பெட்ரோலில் முடிந்த மட்டில் கொள்ளையடி!

கச்சா பேரல் விலையை தீர்மானிப்பதில் வாஷிங்டன் மற்றும் இங்கிலாந்தில் உள்ள இரண்டு சந்தைகள் தான் முக்கிய பங்காற்றுகின்றன. இந்த சந்தையை நிதிமூலதன கும்பல்கள் தான் ஆட்டி படைக்கின்றன. கச்சா பேரல் விலையில் ஊக வணிகம் விளையாடுகிறது என்பதை சமீபத்தில் சிதம்பரம் ஒப்புக்கொண்டார்.

உலக சந்தையில் கச்சா பேரல் விலையில் ஏற்றம் மற்றும் இறக்கம் பாதிக்காமல் இருக்க... அரசு பெட்ரோல் விலையை முன்பு நிர்ணயம் செய்தது. இடைக்காலத்தில் அதில் சில திருத்தங்கள் கொண்டு வந்து, உலக சந்தையில் என்ன விலை விற்கிறதோ அதற்கேற்றார் போல விலை நிர்ணயம் செய்யும் நிலை வந்தது. 160 டாலருக்கும் மேல் விற்ற கச்சா பேரல் விலை இன்றைக்கு 50 டாலருக்கும் கீழே விற்கிறது. நடப்புக் கொள்கைப் படி கூட இந்திய அரசு பெட்ரோல் விலையை குறைக்க மறுக்கிறது.

ஏறியிருக்கும் பொழுது, நிதி மூலதன கும்பல்கள் கொள்ளையடித்தன. இறங்கி நிற்கும் பொழுது, இந்திய அரசு, இந்திய எண்ணெய் நிறுவனங்கள் கொள்ளையடிக்கின்றன.

****

தொடரும் கட்டுரை "லைட் லிங்க்" என்பவர் எழுதியுள்ளார்.

முதலாளிகளுக்கு ஒரு சிரமம் என்றால், அரசு பதறுகிறது. விலையை குறைக்கிறது. பெரும்பான்மை மக்களுக்கு சிரமம் என்றால், அரசு கண்டும் காணாமல் இருக்கிறது.

****

முதலாளிகளுக்கு உதவும் பொருட்டு விமான எரிபொருள் விலையை சரிபாதிக்கும் கீழாக குறைத்துள்ள மன்மோகன் சிங் அரசு, சாதாரண ஏழை, எளிய மக்களின் அன்றாடத் தேவைகளுள் ஒன்றான பெட்ரோல் - டீசல் விலையை குறைக்க மறுத்துவருகிறார்.இவருக்கும், சிதம்பரத்திற்க்கும் இந்திய ஏழைகள் கண்ணுக்கு தெரிவதே இல்லை. இவர்கள் போட்டுள்ள கண்ணாடிகளின் சிறப்பம்சம்.

சர்வதேச கச்சா எண்ணெய் விலைகள் தொடர்ச்சியாக குறைந்து வரும் நிலையிலும் கூட உள்நாட்டில் பெட்ரோல் மற்றும் டீசல் விலைகளைக் குறைக்க மன்மோகன் சிங் அரசு மறுத்து வருகிறது. கடந்த வாரத்தில் சர்வதேச எண்ணெய் விலை பேரல் ஒன்றுக்கு 50 டாலருக்கும் கீழாக வீழ்ந்துள்ளது.

கடந்த ஜூன் மாதத்தில் சர்வதேச எண்ணெய் விலை பேரல் ஒன்றுக்கு 123 டாலரை தொட்ட போது, உள்நாட்டில் பெட்ரோல் விலை லிட்டர் ஒன்றுக்கு ரூ.5-ம், டீசல் விலை லிட்டர் ஒன்றுக்கு ரூ.3-ம் உயர்த்தப்பட்டது. இந்நிலையில், இந்தியாவில் தற்போதைய நிலவரத்தின்படி பெட்ரோல் மற்றும் டீசலுக்கான விலை பேரல் ஒன்றுக்கு 67 டாலர் அளவிற்கே இருக்கிறது என்ற உண்மையை அரசே ஒப்புக் கொண்ட போதிலும் கூட, சில்லரை விற்பனையில் பெட்ரோல், டீசல் விலைகளை குறைக்க மறுப்பது எந்த விதத்திலும் நியாயமானது அல்ல.

