி அடிக்கடி பார்க்கலாம். அரசு அலுவலகம், வங்கி, தொழிற்சாலை, தனியார் நிறுவனம் என்று பல ஆண்டுகள் வேலை பார்த்த ஒருவர் ஓய்வு பெறுகிறார். வழியனுப்பு விழா நடக்கிறது. மாலை அணிவிக்கிறார்கள். பாராட்டு பேசுகிறார்கள். புகைப்படம் எடுக்கிறார்கள். "இனி நிம்மதியாக ஓய்வெடுங்கள்" என்று அனைவரும் வாழ்த்துகிறார்கள்.

 

ஆனால் சில மாதங்கள் கழித்து பார்த்தால்... அதே மனிதர் மீண்டும் ஏதோ ஒரு அலுவலகத்தில் வேலை பார்த்துக் கொண்டிருக்கிறார் அல்லது ஆலோசகராக செயல்படுகிறார். அல்லது ஒரு நிறுவனத்தில் பகுதி நேரமாக பணியாற்றுகிறார்.

 

ஏன்? பொருளாதாரத் தேவையா? சிலருக்கு அது காரணமாக இருக்கலாம். ஆனால் எல்லோருக்கும் அல்ல. ஏனென்றால், பணத்தட்டுப்பாடு இல்லாதவர்களும் ஓய்வுக்குப் பிறகு ஏதாவது ஒரு வேலையில் தங்களை ஈடுபடுத்திக் கொள்கிறார்கள். அதற்குக் காரணம் வேறு.

 

உண்மையில் மனிதர்கள் பணத்திற்காக மட்டும் வேலை செய்வதில்லை. ஒரு நோக்கத்திற்காகவும் வேலை செய்கிறார்கள்.

 

காலையில் எழுந்தவுடன், "இன்று என்ன செய்யப் போகிறேன்?" என்ற கேள்விக்கு ஒரு பதில் வேண்டும். பல ஆண்டுகள் பொறுப்புகளை ஏற்றுக்கொண்டு வாழ்ந்த ஒருவர் திடீரென்று எதுவும் செய்யாமல் வீட்டில் அமர்ந்துவிட்டால், சிலருக்கு அது சுகமாக இருக்காது. சில நாட்கள் மகிழ்ச்சியாக இருக்கும். பிறகு சலிப்பாக மாறலாம்.

 

அதனால் தான் பலர் மீண்டும் வேலை, ஆலோசனை, கற்பித்தல் அல்லது சமூகப் பணிகளில் ஈடுபடத் தொடங்குகிறார்கள்.

 

இன்னொரு காரணமும் இருக்கிறது. வேலை என்பது சம்பளம் பெறும் இடம் மட்டுமல்ல. அது நண்பர்கள் கிடைக்கும் இடம்.  உரையாடல்கள் நடைபெறும் இடம். புதிய விஷயங்கள் கற்றுக்கொள்ளும் இடம். சமூகத்துடன் இணைந்திருக்கும் இடம். அதனால் ஓய்வு பெற்ற பிறகும் பலர் அந்த இணைப்பை இழக்க விரும்புவதில்லை.

 

அப்படியானால் ஓய்வு பெற்ற பிறகு என்ன செய்யலாம்?

 

இதற்கு ஒரே பதில் கிடையாது. ஒவ்வொருவருக்கும் தனித்தனி விருப்பங்கள் இருக்கும். இருப்பினும் சில நல்ல வழிகள் உள்ளன.

 

அனுபவத்தை பகிரலாம் - பல ஆண்டுகள் கற்ற அறிவும் அனுபவமும் ஒரு பெரிய சொத்து. அதை இளைய தலைமுறையினருக்கு பகிரலாம். ஆலோசகராக செயல்படலாம். பயிற்சி அளிக்கலாம். கட்டுரைகள் எழுதலாம். 

 

சமூகப் பணிகளில் ஈடுபடலாம் - பள்ளிகள், நூலகங்கள், தன்னார்வ அமைப்புகள், சுற்றுச்சூழல் முயற்சிகள் போன்றவற்றில் பங்களிக்கலாம்.

 

புதிய விஷயங்கள் கற்கலாம் - வேலை வாழ்க்கையில் நேரமில்லாமல் விட்டுவிட்ட ஆர்வங்களை மீண்டும் தொடங்கலாம். இசை, ஓவியம், மொழிகள், கணினி, செயற்கை நுண்ணறிவு பயன்பாடுகள் போன்றவற்றைக் கற்றுக்கொள்ளலாம்.

 

உடல்நலத்திற்கு நேரம் ஒதுக்கலாம் - நடைப்பயிற்சி, தோட்டப் பராமரிப்பு, உடற்பயிற்சி போன்றவை உடலையும் மனதையும் சுறுசுறுப்பாக வைத்திருக்க உதவும்.

 

வளர்ந்த நாடுகளில் என்ன செய்கிறார்கள்?

 

வளர்ந்த நாடுகளில் ஓய்வு என்பது வாழ்க்கையின் கடைசி அத்தியாயமாக பார்க்கப்படுவதில்லை. அது ஒரு புதிய அத்தியாயமாக பார்க்கப்படுகிறது. பலர் பகுதி நேர வேலை செய்கிறார்கள். பலர் தன்னார்வ சேவையில் ஈடுபடுகிறார்கள்.

 

சிலர் உலகம் சுற்றிப் பார்க்கிறார்கள். (இதற்கு உடல் ஆரோக்கியம் மிகவும் அவசியம்) சிலர் பல்கலைக்கழகங்களில் மீண்டும் படிக்கிறார்கள். சிலர் புதிய தொழில்களைத் தொடங்குகிறார்கள். அவர்களின் நோக்கம் ஒன்றுதான். "வயது அதிகரிக்கலாம்; ஆனால் வாழ்க்கை நின்றுவிடக் கூடாது."

 

ஒரு காலத்தில் ஓய்வு என்பது வேலை முடிவதாக இருந்திருக்கலாம். இன்று ஓய்வு என்பது ஒரு புதிய சுதந்திரம். கட்டாயப் பொறுப்புகள் குறையும். ஆனால் விருப்பமான செயல்களுக்கு நேரம் அதிகரிக்கும். அந்த நேரத்தை எப்படிப் பயன்படுத்துகிறோம் என்பதுதான் ஓய்வு வாழ்க்கையின் தரத்தை நிர்ணயிக்கிறது.

 

இறுதியாக...

 

ஓய்வு பெற்ற பிறகும் வேலை செய்பவர்கள் பணத்தை மட்டும் தேடிச் செல்லவில்லை. தங்களைத் தேடிச் செல்கிறார்கள். சுறுசுறுப்பைத் தேடிச் செல்கிறார்கள். தங்களின் அனுபவம் இன்னும் பலருக்கு பயன்பட வேண்டும் என்ற எண்ணத்தோடு செல்கிறார்கள்.

 

அதனால், சிறந்த ஓய்வு வாழ்க்கை என்பது எதுவும் செய்யாமல் இருப்பது அல்ல. விருப்பத்துடன், அர்த்தமுள்ள செயல்களில் தொடர்ந்து ஈடுபட்டு வாழ்வதே சிறந்த ஓய்வு வாழ்க்கையாகும்.

 

-        -  இரா. முனியசாமி