Immaculate (2024) – Italy

வயதான, நினைவிழந்த, படுத்த படுக்கையாய் இருக்கும் கன்னியாஸ்திரிகளை பார்த்துக்கொள்ளும் இத்தாலியில் ஒரு கிறித்துவ நிறுவனம்.

 

முதல் காட்சியில் ஒரு இளம்பெண் நடுநிசியில் தப்பித்துச் செல்ல முயல்கிறாள்.  ஆனால், இழுத்து வந்து, உயிரோடு புதைத்துவிடுகிறார்கள். படுபாவிகள்.

 

இளம்பெண்ணான நாயகி வெகு தூரத்திலிருந்து அந்த இடத்திற்கு வந்து சேர்கிறாள்.  அங்கு வந்து சேர்ந்ததில் இருந்து சில வித்தியாசமான விசயங்களை உணர்கிறாள்.  புதிது என்பதால் யாரிடமும் கேட்கமுடியவில்லை.

 

வாந்தி, மயக்க. சோதிக்கும் பொழுது அவள் கர்ப்பமாக இருப்பது தெரியவருகிறது.   அவள் யாரோடும் உறவு கொள்ளவும் இல்லை.   ஆண்டவர் அவள் வயிற்றில் தோன்றியிருப்பதாக அங்கு பொறுப்பில் உள்ளவர்கள் எல்லோரிடமும் தெரிவிக்கிறார்கள். அவளை கவனமாக பார்த்துக்கொள்கிறார்கள்.

 

ஏற்கனவே சில வித்தியாசமான விசயங்களை உணர்ந்தவள், தன்னுடைய கர்ப்பமும் அவளுக்கு இன்னும் சந்தேகத்தை உருவாக்க அங்கு இருந்து தப்ப முயல்கிறாள். ஆனால் அது பெரிய சவாலாக இருக்கிறது.

 

அதற்கு பிறகு அங்கு நடந்ததை கொஞ்சம் சஸ்பென்ஸ் + கொஞ்சம் வன்முறை கலந்து சொல்லியிருக்கிறார்கள்.

 

****

 

”ஆண்டவர் மீண்டும் இந்த மண்ணிற்கு வருவார்” என்பதை கொஞ்சம் ‘அறிவியல்’ கலந்து முயற்சித்திருக்கிறார்கள்.    அதற்கு அவர்கள் செய்யும் ”பாவ காரியங்கள்”  ஒவ்வொன்றும் பயங்கரமாயிருக்கிறது.

 

ஹாரர் படம் என்பதை விட திரில்லர் படம் எனலாம்.  அங்கு நடக்கும் மர்மங்களை வைத்து தான் கடைசி வரை நகர்த்தி இருக்கிறார்கள்.

 

நாயகி நன்றாக நடித்திருக்கிறார்.  Heist சீரிசில் வரும் புரபசர் ஒரு பாத்திரத்தில் வந்து போகிறார்.  அந்த பாத்திரத்தை இன்னும் கொஞ்சம் நன்றாக எழுதியிருக்கலாம்.

 

பிரைமில் தமிழில் மொழிமாற்றம் செய்யப்பட்டே இருக்கிறது. திரில்லர், ஹாரர் ரசிகர்கள் பார்க்கலாம். மற்றவர்கள் நிறைய நேரம் இருந்தால் பாருங்கள்.

Officer Black belt (2024)

நாயகன் தற்காப்பு பயிற்சிகளை ஆர்வமாய் கற்றுக்கொள்கிறார்.  அப்பா நடத்தும் உணவகத்தில், உணவை கொண்டு கொடுக்கும் வேலைகளை செய்துவருகிறார்.  மீதி நேரம் நண்பர்களோடு ஜாலியாக விளையாடிக்கொண்டிருக்கிறார்.

 

கொரியாவில் பெருங்குற்றம் இழைத்து சிறையில் இருந்து விடுதலை ஆகிறவர்களை, தவறுகளுக்கு தக்கவாறு சில ஆண்டுகளுக்கு காலில் ஒரு கருவி பொருத்தி கண்காணிக்கிறார்கள். அந்த வேலையை போலீசிடம் கொடுக்காமல், தனியாக ஒரு துறையை உருவாக்கி கண்காணிக்கிறார்கள்.

 

காலில் பொருத்தப்பட்ட கருவி சார்ஜ் குறையாமல் பார்த்துக்கொள்ள வேண்டியது அவருடைய பொறுப்பு. 30% சார்ஜ் குறைந்தால், அலுவலகத்தில் இருந்து அவருக்கு தெரிவிப்பார்கள். ஒருவேளை  அந்த கருவி சார்ஜ் இல்லாமல் போனாலோ, கழற்றப்பட்டாலோ சம்பந்தப்பட்ட அலுவலகத்தில் இருந்து அவரைத் தேடி வந்துவிடுவார்கள். 

 

 அப்படித் தேடி வந்த ஒரு அலுவலரை, முன்னாள் கைதி தாக்க, எதைச்சையாய் நாயகன் காப்பாற்ற அவரை அழைத்துப் பாராட்டுகிறார்கள்.   அவருடைய தகுதியை வைத்து, தற்காலிகமாக இந்த வேலையை செய்கிறீர்களா என கேட்கும் பொழுது, ஆர்வமாய் இணைகிறார்.

 

துவக்கத்தில் சின்ன சின்ன சவால்களோடு துவங்கும் வேலை,  குழந்தைகளை கடத்தி வீடியோ எடுக்கும் ஒரு மாபியா கும்பலோடு மோதும் பொழுது, பெரிய சவாலாகவும், ஆபத்தானதாகவும் மாறுகிறது.

 

இருக்கின்ற சின்ன படையை வைத்துக்கொண்டு அவர்கள் எப்படி சமாளித்தார்கள் என்பதை  கொஞ்சம் உணர்வுப்பூர்வமாகவும், அடிதடி சண்டைகளோடும் சொல்லியிருக்கிறார்கள்.

****

 

பெரிய குற்றமிழைத்த முன்னாள் கைதிகளை காலில் கருவி மாட்டிக் கண்காணிக்கும் வழக்கம் எத்தனை நாடுகளில் இருக்கிறது என தெரியவில்லை. இந்தப் படத்தின் மூலம் கொரியாவில் இருக்கிறது  என தெரிய வருகிறது.  பெரிய சவாலான பணி தான்.