கடந்த நான்கு மாத காலத்தில் மட்டும் 5 முறை, விமான போக்குவரத்து நிறுவனங்களால் பயன்படுத்தப்படும் விமான எரிபொருள் (ஏவியேசன் டர்பைன் ஆயில்) விலையை மன்மோகன் சிங் அரசு குறைத்துள்ளது. ஒரு கிலோ லிட்டர் (1000 லிட்டர்) ரூ.71,000 ஆக இருந்த விமான எரிபொருள் விலை தற்போது கிலோ லிட்டர் ஒன்றுக்கு ரூ.43,000 ஆக குறைக்கப்பட்டுள்ளது. மேலும், விமான எரி பொருளுக்கு இறக்குமதி வரி 5 சத வீதத்திலிருந்தும் விலக்கு அளிக்கப்பட்டுள்ளது.

இப்படி தனியார் விமான கம்பெனிகளுக்கு மிகப்பெரும் அளவில் சலுகை அளித்திருப்பதன் மூலம் பொதுத்துறை எண்ணெய் கம்பெனிகள் சந்திக்கும் மிகப் பெரும் இழப்பு குறித்து பிரதமர் மன்மோகன் சிங்கோ, நிதியமைச்சரோ யோசிக்க தயாராக இல்லை.

ஆனால் அதே நேரத்தில் மன்மோகன் சிங் அரசு, பெட்ரோல், டீசல் விலை உயர்வாலும், அதையொட்டி அனைத்து விதமான பொருட்களின் விலை உயர்வாலும் மிகக் கடுமையான துயரத்திற்கு உள்ளாகியுள்ள மக்களுக்கு நிவாரணம் தரும் பொருட்டு, பெட்ரோல், டீசல் விலைகளை குறைப்பதற்கு மறுப்பதன் மூலம் ஒரு ஈன அணுகுமுறையை பின்பற்றுகிறது. பெட்ரோலிய பொருட்களின் விலைகளை உடனடியாக குறைப்பதே நாட்டின் பொருளாதாரத்தில் நல்ல பலனை ஏற்படுத்தும்; அத்தியாவசியப் பொருட்கள் உள்ளிட்ட அனைத்து பொருட்களின் விலைகளையும் குறைக்க உதவும்.

உலகெங்கும் பெட்ரோல் விலை குறைப்பு

உலக நாடுகள் பலவும் பெட்ரோலியப் பொருட்களின் சில்லரை விலையைக் குறைத்துள்ள அதே நேரத்தில் இந்தியாவில் மட்டும் விலையில் எவ்வித மாற்றமும் இல்லை.

அமெரிக்கா, பிரிட்டன், ஐக்கிய அரபு எமிரேட் (யுஏஇ), பிலிப்பைன்ஸ், மலேசியா, சீனா, கென்யா போன்றவையும் பெட்ரோல் விலையைக் குறைத்த நாடுகளின் பட்டியலில் அடங்கும். பெட்ரோல், டீசல் விலையை மலேசியா கடந்த செவ்வாயன்று மேலும் குறைத்தது. கடந்த ஆகஸ்ட்டுக்குப் பின் மலேசியா பெட்ரோலியப் பொருட்களின் விலையைக் குறைப்பது இது ஆறாவது முறையாகும்.

பாகிஸ்தானில் பெட்ரோல் 13 சதவீதமும், டீசல் 11.6 சத வீதமும் குறைக்கப்பட்டது.
வங்கதேசம் முறையே 10.3 சத வீதமும் 12.7 சதவீதமும் குறைத்தது.

இலங்கையில் நவம்பர் முதல்வாரத்தில் டீசல் விலை லிட்டருக்கு 30 ரூபாயும் பெட்ரோல் விலை 15 ரூபாயும் குறைக்கப்பட்டது.

பிலிப்பைன்ஸில் கடந்த அக்டோபருக்குப் பின் ஐந்து முறை எரிபொருள் விலை குறைக்கப்பட்டது.
கென்யாவில் பெட்ரோல் 5 சதவீதம் டீசல் 4 சதவீதமும் குறைக்கப்பட்டது.

