மொபைல்: கருவியா? கண்ணியா?

சமூக வலைத்தளங்கள் வெறும் தகவல் பகிரும் தளங்கள் மட்டுமல்ல. அவை மனிதர்களின் கவனம், நேரம், பழக்கங்கள் ஆகியவற்றை நீண்ட நேரம் தக்கவைத்துக் கொள்ளும் வகையில் மிக நுணுக்கமாக வடிவமைக்கப்பட்டுள்ளன.

 

நாம் மொபைலைப் பயன்படுத்துகிறோம் என்று நினைக்கிறோம். ஆனால் சில நேரங்களில், மொபைல்தான் நம்மைப் பயன்படுத்திக் கொண்டிருக்கிறது. அது எப்படி?

 

முடிவில்லா ஸ்க்ரோல்

 

ஒரு புத்தகத்திற்கு கடைசி பக்கம் உண்டு. ஒரு திரைப்படத்திற்கு முடிவு உண்டு. ஆனால் சமூக வலைத்தளங்களுக்கு முடிவு இல்லை. கீழே நகர்த்திக் கொண்டே போகலாம். "இன்னும் ஒரு பதிவு மட்டும்..." என்று தொடங்கியது, ஒரு மணி நேரம் எப்போது போனது என்று தெரியாமல் முடிகிறது.

 

கணிக்க முடியாத சுவாரசியம்

 

அடுத்த காணொளி சாதாரணமாக இருக்கலாம். அல்லது மிகவும் சுவாரஸ்யமாக இருக்கலாம். அல்லது உங்களை அதிர்ச்சியடையச் செய்யலாம். அடுத்ததாக என்ன வரும் என்று தெரியாததால், மூளை தொடர்ந்து பார்க்கத் தூண்டப்படுகிறது.

 

அறிவிப்புகளின் மழை

 

யாரோ விருப்பம் தெரிவித்திருக்கிறார்கள். யாரோ கருத்து பதிவிட்டிருக்கிறார்கள். யாரோ உங்களை குறிப்பிட்டிருக்கிறார்கள். இவற்றில் பெரும்பாலானவை அவசரமானவை அல்ல. ஆனால் அவை அவசரமானவை போல உணர வைக்கப்படுகின்றன.

 

சிவப்பு நிறத்தின் உளவியல்

அறிவிப்புகள் ஏன் பெரும்பாலும் சிவப்பு நிறத்தில் வருகின்றன? ஏனெனில் அந்த நிறம் மனித கவனத்தை உடனே ஈர்க்கும். அது ஒரு சிறிய புள்ளி அல்ல. அது ஒரு தூண்டில்.

 

"பார்த்துவிட்டார்" என்ற அழுத்தம்

 

செய்தியைப் பார்த்துவிட்டோம் என்பதை மற்றவர் அறிந்து கொள்வார். இதனால் உடனே பதில் அளிக்க வேண்டும் என்ற மனஅழுத்தம் உருவாகிறது.

 

குறும்படங்களின் கண்ணி

 

15 விநாடி. 30 விநாடி. 45 விநாடி. "இன்னொன்றும் பார்க்கலாம்..." என்பதற்குள் அரை மணி நேரம் போய்விடுகிறது.

 

உங்களை உங்களைவிட நன்றாக அறியும் கணக்கீட்டு முறை

 

நீங்கள் எதைப் பார்த்தீர்கள்? எதில் நின்றீர்கள்? எதை மீண்டும் பார்த்தீர்கள்? எதை விரும்பினீர்கள்?  எல்லாமும் பதிவு செய்யப்படுகிறது. பிறகு அதே வகை உள்ளடக்கங்கள் தொடர்ந்து காட்டப்படுகின்றன.

 

தவறவிட்டுவிடுவோமோ என்ற பயம்

 

புதிய செய்தி. புதிய காணொளி. புதிய விவாதம். ஏதாவது தவறவிட்டுவிடுவோமோ என்ற உணர்வு உருவாக்கப்படுகிறது.

