நேகா தீதீ மக்களின் உணர்வுகளைப் பாடுகிறார்! உ.பி. ஆட்சியாளர்களின் காதில் ஈயத்தை காய்ச்சி ஊற்றியது போல இருக்கிறது!

 

உ.பி.யில் என்ன நடக்கிறது?

ராம்ராஜ்யம் என்ற பெயரில்

அயோத்தியில் வன்முறை அரங்கேறிவிட்டது,

அடுத்து காசி, மதுராவில் ரத்தக்கறை படியப்போகிறது

சாமியார் முதலமைச்சரின் தொகுதியான

கோரக்பூரில் ரத்தக்கறை படிந்துள்ளது.

எதிர்த்துக் கேட்டால் காக்கிச்சட்டை போலீசு

கஞ்சா கேஸ் போடுது

***

”ஹிந்துவானாலும் முஸ்லீம் ஆனாலும்

நமக்கு உழைத்தால் தான் சாப்பாடு –

இவர்களுக்கு (பாஜகவினருக்கு)

ஹிந்து முஸ்லீம்களைப் பற்றி பேசினால் தான்

அவர்கள் அரசியலில் பிழைக்க முடியும்,

உழைக்கும் வழியைப் பார்த்துப் போங்கடா”.

***

”போராடும் விவசாயிகளை

கார் ஏற்றிக்கொலை செய்கிறான்

அமைச்சரின் மகன்,

நம்ம சவுகிதார்(மோடி) என்ன செய்கிறார்?

கொல்லப்பட்ட விவசாயிகளின் நீதிக்கு யார் பொறுப்பு?”

***

‘எலிகள் கடிக்கும் சிறையில் அடைக்கப்படுவேன்” என்று என் அம்மா கூறுகிறார். ஆனால் நான் பயப்படவில்லை’

***

நேகாசிங் ரத்தோர் என்ற பெண்பாடகி எளிய இசைக்கருவிகளின் துணையுடன் சமூகத்தின் பிரச்சனைகளை தனது தாய்மொழியான போஜ்பூரியில் உரக்கப் பாடுகிறார். தினமும் பாடிக்கொண்டே இருக்கிறார். அவருடைய பாடல்கள் மக்களின் தொலைபேசிகளின் ரிங் டோனாக மாறி ஒலிக்கிறது. இந்துத்துவ பயங்கரவாதிகளுக்கும், சங்கிகளுக்கும் நவதுவாரங்கள் வழியாகவும் எரிச்சல் பொங்கி வருகிறது.

கொரானா காலத்தில் சூரத்திலிருந்தும், மும்பையிலிருந்தும் நடந்து வந்த மக்களின் துன்பத்தைப் பார்த்து அவர் பாடத்துவங்கினார். கொரான ஊரடங்கு காலத்தில் ஏதோ பொழுது போகாமல் பாடுகிறார். பிறகு அடங்கிவிடுவார் என ஆட்சியாளர்கள் நினைத்தார்கள். அவர் பாடல்கள் யூடியூப் வழியாக மக்களின் செவிகளை அடைய அடைய பிரபலமானார்.

புல்டோசர் மூலம் ஆட்சியாளும் உத்திர பிரதேச யோகி ஆதித்யநாத் சும்மாயிருப்பாரா? போலீசை ஏவினார். முதல்வரை விமர்சித்தார் என போலீசு நேகாவை கைது செய்ய போனார்கள். நேகா அவர்களுக்கு முன்பே போலீசில் விளக்கம் கொடுத்துவிட்டு, நீதிமன்றத்தில் முன் ஜாமீன் பெற்றுவிட்டார்.

நேகா மீது கஞ்சா வழக்கைப் போட்டார்கள். அவரோ அதிர்ச்சியடையாமல், நான் என்ன சாமியாரா? கஞ்சா அடிச்சிட்டு சுருண்டு கிடக்க! நான் கஞ்சா குடித்தேனா? என்பதை எந்த ரத்தப் பரிசோதனை நிலையத்தில் சோதனை செய்யவேண்டும். சொல்லுங்கள். வருகிறேன் என அதற்கும் ஒரு பாடலை பாடினார்.

இந்துத்துவ சாமியார்கள், சங்கிகள், ஆட்சியாளர்கள் நேகாவை வாயாடி, உ.பியின் புகழை கெடுக்கிறார். எதிர்கட்சிகளிடமும், முசுலீம்களிடமிருந்தும் காசு வாங்கிக்கொண்டு பாடுகிறார என தினமும் அவதூறுகளை அள்ளி வீசிக்கொண்டிருக்கிறார்கள். அவர்களின் சொல்லை வைத்தே அவர்களுக்கான பதிலடிகளை நேகா பாடல்களால் பாடிக்கொண்டிருக்கிறார்.

நாட்டுப்புற பாடல்கள் பாடும் இவர் பிறந்தது பீகார். உ.பி. கான்பூரில் படித்துப் பட்டம் பெற்றார். இப்பொழுது வயது 26. உபிரதேசத்தில் இப்பொழுது கணவருடன் வாழ்கிறார். குடும்பம் அவருக்கு உறுதுணையாக இருக்கிறது. யூடியூப்பில் அவரை பத்து லட்சம் பேர் பின்தொடர்கிறார்கள். அவர் பக்தி பாடல்களையும் பல மேடைகளில் பாடிவருகிறார். இப்பொழுது அவர் சமூக பாடல்களை அதிகமாய் பாடிவருகிறார்.