அயர்லாந்தில் பெட்ரோல் விலை 3 சதவீதம் குறைக்கப் பட்டது.

கென்யாவிலும் அயர்லாந்திலும் கூட சில்லரை விற்பனை அரசின் கட்டுப்பாட்டில் இல்லை. பெட்ரோல் - டீசல் விற்பனை செய்யும் தனியார் கம்பெனிகள் நிர்ப்பந்தம் எதுவும் இல்லாமலேயே எண்ணெய் உற்பத்தி நாடுகளும், பெட்ரோல் சில்லரை விற்பனை விலையைக் குறைக்கத் தொடங்கியுள்ளன.

துபாயில் டீசல் விலை காலனுக்கு 60 திர்ஹம் (துபாய் நாணயம்) குறைக்கப்பட்டது. கடந்த ஜூலைக்குப் பின் 10 முறை எரிபொருள் விலை இங்கு குறைக்கப்பட்டது!

கடும் பொருளாதார நெருக்கடியைச் சந்தித்துக் கொண்டிருக்கும் அமெரிக்காவில் அக்டோபருக்குப் பின் பெட்ரோலியப் பொருட்களின் விலை 16.7 சதவீதம் குறைக்கப்பட்டது!

சீனாவிலும் பெட்ரோலியப் பொருட்களின் சில்லரை விற்பனை விலை குறையத் தொடங்கியது.
உலகிலேயே இந்தியாவில் தான் பெட்ரோல் விலை அதிக விலைக்கு விற்கப்படுகிறது. இந்த சாதனையை உலகிலுள்ள எந்த நாடும் நிகழ்த்தியதில்லை.

நன்றி : http://lightlink.wordpress.com

பந்தய ஒப்பந்தங்கள் – சில குறிப்புகள்

//புதிதாக எதையும் உற்பத்தி செய்யாமல், உற்பத்தி செய்தவனின் பொருள் மீது சூதாடி, சூதாடி உலக முதலாளித்துவம் கண்டிருக்கும் இந்த ‘அபரிதமான பொருளாதார வளர்ச்சி’-யின் உண்மையான பொருள் என்ன? இது உழைப்பே இல்லாமல் உட்கார்ந்து தின்பவனின் உடலில் வளரும் கொழுப்பு! அந்த வகையில் அமெரிக்க முதலாளித்துவத்துக்கு இப்பொழுது வந்திருப்பது மாரடைப்பு// - புதிய கலாச்சாரம், அக். 2008.***

பந்தய ஒப்பந்தங்களைத் தான் “நிதி உலகின் பேரழிவு ஆயுதங்கள்” என்கிறார்கள் இதன் பாதிப்பை ஆழமாய் உணர்ந்த பொருளாதார நிபுணர்களும் முதலீட்டாளர்களும். அதில் ஒருவர் பிரபல முதலீட்டாளர் வாரன் பஃபெட்.

பேரழிவு ஆயுதங்கள் மட்டுமில்லை. இவைகள் “கண்டம் விட்டுக் கண்டம் பாயும் ஏவுகணைகள்” என்கிறார் குருமூர்த்தி.

****

இன்று நிதி மூலதன உலகத்தை ஆட்டி வைப்பவை பந்தய ஒப்பந்தங்கள் (Derivatives) தான். பல நிதிக் கருவிகளில் ஒன்றான இந்த பந்தய ஒப்பந்தங்கள் தங்களது மதிப்பை தமது சொந்த, உண்மையான மதிப்பிலிருந்து பெறுவதில்லை; எந்த சொத்து அல்லது தொழில் நடவடிக்கையை (Transaction) வைத்து ஒப்பந்தம் போடப்படுகிறதோ, அதிலிருந்து தனது மதிப்பைப் பெறுகிறது.

எவைகள் மீதெல்லாம் இந்த பந்தய ஒப்பந்தங்கள் போடப்படுகின்றன? சில உதாரணங்களை பார்க்கலாம்.