 

இந்தப் படைக்கு அரசு ஒதுக்கும்  பணம் பற்றவில்லை, ஆகையால் போதுமான அலுவலர்களை நியமிக்காமல், அங்கு வேலை செய்பவர்களை கூடுதலாக வேலைப் பார்க்க சொல்கிறார்கள்.  எல்லா ஊரிலும் இந்த பற்றாக்குறை பஞ்சாயத்து இருக்கும் போலிருக்கிறது.

சில மாதங்களுக்கு முன்பு Midnight Runners என்றொரு படம் வந்தது. இந்தப் படத்தின் வெற்றியில், தெலுங்கில் Saakini Daakini என்ற பெயரில் எடுத்திருந்தார்கள். அதுவும் இது போல ஒரு படம் தான்.  அந்தப் படத்தை இயக்கியவர் தான் இந்தப் படத்தையும் இயக்கியிருக்கிறார்.   அந்தப் படம் என்ன டெம்போவில் இருந்ததோ, அதே டெம்போவில் தான் இந்தப்படமும் இருக்கிறது.

 

நாயகன், அவருடைய சீனியர், அவருடைய நண்பர்கள் என எல்லோரும் நன்றாக செய்திருக்கிறார்கள்.  வழக்கமான ஒரு கமர்சியலான படம். 

 

நெட் பிளிக்சில் தமிம் மொழிமாற்றம் செய்தே வெளியாகியிருக்கிறது. கமர்சியலான, அடிதடி சண்டை பிரியர்கள் நிச்சயம் பார்க்கலாம்.

Vivarium (2019) அயர்லாந்து

நாயகி ஆசிரியராக இருக்கிறார். நாயகன் ஒரு தொழில்நுட்ப வேலையில் இருக்கிறார். இருவரும் ஒரு பள்ளியில் வேலை செய்கிறார்கள். இருவரும் காதலிக்கிறார்கள். ஒரு வீடு வாங்குவது அவர்களுடைய தேவையாகவும், ஆசையாகவும் இருக்கிறது.

வீடுகள் விற்கும் ஒரு நிறுவனத்தின் அலுவலகத்திற்கு போய் இருவரும் விசாரிக்கிறார்கள். அங்கு இருக்கும் நடுத்தர நபர் கொஞ்சம் விநோதமாய் பேசினாலும், வரவேற்கிறார். ”அருகிலேயே இருக்கிறது. தாங்கள் கட்டியிருக்கும் வீடுகளுக்கு வந்து பாருங்கள்” என்கிறார். அவர் தன் காரில் முன்னே செல்ல, இவர்கள் தங்கள் காரில் பின்தொடர்கிறார்கள்.

தனித்தனி வீடுகளாய், ஒரே மாதிரி வரிசையாய் இருக்கும் வீடுகளில், ஒன்பதாம் எண் கொண்ட வீட்டிற்குள் அழைத்துச் செல்கிறார். வீடு அவர்களுக்கு பிடித்தமானமாக, அழகாக இருக்கிறது. வீட்டைச் சுற்றி காண்பிக்கும் பொழுது, அந்த நபர் திடீரென காணாமல் போகிறார். அவர் வந்த காரும் வாசலில் இல்லை.

சரி! இருவரும் கிளம்பலாம் என தங்கள் காரில் ஏறுகிறார்கள். அந்த வீடுகளைச் சுற்றி உள்ள எந்த தெருவில் நுழைந்து சென்றாலும், மீண்டும், மீண்டும் அதே வீட்டின் வாசலுக்கு வந்து சேருகிறார்கள். பெட்ரோல் தீரும் வரையில் மாலை வரை சுற்றுகிறார்கள். பிறகு சோர்வடைந்து, கவனிக்கும் பொழுது தான் ஒன்றை உணர்கிறார்கள். சுற்றி உள்ள எந்த வீட்டிலும் யாரும் குடியேறவில்லை. சூரியன் இருந்தாலும், செயற்கை மேகங்களாக இருக்கின்றன. அந்த பகுதியே யாரால் புதிதாக செயற்கையாய் உருவாக்கப்பட்ட பகுதியாக இருக்கிறது. தாங்கள் ஒரு லூப்பில் மாட்டிக்கொண்டதாக உணர்கிறார்கள்.

அடுத்தநாள், வாசலில் ஒரு பெட்டியில் குழந்தை இருக்கிறது. அந்த குழந்தையை வளர்த்தால், நீங்கள் விடுவிக்கப்படுவீர்கள் என்ற வாசகமும் இருக்கிறது. தினமும் அவர்கள் வாழ்வதற்கு தேவையானவை பெட்டியில் வந்து சேர்கிறது. அந்த குழந்தை அவர்களோடு நாளும் வளர்கிறான். மிக விரைவில் வளர்கிறான்.

அவர்கள் தப்பிப்பதற்கான வழிகளை யோசித்து யோசித்து முடியாமல் போக… சோர்வாகிறார்கள். பிறகு என்ன ஆனது என்பதை முக்கால் வாசி படத்தில் சொல்லியிருக்கிறார்கள்.

*****

விரல் விட்டு எண்ணக்கூடிய சில படங்கள் படம் பார்த்த பிறகு இந்தப் படம் என்ன சொல்ல வருகிறது என தேடுவோம். அப்படிப்பட்ட படமாகிவிட்டது இந்தப் படம்.

Vivarium என்றால் என்ன தேடினால், செல்லப்பிராணிகளை வளர்ப்பதற்காக உருவாக்கப்பட்டது என சொல்கிறது கூகுள். படம் எழுத்துப் போடும் பொழுது, ஒரு பறவையின் கூட்டை வைத்து சில காட்சிகள் வைத்திருப்பார்கள். இந்தப் படம் என்ன சொல்ல வருகிறது என்பதை படம் முடிந்த பிறகு உங்களுக்கு நிச்சயம் மண்டை காயும். படத்தின் பெயரும், எழுத்து போடும் பொழுது சில காட்சிகளையும் இணைத்து நாம் ஒன்றை புரிந்துகொள்ள வேண்டியது தான்.

இந்தப் படத்தை ”அறிவியல் உளவியல் பூர்வ திரில்லர்” என வகைப்படுத்துகிறார்கள். அதைச் சுருக்கமாக பேண்டசி கதை என புரிந்துகொள்கிறேன்.

