இ.எஸ்.ஐ. கிளை அலுவலகம் மாற்றம் – ஒரு நடைமுறை அனுபவம்

 

 இ.எஸ்.ஐ. பதிவு செய்யும் போது, Shram Suvidha தளத்திலேயே கிளை அலுவலகத்தைத் (ESI Branch Office) தேர்வு செய்யும் வசதி இருந்தது. அதன்படி  நிறுவனத்திற்கு அருகில் இருந்த கிளை அலுவலகத்தைத் தேர்வு செய்தோம். அதன்படி, அந்த நிறுவனத்திற்கு வழங்கப்பட்ட இ.எஸ்.ஐ. பதிவு சான்றிதழிலும் (C11) அந்தக் கிளை அலுவலகமே குறிப்பிடப்பட்டிருந்தது.

 

பின்னர், அந்த நிறுவனத்தின் பணியாளர் ஒருவர் இ.எஸ்.ஐ. தொடர்பான தேவைக்காக அந்தக் கிளையை அணுகியபோது, நிறுவனத்தின் அஞ்சல் குறியீடு வேறுபடுவதால், அம்பத்தூர் கிளை பொருத்தமானது இல்லை.  அம்பத்தூர் தொழிற்பேட்டை கிளை அலுவலகமே பொருத்தமானது என்றும், கிளை மாற்றத்திற்கு விண்ணப்பிக்க வேண்டும் என்றும் தெரிவித்தார்கள்.

 

அதன்படி, இ.எஸ்.ஐ. நிர்வாகத் தளத்திலேயே சமர்ப்பிக்கும் வசதி இருந்தது.  08.08.2026 அன்று கிளை மாற்றத்திற்கான விண்ணப்பத்தை சமர்ப்பித்தோம். ஆனால், 25.08.2026 வரையிலும் அந்த விண்ணப்பம் ஒப்புதல் தராமல் நிலுவையில் இருந்தது.

 

இதுகுறித்து இ.எஸ்.ஐ. தலைமை அலுவலகத்தைத் தொடர்புகொண்டு கேட்டபோது, தளத்தில் விண்ணப்பித்தால் மட்டும் போதாது; தனியாக மின்னஞ்சல் மூலமும் கோரிக்கை அனுப்ப வேண்டும் என்று தெரிவித்தார்கள்.

 

இங்குதான் ஒரு நடைமுறைச் சிக்கல் எழுகிறது.

 

கிளை மாற்றத்திற்கான வசதி ஏற்கனவே இ.எஸ்.ஐ. நிர்வாகத் தளத்தில் வழங்கப்பட்டிருக்கும்போது, அதே கோரிக்கைக்காக மீண்டும் தனியாக மின்னஞ்சல் அனுப்ப வேண்டிய நடைமுறை ஏன் தேவைப்படுகிறது என்பது புரியவில்லை. மேலும், Shram Suvidha தளத்துடன் இ.எஸ்.ஐ. தொடர்புடைய தகவல்களை அஞ்சல் கோடு வாரியான தகவல்களை ஒருங்கிணைத்துவிட்டால், இதுபோன்ற தேவையற்ற அலைச்சல்களையும் காலதாமதங்களையும் தவிர்க்க முடியும்.

 

ஆகையால் இ.எஸ்.ஐ  (Registration) பதிவு செய்யும் பொழுது கவனமாக இருங்கள். இ.எஸ்.ஐ. பதிவு செய்யும்போது தேர்வு செய்யப்பட்ட கிளை அலுவலகம், நிறுவனத்தின் உண்மையான முகவரி மற்றும் அஞ்சல் குறியீட்டிற்கு ஏற்ப இல்லாத நிலை ஏற்பட்டால், பின்னர் கிளை மாற்றத்திற்கான விண்ணப்பம் தேவைப்படலாம்.

 

மேலும், இணையதளத்தில் விண்ணப்பம் செய்துவிட்டோம் என்று மட்டும் நம்பாமல், விண்ணப்பத்தின் நிலை மற்றும் சம்பந்தப்பட்ட அலுவலகத்தின் கூடுதல் நடைமுறைகள் குறித்து உறுதி செய்து கொள்வது பாதுகாப்பானது.