• சரக்குகள்
• பங்குகள்
• கடன் பத்திரங்கள்
• வட்டி விகிதங்கள்
• அன்னிய செலாவணி மாற்று விகிதங்கள்
• பங்குச் சந்தை குறியீட்டு எண்
• பணவீக்க விகிதங்கள்
• தட்பவெட்ப நிலைக் குறியீட்டு எண்கள்

ஒரு உதாரணம் மூலம், இதை புரிந்து கொள்ள முயற்சிக்கலாம்.

பங்குகள் மீதான பந்தய ஒப்பந்தம்

டி.வி.எஸ்-ஸின் பங்குகளின் உண்மை விலை ரூ. 10. கடந்த பல ஆண்டுகளில் உற்பத்தியில் ஈடுபட்டு, லாபம் பிரித்து கொடுத்ததில், அதன் இன்றைய மதிப்பு ரூ. 300 என வைத்துக் கொள்வோம்.

டி.வி.எஸ்-ஸின் பங்கு கடந்த மாதத்தில் அதன் மதிப்பு ரூ. 300. இந்த மாதத்தில் அதன் மதிப்பு ரூ. 350 என விற்கிறது. இப்பொழுது பந்தய ஒப்பந்தம் தொடங்குகிறது. அடுத்த மாதம் இதன் விலை ரூ. 400 வரைக்கும் உயரும். எவ்வளவு பந்தயம் என்கிறேன்? நீங்கள் ரூ. 350-ல் தான் நிற்கும். நீங்கள் உயராது என்கிறீர்கள். இருவருக்கும் பந்தயம் ரூ. 1 லட்சம். ரூ. 350-ஐ தாண்டினால், எனக்கு லாபம். உயராமல் அப்படியோ நின்றால், உங்களுக்கு லாபம்.

தள்ளி நின்று தானே, பந்தய ஒப்பந்தங்கள் போடப்படுகின்றன? இவைகள் எப்படி அந்த சரக்கைப் பாதிக்கும் என நமக்கு சந்தேகம் வருகிறது. பாதிக்கும். எப்படி என்கிறீர்களா?



நான்கு நாட்களுக்கு முன்பு, இந்தியா, இங்கிலாந்து அணிகள் மோதும் ஐந்தாவது ஒரு நாள் போட்டி கட்டாக்கில் நடந்தது. 10 நாட்களுக்கு முன்பு, இந்த போட்டியின் மீது, ஊக வாணிகத்தில் பந்தய ஒப்பந்தம் போடப்படுகிறது (என வைத்துக்கொள்வோம்.) எப்படி? இந்தியா ஜெயிக்கும். இங்கிலாந்து ஜெயிக்கும் – என இரண்டு தரப்பிலும் சில நூறு கோடிகள் புரள்கிறது.

இந்தியா ஜெயித்தால் சில கோடிகளை இழக்கப் போகும் தரப்பு, இரண்டு நாள்களுக்கு முன்பு இந்தியாவில் நன்றாக பந்து வீசக்கூடிய ஜாகிர்கான், இஷாந்த் சர்மா, முனாப் படேலை அணுகி ஒரு கோடி தருகிறோம் பவுலிங்கைச் சொதப்புங்கள் என்கிறது. ஒருவரோ அல்லது இருவரோ இதில் சிக்கி சொதப்புவார்களா இல்லையா?

இந்த ஊக வணிகத்தில் பலர் சிக்கியிருக்கிறார்கள். கிரிக்கெட்டின் வரலாறு நமக்கு ஏற்கனவே நிரூபித்து இருக்கிறது.

இப்பொழுது சொல்லுங்கள். தள்ளி நின்று போடப்பட்டாலும், பந்தய ஒப்பந்தங்கள் சரக்கைப் பாதிக்கிறதா இல்லையா?

பின்குறிப்பு : ஏகாதிப்பத்திய நாடுகளில் இப்பொழுது ஏற்பட்டுள்ள நெருக்கடி உலகத்தில் 1930 காலகட்டத்தில் வந்த பொருளாதார நெருக்கடியை விட பல மடங்கு பெரிதாக இருக்கிறது. இந்தியாவில் இன்னும் இந்த பாதிப்புகள் தொடக்க அளவில் இருப்பதாக செய்திகள் சொல்கின்றன. தொடக்க விளைவுகளே நமக்கு பயம் ஏற்படுத்துகின்றன.