படத்தின் பிரதானப் பாத்திரங்கள் நான்கு தான். சில படங்களில் வசனங்கள் பேசினால், எங்கே கதையை நகர்த்திக்கொண்டு போக முடியாது என பேசுவதையே தவிர்ப்பார்கள். இந்தப் படத்திலும் அப்படித்தான். இப்படி சிக்குண்டால், எத்தனை புலம்புவார்கள்? எத்தனை பேசுவார்கள்? படத்தின் வசனங்கள் பத்து பக்கத்திற்கு கூட தாண்டாது.

நாயகனும், நாயகியும் தான் முக்கிய பாத்திரங்கள். இதில் நாயகி தான் மொத்தப்படத்தையும் தாங்குகிறார்.

சில படங்கள் தமிழ் டப்பிங்கில் இருப்பதாலேயே பார்ப்பேன். பிரைமில் தமிழ் டப்பிங்கிலேயே இருக்கிறது. யூடியூப்பிலும் கிடைக்கிறது. இந்த மாதிரி வித்தியாசமான படங்கள் பார்ப்பவர்கள் மட்டும் பாருங்கள். மற்றவர்கள் பார்த்துவிட்டு குழம்பி திட்டவேண்டாம்.

***

இது குடும்ப அமைப்பை கிரிட்டிசைஸ் பண்ணுற மேஜிக்கல்

ரியாலிச வகையறை...தங்கலான் மாதிரி...ஜெனிபர் லாரன்ஸ் நடிச்ச மதர் படமும் இதே மாதிரிதான்...ஒரு குடும்பத்தின் முக்கிய பணி என்ன...குழந்தை வளர்ப்பு...அது ஒரு தனி மனிதனை எவ்வாறு சுரண்டுகிறது ...அதற்காகவே வாழ்ந்து மடிந்து இறந்து போகும்போது காதலினால் வரும் துக்கம் மேலிட மனைவி அழும்போது வளர்ந்த குழந்தை அதை எவ்வாறு பார்க்கிறது...முதலாளித்துவத்தின் பிடியில் குடும்ப அமைப்பு வந்தபின்பு மனிதர்கள் எவ்வாறு மான்ஸ்டர்களாக மாற்றப்படுகிறார்கள் என்பதுதான் அந்த குழந்தையின் ஒவ்வொரு நடவடிக்கையும் பேச்சும்..

கிளைமாக்ஸ்ஸில் நாயகி ஒவ்வொரு அறையிலும் போய் பார்ப்பது அல்லது ஒவ்வொரு வீட்டிலும் போய் பார்ப்பது அந்தந்த குடும்பங்கள் வேறுமாதிரி சீரழிந்து கொண்டிருப்பதின் உருவகம்...

- @Magellan Michel படம் குறித்துத் தன் கருத்தைப் பகிர்கிறார்.

****

உலகில் உள்ள எல்லா உயிர்களுக்கும் உறைவிடம் தேவை என்பதே பறவைக் கூட்டை காட்டும் காட்சி. மேலும் அவைகள் வீடுகளை வாங்குவதில்லை அவைகளே கட்டி உருவாக்கிக் கொள்கின்றன என்பது அதன் பொருள்.

"விவேரியம்" என்பதன் பொருள் செல்ல பிராணிகளின் கூண்டு என்று கூறுகிறார்கள்.

இங்கே ரியல் எஸ்டேட் காரர்களும் பில்டர்களும் கட்டிக் கொடுக்கும் கூண்டுகளில் அடையும் செல்ல பிராணிகள் மக்கள்.

ரியல் எஸ்டேட் மார்க்கெட்டிங் செய்பவர்கள் நம்மை அழைத்துக் கொண்டு போய் கண்ணை கட்டி வழி தெரியாத இடத்தில் விட்டுவிட்டு நம்மை சிக்கலில் மாட்டிவிட்டு காணாமல் போய்விடுவார்கள் என்பதுதான் அந்த சேல்ஸ் எக்ஸிகியூடிவ் காணாமல் போகும் காட்சியின் அர்த்தம்.

மற்ற வீடுகளில் யாரும் இல்லை என்பதன் பொருள் யார் இருந்தும் பயனில்லை. மேலும் விற்காமல் பல ஆயிரம் வீடுகள் இன்று உலகில் உள்ளன.

மேலும் மொத்தமாக இருந்தாலும் நாம் அங்கு தனித்து விடப்பட்டவர்களே பொருளாதார ரீதியில்.

அந்தக் குழந்தையை வளர்த்தால் தப்பிக்கலாம் என்பதன் பொருள் அது இஎம்ஐ வட்டி வளர்ந்து கொண்டே இருக்கும் நாளுக்கு நாள் வேகமாக.

கூர்ந்து கவனித்தால் நிறைய பொருள்கள் மறைமுகமாக இருக்கும் அற்புதமான மெசேஜ் கூறும் படம். - PrahashArjun

What women want (2000)

அமெரிக்க காதல், கற்பனை கலந்த நகைச்சுவைத் திரைப்படம்

 

நாயகன் ஒரு ஜாலியான ஆள். விவாகரத்தானவன்.  நிறைய பெண்களுடன் உறவு வைத்துக்கொண்டு இருக்கிற ஆள். அவனுக்கு கல்லூரி செல்லும் வயதில் ஒரு பெண்.  ஒரு விளம்பர நிறுவனத்தில் வேலை செய்கிறான்.  அடுத்து தனக்கு தான் பதவி உயர்வு கிடைக்கும் என்ற எண்ணத்தில் இருக்கும் பொழுது, நிறுவனமோ… எங்கிருந்தோ  திறமையான நாயகியை அழைத்து வந்து அந்த பதவியில் வந்து அமர்த்துகிறார்கள்.

 

பதவி உயர்வு கிடைக்காத துக்கத்தில், தண்ணியைப் போட்டு சலம்பும் பொழுது, தவறி விழுந்து, மின்சாரம் ஷாக் அடித்து எழுந்ததில்…  பெண்களின் அருகே சென்றால் என்ன சிந்திக்கிறார்கள் என்பதை அறியும் சக்தி கிடைக்கிறது.

 

முதலில்  சுற்றி உள்ள பெண்களின் குரல்களை தொடர்ந்து கேட்கும் அவன் டார்ச்சர் அடைகிறான்.  நேரே அவனுடைய பெண் மருத்துவரைப் பார்த்தால், ”பெண்களின் மனதை பிராய்ட்டே அறிந்து கொள்ள முடியாமல் திணறிய விசயம்.  இது யாருக்கும் கிடைக்காத ஒரு வரம்.  சரியாக பயன்படுத்திக்கொள்” என அறிவுரை சொல்கிறாள்.

