மே 5 ‍ பிறந்த நாள்!

அப்பா மில் தொழிலாளி. அம்மாவும் நெசவு தொழிலாளி. ஆகையால், சின்ன அக்கா தான் என்னைப் பார்த்துக் கொள்ளும் பொறுப்பை ஏற்றுக்கொண்டார். அக்கா இரண்டாம் வகுப்பு படிக்கும் பொழுது, அக்காவுடன் பள்ளிக்கூடம் சென்றுவிடுவேன். வீட்டின் நிலைமை கருதி ஆசிரியரும் சிறப்பு அனுமதி தந்திருந்தார்.

எனக்கு நான்கு வயது. சன்னலோரம் உட்கார்ந்து வகுப்பையும், போரடித்தால் வெளியேயும் வேடிக்கைப் பார்த்துக்கொண்டிருந்தேன். சன்னலோரம் அமர்ந்த காட்சி மட்டும் இன்றைக்கும் நினைவு அடுக்குகளில் ஆச்சர்யமாய் நினைவில் நிற்கிறது.

அப்பொழுது எல்லாம் பிறந்த சான்றிதழ் எல்லாம் கிடையாது. வலது கையை தலைக்கு மேல் கொண்டு போய் இடது காதை தொடவேண்டும். என்னால் தொட முடியவில்லை. இவ்வளவு பொறுப்பாய் தினமும் பள்ளிக்கூடம் வருகிறானே என நினைத்து...அடுத்த கல்வியாண்டில்... நாலரை வயது ஆகும் பொழுதே, ஆறு மாதத்தை அதிகப்படுத்தி ஒன்றாம் வகுப்பில் சேர்த்துக்கொண்டனர்.

அதற்கு பிறகு என் நெருங்கிய நண்பர்களில் சிலருக்கும் பிறந்தநாள் மே 5 என பார்க்கும் பொழுது அந்த காலத்தில் எனக்கு செய்தது போலவே நிறைய பேருக்கு செய்திருப்பார்கள் என புரிந்துகொள்ள முடிந்தது.

சான்றிதழில் உள்ள மே 5 யே பேஸ்புக்கில் கொடுத்திருப்பதால்... சில நண்பர்கள் வாழ்த்து சொல்வார்கள். இப்பொழுது அந்த வாழ்த்துகள் வருவதில்லை. ஏதாவது தனிப்பட்ட முறையில் சமூகத்தில் சாதித்தால் தான் வாழ்த்து வரும் போல என நினைத்துக்கொண்டேன்.

இரண்டு நாட்களுக்கு முன்பு ஒரு ஆசிரமத்தில் இருந்து அழைத்து, வாழ்த்து தெரிவித்து நன்கொடை கேட்டார்கள். அத்தனை வசதி இல்லையே! என சொல்லிவிட்டேன். இன்றைக்கு ஹரே ராமா இஸ்கான் ஆட்கள் பொறுப்பாய் குறுஞ்செய்தி மூலம் வாழ்த்து தெரிவித்தார்கள். வங்கியில் இருந்தும் வாழ்த்து செய்தி சொன்னார்கள்.

இன்றைக்கு தோழர் மார்க்ஸ்க்கு பிறந்தநாள். பேஸ்புக், வாட்சப் என சில‌ இடங்களில் மார்க்ஸ் கண்ணில்பட்டார். மக்களுக்கு ஏன் இத்தனை துன்பங்கள், துயரங்கள். இதற்கு விடிவு இல்லையா என இளைஞனாய் வாழ்வில் தேடிய பொழுது, ஒரு கட்டத்தில் மார்க்ஸை சென்றடைந்தேன். அவர் தான் என் மண்டையை குடைந்த கேள்விகளுக்கு எல்லாம் பதில் தந்தார். மீதி வாழ்வின் திசையையும் தீர்மானித்தார்.

மே 5 ஐ வணிகர்கள் எப்படி "வணிகர் தினம்" என தேர்ந்தெடுத்தார்கள் என தெரியவில்லை. தேடிப்பார்க்கவேண்டும். அவர்களுடைய கோரிக்கைகள் எப்படியாவது கண்ணில்பட்டுவிடும். அவர்கள் எங்கு மாநாடு நடத்துகிறார்கள் என்கிற செய்தியும் கண்ணில்படும்.

இன்று பிறந்த, சான்றிதழிலும் பிறந்தநாளாய் இருக்கும் அனைவருக்கும் வாழ்த்துகள்!