சட்டமன்றத்திலேயே எதிர்க்கட்சி தலைவர் அகிலேஷ் பாடகி நேகாவிற்கு ஆட்சியாளர்கள் தரும் குடைச்சலை கண்டித்தார். ”அவர் ஒரு நாட்டுப்புறப் பாடகி. சமூகத்தின் துன்ப, துயரங்களை பாடுகிறார். பிறகு உங்களின் ஆட்சியைப் புகழ்ந்து பஜனைப் பாடல்களையா பாடச் சொல்கிறீர்கள்? நாங்கள் ஆதரித்தால் எங்களிடம் இருந்து காசு வாங்கி கொண்டு பாடுவதாக தூற்றுவீர்கள். நான் ஆட்சி செய்த காலத்தில் எங்களை விமர்சனம் செய்தவர்களை பாராட்டி விருது கொடுத்திருக்கிறேன். அதை இந்த நாடு அறியும்.” என பேசினார்.

உத்திரப்பிரதேசத்தில் தங்களின் கோரமான ஆட்சியை எதிர்த்தவர்களை எல்லாம் சிறையில் தள்ளினார்கள். தள்ளுகிறார்கள். சுட்டுக்கொன்றார்கள். இப்பொழுதும் சுட்டுக்கொல்கிறார்கள். ஆனால் ஒரு நாட்டுப்புற பாடகியின் எளிய குரலை அவர்களால் ஒடுக்க முடியவில்லை. ஏனெனில் அவருடைய பாடல்கள் இப்பொழுது மக்களிடம் போய் சேர்ந்துவிட்டது. இப்பொழுது அவர் தனி ஆளில்லை. அவருக்கு பின்னே மக்களின் பேரதரவு இருக்கிறது. இதோ நேற்று ஒரு பாடலை பாடினார். இப்பொழுது வரை ஒன்றரை லட்சம் பேர் கேட்டிருக்கிறார்கள். “உங்கள் பாடல் ஜனநாயகத்திற்கான பாடல் சகோதரி. தொடர்ந்து பாடுங்கள்” என பின்னூட்டங்களில் மக்கள் உற்சாகப்படுத்துகிறார்கள்.

நேகா பாடுவார். அவர் கண்களில் துளியும் பயமில்லை. மோசமான ஆட்சியாளர்களுக்கு தொடர்ந்து மன உளைச்சலை கெடுக்கிறார். மக்களின் ஆதரவு இருக்கும் வரைக்கும் அவர் பாடிக்கொண்டே இருப்பார். அவர் பாடும் பாடலை நீங்களும் ஒருமுறை கேளுங்கள். பிறகு தொடர்ந்து கேட்க துவங்குவீர்கள்.

குறிப்பு : நேகா சிங்கினுடைய டிவிட்டர் பக்கத்தையும், யூடியூப் பக்கத்தையும் பின்னூட்டத்தில் பகிர்ந்திருக்கிறேன்.

யூடியூப் பக்கம்

https://www.youtube.com/@nehafolksinger

ட்விட்டர் பக்கம்

https://twitter.com/nehafolksinger?lang=en

குஜராத்தில் ஊழல் : 1500 ஆதார் அட்டைகள் மூலம் ஜிஎஸ்டி பதிவெண் பெற்று மோசடி

குஜராத்தில் கடந்த 2022 நவம்பரில் தான் பல நிறுவனங்களில் சோதனை செய்ததில், 1000 கோடிகளுக்கும் மேலாக தவறு நடந்ததை கண்டுபிடித்தாக தேசிய ஊடகங்களில் செய்திகள் வந்தன.

****

கடந்த எட்டு மாதங்களில், 1500 ஆதார் அட்டைகளை சட்டவிரோதமாக பயன்படுத்தி ஜிஎஸ்டி பதிவு எண்களை பெற்று, புதிய முறையிலான மோசடி நடந்துள்ளதை ஜிஎஸ்டி துறை கண்டுபிடித்துள்ளது.

சரக்கு கொள்முதல் செய்யாமலே, கொள்முதல் செய்தது போல பில்களை மட்டும் வாங்கி கணக்கு எழுதுவதை “பில் டிரேடிங்” என்பார்கள். இந்த ”பில் டிரேடிங்கை” செய்வதற்காக, அரசு திட்டங்களில் உதவிகள் பெற்றுத் தருகிறோம் என கிராமத்து மக்களை வரவழைத்து, அவர்களுடைய ஆதார், பான் (PAN) எண்களைப் பெற்று, போன் எண்களை மாற்றி 1500 ஆதார் அட்டைகள் மூலம் ஜிஎஸ்டி எண்களை பெற்று மோசடி செய்திருக்கிறார்கள்.