 

இத்தகைய நடைமுறைகள் குறித்து இ.எஸ்.ஐ. நிர்வாகம் தெளிவான வழிகாட்டுதலை வழங்கி, இணையதள விண்ணப்பம் மூலமாகவே முழுமையான செயல்முறையை முடிக்கக்கூடிய வகையில் ஏற்பாடு செய்தால், நிறுவனங்களுக்கும் வரி ஆலோசகர்களுக்கும் தேவையற்ற சிரமங்கள் பெருமளவு குறையும்.

இரா. முனியசாமி,

ஜி.எஸ்.டி, வருமானவரி, இபிஎப், இ.எஸ்.ஐ ஆலோசகர்,

எல்.ஐ.சி. முகவர்

📞 95512 91721

கார்த்திகேயனுக்கு அஞ்சலி

 

திரு. கார்த்திகேயன் மதுரையில் வரி ஆலோசகராக நிறுவனம் நடத்தி, மெல்ல மெல்ல  20 பேர் கொண்ட ஒரு குழுவையும் உருவாக்கியும், இயக்கியும் வருபவர்.  வேலை செய்பவர்களையும் தங்கள் குடும்பத்தினரை போல அன்போடு நடத்துபவர். வருடத்திற்கு இரண்டு முறை சுற்றுலா அழைத்து செல்வார்.

 

வயது 47.  நேற்று மாரடைப்பால் காலமானார் என்ற செய்தி நேற்றிரவு கேள்விப்பட்டதும் அதிர்ச்சியாக இருந்தது என்பதை விட உலுக்கிவிட்டது எனலாம்.

 

பேஸ்புக்கில் அவருடைய எழுத்தின் வழியாக தான் அறிமுகம்.   உற்சாகமாக தொழில், குடும்பம், பயணம், அரசியல், சமூகம் குறித்த அக்கறை என நேர்மையாக தொடர்ந்து எழுதி வந்தார்.  சக வரி ஆலோசகராக அவருடைய வளர்ச்சியை தொடர்ந்து கவனித்து, மகிழ்ந்தும் வந்திருக்கிறேன்.

 

அவருடைய துவக்க கால வகுப்பில் ஒருமுறை விடிகாலையில் கலந்துகொண்டிருக்கிறேன்.  அவரிடம் ஒரே ஒருமுறை பேசியும் இருக்கிறேன்.

 

அவரை இழந்து வாடும் குடும்பத்திற்கு ஆறுதல்.  அவருக்கு எனது அஞ்சலி.

 

- இரா. முனியசாமி,

சென்னை,

9551291721

ஒரு நம்பிக்கை கதை

 

நமது உறுப்பினர் ஒருவர் அந்த நிறுவனத்தின் அக்கவுண்ட் மேனேஜராக பொறுப்பேற்றார்.   நிறுவனத்திற்கு பி.எப்., இ.எஸ்.ஐ இருந்தது.   பணம் செலுத்தாதது, தாமதமாக செலுத்தியது என சில நோட்டிசுகள் இருந்தன.

 

நாம் சரியாக செலுத்துகிறோம். ஆனால் ஏன் இந்த நோட்டிசு வந்தன என கேட்ட பொழுது,  என் நினைவு உடனே வந்து, அணுகினார்.

 

கடந்த கால வரலாற்றை தேடிப் பார்த்தால், நிறுவனம் வரி ஆலோசகருக்கு சின்சியராக பணம் அனுப்ப, அவர் நான்கு மாதங்களுக்கு ஒருமுறை ஒரு சாலனை செலுத்தாமல் விட்டிருக்கிறார். நிறுவனம் அவர் செலுத்தினாரா என சோதிக்கவும் இல்லை. விளைவு நோட்டிசுகள்.

 

பிறகு எந்தெந்த மாதம் செலுத்தவில்லை என சொன்ன பிறகு, அவரிடம் அந்த பணத்தைக் கேட்டார்கள்.   சில தொழிலாளர்கள்  இதனால் நம்பிக்கை இழந்து, ஒவ்வொருவராக பி.எப்., இ.எஸ்.ஐ திட்டத்தில் இருந்து விலகியிருக்கிறார்கள்.

 

மீண்டும் இணைய சொன்னால், உறுதியாய் மறுக்கிறார்கள். நிர்வாகம் ”தொழிலாளர்களிடம் நீங்கள் பேச முடியுமா” என கேட்டதற்கு, ”அவசியம். ஏற்பாடு செய்யுங்கள்” என்றேன்.