சுளுந்தீ நாவல்

எளிய மக்களோடு கலந்த பண்டுவம் படித்த நாவிதன் ஒருவனது வாழ்வைப் பதிவாக்கியிருக்கும் முத்துநாகுவின் முதல் நாவல் ‘சுளுந்தீ’ என்கிறார்கள்.

ஒரு பேரரசு மறையும் நேரத்தில் நாட்டில் நிலவும் நிறைய குழப்பங்கள், ஆட்சியதிகாரப் போட்டிகள் எப்படி இருக்கும் என்கிற கேள்விக்கு பதிலாய் ‘சுளுந்தீ’ 18 ம் நூற்றாண்டின் பின்னணியில் விஜயநகரப் பேரரசு வீழ்ச்சியடைய, வடுக மக்களின் தமிழக குடியேற்றம், நாயக்கர்களின் ஆட்சியின் கீழ் ‘கன்னிவாடி’ எனும் பாளையத்தின் மையம், பாண்டியத் தலைநகரின் மாற்றத்தின் பின்னணி, எதிர்க் கேள்விக் கேட்டவர்கள் ‘குலநீக்கம்’ செய்யப்பட்டு, அடிப்படை உரிமைகள் மறுக்கப்பட்டு வனங்களில், மலைகளில் சொந்த நாட்டிலேயே அகதிகளைப் போல வாழும் அவலம் என்கிற பின்புலத்தோடு எழுதப்பட்ட ‘சுளுந்தீ’ , நூலுக்காக மிக அதிகமாக உழைத்திருப்பதை நாவலில் சொல்லப்பட்டிருக்கும் வரலாறும், நுட்பமாய் சொல்லப்பட்டிருக்கும் பல அம்சங்களும் அதை நிரூபிக்கின்றன.

பொதுவான தமிழிலேயே படித்துவிட்டு, வட்டார வழக்கு என படிக்கும் பொழுது நான் மிகவும் சிரமப்படுவேன். முதன் முதலில் கோபால்ல கிராமத்தில் அதை உணர்ந்தேன். பிறகு ஜெயமோகனின் ஒரு நாவலை படிக்கும் பொழுது ஒரு சோர்வு ஏற்பட்டது. முத்துநாகு அரண்மனையை வியந்து பார்க்கும் பார்வையாக இல்லாமல், எளிய மக்களின் வாழ்க்கையை சொல்வதாக எழுதியிருப்பது வட்டார வழக்காக இருந்தாலும் எந்தவித தொந்தரவும் செய்யவில்லை.

நாவலில் சித்தர் ஒருவர் வருகிறார். அவருக்கு உதவும் பாத்திரத்தில் ராமன் வருகிறார். பல இடங்களில் நோய்களுக்கு நிறைய மருத்துவ குறிப்புகள் எழுதியுள்ளார். ஏன் இவ்வளவு விவரிக்கிறார் என தோன்றிக்கொண்டேயிருந்தது. அவர் போகிற போக்கில் அதை கவனமாக எழுதியிருக்கிறார் என்பதை புரிந்துகொள்ள முடிகிறது.

நாவலில் குலநீக்கம் செய்யப்பட்டவர்களின் வாழ்க்கை கடுமையாக இருக்கிறது. அதற்கான பரிகாரம் அதைவிட பயங்கரமாக இருக்கிறது. இப்படி குலநீக்கம் செய்யப்பட்டவர்கள் எல்லாம் ஒன்றாய் இணைந்து தங்களுக்கு தேவையானதை உழவு செய்வது, அதற்கு தேவையான கிணறு தோண்டுவது, அதற்காக வெடிமருந்தை அரண்மனையில் இருந்து எடுத்து பயன்படுத்தியது தெரிந்ததும் பதறிப்போகிறது. இனி இப்படி ஒரு சம்பவம் நடந்து விடக்கூடாது என்பதில் அடுத்தடுத்த உத்தரவுகள் பறக்கின்றன.

நாவலின் ஓரிடத்தில் பஞ்சம் வருகிறது. அதில் வரும் செய்திகள் எல்லாம் நம்மை உலுக்குகின்றன. புளியங்கொட்டைகளை அரைத்து குடித்து காலத்தை கடத்தியிருக்கிறார்கள். அரண்மனை காவல் படை வசூல் என்ற பெயரில் மக்களை கொள்ளையடித்திருக்கிறார்கள்.