 

நிறுவனத்தில் நாயகியின் சிந்தனையை உணர்வதன் மூலம், அவளுடைய செயல்களை முன் கூட்டியே இவன் செய்துவிடுகிறான்.  பெண்கள் நினைப்பதை எல்லாம் அறிந்து கொள்வதால், அவன் வாழ்வில் என்னென்ன மாற்றங்கள் வந்தன என்பதை கொஞ்சம் உணர்வுப்பூர்வமாகவும், கலாட்டாகவும் சொல்லியிருக்கிறார்கள்.

 

****

ஒரு கற்பனை குட்டிக்கதை. ஒரு கார்ப்பரேட் சாமியார் வேறு ஒரு பவர்புல் சாமியாரை  பார்க்கும் பொழுது, உன்னை சந்திப்பவர்கள் என்ன சிந்திக்கிறார்கள் என அறியும் ஒரு மந்திரம் இருக்கிறது. நீ கற்றுக்கொள்ள விரும்புகிறாயா?  இவர் வேண்டாம் என மறுத்துவிடுகிறார்.  என்னைப் பார்த்தால், ஒருவன் புன்னகைக்கிறான். நல்ல மொழிகள் சொல்கிறான். அது போதும்.  உள்ளே பேசுவதை எல்லாம் கேட்க ஆரம்பித்தால், என் நிலை சிக்கலாகிவிடும் என்றாராம்.

 

பெண்களுக்கு வாய்விட்டு பேசுவதை கேட்பதற்கு தான் ஆட்கள் இல்லை. மனதில் உள்ளதை எல்லாம் ஒரு மனிதன் கேட்டால் என்ன ஆவான்? என்பதை ஜாலியாக, நேர்மறையாக எடுத்து கையாண்டிருப்பது நல்ல அம்சமாக இருந்தது. சில பெண்கள் வெளியே புன்னகைத்து கொண்டே பேசுவதும், உள்ளே வண்டை வண்டையாய் திட்டுவதையும் ஜாலியாக காட்டியிருக்கிறார்கள்.

 

மெல் ஜிப்சனை ஒரு சில படங்களில் சீரியசாக பார்த்துவிட்டு,  இப்படி ஜாலியாக பார்ப்பது நன்றாக இருக்கிறது.   நாயகியும் நன்றாக செய்திருக்கிறார்.  அதே போல மற்றவர்களும்! வெற்றிப்படமாகவும் ஓடியிருக்கிறது.

 

இப்போதைக்கு எந்த ஓடிடியிலும் இல்லை. வேறு வகைகளில் முயலுங்கள்.

விண்ணளந்த சிறகு - சு. தியடோர் பாஸ்கரன் இயற்கை சார்ந்த கட்டுரைகள்

திரை விமர்சகர், சுற்றுச்சூழல் ஆர்வலர் என தியடோர் பாஸ்கரன் பற்றி வெவ்வேறு இடங்களில் படித்து கேள்விப்பட்டிருக்கிறேன். ஆனால் அவருடைய புத்தகம் எதுவும் வாசித்ததில்லை. அந்த ஆர்வத்தில், கடந்த புத்தக திருவிழாவில், இந்தப் புத்தகம் கண்ணில்பட்டது. வாங்கினேன்.

அவர் தமிழ் இந்துவின் இணைப்பு இதழில் தொடர்ந்து எழுதிய கட்டுரைகளைப் புள்ளினங்கள், பாலூட்டிகள், தாவரங்கள், ஆளுமைகள், கருத்தாக்கங்கள் என தலைப்புகொடுத்து 35 கட்டுரைகளை தொகுத்து வெளியிட்டிருக்கிறார்கள்.

ஒரு பறவைப் பார்வையில் தமிழ்நாட்டில் (குறிஞ்சி மலர்) துவங்கி, குஜராத்தில் (காங்க்ரேஜ் மாடுகளைப் பற்றி) தொட்டுப்பேசி, இந்தியா முழுவதும் சுற்றி, பிறகு பரவலாக உலகமும் சுற்றி (ஆடுகளை லாவகமாக மேய்க்கும் ஆஸ்திரேலியா நாய்) வந்துவிடுகிறார்.

ஒவ்வொரு கட்டுரையிலும் நிறைய அடர்த்தியான செய்திகள் இருக்கின்றன. நகர்ப்புறத்தில் பிறந்து வளர்ந்ததினால், எல்லோருக்கும் தெரிந்த தாவரங்கள், விலங்கினங்கள் தான் நாம் அறிந்தவை. ஆசிரியர் ஒவ்வொரு தாவரத்தையும், விலங்கினத்தையும், பறவைகளையும் நம்மை உற்றுப் பார்க்க வைக்கிறார். கற்றுக்கொள்ள தூண்டுகிறார்.

எப்பொழுதும் சுதந்திரத்தின் மீது கவனமாய் இருப்பதால், பறவைகளை கூண்டில் பார்க்கும் பொழுது எரிச்சல் வரும். இதில் காதல் பறவைகள் என்று வேறு பாசம் காட்டுவார்கள். பறவைகள் பறந்தால் தான் அழகு. ஆசிரியர் ஒன்றை சுட்டிக்காட்டுகிறார்.

”சந்தைக்கு வரும் ஒவ்வொரு பறவைக்குப் பின்னாலும், ஒன்பது பறவைகளாவது உயிரிழந்திருக்கும். அதாவது பத்தில் ஒன்று தான் பிழைக்கிறது. மரங்களின் ஆழமான பொந்துகளில் அடைகாத்து குஞ்சு பொரிக்கும் பறவைகளைப் பிடிக்க மரத்தையே திருட்டுத்தனமாக வெட்டிவிடுகிறார்கள்”.

ஓரிடத்தில் “யாரொருவர் பறவைகளை கவனிக்க ஆரம்பிக்கிறாரோ, அவருக்கு புற உலகைப் பற்றிய ஒரு விழிப்பு ஏற்படும். அத்தகைய பிரக்ஞை இயற்கை சார்ந்த பல தளங்களுக்கு அவரை இட்டுச் செல்லும்”என்கிறார்.