 

ஊழியர்கள் எல்லோரையும் அந்த ஹாலுக்கு வரவழைத்தார்கள். அரை மணி நேரம். திட்டத்தின் பலன்கள் குறித்து விளக்கினேன்.  மீதி அரை மணி நேரம் அவர்களுக்கு இருக்கும் சந்தேகங்களை அடுத்தடுத்து கேட்டார்கள். விளக்கினேன்.   குறிப்பாக ”மாதம் மாதம் செலுத்துகிறார்களா என நீங்களே பார்க்கலாம்” என்றேன். மேலும் “பி.எப். பணத்தை எடுப்பதற்கு இப்பொழுது நிர்வாகத்தின் அனுமதி தேவையில்லை. ஆதாரின் அடிப்படையில் நீங்களே க்ளைம் செய்யலாம்” என்றேன்.  அவர்களுக்கு ஒரு தெளிவு கிடைத்தது போல உணர்ந்தேன்.

 

நிர்வாகத்தின் பொறுப்பாளர் சில கேள்விகள் கேட்டார். அவருக்கும் விளக்கினேன். என்னுடைய கட்டணத்தைக் கேட்டுவிட்டு, முன்பு இருந்தவரை விட இன்னொரு மடங்கு கேட்கிறீர்கள் என்றார். நல்ல சேவைக்கு நல்ல கட்டணம் அவசியம் என்றேன். பழையை ஆலோசகர் செய்தது எல்லாம் நினைவுக்கு வந்து போயிருக்கும் போல.! புன்சிரிப்புடன் ஏற்றுக்கொண்டார்.

 

நோட்டிசுகளுக்கு கவனம் செலுத்தி , அதை முதலில் முடித்தேன்.  முதலில் தொழிலாளர்கள் எல்லோரும் முன்வரவில்லை.  வந்தவர்களை இணைத்தோம்.  பிறகு மெல்ல மெல்ல மற்ற தொழிலாளர்களும் நம்பிக்கை வந்து திட்டத்தில் இணைந்தார்கள்.

 

நான் போகும் பொழுது இருந்த தொழிலாளர்களை விட, இப்பொழுது மூன்று மடங்கு தொழிலாளர்கள் திட்டத்தில் இணைந்திருக்கிறார்கள்.

 

கடந்த சில மாதங்களாக, பி.எப். திட்டத்தில் முதன்முறையாக ஊழியர்களை புதிதாக இணைத்தால், தொழிலாளர்களுக்கு மானியம், நிர்வாகத்திற்கும் மானியம் என அறிவித்த திட்டத்தில் இவர்கள் தகுதி பெற்றார்கள்.

 

ஜூன் மாதத்தில் இரண்டு தவணைகளில் நிர்வாகத்தின் வங்கி கணக்கில் மொத்தம் ரூ. 45000 வரை பி.எப். மானியத்தை செலுத்தியிருந்தது.  மேனேஜரிடம் ”மானியம் வந்திருக்கிறது. ஒரு வார்த்தை சொல்லவில்லையே எனக் கேட்டால்…, “வரவில்லை சார்” என முதலில் தெரிவித்தார்.  குறிப்பாக தேதி,  தொகை குறித்து சொல்லி, தேடச்சொன்னால், ”ஆமாம் சார். எங்கிருந்து வந்தது என தெரியாமல்… சஸ்பென்ஸ் கணக்கில் வைத்திருக்கிறோம்” என்றார். நிர்வாகத்தின் பொறுப்பாளரிடம் தெரிவியுங்கள். நிச்சயம் மகிழ்வார் என்றேன்.

 

புதிதாக பி.எப். திட்டத்தில் இணைந்த தொழிலாளர்களுக்கும் இதே போல மான்யம் வந்திருக்கும். அதையெல்லாம் கேட்டுக்கொள்ளவேண்டாம். நிர்வாகம் கேட்டுவிடும் என்ற பயத்தில் வரவில்லை என்பார்கள் என்றேன். சிரித்தார்.

