Timecrimes (2007) ஸ்பானிஷ்

கால பயண (Time travel) திரில்லர் கதை

நடுத்தர வயது நாயகன் வீட்டுக்கு பொருட்களை வாங்கிக்கொண்டு வீட்டுக்குவருகிறான். மனைவி வீட்டை சுத்தப்படுத்தும் வேலையில் இருக்கிறார். வீட்டிற்கு பின்னால் உள்ள புல்வெளியில் ஹாயாக ஒரு சேரைப் போட்டுக்கொண்டு ஒரு பைனாகுலரை வைத்துக்கொண்டு சுற்றி உள்ள மரங்கள் அடர்ந்த இடத்தை வேடிக்கைப் பார்க்கிறான்.

மரங்களுக்கு மத்தியில் ஒரு இளம்பெண் தனியாக நிற்கிறாள். மனைவி வெளியே கிளம்பியதும்… மீண்டும் தொடர்கிறான். இப்பொழுது அந்தப் பெண்ணை காணவில்லை. மீண்டும் தேடும் பொழுது, அவள் தன் மேலே போட்டிருந்த டீசர்ட்டை கழற்றுகிறாள். இவன் ஆர்வம் அதிகமாகி, அந்த இடத்துக்கு போகிறான். மரங்களுக்கு இடையே நடந்துப் போய் பார்த்தால்… அந்தப் பெண் மயக்கத்தில் துணியே இல்லாமல் ஒரு பாறையில் சாய்ந்து இருக்கிறாள். அருகே போனதும், பின்னால் இருந்து யாரோ கத்திரியால் அவன் கையில் குத்த… அய்யோ!வென அலறிக்கொண்டு ஓடுகிறான்.

தட்டுத்தடுமாறி ஒரு வேலியைத் தாண்டி, ஒரு தனியார் இடத்திற்குள் நுழைகிறான். அங்கே ஒரு கட்டிடம் இருக்கிறது. உதவி கேட்கலாம் என அங்கு போனால் யாருமே இல்லை. ஒரு வாக்கி டாக்கி கிடைக்கிறது. அதில் பேசியவனிடம் நடந்ததைச் சொல்லி, காப்பாற்ற கோருகிறான். பக்கத்து கட்டிடத்தில் தான் இருப்பதாகவும், இப்பொழுது அங்கு வருவதாகவும் கூறுகிறான்.

வந்தவன் ”உன்னை கொலை செய்ய வந்தவனிடம் இருந்து காப்பாற்றுகிறேன். இந்த இயந்திரத்திற்குள் நுழைந்துகொள்” என்கிறான். இவனும் வேறு வழியின்றி உள்ளே போகிறான். சிறிது நேரத்தில் மூடிய இயந்திரம் திறக்கிறது. நாயகன் வெளியே வந்து பார்த்தால், நல்ல வெளிச்சம் இருக்கிறது. உள்ளே நுழைந்த பொழுது நன்றாக இருட்டிவிட்டதே என யோசித்து அவனிடம் கேட்டால், ”டைம் டிராவல் செய்திருக்கிறாய். இப்பொழுது ஒரு மணி நேரத்திற்கு முன்பாக இருக்கிறாய்” என சொல்கிறான்.

இப்பொழுது பைனாகுலரில் பார்த்தால், நாயகன் தன் வீட்டு புல்வெளியில் அமர்ந்துகொண்டு பைனாகுலரில் அந்தப் பெண்ணை பார்த்துக்கொண்டிருக்கிறான்.

இதற்கு பிறகு நடந்த களேபரத்தால், ஒரு அசம்பாவிதம் நடக்கிறது. அதை சரி செய்ய அடுத்தடுத்து நாயகன் செய்கிற முயற்சிகளும் சொதப்ப… இறுதியில் என்ன ஆகிறது என்பது தான் கதை.

****

ஒன்றரை மணி நேரம் தான் மொத்தப்படமே! டைம் டிராவல் தான் கதை. ஒரு சாமான்யன் இதில் மாட்டிக்கொண்டால், பயத்திலும், பதட்டத்திலும் அவன் செய்கிற குழப்பங்கள் தான் கதை. புரிஞ்சவரைக்கும் புரிஞ்சுக்க என எந்தவித விளக்கத்தையும் படக்குழு கொடுக்காமல் விட்டுவிட்டது. ஆகையால் படம் பார்த்தவர்கள் நிச்சயம் குழம்பிபோவார்கள். கொஞ்சம் நிதானமாக அசைப்போட்டு யோசித்தால் தான், என்ன நடந்தது என புரிந்துகொள்ள முடியும். முன்பு Triangle என ஒரு படம் பார்த்தேன். டைம் டிராவல், லூப் குறித்தெல்லாம் தெரியாத காலம். மண்டை காய்ந்துவிட்டது.