கணக்கு வழக்கு இல்லாமல் காடுகளை அழிப்பதும், அதன் மூலம் பல உயிரினங்கள் மெல்ல மெல்ல அழிந்து வருவதையும் இந்தக் கட்டுரைகளின் மூலம் அழுத்தமாக பதிவு செய்திருக்கிறார். அதற்காக கவனப்படுத்தும், போராடும் மனிதர்களையும் அறிமுகப்படுத்துகிறார். இயற்கை எல்லோருக்குமானதால், எல்லோருக்கும் இந்த அக்கறை அவசியம். இந்த அக்கறை இல்லையென்றால், இயற்கையின் ஒரு பகுதி தானே மனிதன். அவன் மட்டும் ஆரோக்கியமாக வாழ்ந்துவிட முடியுமா என்ன?

ஆசிரியருக்கு நல்ல தமிழ் புலமை இருப்பதால், அவர் எழுதுவதைப் படிக்கையில் அத்தனை ஆசை ஆசையாய் இருக்கிறது. அடுத்தடுத்து அவர் எழுதிய புத்தகங்களை படிக்கவேண்டும் என ஆவல் வருகிறது. ஆங்கிலத்தில் நல்ல புத்தகங்களை மோசமாக மொழிப்பெயர்த்து கொன்றுவிட்டார்கள் என வருத்தப்படுகிறார். ஒரு நல்லப் புத்தகத்தைப் பார்த்ததும், இது அவர்களிடம் சிக்காமல் இருக்கவேண்டுமே என உண்மையிலேயே கவலைப்படுகிறார்.

வாங்கிப் படிக்க பரிந்துரைக்கிறேன்.

வெளியிடு : தமிழ் திசை

பக்கங்கள் : 122

விலை : ரூ. 150

தொடர் சேவையில் ஒரு புதிய சேவை

ஒரு ஜி.எஸ்.டி ஆலோசகராக, இ.எஸ்.ஐ. ஆலோசகராக, பி.எப் ஆலோசகராக சென்னையில் இயங்கி வருவதை நண்பர்களில் பலரும் அறிந்திருப்பீர்கள். நிறுவனங்களுக்கு மாதாந்திர ரிட்டன்களை தாக்கல் செய்யும் வேலைகளையும் செய்து வருகிறேன். நிறுவனங்களுக்காக கணக்குகளை ஒழுங்கு செய்து, தெரிந்த தணிக்கையாளர்கள் மூலமாக வருமான வரி தாக்கல் செய்தும் தருகிறேன்.

பி.காம். எம்.காம் படித்து, தொடர்ந்து 25 ஆண்டுகளுக்கும் மேலாக அக்கவுண்ட்ஸ் துறையிலேயே இருப்பதும் ஒரு பெரிய பாசிட்டிவ் தான். தொழிலை பொறுத்தவரையில் மிகவும் பிடித்தே செய்கிறேன். உரிய காலத்தில் வேலைகளை செய்வதையும் தொடர்ச்சியாக செய்து வந்திருக்கிறேன்.

ஜி.எஸ்.டி, இ.எஸ்.ஐ. பி.எப், வருமான வரி தொடர்பாகவும் தொடர்ந்து கட்டுரைகளை, குறிப்பாக நான் எழுதிய கட்டுரைகளையும் அவ்வபொழுது பகிர்ந்து வந்திருக்கிறேன். நீங்களும் படித்திருப்பீர்கள்.

இதன் தொடர்ச்சியில்… இப்பொழுது புதிதாக எல்.ஐ. சி முகவராகவும் பதிவு பெற்று அடையாள எண் பெற்றிருக்கிறேன் என்பதை பகிர்வதற்காக இந்த பதிவு.

கடந்த மாதத்தில் ஒரு வாரம் ஒரு முகவராக தேர்ச்சி பெறுவதற்கு தொடர்ந்து படித்துக்கொண்டிருக்கும் பொழுது தான், எல்.ஐ.சி முகவர் என்பது கூடுதல் வருமானம் பார்ப்பது மட்டுமில்லை! அது ஒரு பொறுப்பான வேலை என்பதை உணர முடிந்தது.

பாலிசி எடுப்பதோடு, ஒரு முகவராக அதற்குரிய பலனைப் பெற்றுக்கொள்வதோடு வேலை முடிவதில்லை. பாலிசி எடுத்ததின் பலனை உரியவர்களுக்கு பெற்றுத் தருவது வரை, பொறுமையாகவும், பொறுப்பாகவும் செயல்படவேண்டும் என்பதும் அவசியம் என்பதை உணர முடிந்தது.

பயிற்சியிலும் கூட கமிசனை மனதில் கொண்டு வேலை செய்யாதீர்கள். சந்திக்கும் நண்பர்கள், மக்கள் அவர்களுடைய தேவைகளில் இருந்து என்னவிதமான பாலிசி வேண்டும் என்பதை தேர்ந்தெடுக்க உதவி செய்யுங்கள். ஒரு சேவையாக செய்யுங்கள் என வழிகாட்டுவது பிடித்திருந்தது.

ஆகையால், எல் ஐ சி பாலிசி தொடர்பாக என்ன சந்தேகம் என்றாலும் அழையுங்கள். பழைய பாலிசிகளில் ஏதேனும் சந்தேகம் இருந்தாலும் அழையுங்கள். பாலிசியின் காலம் முடிந்துவிட்டால், அதனை எப்படி பெறுவது என்பதை அறிந்துகொள்வதற்காகவும் அழையுங்கள். கூடுதலாக உங்களுக்கு, உங்கள் குடும்ப உறுப்பினர்களுக்கு பொருத்தமான பாலிசி எடுக்கவும் அழையுங்கள்.

நன்றி.

தோழமையுடன்

இரா. முனியசாமி

9551291721

Kill (2023) இந்தி

நாயகன் ஒரு இராணுவத்தில் ஒரு அதிகாரி. ஒரு பெரும் பணக்காரப் பெண்ணை காதலிக்கிறார். அவளுக்கு வீட்டில் பார்த்த மாப்பிள்ளையோடு நிச்சயதார்த்தம். நிகழ்வுக்கே நேரே போய் சந்தித்து, ”இப்படியே என்னுடன் கிளம்பி வா கிளம்பலாம்” என்கிறார். ”உன்னைத்தான் கல்யாணம் செய்துப்பேன். இப்ப ரெம்ப சிக்கலாயிடும்! அவசரம் வேண்டாம்” என்கிறார்.