 

பாராட்டின் போதை

 

ஒரு பதிவிற்கு அதிக விருப்பங்கள் வந்தால் மகிழ்ச்சி. குறைவாக வந்தால் ஏமாற்றம். இதனால் மீண்டும் மீண்டும் செயலியைத் திறக்க மனம் தூண்டப்படுகிறது.

நேரத்தின் மறைவு

 

ஒரு மணி நேரம் சென்றதா? இரண்டு மணி நேரமா? நமக்கே தெரியாது. ஏனெனில் நேரம் போவதை உணராமல் இருக்கும்படிதான் பல அம்சங்கள் வடிவமைக்கப்பட்டுள்ளன.

 

"இலவசம்" என்பதன் உண்மையான விலை

 

ஒரு பொருள் உண்மையாகவே இலவசமாக இருந்தால், அந்த நிறுவனங்கள் ஆயிரக்கணக்கான கோடிகளை எப்படிச் சம்பாதிக்கின்றன? பதில் எளிது. நாம் தான் அவைகளுக்கான கச்சாப் பொருள். நமது கவனம் தான் விற்கப்படும் பொருள். நமது நேரம் தான் விற்கப்படும் பொருள். நமது பழக்கங்கள் தான் விற்கப்படும் பொருள்.

 

ஒரு தொழிற்சாலைக்கு மூலப்பொருள் தேவைப்படுவது போல, பல சமூக வலைத்தளங்களுக்கு நமது கவனம் மூலப்பொருளாக தேவைப்படுகிறது.

 

நாம் அதிக நேரம் தங்கினால், அவர்களுக்கு அதிக வருமானம். நாம் அதிகம் பார்த்தால், அவர்களுக்கு அதிக லாபம். நாம் அதிகம் அடிமையாகினால், அவர்களுக்கு அதிக வளர்ச்சி.

 

ஒரு தேநீர் கடைக்குப் போனால், ஒரு தேநீர் குடித்துவிட்டு வெளியே வரலாம். ஆனால் சமூக வலைத்தளம் ஒரு பெரிய சந்தை போல. உள்ளே நுழைந்தவுடன்,

ஒருவர் சிரிக்க வைப்பார். ஒருவர் சண்டை காட்டுவார். ஒருவர் அதிர்ச்சி தருவார். ஒருவர் பாராட்டுவார். நீங்கள் வெளியேற முயன்றால், "ஒரு நிமிடம்... இதையும் பாருங்கள்..." என்று இன்னொருவர் கையைப் பிடிப்பார்.

 

மொபைல் அடிமைத்தனம் என்பது குணக்கேடு அல்ல. அறிவுத்திறன் குறைபாடும் அல்ல.

 

உலகின் மிகப் பெரிய நிறுவனங்கள், ஆயிரக்கணக்கான உளவியல் நிபுணர்கள், தரவு ஆய்வாளர்கள், தொழில்நுட்ப வல்லுநர்கள் இணைந்து உருவாக்கிய அமைப்புகளுக்கு எதிராக ஒரு சாதாரண மனிதன் போராடிக் கொண்டிருக்கிறான் என்பதே உண்மை.

 

அதனால் முதல் வெற்றி என்னவென்றால்: "எனக்கு பிரச்சினை இல்லை" என்று மறுப்பது அல்ல. "என் கவனத்தைப் பிடிக்க யாரோ முயற்சி செய்கிறார்கள்" என்பதை உணர்வதே.

 

அந்த உணர்வு வந்துவிட்டால், மொபைல் மீண்டும் ஒரு கருவியாக மாறும். இல்லையெனில், நாமே அதன் கருவியாக மாறிவிடுவோம்.

 

இறுதியாக...

 

மொபைல் உங்கள் வாழ்க்கையின் ஒரு பகுதியாக இருக்கட்டும். உங்கள் வாழ்க்கையே மொபைலின் ஒரு பகுதியாக மாறிவிடாதபடி கவனியுங்கள்.

- இரா. முனியசாமி