மொத்தமே நான்கு கதாப்பாத்திரங்கள் தான். டைம் டிராவல் மூலம் கூடுதல் கதாப்பாத்திரங்கள் உருவாகி, கதையை கட்டமைக்கிறது. இதில் அந்த கட்டிடத்தில் இருந்தவர் கதைப்படி விஞ்ஞானி என்கிறார்கள். அந்த ஆளிடம் இதை எப்படி சரி செய்வது என நாயகன் விவாதிக்கவேயில்லை. தனக்கு தெரிந்த அளவிலேயே நடந்த குழப்பங்களை சரி செய்ய முயல்கிறான். ஏன்?

மனிதாபிமான அடிப்படையில் ஒரு பெண் உதவி செய்யப் போனால், இப்படியா பண்ணி வைப்பீங்க! பாவம். இதற்கு தாங்க எது நடந்தாலும் கண்டுக்காம பல பேர் போயிடாறாங்க!

மலையாள நடிகர் பிருத்விராஜ் இந்தப் படத்தின் கதையை வாங்கியதாக செய்தி சொல்கிறார்கள். படம் எடுத்தாரா? தெரியவில்லை.

டைம் டிராவல் படங்களில் ஆர்வமுள்ளவர்கள் பார்க்கலாம். இப்போதைக்கு எந்த ஓடிடியிலும் இல்லை. கொரானா காலத்தில் கிடைத்ததை, இப்பொழுது தான் பார்த்தேன்.

Fly Boys (2006)

 

"போர் வீரர்கள் போர் செய்ய மறுக்கும் போது, ​​தொழிலாளர்கள் கப்பல்கள் மற்றும் விமானங்களில் ஆயுதங்களை ஏற்ற மறுக்கும் போது, ​​உலகம் முழுவதும் உள்ள பேரரசின் பொருளாதார புறக்காவல் நிலையங்களை மக்கள் புறக்கணிக்கும் போது மட்டுமே போர்கள் நிறுத்தப்படும். ”

― அருந்ததி ராய்,

பேரரசின் காலத்தில் பொது அதிகாரம்

முதல் உலகப்போர் காலகட்டம் (1916). ஜெர்மன் படைகள் மெல்ல மெல்ல பிரான்சுக்குள் ஆக்கிரமித்துக்கொண்டு இருக்கிறார்கள். பிரான்சின் விமானப் படைக்கு ஆட்கள் நிறைய தேவைப்படுகிறார்கள். போர் அப்படித்தான். வெறிகொண்ட பூதம். மனிதர்கள், பொருட்கள் என எல்லாவற்றையும் தின்று செரித்து, இன்னும் வேண்டும் என கேட்டு நிற்கும்.

நட்பு நாடுகளுக்கும் அழைப்பு விடுக்கிறார்கள். அந்தச் சமயத்தில் அமெரிக்கா இன்னும் போருக்குள் உள்ளே வரவில்லை. நட்பு நாடுகளில் உள்ளவர்களும் வரலாம் என அழைப்பு விடுக்கிறார்கள். யாராவது போரில் சண்டையிட்டு சாகலாம் என அழைத்தால் வருவார்களா! ஆனால், நாயகனும் இன்னும் வேறு வேறு பகுதிகளில் இருந்து சிலரும் அமெரிக்காவில் இருந்து கிளம்பி பிரான்சுக்கு வருகிறார்கள். ரயிலில் வந்து இறங்கும் பொழுதே, நிறைய பேர் கை, கால் இழந்து, ரயிலுக்காக காத்திருக்கிறார்கள்.

வந்து சேர்கிறவர்களுக்கு வாழ்வே மாயம் படத்தில் க்ளைடர் விமானம் வருமே! அந்த விமானத்தைப் போல இன்னும் பழைய மாடலில் தோற்றம் இருக்கிறது. அதை இயக்குவதற்கும், சுடுவதற்கும் பயிற்சி அளிக்கப்படுகிறது. ஒருமுறை போர்க்களத்திற்கு போய்வந்தால், சிலர் இறந்துவிடுகிறார்கள். நாயகனிடம் உயரதிகாரி உனக்கு சொந்தம்னு இருக்கிற இடத்தில் எதையும் எழுதவில்லை. நாளைக்கு உனக்கு ஏதாவது நடந்தால், தெரியப்படுத்தனும் அல்லவா! என்கிறார்.

