> குருத்து: GSTPS
Showing posts with label GSTPS. Show all posts
Showing posts with label GSTPS. Show all posts

August 12, 2023

இன்று நடைபெற்ற இ.எஸ்.ஐ, பி.எப் குறித்த விளக்க கூட்டம் குறித்து!

 

அன்புள்ள GSTPS உறுப்பினர்களுக்கு,

 

வணக்கம்.  தலைவர் அவ்வப்பொழுது ஒரு தலைப்பில் பேசுங்கள் என சொல்லும் பொழுது, அது பெரிய வேலை.  ”அதற்கெல்லாம் நான் சரிப்பட்டு வரமாட்டோம்” என நம்பிக்கை ஆழமாய் இருந்தது.

ஆனால் நம் தலைவர் தான் விடுவதில்லையே! மீண்டும் வலியுறுத்துகிற பொழுது,  பேசலாம் என முடிவுக்கு வந்தேன்.

அதை முதலில், இ.எஸ்.ஐ, பி.எப் லிருந்து துவங்குவோம் என சொன்ன பொழுது, தலைவரும் நிர்வாகிகளும் ஏற்றுக்கொண்டார்கள்.


 

படிக்கத் துவங்கிவிட்டேன்.  வில்லியப்பன் சாரிடம் அவ்வப்பொழுது சந்தேகங்களை கலந்து பேசிக்கொண்டேன்.

பிபிடி குறித்த அறியாமையால், தட்டச்சு செய்து அதில் இடுவது தானே! என நானாக நினைத்துக்கொண்டேன்.  அந்த வேலையை செய்யும் பொழுது தான் அது எப்படிகவனத்துடனும், நீண்ட நேரம் எடுத்துக்கொள்ளும் என்பதும் புரிந்தது.  நேற்றும், நேற்றைக்கு முதல் நாள் இரவும் பிபிடிக்காக நேரம் செலவிட வேண்டியிருந்தது.

முதல் உரை என்பதால், கொஞ்சம் உள்ளுக்குள் மெல்லிய பதட்டம் ஓடிக்கொண்டே இருந்தது.  அந்த பதட்டம் மேலெழும்பி வந்துவிடகூடாது என்பதில் எனக்கு நானே மறைத்துக்கொண்டேன்.

முதல் உரையிலேயே தமிழிலும் தயாரிப்பது என்பதற்காக‌ கூடுதல் உழைப்பு தேவைப்பட்டது.  ஆனால் நம் தாய் தமிழுக்காகவும், அப்பொழுது தான் தமிழ் பேசும் பல தொழிலாளர்களுக்கும், பணியாளர்களுக்கும் சென்று சேரும் என நினைத்தேன்.  அதனால் அதில் உறுதியாக இருந்தேன்.

எப்பொழுதும் போல கூட்டத்திற்கு 10.25க்குள் உள்ளே நுழைந்த பொழுது, 15 பேருக்கும் மேல் இருந்தவர்களைப் பார்த்ததும், கொஞ்சம் ”பயம்” தான் வந்தது.


என் உரை வரி ஆலோசகர்களுக்கு கிடையாது. பி.எப்பை பயன்படுத்தும் தொழிலாளர்களுக்கானது என்பதால், அவர்களை மனதில் வைத்து அவர்களுக்கு புரியும் விதத்தில் இருக்கவேண்டும் என முடிவு செய்திருந்தேன். ஆகையால், செக்சன்களை, நிறைய புள்ளி விவரங்களை தவிர்க்கவேண்டும் என முடிவு செய்திருந்தேன்.

 


ஒரு மணி நேரத்திற்குள் பேசுவோமா, தாண்டிப் போகுமா என்ற பயம் இருந்தது.  அவ்வப்பொழுது நேரம் பார்த்து கொஞ்சம் வேகப்படுத்தி சமாளித்தேன். அநேகமாக 1.25 மணி நேரம் பேசியிருப்பேன் என நினைக்கிறேன்.

ஒரு தலைப்பில் படித்து, கலந்து பேசி, சந்தேகங்களை களைந்து, பிபிடி தயாரித்து பேசும் பொழுது தான் ஒரு உரை எத்தனை கடினம் என்பதை புரிந்துகொள்ள முடிந்தது.   நிறைய தேடித்தேடி படித்ததால், நிறைய கற்றுக்கொள்ள முடிந்தது.  அதற்காக தான் தலைவர் இவ்வளவு வலியுறுத்துகிறார் என்கிற ரகசியத்தையும் புரிந்துகொள்ள முடிந்தது.