இவ்வளவு பெரிய நெருக்கடி எப்படி ஏற்பட்டது? எல்லோருடைய மனதிலும் இந்த கேள்வி திரும்ப திரும்ப அலை அலையாய் எழுந்து கொண்டேயிருக்கின்றன.

ஊக வணிகம், பங்குச் சந்தை சூதாட்டம், பந்தய ஒப்பந்தங்கள், நிதி மூலதனத்தின் வளர்ச்சி – இதை எதைப் பற்றி புரிந்து கொள்ள முயற்சிக்காத அரை வேக்காட்டு பேர்வழிகள் இந்த பொருளாதார நெருக்கடி வழக்கமானது தான். கடந்த காலங்களில் சின்ன அளவில் இருந்தது. இப்பொழுது கொஞ்சம் பெரியது. விரைவில் சரியாகிவிடும் என்கிறார்கள்.

தனிநபர்களை விடுங்கள். பத்திரிக்கைகள் கூட இதனை ஆய்ந்து எழுதுவதில்லை. குரு பெயர்ச்சிக்காக புத்தகம் போட்டு விற்பதில் எல்லா பத்திரிக்கைகளும் கவனமாய் இருக்கின்றன.

சமூகத்தின் மீது அக்கறை கொண்டவர்கள் இந்த நெருக்கடியின் தீவிரத்தை புரிந்துகொள்வதும், முதலாளித்துவத்தின் கோரத்தை, அதன் சித்து வேலைகளை, அதனால் ஏற்படும் அபாயகரமான விளைவுகளை சக நண்பர்களிடம், உறவுகளிடம் பகிர்ந்து கொள்வது மிக அவசியம்.

இது தொடர்பாக தேடும் பொழுது செய்திகள் குறைவாக கிடைக்கின்றன. கிடைக்கின்ற தகவல்களைத் திரட்டி தான் பதிவுகள் எழுதப்படுகின்றன. இப்பொழுது, பணிச்சூழலில் தேடுவது சிரமமாக இருக்கிறது. பல சமயங்களில் மின்சாரம் இல்லாமல் வலையில் உலாவ முடியவில்லை. ஆகையால், வாய்ப்பு உள்ளவர்கள் தேடி, பின்வரும் மின்னஞ்சலுக்கு அனுப்புங்கள். நன்றி.

americadhival@gmail.com

கொள்ளையடித்தது நிதிமூலதன கும்பல்கள்! பரிதவிப்பது தொழிலாளர்கள்!

//“பொருளாதாரத்தில் அரசு எந்த விதத்திலும் தலையிடக் கூடாது; சந்தைப் பொருளாதாரம் ஒன்றுதான் மனித சமூகம் கண்டறிந்த மிகச்சிறந்த பொருளாதார ஏற்பாடு” என்று கூறி, பின்தங்கிய நாடுகள் அனைத்தின் மீதும் தனியார்மயத்தைக் கதறக் கதறத் திணித்து வரும் அமெரிக்க முதலாளி வர்க்கம், கூச்சமே இல்லாமல் ‘மக்களின் வரிப்பணத்தை வைத்து எங்களைக் கைதூக்கி விடுங்கள்’ என்று அமெரிக்க அரசிடம் கெஞ்சுகின்றது// - புதிய கலாச்சாரம் – அக். 08.

அமெரிக்காவில் 20 வங்கிகள் ஏற்கனவே மஞ்சள் கடிதாசி கொடுத்து திவலாகிவிட்டன. திவாலாவது அமெரிக்காவில் இப்பொழுது தொடர்கதையாகி வருகிறது. நேற்று புதிதாக கலிபோர்னியாவைச் சேர்ந்த “டவ்னி சேவிங்ஸ் அண்டு லோன் அசோசியேசன்” மற்றும் “பி.எப்.எப். பேங்க் அன்ட் டிரஸ்ட்” இரண்டு வங்கிகள் மஞ்சள் கடிதாசி கொடுத்துவிட்டன. இவைகள் இரண்டும் வீட்டுவசதி மற்றும் நுகர்வு கடன்கள் வழங்கி வந்தவை.