பில் டிரேடிங்கை கட்டுப்படுத்துவதற்காக பிப்ரவரி முதல் வாரத்தில் குஜராத்தில் சூரத், அகமதாபாத், ராஜ்கோட் பகுதிகளில் உள்ள சந்தேகத்திற்குரிய சில நிறுவனங்களுக்கு நேரில் போய் பார்த்த பொழுது, அந்த மக்கள் தங்கள் பெயரில் ஜிஎஸ்டி எண் எடுக்கப்பட்டதே தெரியாது என அதிர்ந்து பதில் அளித்திருக்கிறார்கள்.

ஆதார் அட்டையில் மாற்றப்பட்ட மொபைல் எண்ணில் இருந்து பெறப்பட்ட 470 பதிவுகளை சரிபார்த்த பொழுது இந்தியா முழுவதும் 2700க்கும் மேற்பட்ட ஜிஎஸ்டி பதிவு பெறப்பட்டது கண்டறியப்பட்டது. இப்பொழுது வழக்கு பதிந்து இந்த ஊழலில் சம்பந்தப்பட்டவர்களை தேடிவருகிறார்கள். இதில் சம்பந்தப்பட்ட எல்லா பதிவெண்களையும் சோதித்துப் பார்த்தால் தான் எவ்வளவு பெரிய அளவில் ஊழல் நடந்துள்ளது என்றே தெரியவரும். குஜராத்தில் கடந்த 2022 நவம்பரில் தான் பல நிறுவனங்களில் சோதனை செய்ததில், 1000 கோடிகளுக்கும் மேலாக தவறு நடந்ததை கண்டுபிடித்தாக தேசிய ஊடகங்களில் செய்திகள் வந்தன.

ஜிஎஸ்டி அறிமுகமான 2017 ஆண்டிலிருந்து டிசம்பர் 2021 வரை அதாவது 4.5 ஆண்டு காலத்தில் மட்டும் 32,310 கோடி அளவிற்கு போலியான பில்கள் மூலம் ஊழல் நடந்திருக்கிறது என டைம்ஸ் ஆப் இந்தியாவில் கடந்த ஆண்டு பிப்ரவரியில் செய்தி வந்தது. ஜிஎஸ்டி அதிகாரிகளின் உதவி இல்லாமல் இவ்வளவு பெரிய ஊழல் நடக்க வாய்ப்பில்லை எனவும் எழுதின. அதைத் தொடர்ந்து இப்பொழுது ஆதாரை வைத்து ஊழல் நடந்திருப்பதாக செய்திகள் வருகின்றன.

கடந்த தேர்தல்களில் ”ஊழல் செய்யமாட்டேன். ஊழலும் செய்ய விடமாட்டேன்” என்பது மோடியினுடைய பிரபலமான முழக்கம். ஆனால், ஊழலுக்கு மேல் ஊழலாக மோடியின் சொந்த மண்ணான குஜராத்தில் இருந்து வெடித்து கொண்டிருக்கிறது. இப்படி கடந்த நாடாளுமன்ற தேர்தல்களை ஒட்டி அறிவித்த அனைத்து முழக்கங்களுமே வெற்று முழக்கங்களாகி வருகின்றன. இனி வரும் தேர்தலில் புதிதாக என்ன முழக்கம் வைப்பது என மோடி கும்பல் ரூம் போட்டுத்தான் சிந்திக்கவேண்டும்.

8 வருடத்தில் மோடி உடைத்த பர்னிச்சர்கள்

மோடி எட்டு ஆண்டுகளில் செய்த ”சாதனையை” மக்கள் வரிப் பணத்திலேயே ஏகப்பட்ட பணத்தை செலவழித்து, பிரச்சாரம் செய்கிறார்கள். 2024 மக்களவை தேர்தலுக்கு தயாராக காய்களை நகர்த்த ஆரம்பித்துவிட்டார்கள். நாம் எப்படி சும்மா இருக்கமுடியும். நம்ம பங்குக்கு நாம் எட்டு ஆண்டு “சாதனையை” சொல்லவேண்டியது காலத்தின் அவசியமாகிறது.

இத்தனை ஆண்டுகளில் மோடி உடைத்த பர்னிச்சர்கள் அதிகம். மக்களின் வாழ்வை சிக்கலாக்கியதும் அதிகம். துறைவாரியாகவே எட்டு, எட்டா எடுத்துவிடலாம். பறவைப் பார்வையில் பார்த்தால்…. பரந்துப்பட்ட மக்களைப் பாதித்த சில முக்கிய விசயங்களை சொல்வோம்.

1. கொரானா கொன்றது கொஞ்சம். மோடி கொன்றது அதிகம் :

உலக நாடுகள் கொரானாவை எதிர்கொள்ள தயாரான பொழுது, எந்தவித முன் தயாரிப்பும் இல்லாமல் ஊரடங்கு அறிவித்தார். அன்றாடம் உழைத்து, வீட்டில் உலை பொங்கியவர்கள் எல்லாம் தவித்துப் போனார்கள். மற்ற புயல், வெள்ள காலங்களில் சிவில் சமூகம் களத்தில் இறங்கி தன்னால் சாத்தியமானதை செய்யும். கொரானா ஆட்கொல்லி நோய் என்பதால் அவர்களாலும் உதவ முடியவில்லை. விளைவு. தற்கொலைகள். ஆயிரக்கணக்கான மைல்கள் தகிக்கும் வெயிலில் கர்ப்பிணிகள், முதியவர்கள், குழந்தைகள் நடந்தார்கள். நடந்தே சொந்த ஊரை அடைந்தார்கள். இரண்டாம் அலையில், தன் சொந்தங்களுக்கு ஆக்சிசன் கிடைக்காமல், மருந்து கிடைக்காமல், பெட் கிடைக்காமல், பிறகு இடுகாட்டில் எரிக்க இடம் கிடைக்காமல் பதைபதைப்புடன் அலைந்துகொண்டே இருந்தார்கள். இந்த அரசு நமக்கானது இல்லை என்பது பளிச்சென உணர்ந்த தருணம்.