நமது உறுப்பினர்களில் பெரும்பாலும் வரி ஆலோசகர்கள் தான். ஆகையால் நிறைய பேர் வரமாட்டார்கள் அல்லவா! என எனது கருத்தாக தலைவரிடம் தெரிவித்தேன். 40 பேர் வரை நம் கூட்டத்திற்கு இயல்பாக வருகிறார்கள். அதே எண்ணிக்கையில் வருவார்கள் என தெரிவித்தார். ஆனால்,  74 பேர் வரை கலந்துகொண்டார்கள். அதில் 28 பேர் நமது உறுப்பினர்கள் என்கிற செய்தி தலைவர் சொன்னது மகிழ்ச்சியாக இருந்தது. 

 

பொதுவிலும், தனிப்பட்ட முறையிலும் உரை குறித்த தங்களது கருத்துக்களை பகிர்ந்துகொண்டார்கள்.  அனைவருக்கும் நன்றி.

 

1.25 மணி நேரம் பேசி முடித்ததும், மொத்த ஆற்றலும் வடிந்தது போல இருந்தது. கேள்வி பதில் பகுதி முழுக்க இரண்டு மூத்தவர்கள்  Dr. வில்லியப்பன் அவர்களும், கோவை பெருமாள் அவர்களும் அனைத்து கேள்விகளுக்கும் பதில் சளைக்காமல் பதில் தந்தது அருமையாக இருந்தது. அவர்களுக்கு நன்றி.

 

பேச உற்சாகம் கொடுத்து பேச சொன்ன தலைவர் அவர்களுக்கும், நிகழ்ச்சியை சிறப்பாக ஒருங்கிணைத்து, வரவேற்புரை பேசிய  நமது இணைச்செயலர் செண்பகம் அவர்களும், நன்றியுரை வழங்கிய நமது பொருளாளர் செல்வராஜ் அவர்களுக்கும், மற்ற நிர்வாகிகளுக்கும் நன்றி.

முதல் உரை என்பதால், அது தந்த அனுபவத்தை உறுப்பினர்களிடம் பகிர்ந்துகொள்ளவேண்டும், இனி வகுப்பு எடுக்கப் போகும் புதியவர்களுக்கும் நிச்சயம் பயன்படும் என்பதற்காக தான் இந்த பதிவை எழுதுகிறேன்.

ஆகையால், புதியவர்கள் உற்சாகத்துடன் வகுப்பு எடுக்க முன்வாருங்கள்.

நன்றி.


குறிப்பு : தனிப்பட்ட முறையில் பேசும் பொழுது, பிபிடி பகிருமாறு கேட்டார்கள்.  சில விடுபடுதல்கள், எழுத்துப்பிழைகள், திருத்தங்கள்  செய்த பிறகு, குழுவில் பகிர்கிறேன்.

March 11, 2023

GSTPS - பொதுக்குழு குறித்து!

 



GSTPS பொதுக்குழு கூட்டத்தில் கிடைத்த சில அனுபவ பகிர்வுகள் 


சொசைட்டியின் செயல்பாடுகள்


நமது சொசைட்டி துவங்கி சில மாதங்களிலேயே ஆட்கொல்லி கொரானா உலகையே முடக்கிவைத்தது. இந்தியாவும் ஊரடங்கு அறிவித்தது. இந்த புதிய சூழ்நிலை. கடந்த சில பத்தாண்டுகளில் நாடும், மக்களும் எதிர்கொள்ளாதது.  20 நாட்கள் கடந்தன. நாம் இணைய வழி ஜூம் கூட்டங்களை ஏற்பாடு செய்து, வரிசையாக கூட்டங்கள் நடத்த ஆரம்பித்துவிட்டோம்.  கொரானாவிற்கு முந்தைய காலத்தில் மாதத்தில் ஒரு கூட்டம் என்றால், கொரானாவிற்கு பிறகு மாதம் நான்கு கூட்டங்களாக நடத்தியது பாராட்டத்தக்கது. கால நிலைமைகளுக்கேற்ப மாற்றிக்கொள்ளாத உயிரினங்கள் உலகில் நீடிப்பதில்லை என உயிரினங்களின் அறிவியல் நமக்கு போதிக்கிறது. அதுபோல தான் அமைப்பும் . புதிய நிலைமைகளுக்கு ஏற்ப சொசைட்டியின் செயல்பாடுகளும் உடனே மாறியது.  நமது தலைவர் கொரானா காலத்தில் அயல்நாட்டில் மாட்டிக்கொண்டார். இந்திய நேரத்திற்கு தன்னை தகவமைத்துக்கொண்டு, தொடர்ச்சியாக கூட்டங்களை ஒருங்கிணைத்தார்.  இந்த சொசைட்டி எப்பொழுதும் உயிர்ப்புடன் இருக்கும் என்பதற்கு இரண்டு நல்ல உதாரணங்கள்.