பாதிரியார், அவர் சார்ந்த மதம் வருகிறது. அவருக்கு வேலை அரண்மனையை எதிர்த்து குல நீக்கம் செய்யப்பட்டவர்கள் அதிகாரத்தை எதிர்த்து போரிட்டு விடக்கூடாது என்ற இலக்கில், அவர்களை ஏசுவின் பெயரால் சாந்தப்படுத்தும் வேலையை பக்காவாக செய்கிறார்.

வண்ணான் தொழில் குறிப்புகளும் நாவலில் வந்து போகின்றன. வெள்ளாவி வைக்கும் பொழுது, துணியை அடுதடுத்து அடுக்கும் பொழுதே, சமூகத்தின் வர்க்க அடுக்களையும் புரிந்துகொள்ள முடிகிறது. அதில் மேலே உள்ள துணி யாருடையது என்றால்… பார்ப்பனர்களின் துணி. கீழே உள்ளவர்களின் துணி கடுமையாக உழைக்கும் “சூத்திர” மக்களின் துணி.

நாவலாசிரியரிடம் கேள்விகள் கேட்டு, பதில்களையும் அன்பாதவன் பெற்றிருக்கிறார். அதில் சில சுவாரசியமான கேள்விகளும், பதில்களும்.

சுளுந்தீ புதினத்தின் களம் வரலாறும் புனைவும் கலந்தது..எனில் வரலாற்றுக் காலம் எது?

நாயக்க மன்னர் சொக்கநாத நாயக்கரின் காலமான 1650 முதல் 1680 வரை

இந்த நாவலை எழுத எத்தனை ஊருக்கு அலைந்தீர்கள்..எவ்வளவு காலம் ஆயிற்று?

தமிழகம், கருநாடகம், கேரளம், பகுதிகளுக்கு சென்று வந்தேன். காலம் நான் குறிப்பிட்டால் மிகையாக இருக்கும் என்பதால் பதிலை தவிர்க்கிறேன்.

திண்டுக்கல் தோல் பட்டறைகள் இந்நாவல் நிகழும் காலத்தில் பயன்பாட்டுக்கு வந்துவிட்டனவா?

ஆம். நாயக்கர் ஆட்சியின் துவக்க காலமான திருமலை நாயக்கர் காலத்திலே தோல் பதனிடும் பட்டறைகள் வந்து விட்டது. மன்னர் சொக்கநாதநாயக்கர் ஆட்சியிலே அது பெருக்கம் கண்டது.

பன்றிமலைச் சித்தர் தங்கியிருந்த குகைதான் கொடைக்கானல் குணா குகையா?

இல்லை. சித்தர் பொடவு என்ற சிறுகுகை பன்றிமலையில் உள்ளது. நீங்கள் குறிப்பிடும் பகுதியில் பிரிட்டீஷார் ஆட்சியிலே மனித நடமாட்டம் ஏற்பட்டது.

இந்த நாவலில் அரசு அதிகாரம், படை, மக்களின் வாழ்க்கை, பண்பாடு என கற்றுக்கொள்வதற்கு நிறைய இருக்கின்றன. நாவலில் அம்சங்களை எடுத்துக்கொண்டு விவாதிப்பதற்கும் நிறைய இருக்கின்றன. இப்பொழுது தான் படித்து இருப்பதால், இது தொடர்பாக நிறைய படிக்க வேண்டியிருக்கிறது. அதற்கு பிறகு அசைப் போட்டு நாவல் குறித்த அறிமுகம் ஒன்றை விரிவாக எழுதுவது இன்னும் பொருத்தமாக இருக்கும் என கருதுகிறேன். மீண்டும் ஒருமுறை பிறகு எழுதுகிறேன்.

பக்கங்கள் : 480

விலை : ரூ. 450 (நான்காம் பதிப்பு)

வெளியீடு : ஆதி பதிப்பகம்.

The Pope’s Exorcist (2023)

கணவனை ஒரு விபத்தில் இழந்து, தன் கணவரின் பரம்பரை சொத்தை சரி செய்து, வாழ்க்கைக்கு எதையாவது தேத்தலாம் என ஸ்பெயினுக்கு வருகிறார் அந்த அம்மா. கல்லூரி படிக்கும் பெண்ணுடன், பள்ளி செல்லும் மகனுடன் வருகிறார்.