 

- இரா. முனியசாமி,

வரி ஆலோசகர்,

GSTPS உறுப்பினர்,

9551291721

15/09/2026

நல்ல வாழ்க்கை என்றால் என்ன? - Rhythm of life

உலகிலேயே ஆரோக்கியமாகவும், மனநிறைவுடனும், ஒழுங்காகவும் வாழும் மக்கள் யார்?   Finland, Denmark, Norway, Sweden, Iceland போன்ற Nordic நாடுகளும், Japan போன்ற நாடுகளும் நமக்கு சில முக்கியமான வாழ்க்கைப் பாடங்களைச் சொல்லிக் கொடுக்கின்றன.

 

அவர்கள் நம்மைவிட வேறுபட்ட உணவைச் சாப்பிடுகிறார்கள் என்பதல்ல முக்கியம். அவர்கள் வாழ்க்கையை எப்படி நடத்துகிறார்கள் என்பதுதான் முக்கியம். அவர்களுடைய வாழ்க்கையில் ஒரு நல்ல Rhythm இருக்கிறது.

 

வேலை → ஓய்வு → குடும்பம் → நண்பர்கள் → உடல் இயக்கம் → தனிநேரம் → தூக்கம்

 

ஒவ்வொன்றுக்கும் அதற்குரிய நேரம். நம்முடைய வாழ்க்கையில் சில நேரங்களில் இதற்கு மாறாக வேலை → இன்னும் வேலை → தொலைபேசி → இன்னும் வேலை → தூக்கம் குறைவு → உடல் சோர்வு என்று ஓடிக்கொண்டிருக்கிறோம்.

 

உடம்பு எச்சரிக்கை கொடுத்த பிறகுதான் ஆரோக்கியத்தைப் பற்றி யோசிக்கிறோம். அவர்களிடம் வேலை என்பது வாழ்க்கை முழுவதும் அல்ல; வாழ்க்கையின் ஒரு முக்கியமான பகுதி மட்டுமே. வேலை நேரத்தில் கவனமாக வேலை செய்கிறார்கள். வேலை முடிந்ததும் வாழ்க்கைக்குத் திரும்புகிறார்கள்  அதனால்தான் குறைந்த நேரத்தில் ஒழுங்காக வேலை செய்வது, அதிக நேரம் வேலை செய்வதைவிட முக்கியமாகிறது.

 

உடற்பயிற்சியை அவர்கள் வாழ்க்கையில் தனியாகத் தேடுவதில்லை.

 

நடப்பது, சைக்கிளில் செல்வது, வெளியில் நேரம் செலவிடுவது போன்றவை அன்றாட வாழ்க்கையிலேயே கலந்து இருக்கின்றன. அதாவது, “மாலை 6 மணிக்கு உடற்பயிற்சி செய்ய வேண்டும்” என்று ஒரு தனி கடமையாக வைத்துக்கொள்ளாமல், “வாழ்க்கையே கொஞ்சம் உடல் இயக்கத்துடன் இருக்க வேண்டும்” என்று அமைத்துக்  கொள்கிறார்கள். இது நமக்கும் நல்ல பாடம்.

 

இயற்கைக்கும் அவர்களுடைய வாழ்க்கையில் இடம் இருக்கிறது.

வாரக்கடைசி என்றால் ஷாப்பிங் மால் மட்டும் அல்ல. நடை, காடு, ஏரி, மலை, சைக்கிள், வெளிப்புறச் செயல்பாடுகள்... சிறிது நேரம் இயற்கையோடு இருப்பது உடலுக்கு மட்டுமல்ல, மனதுக்கும் ஓய்வு. நம்முடைய மூளை நாள் முழுவதும்

Phone → Message → Notification → News → Work → Social Media என்று தொடர்ந்து தூண்டப்பட்டுக் கொண்டிருக்கிறது.  இயற்கை மட்டும் நம்மிடம், “கொஞ்சம் மெதுவாக நடங்கள்...” என்று சொல்கிறது. அங்கேதான் சிந்தனை மீண்டும் நம்மிடம் திரும்புகிறது.

 

ஜப்பான் நமக்குச் சொல்லும் பாடம் வேறு.

 

அளவான உணவு, ஒழுங்கான வாழ்க்கை, தொடர்ந்து உடல் இயக்கம், வயதான பிறகும் ஏதாவது ஒரு செயல்பாட்டில் இருப்பது... ஆரோக்கியம் என்பது ஒரு மாத diet plan அல்ல. ஆரோக்கியம் என்பது தினசரி வாழ்க்கையின் Rhythm.