நிதி


ஒரு அமைப்பு ஆரோக்கியத்துடன் இருப்பதற்கு நிதி எப்பொழுதும் அவசியம். ஒரு மனிதர் தனிப்பட்ட முறையில் செலவாளியாக இருக்கலாம். ஆனால் சொசைட்டி உறுப்பினர்களுடன் பெறப்படும் கட்டணம், நன்கொடையாக பெறப்படும் பணம் என்பது பொதுப்பணம். அதை கையாளும் பொழுது மிகவும் பொறுப்பாக கையாளவேண்டும்.  அதை நிர்வாகிகள் நன்றாக புரிந்துவைத்திருக்கிறார்கள்.  அதனால் தான் ஒவ்வொரு செலவு செய்யப்படும் பொழுது கவனமாக இருக்கிறார்கள்.  (இருந்தாலும் இன்னொரு கீசெயினும் கொடுத்திருக்கலாம்.  ) அதனால் தான் நிதியை சேகரித்து பாதுகாப்பாக வங்கியில் வைத்திருக்கிறார்கள்.


பல அமைப்புகளில் தனது உறுப்பினர்களின் நலன்களுக்காக சிந்திக்கும் பொழுதும், செயல்படும் பொழுதும் அதை அமுல்படுத்த நிதி பற்றாக்குறை தான் கைகளை கட்டிப்போடும்.  இப்பொழுது நமது அமைப்பில் வருடாந்திர சந்தா என்பது மட்டும் பெறப்படுகிறது. சொசைட்டியில் பல்வேறு நிலைகளில், பல்வேறு வருமான அளவிலும் இருக்கிறார்கள்.  சொசைட்டி லாபம் ஈட்டுவதற்காக அல்ல! பொதுநலன் அடிப்படையிலான சேவையை முன்னிட்டு நிறுவப்பட்டது. அதனால தான் சொசைட்டியின் அடிப்படை செலவுகளை எதிர்கொள்வதற்காக குறைவான தொகையை தீர்மானித்து சந்தா என்ற பெயரில் வாங்குகிறார்கள்.  ஒரு சொசைட்டியின் இருப்பு, அதன் வளர்ச்சியின் பங்கில் பல நிர்வாகிகள், உறுப்பினர்கள் எல்லோரும் எந்தவித சன்மானமும் பெறாமல் உழைக்கிறார்கள் என்பதை நினைவில் கொள்ளவேண்டும்.  ஆகையால் கூடுதல் வருமானம் ஈட்டுபவர்கள் கூடுதல் நன்கொடை கொடுப்பதை வழக்கமாக்கி கொள்ளவேண்டும்.  ஒரு நிறுவனத்தில் வேலை செய்பவராயிருந்தால், போனஸ் என வாங்கும் பொழுது, சொசைட்டிக்கு ஒரு தொகையை தரலாம் என சிந்திக்கவேண்டும். கொடுக்கவேண்டும்.


சமீபத்தில் நம்மை விட்டு பிரிந்த நமது உறுப்பினர் சந்திரசேகர் அவர்கள் நேரிடையாக கூட்டம் நடக்கும் பொழுதெல்லாம், தலைவர் செந்தமிழ்செல்வன் சாரிடம் ஒரு குறிப்பிட்ட தொகையை நன்கொடையாக தருவார் என தலைவர் பகிர்ந்து கொண்ட பொழுது, நெகிழ்வாக இருந்தது. பலருடைய நலன்களுக்காக உழைக்கும் ஒரு அமைப்புக்கு நிதி எவ்வளவு அவசியம் என்பதை உணர்ந்திருந்தால் தான் அவர் தொடர்ந்து கொடுத்திருக்கிறார்.   அவரிடமிருந்து அந்த நல்ல பண்பை நாம் எடுத்துக்கொள்வோம்.


உறுப்பினர்களின் எண்ணிக்கை


ஒரு அமைப்புக்கு உறுப்பினர்களின் எண்ணிக்கை என்பது மிகவும் பிரதானமானது.  எவ்வளவுக்கு நாம் உறுப்பினர்களின் எண்ணிக்கையை அதிகப்படுத்துகிறோமோ அவ்வளவுக்கவ்வளவு சொசைட்டிக்கு நல்லது.  இந்த எண்ணிக்கையை அதிகப்படுத்தும் வேலையை நிர்வாகிகள் பார்த்துக்கொள்வார்கள் என சிந்திப்பது அல்லது அதைப் பற்றிய சிந்தனையே இல்லாமல் இருப்பது இரண்டுமே தவறு.