உலகின் முன்னணி ஆட்டோ மொபைல் நிறுவனமான “ஜெனரல் மோட்டார்ஸ்” நிறுவனம் திவால் அறிவிப்பை தீவிரமாக பரிசீலித்து வருகிறார்களாம். இந்த திவால் அறிவிப்பைத் தவிர்க்க அந்த நிறுவனத்தின் இரண்டு பிரதிநிதிகள் வெள்ளை மாளிகையில் ஜனாதிபதியைப் சந்தித்து 25 பில்லியன் டாலர்கள் (மக்களின் வரிப்பணத்தை) கேட்டிருக்கிறார்களாம்.


அமெரிக்காவின் “சிட்டி வங்கி” யின் பங்குகள் ஒரே நிதியாண்டில் 83% வீழ்ச்சியாகி, அதள பாதாளத்தில் கிடக்கிறது. ஏற்கனவே, உலகம் முழுவதும் 23000 தொழிலாளர்களை வேலை நீக்கம் செய்துவிட்டது. இந்தியாவில் 37 முக்கிய உயர்நிலை அதிகாரிகளை வீட்டுக்கு அனுப்பிவிட்டது. மேலும், 52000 ஊழியர்களை நீக்க அறிவிப்பு வெளியிட்டு இருக்கிறது. ஏற்கனவே திவாலை தவிர்க்க இந்த வங்கி அமெரிக்க அரசிடம் 25 பில்லியன் டாலர்களை வாங்கி ஏப்பம் விட்டுவிட்டது முக்கிய செய்தி.

இப்படி நாளொரு வங்கி திவாலாவது நடந்து கொண்டிருக்கிறது. இவ்வளவு பெரிய நெருக்கடிக்கு காரணம் முதலாளித்துவத்தின் தவிர்க்க முடியாத மிகை (அராஜக) உற்பத்தியும், அதன் விளைவாய் எழுந்த நிதி மூலதனத்தின் தோற்றமும், நிதி மூலதனத்தைக் கொண்டு ஊக வாணிகத்தில் நிதி மூலதன கும்பல்கள் சூதாடி, ஊதிப் பெருக்கியதுதான் காரணம்.

கொள்ளையடித்தது நிதி மூலதன கும்பல்கள், ஏகாதிபத்திய வல்லரசுகள், மிகப்பெரிய வங்கிகள். ஆனால், இன்றைக்கு உலகம் முழுவதும் பாதிக்கப்படுவது பெரும்பான்மை உழைக்கும் மக்கள் தான். அமெரிக்காவில் ஏப்ரலில் வந்த தகவல்படி, மார்ச் மாதம் மட்டும் 80 ஆயிரம் தொழிலாளர்களும், ஜனவரி முதல் மார்ச் வரை 2.5 லட்சம் பேர் வேலையிலிருந்து துரத்தப்பட்டுள்ளனர்.



அமெரிக்காவிற்கு காய்ச்சல் என்றால், நாமும் இங்கு மருந்து சாப்பிடுகிறோம். ஆம். தகவல் தொழில்நுட்பம், உருக்கு, நிதி சேவைகள், ரியல் எஸ்டேட், சிமெண்ட், கட்டுமானம் துறைகளில் 30% வேலை இழப்பார்கள் என அசோசியேட் சேம்பர் ஆப் காமர்ஸ் அண்டு இன்டஸ்டிரீஸ் (அசோசெம்) கணித்துள்ளது.

வருகிற தகவல்கள் இந்த கணிப்பை உறுதிப்படுத்துகின்றன.

“டாடா மோட்டார்ஸ்” நிறுவனம் தனது வாகன உற்பத்தி பிரிவை 25.11.2008 லிருந்து 5 நாட்கள் மூடுகிறது. இது இந்த மாதத்தில் இரண்டாவது முறை. 3000 தற்காலிக ஊழியர்களை நீக்கிவிட்டது. 3 ஷிப்டிலிருந்து 1 ஷிப்டாக குறைத்துவிட்டது.

அசோக் லேலண்ட் நிறுவனம் வாரத்தில் 3 நாள்கள் மட்டுமே உற்பத்தியில் ஈடுபடுகிறதாம். ஷிப்டுகளை குறைத்துவிட்டதாம். இதனால், இதனை நம்பியிருக்கும் பல சிறு நிறுவனங்கள் இயங்க முடியாமல் மூடிவிட்டன.