2. பணமதிப்பிழப்பு கொடுத்த அலைச்சலும் மன உளைச்சலும் அதிகம்.

ஒரு ”சுபயோக சுப” தினத்தில், மோடி திடீரென தொலைக்காட்சியில் தோன்றி, 500, 1000 நோட்டுக்கள் செல்லாது என்றார். ”கருப்பு பணத்தை வெளியே கொண்டுவர மக்கள் பொறுத்துக்கொள்ளுங்கள்” என்றார். மக்கள் ஏற்கனவே கடுஞ்சிரமத்தில் இருந்தவர்கள், இன்னும் அல்லாடினார்கள். வங்கிகளின் நீண்ட வரிசையில் தங்கள் நாட்களை செலவழித்தார்கள். வங்கிகளில் பணம் இருந்தும், திட்டமிட்ட நல்ல காரியங்களை செய்ய முடியாமல் திணறினார்கள். பணம் இல்லாமல் பிணத்தை அடக்கம் செய்ய முடியாது அலைந்தார்கள். “கருப்பு பணம்” உட்பட அத்தனைப் பணமும் பாதுகாப்பாக வங்கிக்கு வந்து சேர்ந்தது. உலகமே காறித்துப்பினாலும், மோடி எதுவும் நடைபெறாதது போல தன் துப்பட்டாவால் துடைத்துக்கொண்டார்.

3. விலைவாசி உயர்வு தரும் மன உளைச்சல்.

கடந்த எட்டு ஆண்டுகளில் மோடியின் நண்பர்கள் மில்லியனர்கள் எல்லாம் பில்லியனர்களாகி இருக்கிறார்கள். பெரும்பாலான மக்கள் ஏறிக்கொண்டே இருக்கும் விலைவாசி உயர்வால் கடும் அவதிக்குள்ளாகி இருக்கிறார்கள். அவர்களின் மாதாந்திர குடும்ப பட்ஜெட்டை இந்திய பட்ஜெட் போலவே பற்றாக்குறை பட்ஜெட்டாக மாற்றியிருக்கிறார். காரணம் மோடி நேரடி வரியை குறைத்து, மறைமுகவரியை அதிகப்படுத்திக்கொண்டே செல்கிறார். கார்ப்பரேட்டுகளுக்கு வரிச்சலுகை. பொதுமக்கள் மீது வரிச்சுமையை ஏற்றிக்கொண்டே போகிறார். கடந்த எட்டு ஆண்டுகளில் மோடி பெட்ரோல், டீசல், எரிவாயு என பொருட்களில் விலை ஏற்றி கொள்ளையடித்தது மட்டும் 26 லட்சம் கோடி. சராசரியாக கணக்கிட்டால், ஒரு குடும்பத்திற்கு ஒரு லட்சம் என்கிறார்கள். எல்லா குடும்பத்துக்கும் கேஸ் அடுப்பு, சிலிண்டர் என புகை அடுப்பிலிருந்து பெண்களை விடுதலை செய்கிறோம் என்றார்கள். இப்பொழுது ஏறிவரும் கேசு சிலிண்டர் விலையால், மீண்டும் பழைய புகை அடுப்புக்கு பெண்கள் திரும்பிக்கொண்டு இருக்கிறார்கள். இந்த ‘பெருமை’ எல்லாம் மோடிக்கே போய்ச்சேரும்.

4. கலவரங்கள் மேலும் கலவரங்கள் :

1925ல் சித்பவன பார்ப்பனர்களால் துவங்கப்பட்டது ஆஎஸ்.எஸ். இயக்கம் அவர்களுடைய கனவு இந்து ராஷ்டிரம். வர்ணாசிரம தர்மத்தை மக்கள் கடைப்பிடிப்பது மூலம் இந்த மண்ணிலேயே அவர்களுக்கான சொர்க்க பூமியை உருவாக்குவது தான் அவர்களின் நோக்கம். நமக்கெல்லாம் செத்ததுக்கு பிறகு தான் ”சொர்க்கம்”. இந்து மதத்தின் ”பெருமைகள்” சொல்லி இந்துக்களை ஒன்றுப்படுத்த முடியாது என்பதை அறிந்துகொண்ட அவர்கள் முசுலீம்களையும், கிறிஸ்துவர்களையும் எதிரிகளாக பிரச்சாரம் செய்தார்கள். அதற்காக அவர்கள் உருவாக்குவது கலவரங்கள். அதற்காக அவர்களின் குண்டர்படைகள் கடுமையான பயிற்சி எடுக்கிறார்கள். இந்த எட்டு ஆண்டுகளில், ஆட்சி அதிகாரத்தில் அவர்கள் வந்ததும், கள் குடித்த குரங்காகி போனார்கள். மக்கள் அன்றாட வாழ்க்கையை தள்ளுவதற்கே சிரமப்படும் வேளையில் தான் இவர்கள் கலவரங்களைத் தூண்டி, மக்களை பலிகொடுத்து அதில் குளிர்காய்கிறார்கள். இந்தியா முழுவதும் மெல்ல மெல்ல காவிமயப்படுத்தி வருகிறார்கள்.