இருப்பினும் வெற்றிகரமாக பயிற்சி முடித்து, களத்தில் இறக்கிவிடப்படுகிறார்கள். படை வீரர்களில் ஒருவனே சொல்வது போல ஜெர்மனியின் விமானம் பிரான்சின் விமானத்தை விட தொழில்நுட்பத்தில் இன்னும் சிறப்பாக இருக்கிறது. இவர்கள் விமானத்தில் ஒரு துப்பாக்கி வைத்திருந்தால், அவர்கள் இரண்டு துப்பாக்கிகள் வைத்திருக்கிறார்கள். ஒவ்வொரு முறை போய் வரும் பொழுதும் ஒன்றிரண்டு பேர் இறந்து போகிறார்கள்.

இறுதியில் என்ன ஆனது என்பதை பறந்து பறந்து சண்டையிட்டு சொல்லியிருக்கிறார்கள்.

****

படம் உண்மைச் சம்பவங்களின் அடிப்படையில் என சொன்னதால், உள்ளதை தானே சொல்லமுடியும். அதனால் அதற்குரிய தன்மையுடன் தான் படம் இருக்கிறது.

வேறு நாட்டில் போர். அமெரிக்க இளைஞர்கள் அங்கு சண்டையிட கிளம்புகிறார்களா! இதெல்லாம் நம்பும்படியாக இருக்கிறது என யோசித்துக்கொண்டே தான் படத்திற்குள் நுழைந்தேன்.

நம் தமிழ்படங்களில் முன்பெல்லாம், ஊரில் ஏதாவது காதல், கலாட்டா என பிரச்சனை என்றால், காணாமல் போய் சில வருடங்களுக்கு பிறகு இராணுவ உடையுடன் ஊருக்குள் வருவதை பார்க்க முடியும். இந்தப் படத்தில் அப்படித் தான். நாயகனுக்கு உள்ளூரில் ஒரு பிரச்சனை. அந்த போலீசு அதிகாரி “உன்னை கைது செய்ய உத்தரவு. நானாக இருந்தால் புத்திசாலித்தனமாக ஊரை விட்டு ஓடியிருப்பேன்” என்கிறார். நாயகன் படையில் வந்து இணைகிறார்.

இன்னொருவர் கருப்பினத்தைச் சேர்ந்த குத்துச்சண்டை இளம்வீரர். அமெரிக்காவில் இனவெறி தாக்கம் அதிகமாக இருப்பதால், ”இங்கேயாவது சமமாக நடத்துவார்கள் என்று தான் வந்தேன்” என்பார்.

இன்னொருவர் குடும்பம் தான் அந்த இளைஞரை ”போய் வென்று வா! மகனே!" என வாழ்த்தி அனுப்பிவைக்கும். ஆனால், இரண்டுமுறை போர்க்களத்துக்கு போய் வந்ததும், இரண்டு பேர் கண்ணெதிரில் செத்துப்போனதுமே அதிர்ச்சியாகி, மனம் பேதலித்துவிடுவார். (பிறகு சரியாகிவிடுவார்.) இன்னொருவரை அவருடைய அப்பா கட்டாயப்படுத்தி அனுப்பிவைப்பார்.

இருந்தும் படம் பார்க்கும் அளவிற்கு இருக்கிறது. போர் என்றதும் நிறைய ரத்தம், கண்ணீர் என இல்லாமல், ஒரு ஆக்சன் படம் போல எடுத்திருக்கிறார்கள். இதற்கிடையே ஒரு குட்டிக் காதல் கதையும் உண்டு.

ஜேம்ஸ் பிராங்கோ தான் நாயகன். பழைய ஸ்படைர் மேன் படத்தில் நண்பனாக இருந்து, பிறகு வில்லனாக மாறுவார். மற்றவர்களும் ஓக்கே. வானில் சண்டைகள் சிறப்பு. Tony Bill இயக்கியிருக்கிறார்.

தமிழில் மொழி மாற்றம் செய்திருக்கிறார்கள். சண்டை, போர் பட விரும்பிகள் பார்க்கலாம். இப்போதைக்கு எந்த ஓடிடியிலும் இல்லை என இணையம் சொல்கிறது. வேறு வழிகளில் முயலுங்கள்.