ஒவ்வொரு உறுப்பினரும் தனக்கு தெரிந்த நண்பர்கள், உறவினர்கள் என இந்த சொசைட்டி செயல்பாடுகள் யாருக்கு கிடைத்தால் பயன்பெறுவார்களோ அவர்களுக்கு தெரியப்படுத்தி அவர்களை உறுப்பினராக்கும் வேலையை செய்யும் ஒரு பணியை செய்வது அவசியமானது. தனது துறை சார்ந்த அறிவுக்காக எப்பொழுதும் தேடுதலோடு இருப்பவர்களுக்கு ஒருமுறை சொன்னாலே, சொசைட்டியில் இணைந்துவிடுவார்கள். நமது உறுப்பினர் Godwin Joe அப்படித்தான் நம்மோடு இணைந்தார். சிலருக்கு தொடர்ச்சியாக நமது கூட்ட நிகழ்வுகளை தொடர்ச்சியாக அனுப்புவதன் மூலம், ஒரு சில கூட்டங்கள் கலந்துகொண்ட பிறகு உறுப்பினராக முன்வருவார்கள். அதற்கும் சிலர் உதாரணங்களாக இருக்கிறார்கள்.


ஐந்து பேரிடம் தொடர்ச்சியாக பேசினால், ஒருவர் உறுப்பினராகிவிடுவார் என்பது தான் கடந்த கால அனுபவமாக இருக்கிறது.  ஆகையால் ஒவ்வொரு உறுப்பினரும் நம்மைச் சுற்றி உள்ளவர்களை மனதில் வைத்து அவர்களிடம் பேசுவதின் மூலம், சொசைட்டியின் செயல்பாடுகளை பகிர்ந்துகொண்டால் உறுப்பினர்களாவார்கள்.


நமது சொசைட்டியின் அனுபவமே கடந்த ஆண்டு இருந்தவர்கள் சிலர் அவர்களுடைய சொந்த காரணங்களால் விலகியிருக்கிறார்கள். நிர்வாகிகள் அவர்களுடன் தனிப்பட்ட முறையில் நட்புடன் பேசியதில் அதை உறுதியும் செய்திருக்கிறார்கள். ஆக சிலர் விலகுவது இயல்பு தான். எப்பொழுதும் ஒரு அமைப்பு உற்சாகத்துடன் இயங்கவேண்டும் என்றால், புதியவர்கள் உள்ளே வந்துகொண்டே இருக்கவேண்டும். அப்பொழுது தான் ஏற்கனவே இயங்கும் பொறுப்பாளர்களுக்கும் உறுப்பினர்களுக்கும் உற்சாகம் வரும். இல்லையெனில் பார்த்த முகத்தையே பார்ப்பது சோர்வையே தரும். 


அதே போல, ஒரு பேச்சாளர் ஒரு உரைக்காக பல மணி நேரங்கள் படிக்கிறார். நிர்வாகிகளுடன் விவாதிக்கிறார். உறுப்பினர்களுக்கு மனதில் எளிதாக பதியவேண்டும் என்பதற்காக வண்ணமயமாக PPT தயாரிக்கிறார். அவர் வகுப்பு எடுக்கும் பொழுது, நமது உறுப்பினர்களின் எண்ணிக்கையில் சரி பாதிபேர் தான் கலந்துகொள்கிறார்கள். அதற்கு குடும்ப நெருக்கடி, வேலை நெருக்கடி, உடல்நிலை என காரணங்களை முறையாக தெரிவிக்கிறார்கள்.  குறைவான எண்ணிக்கையில் உறுப்பினர்கள் கலந்துகொள்ளும் பொழுது அவர் நிச்சயம் சோர்வடைவார். இதற்காகவும் நாம் உறுப்பினர்களை அதிகப்படுத்துவது அவசிய தேவையாகிறது.


இன்னும் சில நல்ல விசயங்களை இன்றைய கூட்டத்தில் பகிர்ந்துகொண்டோம்.  அதை நாளை பேசுவோம்.

நன்றி.

August 3, 2022

நமது GSTPS (GST Professionals Society) மூன்று ஆண்டுகளை வெற்றிகரமாய் நிறைவு செய்திருக்கிறது.