5. மோடி உடைத்த பர்னிச்சர்களின் எண்ணிக்கை அதிகம்.

சிபிஐ, ரிசர்வ் வங்கி, வங்கிகள், நீதிமன்றம், நாடாளுமன்ற ஜனநாயகம், பிரதமர் தேசிய நிவாரண நிதி என பல அமைப்புகளையும் சல்லி சல்லியாக உடைத்தது மோடியின் சாதனை. ஏற்கனவே அதன் சமூக மதிப்பு மலையின் விளம்பில் நின்று கொண்டிருந்ததை, மோடி உச்சியிலிருந்து கீழே தள்ளிவிட்டார் எனலாம். ஆர்.எஸ். எஸ்காரர்களை எல்லா அமைப்புகளுக்குள்ளும் மெல்ல மெல்ல புகுத்திவிட்டார்கள். இப்பொழுது அவர்களின் வானரப்படைகளை கொண்டு கஷ்டப்பட்டு கலவரம் செய்யவேண்டியதில்லை. ஒரு நீதிமன்ற தீர்ப்பை ‘பெறுவதின்’ மூலம் தன் அரசுப் படைகளைக் கொண்டே அமுல்படுத்திவிடமுடியும். அமுல்படுத்துகிறார்கள்.

6. பொதுச் சொத்துக்களை ஒழி; மலிவு விலையில் ”நண்பர்களுக்கு” படையல் வை

1947ல் அதிகாரம் கைமாறிய பிறகு, நேரு ரசிய சார்பாளராக இருந்தார். தரகு முதலாளிகள் அப்பொழுது இந்தியாவில் வளர்ந்திருக்கவில்லை. ரசியாவில் வெற்றிகரமாக அமுல்படுத்திய ஐந்து ஆண்டு திட்டங்களை இந்தியாவிலும் அமுல்படுத்த துவங்கினார். தொழில்துறை, பொதுப்பணித்துறை, ரயில்வே, மருத்துவதுறை, தகவல் தொடர்பு துறை, வங்கித்துறை அடிப்படை கட்டுமானங்கள் எல்லாவற்றையும் மக்கள் வரிப்பணத்தில் உருவாக்கினார். இப்பொழுது ஏகாதிப்பத்தியங்களின் நெருக்கடியால் தனியார்மயம், தாராளமயம், உலகமய கொள்கைகளை கடந்த இருபத்தைந்து ஆண்டுகளாக அமுல்படுத்திக்கொண்டிருக்கிறார்கள். இதில் நாலுகால் பாய்ச்சலில் பொருளாதார திட்டங்களை அமுல்படுத்துகிறார். பொதுத்துறைகளை தன் நண்பர்களுக்கு மலிவு விலையில் விற்றுத் தீர்க்கிறார். எதிர்காலத்தில் மிஞ்சப்போவது அமெரிக்காவைப் போல, அரசு மரத்தை வெட்டி வெட்டி நோட்டடிக்கும். வரி வசூலிக்கும். வெளி விவகாரத்துறைகளை பார்த்துக்கொள்ளும். பெரும்பாலான மக்கள் மக்கள் விரோத திட்டங்களை எதிர்த்து போராடும் பொழுது, போலீசு, இராணுவத்தை வைத்து கடுமையாக ஒடுக்கும்.

கார்ப்பரேட்டு - காவி பாசிஸ்டுகளை ஒழித்துக்கட்டுவதில் தான் நமக்கு விடிவு இருக்கிறது.

The Kashmir files (2022) இந்தி

தில்லியில் பேரனுடன் வாழ்கிறார் பண்டிட் தாத்தா. பேரன் ஜேன்யூ கல்லூரியில் படிக்கிறார். தாத்தா உடல்நலமில்லாமல் இறக்கிறார். அவருடைய இறுதி ஆசையான அவருடைய அஸ்தியை காஷ்மீரில் கரைக்க செல்கிறார்.

தாத்தாவினுடைய பால்ய கால நண்பர்கள் காஷ்மீரில் காத்திருக்கிறார்கள். காஷ்மீரில் 1990 நடந்தவற்றை சொல்கிறார்கள். ஆயுதம் தாங்கிய குழுவால் இந்து பண்டிட்டுகள் எவ்வாறு துரத்தப்பட்டனர்? கொல்லப்பட்டனர் என்பதை என்பதை உணர்ச்சிப்பூர்வமாக சொல்லியிருக்கிறார்கள்.