 

நன்றாக சாப்பிடுவது மட்டும் போதாது. நன்றாக தூங்க வேண்டும். உடலை இயக்க வேண்டும்.  மனதுக்கு ஓய்வு கொடுக்க வேண்டும்.உறவுகளுக்கு நேரம் கொடுக்க வேண்டும். சிந்திப்பதற்கும் தனியாக இருக்க வேண்டும்.

 

இதில் இன்னொரு முக்கியமான மாற்றம் இருக்கிறது. அவர்களுடைய வாழ்க்கையில், “நான் எவ்வளவு சம்பாதிக்கிறேன்?” என்பது மட்டுமே வாழ்க்கையின் அளவுகோல் அல்ல. “நான் எவ்வளவு நன்றாக வாழ்கிறேன்?” என்பதற்கும் மதிப்பு இருக்கிறது.

 

அதனால்தான் வேலைக்கும் வாழ்க்கைக்கும் இடையே ஒரு எல்லை இருக்கிறது. குடும்பத்திற்கும் நண்பர்களுக்கும் நேரம் இருக்கிறது. தனிப்பட்ட ஆர்வங்களுக்கும் வாசிப்புக்கும் இடம் இருக்கிறது. ஓய்வெடுப்பதற்கும் குற்ற உணர்வு இல்லை.

 

எனக்குத் தோன்றுவது, நாம் அவர்களுடைய வாழ்க்கையை அப்படியே நகலெடுக்க வேண்டியதில்லை. நம்முடைய சூழலுக்கு ஏற்ற சில விஷயங்களை மட்டும் எடுத்துக்கொண்டாலே போதும்.

 

காலை — உடலை இயக்குதல். பகல் — முழுக் கவனத்துடன் வேலை செய்தல். வேலை முடிந்ததும் — வேலையை மனதிலிருந்தும் இறக்கி வைத்தல். மாலை — நடை, குடும்பம், நண்பர்கள். இரவு — சிறிது வாசிப்பு, சிறிது சிந்தனை. பின்னர் — நல்ல தூக்கம். அடுத்த நாள் மீண்டும் புத்துணர்ச்சியுடன் தொடங்குதல்.

இதுதான் எனக்குப் பிடித்த Rhythm of Life. இது Slow Life அல்ல. ஒழுங்கான வேகத்தில் வாழும் வாழ்க்கை. வாழ்க்கையின் ஒவ்வொரு பகுதிக்கும் அதற்குரிய இடத்தைக் கொடுக்கும் வாழ்க்கை.

 

50 வயதைக் கடந்த பிறகு இந்தப் பாடம் இன்னும் முக்கியமாகிறது. வாழ்க்கையின் வெற்றி என்பது எவ்வளவு வேலை செய்தோம்? என்பதில் மட்டும் இருக்க வேண்டியதில்லை.

 

எவ்வளவு ஆரோக்கியமாக இருந்தோம்? எவ்வளவு வாசித்தோம்? எவ்வளவு சிந்தித்தோம்? எவ்வளவு நன்றாக உறவுகளை வைத்திருந்தோம்? எவ்வளவு அமைதியாக வாழ்ந்தோம்?  என்பதிலும் இருக்க வேண்டும்.

 

உடலுக்கு — இயக்கம்.
மனதுக்கு — வாசிப்பு.
வேலைக்கு — எல்லை.
உறவுகளுக்கு — நேரம்.
சிந்தனைக்கு — அமைதி.
வாழ்க்கைக்கு — ஒரு நல்ல Rhythm.

 

ஒருவேளை, நல்ல வாழ்க்கையின் ரகசியம் இன்னும் அதிகமாக ஓடுவதில் இல்லாமல், எப்போது ஓட வேண்டும், எப்போது நிற்க வேண்டும், எப்போது ஓய்வெடுக்க வேண்டும் என்பதைத் தெரிந்து கொள்வதில் இருக்கலாம்.

 

“வாழ்க்கையை வேலைக்கு இடையில் நடத்தாதீர்கள்; வேலை என்பது வாழ்க்கையின் ஒரு பகுதி மட்டுமே என்று வாழுங்கள்.”

 

-         -  இரா. முனியசாமி

 

Rhythm of life