புதிய நிர்வாகிகள் தேர்ந்தெடுக்கப்பட்டுள்ளார்கள். அவர்களுக்கு வாழ்த்துகளை தெரிவித்துக்கொள்கிறோம்.

தமிழ்த்தாய் வாழ்த்துப் பாடலுடன் இனிதே துவங்கியது. நமது சொசைட்டியின் பொதுக்குழு கூட்டத்தில் பெரும்பான்மையான உறுப்பினர்கள் கலந்துகொண்டது இன்னும் சிறப்பாக இருந்தது.

நமது சொசைட்டியின் தலைவர் (President) செந்தமிழ்செல்வன் கடந்த வந்த பாதையை உறுப்பினர்களுடன் பகிர்ந்துகொண்டார்.

நிதிநிலை அறிக்கை ஏற்பு

சொசைட்டியின் பொருளாளர் சுந்தர்ராம் கல்யாண் வரவு, செலவு, நிதிநிலை அறிக்கையை முன்வைத்தார். சொசைட்டி துவங்கிய பிறகு கடந்த இரண்டு ஆண்டுகளுக்கு மேலாக கொரானா காரணமாக ஊரடங்கு அறிவிக்கப்பட்டது. அதனால் நேரடி சந்திப்புக்கு வாய்ப்பில்லாததால், தொடர்ந்து ஜூம் வழியாக கூட்டங்கள் நடத்தப்பட்டது. ஆகையால், செலவுகள் மிகவும் குறைவாக செய்யப்படாததால், நிதி கையிருப்பு கூடுதலாக சொசைட்டியின் வசம் இருந்தது. அதில் ஒரு தொகையை வைப்பு நிதியாகவும் (Fixed Deposit) போட்டு வைத்திருக்கிறார்கள். அவ்வப்பொழுது ஏற்படும் சிநன்றி சின்ன செலவுகளை பொறுப்பில் இருப்பவர்கள் தங்கள் செலவில் செய்து வந்திருக்கிறார்கள். ஆகையால், உற்சாகமாக நிதி நிலை அறிக்கை உறுப்பினர்களின் ஆதரவுடன் ஏற்றுக்கொள்ளப்பட்டது.

நிர்வாகிகள் தேர்வு

சொசைட்டியின் தலைவர், துணைத்தலைவர், செயலர், இணைச்செயலர், பொருளாளர், செயற்குழு உறுப்பினர்கள் பதவிகளுக்கு தேர்தல் நடத்தப்பட்டது. ஏற்கனவே அனைத்து உறுப்பினர்களுக்கும் தேர்தல் குறித்து முறையாக தெரிவிக்கப்பட்டிருந்தது. நிர்வாக பொறுப்புகளுக்கு முன்வருபவர்கள் முன்வாருங்கள் என கோரப்பட்டிருந்தது. உறுப்பினர்களிடமிருந்து புதிதாக யாரும் முன்வராததால், ஏற்கனவே பொறுப்பில் இருந்தவர்களே, சில பொறுப்புகளுக்கு மட்டும் சிலரை மாற்றி முன்வைத்தார்கள்.

தேர்தலை கண்காணிக்கும், நடத்தும் பொறுப்பை நமது உறுப்பினர்களில் மூத்தவரான பட்டய கணக்காளர் ஓம் பிரகாஷ் அவர்கள் ஏற்றுக்கொண்டிருந்தார்.

ஒவ்வொரு நிர்வாக பதவிக்கும் ஒரு உறுப்பினர் மட்டுமே முன்மொழியவேண்டும். ஒரு உறுப்பினர் மட்டுமே வழிமொழியவேண்டும் என வழிகாட்டப்பட்டது. அதன்படி, ஒவ்வொருவரும் பதவியேற்றுக்கொண்டனர். பொறுப்பேற்ற அனைவருக்கும் அனைத்து உறுப்பினர்களும் ஏகோபித்த பாராட்டுகளை தங்களது கைதட்டல்கள் வழியே வழங்கினார்கள். புதிய நிர்வாகிகளுக்கு உறுப்பினர்களில் சிலர் முன்வந்து வாழ்த்தி பேசினார்கள்.

வேலைகள் அதிகமாவதால், (Acting) செயற்குழுவிற்கு புதிதாக நான்கு பேர் தேர்வு செய்யப்படுவார்கள் என ஏற்கனவே நிர்வாகிகளால் அறிவிக்கப்பட்டிருந்தது. இதில் உற்சாகமாக முன்வந்த நால்வரை நிர்வாகிகள் தெரிவிக்க உறுப்பினர்கள் முன்மொழிய, வழிமொழிய அவர்களும் உற்சாகமாக பொறுப்பு ஏற்றுக்கொண்டனர்.

