Game Over (2019)

கதை. ஒரு புத்தாண்டு துவங்கும் நாளில் நாயகி பாலியல் பலாத்காரம் செய்யப்படுகிறாள். அதிலிருந்து மெல்ல மெல்ல மீண்டு வரும் பொழுது டிசம்பர் துவங்கியதும் உடலில் பதட்டம் தொற்றிக் கொள்கிறது. மருத்துவர் ஆனிவர்சரி ஃபீலிங் என்கிறார். ஜனவரி பிறந்து விட்டால் சரியாகிவிடும் என்கிறார்.

சைக்கோ கொலையாளிகள் வீட்டில் தனியாக இருக்கும் பெண்களை கொடூரமாக கொலை செய்கிறார்கள். நாயகியும் அதில் மாட்டுகிறாள். வீடியோ விளையாட்டில் தருவது போல மூன்று வாய்ப்புகள் தரப்படுகிறது. பயன்படுத்திக்கொண்டு தப்பித்தாளா என்பது பதட்டமான மீதிக்கதை.

****

30 நிமிடங்களுக்கு ஒரு பாலியல் பலாத்காரம் நடக்கிறது என இந்திய குற்ற ஆவணக் காப்பகம் அறிவிக்கிறது.

பாலியல் வெறித்தனத்தால், சாதிய வன்மத்தால், மதவெறியால் தனியாகவோ கும்பலாகவோ பாலியல் பலாத்காரம் செய்து விடுகிறார்கள். ஒரு பெண்ணின் வாழ்வில் அது எவ்வளவு பதற்றத்தையும் துயரத்தையும் தருகிறது என்பதை நாயகியின் உணர்வுகளால் நன்றாக உணர்த்தி இருக்கிறார்கள்.

இப்படி செய்திருக்கலாம். அப்படி செய்திருக்கலாம் என புலம்புவதா, அழுவதா, அதற்கு போராடி சாகலாம் என்ற முடிவுக்கு வருகிற நாயகியின் முடிவு அருமையானது. வரவேற்கத்தக்கது.

இந்த ஆனிவர்சரி உணர்வு எனக்கும் உண்டு. ஓணம் பண்டிகை வந்தால் ஒரு கசப்பான நிகழ்வு நினைவுக்கு வரும். ஒரு நாள் தான். பிறகு இயல்பாகிவிடும்.

காலயந்திரம், விளையாட்டில் தருகிற 3 (life) வாய்ப்புகளும் எப்பொழுதும் ஈர்ப்பானது. வாழ்வில் செய்த பெரும் தவறுகளை திருத்திக் கொள்ள முடியும் அல்லவா?

ஆண்களைவிட பெண்களுக்கு இது இன்னும் ஈர்ப்பாக இருக்கும் என்பதை உணர முடிகிறது.

படத்தை இன்னும் கொஞ்சம் மெனக்கெட்டிருந்தால் மக்களிடம் பரவலாகக் கொண்டு சேர்த்திருக்கலாம்.

மொத்தப் படத்தையும் தாப்ஸி தாங்குகிறார். வாழ்த்துக்கள்.
பார்க்கக்கூடிய படம் தான். பாருங்கள்.