நிச்சயத்தார்த்ததை முடித்துவிட்டு, பெண் குடும்பம் விரைவு ரயிலில் கிளம்புகிறது. நாயகனும், அவருடைய நண்பரும் அதே ரயிலில் கிளம்புகிறார்கள்.

அதே ரயிலில் 40க்கும் மேற்பட்ட திருடர்கள் உள்ளே ஏறுகிறார்கள். குறிப்பாக ஏசி கோச்சில் ஏறுகிறார்கள். மற்ற கோச்சிகளில் இருந்து ஆட்கள் வருவதை கதவடைத்து தடுக்கிறார்கள். மக்களிடம் இருந்து எல்லாவற்றையும் பறிக்கிறார்கள். தடுப்பவர்களை உதைக்கிறார்கள்.

இதில் நாயகனும் நாயகனின் நண்பனும் அந்த கூட்டத்தோடு மோதுகிறார்கள். வழக்கமாக கொள்ளையடித்துவிட்டு போகிறவர்கள், குழுவில் ஒருவன் நாயகியின் அப்பா பெரும் பணக்காரர் என்பதால், கடத்தி பெரும்பணம் கேட்கலாம் என யோசனை சொல்கிறான்.

இந்த களேபரத்தில் சிலர் கொலை செய்யப்படுகிறார்கள். அங்கிருந்து படம் ரத்தக்களறியாக மாறிவிடுகிறது. கொள்ளையர்களிடமிருந்து தப்பித்தார்களா என்பதை ரத்தம் தெறிக்க தெறிக்க சொல்லியிருக்கிறார்கள்.

****

இதுவரை ரயிலில் எடுத்த சண்டைப் படங்களில் இந்தப் படம் நிச்சயம் முதல் இடத்திற்கு வந்துவிடும். அவ்வளவு சண்டைகள். அதே போல இந்திய சண்டைப் பயிற்சியாளரோடு, கொரியா சண்டைக்கார்களும் கைகோர்த்திருக்கிறார்கள். ஆகையால் இன்னும் வேகமாகவும், லாவகமாகவும் சண்டைகள் இருக்கின்றன.

ரயில் குறுகிய இடம் எப்படி என யோசித்தால், உண்மையான ரயிலைப் போல ஒரு செட்டை அமைத்து கச்சிதமாக எடுத்திருக்கிறாகள். அதைப் பற்றி ஒரு சின்ன காணொளி யூடியூப்பில் இருக்கிறது.

பொதுவாக தென்கொரியா படங்கள் உணர்வுப்பூர்வமாகவும் படத்தோடு ஒன்றோடு வைப்பதில் தேர்ந்தவர்கள். இந்தப் படமும் அப்படி ஒன்ற வைத்திருக்கிறார்கள்.

துவக்கத்தில் கொள்ளையர்கள் திட்டமிடும் பொழுது, இப்ப ஏறனும், குறிப்பிட்ட நேரத்தில் இறங்கிவிடவேண்டும் என நேரம் எல்லாம் சொல்வார்கள். ஆனால் திட்டமிட்டபடி அங்கு நடப்பதில்லை. ரயில் என்றால், இடையில் மக்கள் ஏறுவார்கள். இறங்குவார்கள். எப்படியாவது நிர்வாகத்திற்கு தெரிந்துவிடும். குறிப்பிட்ட காலம் வரைக்கும் எதுவும் தெரியாத அளவிற்கு இருப்பதாக சொல்வது ஒரு குறை.

இந்தப் படம் டிரெண்ட் செட்டர் போல அமைந்தால், இனி நிறைய இந்த மாதிரி படங்கள் வரும். அது தான் பயமாக இருக்கிறது.

இந்தப் படத்தின் நாயகன் லட்சயாவிற்கு முதல் படம் என்கிறார்கள். அப்படி தெரியவில்லை. அந்த கொள்ளையர்களின் தலைவனாக நமக்கெல்லாம் தெரிந்த ஆசிஷ் வித்யார்த்தி வருகிறார். கொள்ளையர்களில் ஒரு ஆளாக கொடூர ஆளாக ஒரு வித அலட்சியத்துடன் வரும் ராகவ் கவர்கிறார். இனி நிறைய படங்களில் பார்க்கலாம் என நினைக்கிறேன். நிகில் ராகேஷ் பட் இயக்கியிருக்கிறார்.

ஹாட் ஸ்டாரில் இருப்பதாக இணையம் சொல்கிறது. சண்டைப் பிரியர்கள் பாருங்கள். இளகிய மனம் கொண்டவர்கள் பார்க்காமல் இருப்பது நல்லது.

Lalitham sundharam (2022)

எளிமையானது அழகு

கேரளத்தின் வண்டிபெரியார் பகுதி. வால்பாறையின் குளிர் கொண்ட நிலமாய் இருக்கிறது. அந்த பெரியவர் சில பசங்களுக்கு வயலின் பயிற்சி தருகிறார். அவருடைய துணைவியார் உடல்நலம் சரியில்லாமல் இறந்துவிடுகிறார்.

அவருக்கு மூன்று பிள்ளைகள். மூத்தவர் கொச்சியில் சில தொழில்கள் செய்து, நொந்து நூடுல்சாகி இருக்கிறார். மனைவியுடன் பிணக்கு முற்றி, பிரியும் மனநிலையில் இருக்கிறார்.

இரண்டாவது மகள். மும்பையில் ஒரு பெரிய கார்ப்பரேட் நிறுவனத்தின் முதன்மை அதிகாரியாக பிசியாக இருக்கிறார். அவருடைய கணவர் கப்பல் துறையில் வேலை செய்து, குடும்பத்துடன் இருப்பதற்காக விருப்ப ஓய்வில் இருக்கிறார்.

மூன்றாவது மகன். பெங்களூரில் ஒரு கணிப்பொறி இன்ஜினியராக இருக்கிறார். ஒரு பெண்ணை காதலிக்கிறார்.

பிள்ளைகள் மூவரையும் சொந்த ஊருக்கு அம்மாவின் நினைவு நாளுக்கு அழைக்கிறார். அவர்களுடைய தொழில் நெருக்கடியில்… வந்த மறுநாளே கிளம்பும் மனநிலையில் மூவரும் இருக்கிறார்கள்.

