ஒரு சின்ன தேசத்தின் இளவரசியாக இருக்கிறாள் நாயகி. அது ஒரு பெரும் பஞ்சகாலம். வருகிற பனிக்காலத்தை தனது மக்கள் கடந்துவிடுவார்களா என பெருங்கவலையுடன் இருக்கிறார் அந்த சிற்றரசர்.
அந்த இக்கட்டான சமயத்தில் பெரும் ராச்சியத்தின் இளவரசனுக்கு நாயகியைப் பெண் கேட்டு தூது வருகிறார்கள். அதற்காக கொடுக்கும் திருமண பரிசு அவர்களுடைய நெருக்கடியை தீர்க்கும் என நாயகியின் அப்பா நினைக்கிறார். சந்தோசமாய் ஒத்துக்கொள்கிறார்கள்.
அரண்மனையில் எளிமையாக திருமணம் நடக்கிறது. அன்றைக்கே ஊருக்கு வெளியே ஒரு குன்றில் திருமண சடங்கு இருப்பதாக மணமக்களை அழைத்துப் போகிறார்கள். அங்கு ஒரு இருக்கும் பெரிய குகைக்குள் நாயகியை தூக்கிப்போட்டு திரும்பி பார்க்காமல் அங்கிருந்து நகர்ந்துவிடுகிறார்கள். அடப்பாவிகளா!
உள்ளே ஒரு பெரிய கொடூர டிராகன் இருக்கிறது. அந்த பெரும் ராச்சியத்தின் மன்னனுக்கும் டிராகனுக்கும் ஏற்பட்ட பழைய பஞ்சாயத்தில் ஏற்பட்ட டீலில் இப்படி தொடர்ந்து செய்கிறார்கள்.
நாயகி டிராகனின் தாக்குதலில் இருந்து தப்பித்தாளா? என்பதை சுவாரசியமாக சொல்ல முயன்றிருக்கிறார்கள்.
****
என் பொண்ணுப் பார்த்துவிட்டு, நீங்களும் பாருங்கப்பா! என பரிந்துரைத்தார். அதற்காகப் பார்த்தேன்.
ஒரு சர்வைவல் கதை தான். நாட்டுப்புற கதைகளில் ஒன்று போல தோற்றம் இருக்கிறது. இன்னும் கொஞ்சம் சுவாரசியப்படுத்தியிருக்கலாம்.
Stranger things ல் பதின் பருவத்து நாயகியாக வரும் மில்லி பேபி ப்ரெளன் தான் இதில் நாயகியாக வளர்ந்திருக்கிறார். குகைக்குள் வரும் டிராகனை நன்றாக வடிமைத்திருக்கிறார்கள். மற்றவர்கள் எல்லோரும் உப கதாப்பாத்திரங்கள் தான்.
நெட் பிளிக்சில் தமிழில் மொழிமாற்றம் செய்து வெளியிட்டு இருக்கிறார்கள். இங்கிலீஷில் இந்தப் படத்தைப் பார்த்த என்னுடைய பெண், மன்னர் காலத்து படம் என்பதால், ”சிற்றன்னையே!” என தமிழில் அழைத்ததும், கொஞ்சம் பதட்டமாகி இங்கிலீஷிலேயே பாருங்கப்பா! என பரிந்துரைத்தார்.
குழந்தைகளுக்கு பிடிக்கும். வாய்ப்புள்ளவர்கள் பாருங்கள்.
Posts