வீட்டை சரி செய்வதற்கான வேலைகளில் ஊழியர்கள் ஈடுபடும் பொழுது, நெருப்பு விபத்து ஏற்பட்டு ஒரு தொழிலாலி காயம்பட இனி இங்கு வேலை செய்ய முடியாது என சொல்லிவிட்டு கிளம்புகிறார்கள்.

அந்த வீட்டில் இருந்த சாத்தான் அந்தப் பையனைப் பிடித்து ஆட்டத் துவங்குகிறான். உள்ளூரில் ஒரு பாதர் வருகிறார். ”இவரெல்லாம் வெத்துவேட்டு பெரிய ஆளை வரசொல்லு” என மிரட்டுகிறது.

இந்த செய்தி உள்ளூர் சர்ச் மூலம் வாடிகனுக்கு வந்து சேர்கிறது. அங்கு இந்த மாதிரி பேய் விரட்டும் ஆட்களில் தலைமை ஆளாக இருக்கிறார் நாயகனான அந்த பாதிரியார். ”கடந்த காலத்திலும் அந்த ஊரில் இருந்து பிரச்சனைகள் வந்தது. அதை உடனடியாக போய் என்னவென்று பார்!” என போப் அவரை அனுப்புகிறார்.

அந்த சாத்தான் வழக்கமான, சாதாரண பேயாக இல்லாமல், சக்தி வாய்ந்ததாக இருக்கிறது. தன்னை விரட்ட வரும் பாதிரியாரின் பலவீனங்களை எல்லாம் நன்றாக தெரிந்துவைத்திருக்கிறது. அந்த பாதிரியாரைப் பிடித்துக்கொண்டு, வாடிகனுக்குள்ளேயே நுழைந்து நிறைய காரியங்களை செய்துவிடும் பெரிய திட்டத்துடன் இருக்கிறது. இதெல்லாம் படம் துவங்கி கொஞ்ச நேரத்திலேயே சொல்லிவிடுகிறார்கள்.

தலைமை பாதிரியாரால் அந்த சாத்தானை விரட்ட முடிந்ததா? அல்லது சக்தி வாய்ந்த சாத்தான் ஜெயித்ததா? என்பதை கொஞ்சம் பயமுறுத்தி சொல்லியிருக்கிறார்கள்.

****

சாத்தான். வழக்கமான பேய்விரட்டும் படலம். பயமுறுத்தல் என்ற வழக்கமான படமாக இல்லாமல் , மொத்தப் படத்தையும் காப்பாற்றியிருப்பது தலைமை பாதிரியாக வரும் Russel Crowe தான். அவருடைய தடிமனான உடம்பு, எதற்கும் அலட்டிக்கொள்ளாத குணம் எல்லாமும். அதற்கு பிறகு வழக்கமான பேயாக இல்லாமல், வரும் சாத்தான். அதுவும் சக்தி வாய்ந்ததாக இருப்பது. குறைவான பாத்திரங்கள் தான். மற்றவர்கள் கொடுத்த வேலைகளை செய்திருக்கிறார்கள்.

வாடிகனில் உள்ள சாத்தான் விரட்டும் தலைமை பாதிரியாரின் வாழ்க்கையிலிருந்து உண்மை பகுதிகள் என விளம்பரப்படுத்துகிறார்கள். வாடிகன் படத்தை நிறுத்திவிடும் என பயம் வந்துவிட்டதா என தெரியவில்லை. இந்தப் படம் ஒரு கற்பனை கதையே என முதலிலேயே ஜகா வாங்குகிறார்கள்.

மற்றபடி, பேயெல்லாம் உலகத்தில் இல்லை. ஹாலிவுட் துவங்கி, கோலிவுட் வரை தயாரிப்பாளர்கள் கல்லா கட்டுவதற்கு பேய், சாத்தான் எல்லாம் நன்றாக பயன்படுகின்றன. இப்படி கற்பனையான பாத்திரம் ஒன்று கிடைத்துவிட்டால், கதையும், திரைக்கதையிலும் எவ்வளவு புகுந்து விளையாடலாம். ஆனால் அதில் நமது கதையாசிரியர்கள் கற்பனை வறட்சியுடன் இருப்பது தான் இதில் பெரிய சோகம்.

இந்தப் படம் இப்பொழுது திரையரங்குகளில் வெளியாகியிருக்கிறது. தமிழிலும் வெளியாகியிருக்கிறது. ஓடிடிக்கு விரைவில் வந்துவிடும். பேய் விரட்டும் படங்களில் ஆர்வமுள்ளவர்கள் பாருங்கள்.