கார் விற்பனை சரிந்ததால், டன்லப் டயர் நிறுவனம் தனது உற்பத்தியை காலவரையின்றி நிறுத்திவிட்டது. சென்னையில் 1000 ஊழியர்களையும், கொல்கத்தாவில் 1171 ஊழியர்களையும் வீட்டுக்கு அனுப்பிவிட்டது. மாதந்திர உதவித் தொகை ரூ. 1500 ரூபாயாம். இருக்கும் வீட்டிற்கு வாடகை கூட கொடுக்கமுடியாது.

அமெரிக்காவை காப்பியடித்து இந்தியாவிலும் காலியிடம் மற்றும் வீட்டின் விலையை செயற்கையாக ஏற்றி கொள்ளையடித்த ரியல் எஸ்டேட் பிசினெஸ் வீழ்ச்சியடைந்திருக்கிறது.

டி.எல்.எப்., யுனிடெக், பர்ஸ்வந்த், ஓமெக்ஸ் உட்பட்ட 4000 கட்டுமான நிறுவங்களின் கூட்டமைப்பு விற்பனை விலையிலிருந்து 15% குறைத்துக்கொள்ள (லாபத்தில் நட்டம்?)முடிவு செய்திருக்கின்றன. இப்பொழுது பரிசு – கார், லேப்டாப், பிளாஸ்மா டிவி, படுக்கையறை இலவசம் என அறிவிப்பு செய்து கொண்டிருக்கிறார்கள். வீடு வாங்கினால் கார் தருவதாக‌ நேற்று கூட தொலைக்காட்சியில் ஒரு விளம்பரம் பார்த்தேன். குர்கானில் கூவி கூவி விற்றுக்கொண்டிருக்கிறார்கள். வாங்கத்தான் ஆளில்லை. இப்படி கட்டுமான தொழிலும் படுத்துவிட்டது.

இந்தியாவில் இப்படி கடந்த சில மாதங்களில் மட்டும் கோடிக்கணக்கானோர் வேலை இழந்திருக்கிறார்கள்.

இலாபம் கொழித்த பொழுதெல்லாம் அள்ளிய முதலாளிகள் இப்பொழுது நெருக்கடி என்றதும் வேறு எதிலும் கை வைக்க முடியாத இவர்கள் தொழிலாளர்களின் தலையில் கை வைக்கிறார்கள். சம்பளத்தை பாதியாக குறைக்கிறார்கள். சிக்கன நடவடிக்கை (Cost Cutting) என்ற பெயரில் தொழிலாளர்களை வேலையிலிருந்து துரத்துகிறார்கள்.


நிலைமை இவ்வாறு இருக்க, இந்தியாவில் 30% பேர் வேலை இழப்பார்கள் என்று தனது கணிப்பைச் சொன்ன அசோசெம்-ஐ மத்திய அரசு (8,நவம். 2008) கண்டித்து இருக்கிறது.

பொருளாதார மந்தத்தால் இனி வருங்காலத்தில் உருவாகப் போகும் வேலை வாய்ப்பு தான் குறையுமே ஒழிய இப்பொழுது வேலை வாய்ப்பு எப்படி குறையும் என சிதம்பரம் வேலை இழந்த தொழிலாளர்களைப் பார்த்து சிதம்பரம் (1,நவம்.2008) எதிர் கேள்வி கேட்கிறார்.

மூலதனத்தின் மீதும், பொருட்கள் மீதும் அரசாங்கக் கட்டுப்பாடுகள், கண்காணிப்புகள் நீக்கப்பட்டு, எல்லா துறைகளிலும் அன்னிய மூலதனத்திற்குத் தாராளமாக திறந்து விடப்பட்டது தான் இத்தனை நெருக்கடிக்கும் காரணம்.

இவ்வளவு நடந்த பிறகும், தனியார்மய, தாராளமய, உலகமய கொள்கைகளிலிருந்து பின்வாங்க மாட்டோம் என உறுதியாக சோனியா அறிவித்துள்ளார்.

பெரும்பான்மை உழைக்கும் மக்களுக்கு இனி போராட்டம் இல்லாமல் வாழ்க்கையில்லை!