இந்தியா முழுவதும் ஆர்.எஸ்.எஸ் பரிவாரங்களும், வானரப் படைகளும் பயங்கர உற்சாகத்துடன் இருக்கிறார்கள். கலவரம் செய்வதற்கு ஒரு சரக்கு கிடைத்துவிட்டதென குதூகலிக்கிறார்கள். அவர்களுக்கு எப்பொழுதும் உண்மை தேவைப்பட்டதேயில்லை. பொய்கள் தான் வதந்திகளை பரப்புவதற்கு, கலவரங்களுக்கு தோதானவை. இந்தப் படம் கொஞ்சூண்டு உண்மை, ஏகப்பட்ட பொய், புளுகுகளுடன், வன்மத்துடன் எடுக்கப்பட்டிருக்கிறது. படத்தை கொண்டாடி தீர்க்கிறார்கள்.

பாஜக ஆளும் மாநிலங்களில் 100% வரிவிலக்கு கொடுத்திருக்கிறார்கள். மற்ற மாநிலங்களிலும் வரிவிலக்கு கொடுக்க நச்சரிக்கிறார்கள். தில்லியில் கெஜ்ரிவால் “வரிவிலக்கு எல்லாம் கொடுக்கமுடியாது. அப்படி பலரும் பார்க்கனும்னா, யூடியூப்பில் படத்தை போடு!” என கடுப்பாய் பேசியிருக்கிறார். பாஜக ஆளும் மாநிலங்களில் அரசு ஊழியர்களுக்கு கட்டாய விடுப்பு தருகிறார்கள். கட்டாயமாக படம் பார்க்க உத்தரவிடுகிறார்கள். முசுலீம் வெறுப்பு கோஷங்களை எழுப்புகிறார்கள். பார்க்காமல் போய்விடுவார்களோ என பதறி அவர்களே திரையரங்கை வாடகைக்கு வாங்கி, இலவசமாக பார்க்க வைக்கிறார்கள்.

ஆனால், பா.ஜனதா எவ்வளவோ திட்டமிட்டு, பல திரையரங்குகளில் வெளியிட்டாலும், திரையரங்குகள் காத்து வாங்குகின்றன. முந்தாநாள் அம்பத்தூர் முருகன் திரையரங்கில் இணையத்தில் பார்த்தால், மாலை 6.20 வரைக்கும் ஒரு டிக்கெட் கூட விற்கவில்லை. தனியாய் பார்க்க பயமில்லை தான். ஆனால், குறைவான டிக்கெட்கள் என்றால், காட்சியை ரத்துசெய்துவிடுவார்கள். ஆகையால், கோயம்பேடு ரோகிணி போனால், மாலை 7.30 காட்சி. மொத்தமே எட்டு பேர்தான். இதில் இரண்டு காதல் ஜோடிகள் வேறு. எட்டு பேர் என்பதால், ஏசி குளிரைத் தான் தாங்கமுடியவில்லை.

படத்தின் துவக்கம் முதல் இறுதிவரை காஷ்மீரத்து சிறுவன் முதல் வயதான ஆள் வரை கொடூர வில்லனாக்கி வைத்திருக்கிறார்கள். அதனாலேயே நம்பகத்தன்மை இல்லாமல் படம் பல் இளித்துவிடுகிறது.

காஷ்மீரத்து மக்கள் எப்பொழுதும் பாகிஸ்தானோடும் இருக்க விரும்பியதில்லை. இந்தியாவோடும் இருக்கவிரும்பியதில்லை. அதனால் தான், அடிப்படை உரிமைகள் மறுக்கப்பட்டும், பல ஆயிரம் மக்களை பலி கொடுத்தும், அவர்கள் தங்கள் இறையாண்மைக்கு தான், தொடர்ந்து பல ஆண்டுகளாக போராடிவருகிறார்கள்.

1990களில் காஷ்மீரத்து மக்களின் செல்வாக்கு பெற்ற கட்சியான ஜம்மு காஷ்மீர் தேசிய மாநாட்டு கட்சியின் கொள்கை அறிக்கையை படித்துப் பாருங்கள். உழுபவனுக்கு நிலம் சொந்தம். ஏகப்பட்ட நிலங்களை பிரித்து தந்தார்கள். அப்பொழுது ஆண்ட இந்திய தலைவர்களுக்கு எல்லாம் வயிறு எரிந்தது. மதசார்பற்ற தன்மையை கடைப்பிடித்தார்கள். பாகிஸ்தானோடு இணைந்தால் அது சாத்தியமே இல்லை என்பதால் தான், இந்தியாவோடு கொஞ்சம் இணக்கமாக இருந்தார்கள். அப்படிப்பட்ட மக்களை போய், இப்படி அவதூறுகள் செய்கிறார்கள்.

1990களில் பண்டிட்டுகள் துரத்தப்பட்டது, கொல்லப்பட்டது உண்மை என்றால், இந்துக்களின் ”காவலனான” இவர்கள் என்ன செய்துகொண்டிருந்தார்கள்? பாபர் மஸ்ஜித்தை கையில் வைத்துக்கொண்டு இந்தியா முழுவதும் கலவரம் செய்துகொண்டிருந்தார்களே! பண்டிட்டுகளுக்கு ஏன் நியாயம் கேட்கவில்லை?