அவர்களின் அம்மா இறப்பதற்கு முன்பு, ”வருடத்திற்கு ஒருமுறை எல்லோரும் வரவேண்டும். இங்கு சில நாட்கள் தங்கவேண்டும்” என கேட்டுக்கொண்டதை நினைவுப்படுத்தி, ”அதன் பிறகு உங்கள் விருப்பம்” என சொல்லிவிடுகிறார்.

அங்கு இருக்கும் சில நாட்களில் அவர்களுக்குள் என்ன நடந்தது? குடும்பத்தின் அருமையை பாசம், நேசம் கலந்து சொல்லியிருக்கிறார்கள்.

****

பொதுவாக குடும்பத்தின் பெருமையை சொல்கிற பல படங்கள் நெஞ்சை நக்குவதாக அமையும். சில இடங்களில் நெளிய கூட வைக்கும். மலையாள படங்களின் சமகால இயல்பு படி, மூன்று குடும்பங்களையும் அதன் இயல்புக்கு காட்டியிருப்பது நன்றாக இருக்கிறது. அந்த பெரியவர் தான் நினைப்பதை மெல்ல சொல்வதும் இயல்பு.

தனிநபர் குடும்பமே ஆளுக்கு ஒரு இடமாக சிதறுண்டு வாழும் சூழ்நிலையில், மூன்று குடும்பங்கள் இணைவது எல்லாம் நடைமுறையில் சாத்தியமா என இயல்பாய் கேள்வி எழுகிறது.

”பிள்ளைகள் வளர்ந்துவிட்டால் பங்காளிகள்” என ஒரு சொலவடை நினைவுக்கு வருகிறது. நிறைய குடும்பங்களில் நிறைய பிரச்சனைகள். அடுத்தடுத்த தலைமுறைகளையும் இந்த சண்டை கடுமையாக பாதிக்கிறது.

பிள்ளைகளுக்குள் நடக்கும் சண்டைகளை வைத்து, ஓரிடத்தில் தன் பேரப்பிள்ளைகளிடம் சொல்வது போல மற்றவர்களுக்கும் சொல்வார். ”எவ்வளவு வேண்டுமென்றாலும் சண்டைப் போடுங்கள். ஆனால் அதற்கும் அதிகமாக அன்பு செலுத்துங்கள்” என்பார். இந்தப் படம் சொல்லும் செய்தியும் அது தான்.

தோற்ற மனிதனாக பிஜீ, அதிகாரியாக மஞ்சு, அதிகாரியின் கணவராக சஜூ குருப் என படத்தில் எல்லாரும் அளவாக நடித்திருக்கிறார்கள். மஞ்சுவின் சகோதரர் மது இயக்கியிருக்கிறார். மஞ்சு தான் தயாரிப்பாளரும்!

திரையரங்குகளில் வெளியாகாமல் நேரடியாக டிஸ்னியில் வெளிவந்த படம் என இணையம் சொல்கிறது. ஆகையால் டிஸ்னி ஸ்டாரில் இருக்கிறது.

பெரிய எதிர்பார்ப்பு இல்லாமல் பாருங்கள். உங்களுக்கும் பிடிக்கும்.

நூறாவது நாள் (1984)

ஊட்டியில் படிக்கும் நாயகிக்கு ஒரு கனவு வருகிறது. அந்த கனவில் ஒருவன் நாயகியின் அக்காவை வீடு புகுந்து கத்தியில் குத்தி கொலை செய்கிறான். பதறி எழுந்து, சென்னையில் இருக்கும் அக்காவிற்கு போன் செய்து சொல்கிறாள். அவள் சமாதானம் சொல்கிறாள். ஆனால், அதற்கு பிறகு காணாமல் போய்விடுகிறாள்.

சில ஆண்டுகள் கழிகின்றன. இப்பொழுது நாயகி, பக்கத்து வீட்டில் இருக்கும் பணக்காரராக இருக்கும் நாயகனை ஒரு கல்யாண வீட்டில் பார்த்து... ஒரு கலாட்டாவில் துவங்கி, பின்பு காதல் செய்து, கல்யாணமும் செய்துகொள்கிறார்கள்.

இப்பொழுது அவளுக்கு மீண்டும் கனவு வருகிறது. அதில் அவளுக்கு தெரியாத ஒரு பெண் கொலை செய்யப்படுகிறாள். தன் உறவுக்காரரான மருத்துவரின் உதவியுடன் அந்த கொலையை தடுக்க தன்னளவில் விசாரிக்க துவங்குகிறாள். அதற்கு பிறகு அடுக்கடுக்கான பிரச்சனைகள்.

பிறகு என்ன ஆனது என்பதை சில திருப்பங்களுடன் படத்தை சொல்லி முடிக்கிறார்கள்.

****

படம் நன்றாக ஓடியிருக்கிறது. தனது குருநாதர் எடுத்த சிகப்பு ரோஜாக்கள் போல ஒரு படத்தை மணிவண்ணன் எடுத்திருக்கிறார். கதை கொஞ்சம் வித்தியாசமாக இருக்கிறதே எனப் பார்த்தால், 1977ல் வெளிவந்த ஒரு இத்தாலிய படத்தின் அதிகாரப் பூர்வமற்ற தழுவல் என்கிறது விக்கி.

ஆனால் இசையமைப்பாளர் கார்த்திக் ராஜா, ஒரு பேட்டியில், இந்தப் படத்தின் கதையை நம் ஆட்களிடம் ஆங்கில திரை நிறுவனம் கேட்டதாகவும், அந்த கதை தான் பிறகு ”மைனாரிட்டி ரிப்போர்ட்” (2002) என வந்ததாக ஆச்சர்யப்பட்டு சொன்னார். அந்தப் படத்தைப் பார்த்திருக்கிறேன். இப்பொழுது மங்கலாக நினைவில் இருக்கிறது.

ஒரு பெரும் பணக்காரன் அவனின் செயல்கள் எல்லாம் சிறுபிள்ளைத்தனமாக இருக்கின்றன. அவனின் உதவியாளராக வரும் ஜனகராஜ் பாத்திரம் எல்லாம் அபத்தமான பாத்திரம். ஆனால் கதையை நகர்த்துவதற்காக வைத்திருக்கிறார்கள்.