One Piece (2023) தொலைக்காட்சி தொடர் - புதையலை தேடிய ஒரு சாகச பயணம்

முதல் காட்சியில் ஒரு புகழ்பெற்ற கடற்கொள்ளையன் ஒருவனை திரண்டிருக்கும் மக்கள் முன்னிலையில் தூக்கில் இடுகிறார்கள். அவன் பல ஆண்டு காலம் அவனுடைய குழுவால் கொள்ளையடிக்கப்பட்ட செல்வங்களை எல்லாம் ஓரிடத்தில் சேர்த்து வைத்திருக்கிறான். அதன் பெயர் தான் ஒன் பீஸ். அதில் ஒரு பகுதி கிடைத்தால் கூட பெரிய பணக்காரனாகிவிடலாம். ஆகையால் பலரும் குழு, குழுவாக இணைந்து தேட துவங்குகிறார்கள். அதை அடைவதற்காக பலர் தங்கள் மொத்த வாழ்க்கையையும் தொலைத்திருக்கிறார்கள்.

நாயகன் ஒரு இளைஞன். அவருக்கு ஒரு கடற்கொள்ளையனை மிகவும் பிடிக்கும். ஆகையால் சிறு வயதில் இருந்தே, தான் ஒரு கடற்கொள்ளையனாக ஆகவேண்டும். அதுவும் அந்த குறிப்பிட்ட ஒன் பீஸை அடைந்து கடற்கொள்ளையர்களுக்கெல்லாம் ராஜாவாக வேண்டும் என்பது அவனது கனவு. அவனுடைய தாத்தாவோ, கடற்கொள்ளையர்களை எல்லாம் வேட்டையாடுகிற அரசு தரப்பு கப்பல் படையில் பெரிய தலையாக இருக்கிறார். பேரனை அடித்து, திட்டி, பயிற்சி எல்லாம் கொடுத்தாலும் அவன் சொன்னதையே திரும்ப திரும்ப சொல்லிக்கொண்டிருக்கிறான்.

சின்ன வயதில் அவன் அபூர்வ பழத்தைச் சாப்பிட்டதால், ரப்பர் மாதிரி உடலை வளைப்பது, எவ்வளவு இழுத்தாலும் நீள்வது என்ற சக்தியோடு இருக்கிறான். இதில் வரும் பல கதாப்பாத்திரங்களுக்கு இப்படி ஏதோ விசேச சக்தி இருக்கிறது.

ஒன் பீஸை அடைய வேண்டுமென்றால், அரசு தரப்பில் பாதுகாப்பாக வைத்திருக்கும் ஒரு வரைபடத்தை முதலில் அடைந்தாக வேண்டும். அதை தேடிப் போகும் பொழுது இருவர் அறிமுகமாகிறார்கள். ஒரு ஆள் கத்தி சண்டையில் தேர்ந்த ஆளாக இருக்கிறான். இன்னொரு பெண் விவரமறிந்தவளாகவும் திருடியாகவும் இருக்கிறாள். ஏக களேபரங்களுக்கு பத்தியில் வரைபடத்தை அங்கிருந்து நகர்த்திவிடுகிறார்கள்.

நாயகன் மற்றவர்களை ஒரு குழு என சொல்லிக்கொண்டாலும், அவர்கள் அதை ஏற்றுக்கொள்வதில்லை. மறுக்கிறார்கள். இருப்பினும் சேர்ந்தே பயணிக்கிறார்கள். இந்த பயணத்தில் அடுத்தடுத்து என்ன தடைகள் வந்தன? புதிதாக இவர்கள் குழுவில் யார் யாரெல்லாம் இணைந்தார்கள்? என்பதை சுவாரசியாகவும், தொலைக்காட்சி தொடர் என்பதால், கொஞ்சம் இழுத்தும் சொல்லி முடித்திருக்கிறார்கள்.

****

அந்த காலத்தில் விமானம் இல்லை. ஒரு நாட்டிலிருந்து இன்னொரு நாட்டிற்கு போகவேண்டும் என்றால், தரை வழிப் பயணம் அல்லது உலகத்தில் நான்கில் மூன்று பகுதி நீர் தான் என்பதால் கப்பல் பயணம் தான். ஆகையால் கப்பல் பயணம் என்பது பொருட்களை எடுத்துச்சென்று வியாபாரம் செய்வது என்பது பொருளாதாரத்திற்கு மிகவும் அடிப்படையாக இருந்தது. அந்த பொருட்கள், செல்வங்களை கடற்கொள்ளையர்களை ஈர்த்தது. அதனால், சின்ன குழுவாக, பெரிய படையாக ஆங்காங்கே நிறைய பேர் இருந்தார்கள். ஆகையால், அரசுக்கு கடற்கொள்ளையர்கள் பெரிய தலைவலியாக இருந்தார்கள். அவர்களை கட்டுப்படுத்துவது மிகவும் அவசியமாக இருந்தது.

