Falimy (2023)

குடும்பம் கலைந்து கிடந்தால் “Falimy” தான்!

நாயகன் ஒரு டப்பிங் ஸ்டுடியோவில் பணிபுரிகிறார். அப்பா ஒரு பழைய பிரிண்டிங் பிரஸை சும்மா வைத்துக்கொண்டு, தினமும் தண்ணியடிக்கிறார். அம்மா இன்னொரு பிரஸ்ஸில் சம்பளத்துக்கு வேலை செய்கிறார். தம்பி வெளிநாட்டில் படிக்க ஆசைப்படுகிறார். தாத்தா காசிக்கு செல்லவேண்டும் என்பது அவருடைய பெரிய ஆசையாய் இருக்கிறது. இவர்கள் எல்லோரும் ”குடும்பமாய்” வாழ்ந்தாலும், அவர்களுக்கிடையே உள்ள முரணால், “தனித்தனியே” வாழ்கிறார்கள்.

நாயகனுக்கு பெண் பார்த்து, அதில் ஏற்படுகிற தாமதத்தால், கடுப்பாக இருக்கிறார். தாத்தாவின் ஆசையையாவது நிறைவேற்றலாம் என காசிக்கு கிளம்புகிறார்கள். ஒற்றுமையான குடும்பமே பயணத்தில் அத்தனை சிரமங்களை எதிர்கொள்ளும். இந்த ”குடும்பம்” பல சிரமங்களை எதிர்கொள்கிறது.

காசிக்கு போன முதல் நாளே தாத்தா காணாமல் போகிறார். தேடுகிறார்கள். தேடி அலைகிறார்கள். அந்த ”குடும்பம்” ஒரு குடும்பமாக மாறினார்களா என்பதை கலகலப்பாக சொல்லியிருக்கிறார்கள்.

*****

“American Beauty” என ஒரு அருமையான அமெரிக்கப் படம். ஆஸ்கார்களை வென்றபடம். அமெரிக்க குடும்பங்கள் எத்தனை அக சிக்கல்களை எதிர்கொண்டு வருகிறது என்பதை இரண்டு குடும்பத்தை வைத்து, நமக்கு புரிய வைத்திருப்பார்கள்.

அது எங்கோ அமெரிக்காவில், நம்ம ஊரில் அப்படி இல்லை என நினைத்துக்கொண்டிருந்தால், அப்படியெல்லாம் இல்லை. நமது குடும்பங்கள் கூட அப்படித்தான் இருக்கின்றன என்பதை புரிய வைக்கும் படம் Falimy.

மாறிவரும் சமூக நிலைமைகள் பெரும்பாலான குடும்பத்துக்குள் ஏகப்பட்ட குழப்பங்களையும் புரிதலின்மையையும் உருவாக்கிவருகிறது. ”குடும்பம்” குடும்பமாய் வாழ்வதாக தெரிந்தாலும், குடும்பத்தில் தனித்தனியான நபர்களாக வாழ்கிறார்கள். பேசினால் சண்டை. பேசாமலேயே கூட பல நாட்கள் நகர்கின்றன. ஒவ்வொரு குடும்பத்தையும் கொஞ்சம் நிதானமாக கவனித்தால், இந்த உண்மை பளிச்சென புரிந்துவிடும்.

ஏன் இப்படி நிகழ்கின்றன? இதை அந்தந்த குடும்பத்து பிரச்சனையாக பார்ப்பதா? சமூகத்தில் இப்படி சிக்கல்கள் இருக்கின்றன. அது குடும்பத்தை பாதிக்கிறது என்பதாக புரிந்துகொள்வதா?

எப்படி இதை சரி செய்வது? என்பதை கொஞ்சம் யோசித்து சொன்னால் நாம் புரிந்து கொள்ள முயற்சிக்கலாம்.

மாத்திரைக்கு மேல் இனிப்பு தடவி தருவது போல, நகைச்சுவை கலந்து கலாட்டாவாக படத்தைத் தந்திருக்கிறார்கள். அப்படி தந்திருப்பதால், நம்மால் “ரசித்துக்கொண்டே” இறுதிவரை பார்க்கமுடிகிறது.

ஜய ஜய ஜய ஹே படத்தில் அடிவாங்கிய பசில் ஜோசப் நாயகனாக, “ குடியை இன்றோடு விட்டுவிட வேண்டும் என நினைப்பேன். ஆனால் முடியாது” என தன் மகனிடம் புலம்பும் அப்பாவாக ஜெகதீஷ், அதே ஜெய ஜெய படத்தில் வரும் நீதிபதியான மஞ்சு பிள்ளை இதில் அம்மாவாக வருகிறார். அந்த தாத்தா உட்பட எல்லோரும் சிறப்பாக நடித்திருக்கிறார்கள். நிதிஷ் சகதேவ் சிறப்பாக இயக்கியுள்ளார்.

டிஷ்னி ஹாட் ஸ்டாரில் வெளியாகியிருக்கிறது. தமிழிலும் டப் செய்திருக்கிறார்கள். அவசியம் பாருங்கள்.