குடிப் பிரியர்களின் அட்டகாசம்!

பெருங்குடிகாரன் அவன். இப்படி சொன்னா குடிப்பிரியர்களின் மனம் கெடும். பெருங்குடிப்பிரியன் அவன். அந்த அம்மாவின் கடைசிப் பிள்ளையும் அவன். வயது 30ஐ கடந்தாலும், இன்னும் பொறுப்பு என்றால் என்னவென்று கேட்பவன். "ஒழுங்கு மரியாதையாக மூணாவது தெருவில் இருக்கும் கதிரேசனின் மகளை பெண் கேட்டு கட்டி வை!" என மிரட்டுகிறான். அதுவும் வீட்டு வாசலில் நின்று ஊரே கேட்குமளவு கத்துகிறான். மானத்தை வாங்குகிறானே என அம்மா வருந்தி, கல்யாணம் கட்டி வைக்கும் என யோசிக்கிறான். என்ன ஒரு புத்திசாலித்தனம்!

எதற்கும் மசியாமல் அம்மா இருப்பதால், கடைசி ஆயுதமாக பூச்சி மருந்தை சாராயத்தில் கலந்து குடித்து தற்கொலை செய்து கொள்வதாக மிரட்டுகிறான்.

சொன்னது போலவே, ரோசத்துடன் சரக்குடன் பூச்சி மருந்தை பொறுப்பாய் (கொஞ்சமாய்) குடித்துவிட்டு, அதே வாசலில் வந்து, வாயில் நுரை தள்ள விழுந்துவிடுகிறான். தூக்கிக்கொண்டு மருத்துவமனைக்கு ஓடுகிறார்கள்.

அவன் மிச்சம் வைத்துவிட்டு போனதை, இரண்டு பேர் பார்த்து, அதை பொறுப்பாய் முழுவதும் குடித்துவிட்டு, அவர்கள் அநியாயமாய் செத்துப்போகிறார்கள்.

இப்பொழுது மதுப்பிரியரான மகன் தான் அந்த இரண்டு பேருக்கும் ஊத்திக் குடித்து, இரண்டு பேரையும் சாகடித்துவிட்டதாக, பஞ்சாயத்து நடக்கிறது. குடிப்பிரியரான மகன் அவர்களின் சாவுக்கு தான் காரணமில்லை என நிதானமாய் சொன்னாலும், ஊர் நம்பவில்லை. இறுதியில், அம்மா தன்னிடம் மிச்சமிருந்த கடைசி நிலத்தையும் அந்த இரண்டு பேருக்கு கொடுத்துவிடுகிறார்.

இன்னும் முடியவில்லை. கொசுறு ஒன்று இருக்கிறது.

இந்த கதையைக் கேட்ட ஒருவர் "அந்த கதிரேசன் மகளைத்தான் கட்டி வைச்சிருலாம்ல!" என அப்பாவியாக கேட்கிறார்.

"அந்த பொண்ணு கல்யாணம் கட்டி, மூணு பிள்ளைகளுக்கு அம்மா. அவ புருஷன் ஒரு போலீஸ்காரன் வேறு. அதனாலேயே போலீசே அவனுக்கு பிடிக்காதாம்!"

இப்படி ஒவ்வொருவருக்கு "அதகளமான" அறிமுகம் என போகிறது கதை.

மீதியையும் பார்த்துவிட்டு, பிறகு படம் பற்றி எழுதுகிறேன்.

போலீசு துறை எப்படிப்பட்டது தெரியுமா?

ஆயுதப்படை வீரர்களுக்கு பல ஆண்டுகளாக பயிற்சி அளிக்கும் அவர் சொல்வார்.