நமது சொசைட்டியின் ஒவ்வொரு கூட்டமும் ஜி.எஸ்டி குறித்த புரிதலை உருவாக்கும் கூட்டம் தானே! சமீபத்தில் ஜி.எஸ்.டி கவுன்சில் அரிசி, மற்றும் அடிப்படை உணவு பொருட்களுக்கு வரி விதிக்கப்பட்டு இருந்தது. அது குறித்து தலைவர் செந்தமிழ்செல்வன் விவாதத்தை துவக்கிவைத்தார். கிட்டத்தட்ட 45 நிமிடங்களுக்கு மேலே விவாதம் சுறுசுறுப்பாக நடைபெற்றது. ஜி.எஸ்.டி குறித்த புரிதலை தந்தது.
சரியாக ஒரு மணிக்கு கூட்டம் முடிவுற்றது. ஒரு சுவையான மதிய உணவு எல்லோருக்கும் ஏற்பாடு செய்யப்பட்டிருந்தது. இந்த கூட்டம் புதிய இடமான எழும்பூர் பகுதியில் பெரியார் நெடுஞ்சாலையில் அமைந்திருந்த YWCA கட்டத்தில் நடைபெற்றது. கூட்டம் நடத்துவதற்கு அருமையான இடம்.

எல்லா ஏற்பாடுகளையும் சிறப்பாக ஏற்பாடு செய்த நிர்வாகிகளுக்கு நன்றி.

July 9, 2022

மூன்றாம் ஆண்டு கொண்டாட்டமும்... மெல்ல எழும் நினைவுகளும்


மூன்றாம் ஆண்டு கூட்டம் குளு குளு ஏற்காட்டில் என பேச்சு ஆரம்பித்து, உறுப்பினர்களின் பர்சை பதம் பார்த்துவிடக்கூடாது, எல்லோரும் கலந்துகொள்ள‌வேண்டும் என்ற தொலைதூர சிந்தனையால், இறுதியில் உள்ளூரிலேயே சந்திப்பு என முடிவானது.  அது அப்படித்தான். ஒரு குழந்தை பிறந்ததும் எழுந்து ஓடிவிடுகிறதா என்ன?  தவழும். தத்தி தத்தி நடக்கும். பிறகு தான் ஓட ஆரம்பிக்கும். ஓட ஆரம்பித்த பிறகு நம்மால் தான் பிடிக்கமுடியாது. 


நிறைய பயணங்களை கடந்துவந்திருக்கிறேன். பெரும்பாலோர் நேரத்துக்கு வந்தது இந்தப் பயணத்தில் தான்.  எல்லா பயணங்களிலும் அந்த "இரண்டு பேர். ஒருவர்" கொஞ்சம் தாமதமாக தான் வந்து சேர்வார்கள். உலகம் உருண்டை என இப்படித்தான் நாம் நிரூபித்துக்கொள்கிறோம்.  🙂


காலையில் அந்த மினி டிபன் சுவையான உணவு. நமக்காக முன்கூட்டியே சாப்பிட்டு சோதித்து, அத்தனை பேரின் வயிறையும் நிர்வாகிகள் காப்பாற்றிவிட்டார்கள். சிரமங்கள் மேற்கொண்ட சந்திரசேகர் அவர்களுக்கு மிக்க நன்றி. அத்தனை டிராபிக்கிலும், திட்டமிட்ட நேரத்தில் போய் சேர்ந்துவிட்டோம். கூட்டத்தையும் துவங்கிவிட்டோம். 


உறுப்பினர்களின் சுய அறிமுகம். அவசியம் தேவை.  உறுப்பினர்களின் எண்ணிக்கை எதிகம் என்பதால்,  விரிவான சுய அறிமுகமாகிவிட்டது. இருப்பினும் எல்லா உறுப்பினர்களும் ஒவ்வொருவரைப் பற்றி அறிந்துகொள்ள முடிந்தது. 



நானெல்லாம் எப்பொழுதும் கடைசி பெஞ்ச் மாணவன் தான். ஆனால், அந்த அரங்கில் பின்னாடி இருந்த‌தால், எவ்வளவு உன்னிப்பாக கவனித்தாலும் மைக் சத்தம் தெளிவாக கேட்கவில்லை. ஒரு கட்டத்தில் களைப்பாகி முன்னாடி வந்து உட்கார்ந்துவிட்டேன். 