இவர்களுக்கு காஷ்மீர் மக்கள் மீதும் அக்கறையில்லை. பண்டிட்டுகள் மீதும் அக்கறையில்லை. அவர்களுக்கு ஒரு ‘ இந்து ராஷ்டிர கனவு’ இருக்கிறது. அந்த கனவை நிறைவேற்ற என்ன வேண்டுமென்றாலும் செய்வார்கள். அவர்களின் வரலாறு அப்படி! அவர்களின் கனவு நிறைவேறினால், பெரும்பாலான உழைக்கும் மக்களை கனத்த இருட்டிற்குள் தள்ளிவிடும். அவர்களின் கனவை கலைத்துப் போடுவோம்!

Shyam Singha Roy (2021) தெலுங்கு

”ஒரு குறும்படம் எடுத்து காட்டு! உனக்கு திரைப்படம் இயக்கும் வாய்ப்பு தருகிறேன்” என தயாரிப்பாளர் சொல்ல.. படம் இயக்கும் வாய்ப்பையும் பெற்று, படமும் வெற்றி பெறுகிறது. இந்தியில் அதேப் படத்தை எடுக்கும் வாய்ப்பு அடுத்து கிடைக்க… அந்த கதை சுட்டது என கைது (!) செய்யப்படுகிறார்.

நாயகன் எடுத்த அந்த கதையை முன்பே எழுதியது யார்? என கதை 1960களில் துவங்கி 1970 களில் படம் நகர்கிறது. சாம் சிங்கா ராய். மேற்கு வங்கத்தில் ஒரு பணக்கார குடும்பத்தைச் சார்ந்தவர். முற்போக்கான எழுத்தின் மூலம் சமூகத்தில் நல்ல மாற்றத்தை ஏற்படுத்திவிட முடியும் என நம்புகிறார். அந்த கிராமத்தை விட்டு கல்கத்தாவிற்கு குடிபெயர்ந்துவிடவேண்டும் என முடிவெடுக்கும் பொழுது, நடனத்தில் சிறந்து விளங்கும் ”தேவதாசி” பெண்ணை கோயிலில் பார்க்கிறார். காதல் வயப்படுகிறார். தேவதாசிகளை தன் காம இச்சைக்கு பயன்படுத்திக்கொள்ளும் ஒரு பார்ப்பானை நாயகி எதிர்க்க, கடுமையாக தாக்கப்படுகிறாள்.

அங்கு நடக்கும் மோதலில் அந்த பார்ப்பனனை கொன்று தீயில் பலியிடுகிறார். நாயகியை அழைத்துக்கொண்டு, கல்கத்தா நகருக்கு வருகிறார். பிறகு என்ன நடந்தது என்பதை விரிவாக சொல்லியிருக்கிறார்கள்.

***

நானி, சாய் பல்லவி இருவருடைய காதல் பகுதி ரசிக்கும்படி இருந்தது. தங்கள் பாத்திரத்தில் அருமையாக பொருந்தியிருக்கிறார்கள். சாய் பல்லவியின் அந்த குழு நடனம் அசத்தலாக இருந்தது. படம் பரவலாக பேசப்படுகிறது.

கோயிலுக்கு சேவை செய்ய என்னும் போர்வையில், பெண்களை நிலபிரபுக்களும், அவர்களை அண்டிப்பிழைத்த பார்ப்பனர்களும் தங்களின் காம இச்சைக்கு பயன்படுத்தி இருக்கிறார்கள். தொடர்ச்சியாக போராடி, 1947லிலேயே தேவதாசி ஒழிப்புச் சட்டத்தை நிறைவேற்றியிருக்கிறார்கள். அதற்கு பிறகு நீடித்ததா என வரலாற்றின் பக்கங்களில் தேடிப்பார்க்கவேண்டும். ஆனால், வங்கத்தில் 1970களுக்கு பிறகும் தேவதாசி முறை நீடித்ததாக படம் பேசுகிறது. இயக்குநர் 1970 களில் இந்தியாவில் அரசியல் ரீதியாக கொந்தளிப்பான காலகட்டம். அந்த காலக்கட்டத்தையும் பயன்படுத்திக்கொள்ளலாம் என நினைத்தாரா என தெரியவில்லை. ஒன்று வரலாற்று ரீதியான படமாக எடுத்திருக்கலாம் அல்லது சம கால படமாக எடுத்திருக்கலாம். இரண்டையும் இணைக்கிறேன் என எடுத்தது தான் இந்த காலக் குழப்பத்திற்கு காரணம் என நினைக்கிறேன்.

எல்லோரும் சொல்வது போல, கதையை சுட்டதற்காக எல்லாம் கைது வரை சென்றது எல்லாம் அதீதம். அதை நியாயப்படுத்த இராமர் கோவில் விசயத்தை எல்லாம் இழுத்தது இன்னும் அபத்தமாகப்பட்டது. நல்லவேளை வழக்கை திரும்ப பெற்றுவிட்டதால் தப்பித்தோம்.

நெட் பிளிக்சில் தமிழ் டப்பிங்கிலும் கிடைக்கிறது.

படத்தின் இயக்குனருடைய புதிய தலைமுறை பேட்டி(யில் நான் எழுப்பியிருந்த சில கேள்விகளுக்கு பதில் தந்திருக்கிறார்.)

https://www.puthiyathalaimurai.com/newsview/128095/shyam-singha-roy-director-rahul-sankrityan-exclusive-interview

Delhi Crime (2019) நிர்பயா வழக்கும், குற்றவாளிகளை தேடலும்!