இந்த பின்னணியில் தான் கடற்கொள்ளையர்களைப் பற்றிய இந்த கதை எடுக்கப்பட்டிருக்கிறது. ஜப்பானில் மங்கா காமிக்ஸ் புகழ்பெற்றது. சிறுவர்கள் முதல் பெரியவர்கள் வரை படிப்பார்கள் என கேள்விப்பட்டிருக்கிறேன். அதில் ஒரு கதை தான் இந்த ஒன் பீஸ். அதைத் தான் இப்பொழுது தொலைக்காட்சிக்காக படமாக்கியிருக்கிறார்கள்.

நாயகனுக்கு அறிமுகமாகி பின்பு அவனோடு பயணிக்கும் ஒவ்வொருவருக்கும் பின் கதை ஒன்றை சொல்கிறார்கள். சிலது சுவாரசியமாக இருக்கிறது. சிலது சுவாரசியமில்லாமல் இருக்கிறது. ஆனால் குழு என்றால், ஐந்து விரல்கள் போல தான். ஒவ்வொருவருக்கும் ஒரு திறமை. பெரிய அளவு திறமையில்லாமலும் இருக்கலாம். எல்லோரும் ஒரு இலக்கில் ஒரு செயலில் ஒன்றிணையும் பொழுது ஒரு பெரிய சக்தியாக மாறுகிறது. அப்படித்தான் பல கடுமையான தடைகளை எல்லாம் தகர்த்து அந்த இளைஞர் குழு பயணிக்கிறார்கள்.

உலகத்தில் அடைய சாத்தியமில்லாத பெரும் கனவு ஒன்றை அடையப்போவதாக சொல்லித் திரியும் ஒரு நாயகன், எப்படிப்பட்ட குணநலன்களோடு இருக்கவேண்டும் என நினைப்போம். ஆனால் அவன் அதற்கு எதிரான குணநலன்களோடு இருக்கிறான். வெள்ளந்தியாக, ஒரு திட்டமிடல் இல்லாமல், இடம், பொருள், ஏவல் அறிந்து பேசாதவனாக, சில சமயங்களில் முட்டாள்தனமாக கூட நடந்துகொள்கிறான். இத்தனை குறைபாடு இருந்தாலும் அவனிடம் வேறு நல்ல பண்புகள் இருக்கின்றன. தனது இலக்கில் பிடிவாதமாக இருக்கிறான். தன் ”குழுவில்” (அவர்கள் ஒத்துக்கொள்ளவில்லை என்றாலும்) இருப்பவர்களுக்கு ஒரு பிரச்சனை என்றால், உயிரே போகும் என்றாலும் உடன் நிற்கிறான். அவர்களுடைய கனவுகளை மதிக்கிறான். அதற்கு துணை நிற்கிறான். அதனால் ஒரு கட்டத்தில் அவனை ஏற்று பின்தொடர்கிறார்கள்.

படமாக எடுத்திருந்தால் கச்சிதமாக எடுத்திருப்பார்கள். ஆனால், தொலைக்காட்சி தொடர் என்பதால், கொஞ்சம் இழுத்து எடுத்திருக்கிறார்கள். ஒன் பீஸை அடைவது நீண்ட பயணத்தில் ஒரு சின்ன பகுதியை ஒரு சீசனாக எட்டு அத்தியாயங்களாக, எட்டு மணி நேரமாக எடுத்திருக்கிறார்கள். அடுத்தடுத்து சீசன்கள் இனி வரிசையாக வரும் என எதிர்பார்க்கலாம். இது இளைய தலைமுறையை மனதில் வைத்து எடுத்திருக்கிறார்கள். அதனால் பெரும்பாலான பாத்திரங்கள் 20 லிருந்து 25 வரை தான்.

படத்தில் நடித்த அத்தனைப் பேரும் நன்றாக செய்திருக்கிறார்கள். ஒவ்வொருவருக்கும் ஒவ்வொரு அசாத்திய திறமை இருப்பதால், நிறைய தொழில்நுட்பகாரர்கள் துணை நின்றிருக்கிறார்கள். இசை நன்றாக இருக்கிறது.

நெட் பிளிக்ஸ் தான் தயாரித்திருக்கிறது. தமிழில் நன்றாக மொழிமாற்றம் செய்திருக்கிறார்கள். கடற் பயணம், கடற்கொள்ளையர்கள், சாகச பிரியர்கள் பாருங்கள். பிடிக்கும்.