மூன்று ஆண்டில் சொசைட்டி கடந்து வந்த பாதை குறித்து நிர்வாகிகள் சொல்ல சொல்ல‌ விரிவாக பதிந்தார்கள். அவசியமான பதிவு. ஆனால் அந்த சமயம் மட்டும் கொஞ்சம் தொய்வு ஏற்பட்டதாக எனக்குப்பட்டது. சொசைட்டி துவங்கும் எண்ணம் எப்பொழுது முதலில் உருவானது? எப்படி சாத்தியப்படுத்தினோம். நிர்வாகிகள் ஒவ்வொரு கூட்டத்தையும் எத்தனை திட்டமிடலுக்கு பிறகு கூட்டம் நடத்துகிறோம். எங்கெல்லாம் நமக்கு தெரிந்தவர்கள் இருக்கிறார்கள். எல்லோரையும் எப்படி நட்புடன் பராமரிக்கிறோம். உறுப்பினர்களின் வளர்ச்சிக்காக என்னென்ன திட்டங்களை அமுல்படுத்தினோம். உறுப்பினர்களின் எண்ணிக்கையை அதிகப்படுத்துவதற்காக என்னென்ன செய்தோம் என்பதை ஒவ்வொரு நிர்வாகியும் அவரவர் அனுபவத்தை லைவ்வாக சொல்லியிருந்தால் மூன்று ஆண்டு கடந்து வந்த பாதை இன்னும் உயிர்ப்புடன் இருந்திருக்கும். அனைத்து உறுப்பினர்களும் உங்கள் அனுபவத்தை தங்கள் அனுபவமாக உள்வாங்கியிருப்பார்கள். (இது எனது ஆலோசனை தான். இதை பேருந்திலேயே தெரிவித்தேன்.)


"செயற்குழு ஒன்றை உருவாக்க யோசித்து அழைப்புவிடுத்திருக்கிறோம்.  சொசைட்டியை உற்சாகமாக கொண்டு செல்ல ஆர்வத்துடன் முன்வாருங்கள்" என செந்தமிழ்ச் செல்வன் சார் கேட்டுக்கொண்டார். ஒரு அமைப்பு என்பது அறிவும், அனுபவமும் உள்ள மூத்தவர்களும், இளரத்தம் ஓடுகிற இளைஞர்களும் கலந்து செயல்படவேண்டும்.  அப்பொழுது தான் சொசைட்டியின் செயல்பாடுகள் இன்னும் வேகமெடுக்கும்.  செயல்பட இளைஞர்கள் தாமாக முன்வரவேண்டும் என கேட்டுக்கொள்கிறேன்.


சாப்பாடு. நல்ல சாப்பாடு. சந்தோஷ் சுப்பிரமணியன் படத்தில் ஜெனிலியா தனக்குத் தானே சொல்லிக்கொள்வது போல, "நிறைய ஐயிட்டம் இருக்கு. கொஞ்சமா சாப்பிடு. கொஞ்சமா சாப்பிடு" எனக்குள் நானே சொல்லிக்கொள்ளவேண்டியதாகிவிட்டது.  🙂


விளையாட்டுகளில், கிரிக்கெட் ஹைலாட்டாகிவிட்டது.  காற்றே இல்லை. வெயிலில் தாக்கம் அதிகமாக இருந்தது. இருப்பினும்  மிகவும் கர்ம‌ சிரத்தையாக இரண்டு முறை விளையாடினார்கள்.  புல் தடுக்கி எல்லாம் விழுந்தார்கள். சிரித்தார்கள். கோபப்பட்டார்கள். கிண்டல் செய்தார்கள். அழுகை மட்டும் தான் இல்லை. ஒரு விளையாட்டில் எல்லா உணர்ச்சிகளையும் காட்டினார்கள். 😍


இதில் எனக்கு ஹைலெட். என்னை இரண்டாவது விளையாட்டில் ஒன்லி ஒன் அம்பயராக்கியது தான். எனக்கு கிரிக்கெட் தெரியாது என உண்மையை சொன்னேன். விளையாட்டுக்கு சொல்கிறேன் என நினைத்து... அம்பயராக்கிவிட்டார்கள். பள்ளிக் காலத்தில் மட்டும் சில மாதங்கள் மட்டும் கிரிக்கெட் அத்தனை ஆர்வமாயிருந்தது.  பிறகு அந்த ஆர்வம் சுத்தமாக போய்விட்டது. சும்மா ஜாலிக்காகத்தானே விளையாடுகிறார்கள் என நினைத்தேன். விளையாட்டில் மேலே சொன்ன அத்தனை உணர்ச்சிகளும் உள்ளே வந்த பொழுது கொஞ்சம் தடுமாறித்தான் போனேன்.  ஒரு வீரரின் வாழ்வா சாவா என முடிவு செய்வது கூட என் கையில் வந்தது. பிறகு சுதாரித்துக்கொண்டு, ஒரு பேப்பரை எடுத்து பொறுப்பாக குறிக்க‌ துவங்கிவிட்டேன்.  வாழ்வில் மறக்க முடியாத சம்பவம் இது. 😇