“கீழே இருக்கிற மரத்துக்கு கீழே ஒரு கார்டு (Guard) நிற்கிறான் இல்லையா? அவன் எதுக்கு நிற்கிறான்னு தெரியுமா? கந்தசாமின்னு ஒரு கமாண்டண்ட் (Commandant) இருந்தார். ரெம்ப பக்தியான மனுசன். ரோட்ல ஒரு கல்லைப் பார்த்தாலே கடவுள்னு கையை எடுத்து கும்பிடற ஆள். ஒரு நாள், இங்க லெட்சுமிகடாட்சமா ஒரு வேப்ப மரம் இருந்தா நல்லா இருக்கும்ல! என சொல்லி என்னை ஒரு கன்றை நடச் சொன்னார். நானும் நட்டேன். ஆடு வந்து இரண்டு முறை தின்னுட்டு போயிருச்சு! கடுப்பாகி, ஒரு ஆளை பாதுகாப்புக்கு போடுங்க!ன்னு ஒரு உத்தரவு போட்டார். கன்று வளர்ந்து மரமாயிருச்சு! அவரும் செத்துப்போய் பன்னிரெண்டு வருசமாச்சு! அதிகாரி உத்தரவுன்னு அதுக்கு பிறகு வந்த யாரும் அந்த உத்தரவை திரும்ப வாங்கவில்லை. அந்த கார்டுக்கு ஏன் அங்க நிற்கிறோம்னு தெரியாது! கார்டு போடுறவனுக்கு ஏன் போடுறோம்னு தெரியாது! இவங்கள எந்த கேள்வியும் கேட்கமுடியாது. கேட்டாலும் பதிலும் கிடைக்காது. இது தான் போலீசு துறை!” என்பார்.

- "டாணாக்காரன்" படத்தில் ஒரு காட்சி.

பழி!

நாயகி வேலை செய்யும் அதே அலுவலகத்தில் அந்த ஆள் வேலை செய்கிறான். நாயகி தன் மகனுடன் தனித்து வாழ்ந்து வருவதை தெரிந்துகொண்டு, “என்னை எப்படி வேண்டுமென்றாலும் பயன்படுத்திக்கொள்ளாலாம்” என சொல்ல. நாயகி செருப்பால் வெளுத்துவிடுகிறார். விசயம் பெரிசாகி, வேலை போய்விடக்கூடாதுன்னு என சுதாரித்து, அடுத்தநாளே அழுது, சீனைப் போட்டு மன்னிப்பும் கேட்டுவிடுகிறான்.

அதற்கு பிறகான நாட்களில், நாயகிடம் ஒரு ”சகோதரனைப்” போல பேசிப்பழகி வருகிறான். ஆனால், சக ஊழியர்களிடம் நான் நாயகியை கரெக்ட் பண்ணிட்டேன் என புளுகிவருகிறான். சந்தேகமாய் கேட்பவர்களிடம் ”இன்று மாலை 5 மணிக்கு நான் போன் செய்வேன். அவள் என்னைத் தேடி இந்த லாட்ஜ்க்கு வருவாள். நீங்க வந்தா பார்க்கலாம்!” என்கிறான். சொன்னது போல இவளும் அவசரம் அவசரமாய் கிளம்பி செல்கிறாள்.

பையனை யாரோ கடத்தியதாகவும், தான் அவனை மீட்டு வைத்திருப்பதாகவும், உடனே இங்கே வாருங்கள் என சொல்லியிருக்கிறான். நாயகியும் அடித்து பிடித்து இங்கே வந்துவிட்டாள். அவள் லாட்ஜின் அறைக்குள் உள்ளே நுழைந்ததும், கதவை சாத்துகிறான்.

அவன் பொய் சொல்லியிருக்கிறான் என தெரிந்ததும், அவள் பாட்டிலை உடைத்து ”பகக்த்துல வந்தா உன்னை கொன்றுருவேன்” என மிரட்டுகிறாள். உனக்கு பத்துநிமிசம் தர்றேன். அதுக்குள்ளே யோசித்து சொல்! என்கிறான். பத்துநிமிடம் கழித்து, கொஞ்சம் தலையை கலைத்துக்கொண்டு, சட்டையின் மேல்பட்டனை கழற்றிவிட்டுகொண்டு, ”வெளியே நம்ம சக ஊழியர்கள் வெளியே நிற்கிறார்கள். இப்ப நான் வெளியே போகப்போறேன். உள்ளே எதுவும் நடக்கலைன்னு உனக்கும் எனக்கும் தான் தெரியும். அவங்க கற்பனை பண்ணிக்குவாங்க!” என சொல்லிவிட்டு வெளியே போய்விடுகிறான். அடுத்தநாள் அலுவலகமே அவளைப் பற்றி பரபரப்பாய் பேசிக்கொண்டு இருப்பார்கள்.