ஒரு காட்சியில் நாயகன் நாயகிக்கு வந்த அத்தனை பரிசு பொருட்களும் வீட்டில் பயன்படுத்தும் டெலிபோன்கள் என்பது நல்ல கற்பனை. நம்ம ஆட்கள் அப்படித்தான். ஒரு கட்டத்தில் கடிகாரங்களாக கொடுத்தார்கள். ஒரு கட்டத்தில் இரவு விளக்குகளாக கொடுத்தார்கள். இப்பொழுது நிலைமை மாறியிருக்கிறது என நினைக்கிறேன்.

பெரும் பணக்கார நாயகனாக மோகன், கனவில் வந்த பெண்ணின் கொலையை தடுக்க பதைபதைக்கும் நாயகியாக நளினி, பாய்ந்து பாய்ந்து சண்டை போடும் மருத்துவராக விஜய்காந்த், ஆரம்ப கால சத்யராஜ், ஜனகராஜ், தேங்காய் சீனிவாசன் என சிலரும் வந்து போகிறார்கள். இளையராஜா தான் இந்த மாதிரி திரில்லர் படங்களை தன் பின்னணி இசையால் காப்பாற்றியிருக்கிறார். ”விழியிலே மணி விழியிலே” பாடல் இந்தப் படத்தில் தான்.

அமேசானில் இந்தப் படத்தைப் பார்த்தும் பார்க்கலாமே என பார்க்க துவங்கினேன். யூடியூப்பிலும் இருக்க நிறைய வாய்ப்பிருக்கிறது. நேரம் நிறைய இருப்பவர்கள் பாருங்கள்.

The Blink (2024) கன்னடம்

நாயகன் ஒரு மேடை நாடக குழுவில் இருக்கிறான். பொருளாதார தேவைக்கு அவ்வப்பொழுது தற்காலிக எடிட்டிங் வேலை செய்துகொண்டிருக்கிறான். குழுவில் உள்ள ஒரு பெண்ணை காதலித்துக்கொண்டிருக்கிறான்.

அவனை திடீரென ஒரு வயதானவர் பின்தொடர்கிறார். ஏதோ சொல்ல முயல்கிறார். ஆனால் சட்டென காணாமல் போகிறார். நண்பர்களிடமும், காதலியிடமும் சொல்லி புலம்புகிறான். அவர்கள் கிண்டல் செய்கிறார்கள்., இப்பொழுது பின்தொடரும் ஆளோடு, தன்னைப் போலவே இன்னொருவனையும் பார்க்கிறான். குழப்பத்தின் உச்சிக்கே போகிறான்.

சில வருடங்களுக்கு முன்பு, கிராமத்தில் ஒரு நபருக்கு மைசூரில் இருந்து வந்த புதிய நபர் அறிமுகமாகிறான். பழகும் பொழுது, அந்த குடும்பத் தலைவனின் தங்கையை விரும்புகிறான். அந்த குடும்பத்துக்கு பிடித்துப் போனதால், திருமணத்திற்கும் சம்மதிக்கிறார்கள். திருமணமும் நடக்கிறது. அவளின் பிரசவ காலத்தில் ஒரு நாள் திடீரென காணாமல் போகிறான்.

இது ஒரு காலப்பயணம் (Time travel) செய்யும் ஒருவனின் கதை. அவன் ஒரு டைம் லூப்பில் (Time Loop) சிக்கிக்கொண்டிருக்கிறான். அதை சரி செய்ய போராடுகிறான்.

நாயகனை பின்தொடரும் அந்த நபர் யார்? என்ன சொல்ல வருகிறார்? கிராமத்தில் காணாமல் போனவன் யார்? என்பதை சுவாரசியமாய் சொல்ல முயன்றிருக்கிறார்கள்.

*****

2014ல் Predestination என ஒரு ஆஸ்திரேலியன் படம் வந்தது. காலப் பயண கதைகளில் புகழ்பெற்ற படம் அது. அந்தப் படத்திற்கு நன்றி சொல்லித் தான் ஆரம்பிக்கிறார்கள். அந்தப் படத்தை பார்த்திருப்பவர்களுக்கு இந்தப் படம் புரிந்துகொள்வது எளிது.

அந்த படத்தின் ஒன்லைனை எடுத்துக்கொண்டு, கிரேக்க தொன்ம கதைகளில் ஒன்றான இடிபஸ்ஸையும் இணைத்து நம் ஊருக்கு ஒரு கதை பண்ணியிருக்கிறார்கள். படத்தின் துவக்க அரை மணி நேரத்திற்கு பிறகு கொஞ்சம் விறுவிறுப்பாய் நகருகிறது.

காலப் பயணத்தை விளக்குவதில் துவக்க கால படங்கள் நிறைய நேரத்தை எடுத்துக்கொள்வார்கள். வருங்காலங்களில் இது எளிதாகும் என நினைத்தேன். அதே போல இந்தப் படத்தில் ஒரு கண்ணில் ஒரு சொட்டு மருந்து விட்டால், பயணம் செய்யலாம். , கண் இமைத்தால் மீண்டும் திரும்பி வந்துவிடுவோம் என கதை சொல்லிவிட்டார்கள்.

சமீபத்தில் காதல் டிராமா படம் ஒன்றை பார்த்த பொழுது, ஒரு இருட்டறைக்குள் நின்று நமக்கு தெரிந்த, இருந்த ஒரு தேதியை நினைத்துக்கொண்டால் போதும். அங்கு போய்விடலாம் என சிம்பிளாய் சுவாரசியமாய் ஒரு கதை சொல்லியிருந்தார்கள்.

ஆக காலப் பயணக் கதை வருங்காலத்தில் இன்னும் எளிமையாகும். நல்ல கற்பனை இருந்தால், நல்ல கதை சொல்லலாம் என்பது மட்டும் நிதர்சனம்.

இந்தப் படத்தில் அந்த அண்ணன் ஈர்த்தார். அதற்கு பிறகு நிறைய ஈர்த்தவர் தங்கையாக வரும் சைத்ரா. இந்தப்படம் இயக்கியவருக்கு முதல் படம் என்கிறார்கள். ஆச்சர்யம்.

அமேசானில் இங்கிலீஷ் சப் டைட்டிலுடன் கிடைக்கிறது. காலப்பயணம் சம்பந்தப்பட்ட, சுவாரசியமான படங்களை விரும்புபவர்கள் பாருங்கள். மற்றவர்கள் படத்தைப் பார்த்து என்னடா? குழப்புகிறார்களே என மனம் கலங்க வேண்டாம்.