அதன் பிறகு கொஞ்சூண்டு பரிசல், கொஞ்சூண்டு கேரம், கொஞ்சூண்டு செஸ் என பல  உறுப்பினர்கள் உற்சாகமாக விளையாடினார்கள்.


பேருந்தில் கிளம்பிய பொழுது, ஒவ்வொருவரும் அவரவர் அனுபவத்தை நன்றாக‌ சொன்னார்கள். அடுத்தமுறை ஒரு மைக், ஸ்பீக்கரும் ஏற்பாடு செய்தால்  பேருந்தில் கடைசிவரை உறுப்பினர்கள் என்ன‌ சொன்னார்கள் என கவனமாக கேட்டிருக்கும் வாய்ப்பு கிடைத்திருக்கும்.


பலரும் பல ஆலோசனைகளை சொன்னார்கள். அதில் ஒரு உறுப்பினர் சொன்ன ஆலோசனை "தங்கத்தை" விட மதிப்பு வாய்ந்தது. ஒவ்வொரு உறுப்பினரும் தங்களது சுக துக்கங்களை சொசைட்டி உறுப்பினர்களுடன் பகிர்ந்துகொள்ளவேண்டும்.  அதில் உறுப்பினர்களும் தவறாது கலந்துகொள்ளவேண்டும். அப்பொழுது தான் உறுப்பினர்களிடையே நெருக்கம் வரும். இனி அந்த பழக்கத்தை கடைப்பிடிப்போம்.


ஒரு பயணம் முடிந்ததும், அடுத்த பயணத்திற்கான துவக்கத்திற்கான ஆலோசனையும், உடனடியாக அமுல்படுத்தவும் துவங்கிவிட்டார்கள். இன்னொருமுறை பயணம் கிளம்பும் பொழுது பணம் தடையாக இருக்ககூடாது என ஆலோசனை சொன்னார்கள். மாதம் ஒரு தொகை தருகிறோம். பணம் தடையாக மாறாது என பலரும் ஆமோதித்தார்கள். சிலர் முதல் மாத தவணைத்தொகையை உடனே அனுப்பிவைத்துவிட்டார்கள். இதோ குழந்தை தவழத்துவங்கிவிட்டது. அடுத்து ஓடத்துவங்கும். நாம் நம்புவோம்.


பிறகு கீச்செயின் நன்றாக  இருந்தது. தினசரி பயன்பாட்டிற்கு உகந்தது..  வீட்டிற்கு வந்ததும் நினைவுக்கு வந்தது. எல்லோருக்கும் இரண்டு கீச்செயினாவது கொடுத்திருக்கலாம் என தோன்றியது.


முக்கிய குறிப்பு : இந்த ஒருநாள் பயணத்திற்கு நிர்வாகிகள் கொடுத்த கடுமையான‌ உழைப்பும், சக உறுப்பினர்கள் கொடுத்த உழைப்பும், ஒத்துழைப்பும் மிக முக்கியமானவை.  இந்த கடுமையான உழைப்பு இல்லாமல், இந்த பயணமும், மகிழ்ச்சியும் சாத்தியமில்லை.  நிர்வாகிகள் அனைவருக்கும் நன்றி.  இதில் உணவு, பேருந்து, ரிசார்ட்டில் பதிவு செய்வது, வரத்தயங்கிய சில உறுப்பினர்களிடம் தொடர்ந்து பேசி என‌ எல்லா ஏற்பாடுகளிலும் தன் உழைப்பைத் தந்து, கடைசி நேரத்தில் உடல் நிலை சரியில்லாது வரமுடியாமல் போன நாராயணசாமி சாரை பலரும் பல சமயங்களில் நன்றிகளுடன் நினைவுப்படுத்தினார்கள்.  உடல்நலம் சரியில்லாமல் இருந்தும் நிகழ்ச்சி சிறப்பாக அமையவேண்டும் என்ற அயராத உழைப்பை, நல்ல  பண்பை எல்லோரும் அவரிடமிருந்து கற்றுக்கொள்வோம்.


-