இந்தப் பிரச்சனையை நாயகியை சரி செய்துவிடுவதாய் காண்பித்திருக்கலாம். கதைக்கு முக்கிய ட்விஸ்ட் தேவை என்பதால், மேலாளராய் இருக்கும் நாயகனே அவனை வெளுத்து உண்மையை சொல்லுவதாய் முடித்திருப்பார்கள்.

#Galatta_Scene3

#Mouna_Geethangal_1981

நோ மீன்ஸ் நோ!

முகலாய பேரரசர் அக்பர். அவருடைய மனைவி ஒரு ரஜபுத்ர பெண். சதி செய்ததாய் சொல்லி மாட்டிவிடுகிறார்கள். கோபத்தில் அம்மா வீட்டிற்கு அனுப்பிவிடுகிறார். உண்மை தெரிந்ததும், அவரே அழைக்க செல்கிறார். பேரரசர் என்பதால், தடபுடலான வரவேற்பு.

 

முதன்முறையாக மணமகன் மாமியார் வீடு வரும்பொழுது முக்காடிட்டு நிற்கும் பத்து பேரில் ஒருத்தியான தன் மனைவியை சரியாக கண்டுப்பிடிக்கவேண்டும். கண்டுபிடித்தால், மனைவியின் அறையில் தூங்கலாம். இல்லையெனில் வெட்டவெளியில் நட்சத்திரங்களை எண்ணிக்கொண்டு தூங்கவேண்டியது தான்! என சொல்லிவிட்டு சிரிக்கிறார்கள்.

 

கூட்டத்தில் நிற்கும் ராணியான தன் மனைவியை (ஐஸ்வர்யா ராயை) கண்டுபிடிக்க முடியாதா என்ன? கொஞ்சம் முயன்று கண்டுபிடித்துவிடுகிறார். கண்டுபிடித்தபின்பும், வெட்டவெளியில் தான் தூங்குகிறார். காரணம் மனைவி மறுத்துவிட்டால், பேரரசராக இருந்தாலும் வெட்டவெளி தான்! நோ மீன்ஸ் நோ தான்!

 

#Galatta_Scene2

#JodhaAkbar

காதல் கடவுளும், மன்னிப்பும்!

'முதல் நீ முடிவும் நீ' படத்தில் ஒரு காட்சி. பள்ளி இறுதி ஆண்டு படிக்கும் நாயகனை அவளை விரும்பும் ஒரு சக மாணவி எதிர்பாராத தருணத்தில் முத்தம் கொடுத்துவிடுவாள். விதி வலியது. சரியாக அந்த நொடியில் உள்ளே நுழையும் அவனின் காதலி பார்த்துவிடுவாள். அழுதுகொண்டே வெளியே செல்வாள். அவன் தனது நிலையை விளக்க முயற்சிப்பான். அவள் எதையும் கேட்கிற மனநிலையில் இருக்கமாட்டாள். அழுதுகொண்டே வீட்டிற்கு போய்விடுவாள்.

 

காதலின் கடவுளான கியூபிட் அந்த பொண்ணுக்கு போய் அறிவுரைகள் வழங்காமல், மெனக்கெட்டு அவன் வீட்டுக்கு போய், "போய் அவளிடம் மன்னிப்பு கேள்! இல்லையெனில் உன் காதல் புட்டுக்கும். காதலி உனக்கு கிடைக்கவே மாட்டாள்" என அறிவுரை சொல்வார். "செய்யாத தப்புக்கு நான் எப்படி மன்னிப்பு கேட்பது?” என உறுதியாய் மறுத்துவிடுவான்.

 

அந்த கடவுள் அவன் ஒரு இசையமைப்பாளராக நன்கு வளர்ந்த பிறகும், வேண்டுமென்றே நிறைய அழவிட்டு... ஏகத்துக்கும் டிராமா செய்து, ”செய்யாத தப்புக்கு மன்னிப்பு கேட்கவைத்து..!” கடவுளே இப்படி செய்ததால் தான்... செய்யாத தப்புக்கு இன்னும் மன்னிப்பு கேட்டுக்கொண்டே மண்ணில் வாழ்ந்துகொண்டிருக்கிறான் கணவன்.

 

”செஞ்ச தப்புக்கு மன்னிப்பு கேட்கிறவன் மனுஷன்; செய்யாத தப்புக்கு மன்னிப்பு கேட்கிறவன் புருஷன்” 

 

#Galatta_Scene1