 

ஒரு சீசன் 7 அத்தியாயங்கள்

”மத்திய அரசின் குற்ற ஆவணக் காப்பகத்தின் அறிக்கையின்படி, கடந்த 2007 மற்றும் 2016-ம் ஆண்டுக்கு இடையே பெண்களுக்கு எதிரான வன்முறை 83 சதவீதம் அதிகரித்துள்ளது. ஒவ்வொரு மணிநேரத்துக்கும் 4 பெண்கள் பாலியல் பலாத்காரம் செய்யப்படுகிறார்கள் . ஒவ்வொரு நாளும் 100 பாலியல் வழக்குகள் பதிவாகின்றன, கடந்த 2016-ம் ஆண்டு பெண்களுக்கு எதிராக 39 ஆயிரம் தாக்குதல்கள் நடந்துள்ளது. இது கடந்த 2015-ம் ஆண்டைக் காட்டிலும் 12 சதவீதம் அதிகம்.”

- செய்தி

*****

தலைநகரான தில்லியில் டிசம்பரின் ஒரு குளிர்கால இரவில், பிசியோதெரபி மாணவியான நிர்பயா, தன் ஆண் நண்பருடன் தெற்கு தில்லியில் அந்த தனியார் பேருந்தில் ஏறுகிறாள். அந்த வண்டியில் ஓட்டுநரோடு இன்னும் ஐந்து பேர் உடன் இருக்கிறார்கள். சில நிமிடங்களுக்கு பிறகு ஆறு பேராலும் பாலியல் பலாத்காரம் செய்யப்பட்டு, கொடூரமாக டார்ச்சர் செய்யப்பட்டு, இருவரும் துணியே இல்லாமல், சாலையோரத்தில் தூக்கியெறியப்படுகிறார்கள். அவர்கள் மீது பேருந்தை ஏற்றி கொல்லப் பார்க்கிறார்கள். அவர்கள் தப்பித்துவிடுகிறார்கள்.

மெல்ல மெல்ல தலைநகர் முழுவதும் செய்தி பரவுகிறது. பிறகு இந்தியா, உலகம் முழுவதும் இந்த அதிர்ச்சி செய்தி பரவுகிறது. போலீஸ் தாக்கப்பட்டவர்களுக்கு சிகிச்சைக்கு ஏற்பாடு செய்கிறது. பலாத்காரத்தை செய்துவிட்டு, வெவ்வேறு திசைகளில், மாநிலங்களில் போய் ஒளிந்துகொள்கிறவர்களை தேட துவங்குகிறார்கள். பல்வேறு சிரமங்களை எதிர்கொண்டு ஒவ்வொருவரையும் கைது செய்வது தான் படம்.

ஒரு பெண்ணை பாலியல் பலாத்காரம் செய்யப்படுவதும், கொல்ல முயல்வதும், கொல்லப்படுவதும் இந்தியாவில் நடக்கும் அரிதிலும் அரிதான நிகழ்வா? இல்லை. தொடர்ச்சியாய் இப்படி நடப்பதும் தலைநகர் தில்லியிலேயே இப்படி கொடூரமாய் நடந்ததும், ஏற்கனவே குமுறிக்கொண்டிருந்த தன் கோபத்தை மக்கள் மொத்தமாய் காட்டியதிலும் தான் இதன் முக்கியத்துவம் இருக்கிறது.

படத்தில் போலீஸ் வீட்டிற்கே செல்லாமல் கண் விழித்து விடிய விடிய வேலை செய்வது, ஸ்டேசனிலேயே தூங்கி எழுந்து, தொடர்ந்து வேலை செய்வது, அவர்களின் இயல்பான உடல் நோவுகள், அவர்களின் மனித நேயம், போலீஸ் என்பதால் தன் பெண்ணுக்கு வரன் கிடைக்காமல் சிரமப்படுவது, தில்லியில் உள்ள மக்கள் தொகைக்கு ஏற்ப, போலீசின் எண்ணிக்கை இல்லாததது, அதற்குரிய நிதி ஒதுக்கீடு இல்லாமல் இருப்பது, யூனியன் பிரதேசம் என்பதால், ஒன்றிய அரசின் கையில் போலீசின் அதிகாரம் இருக்கிறது. அதனால், தில்லியின் முதல் அமைச்சர் போலீஸ் அதிகாரம் தன் கைக்கு வரவேண்டும் என உள்ளடி வேலைகளை செய்வதால் ஏற்படும் துயரம் என போலீசின் பல பிரச்சனைகளையும் சொல்லிவிட்டார்கள். இந்த சம்பவத்தில் தில்லி போலீசின் பெயர் மிக மோசமாக சாபம் கிடைத்துவிட்டது. தொலைந்த இடத்தில் தானே தேடமுடியும். அதனால், இழந்த பெயரை அந்த சம்பவத்தை வைத்தே விமோசனம் பெறுவதற்காக இந்த சீரிஸ் எடுக்கப்பட்டுள்ளது.

இந்த சம்பவத்திற்கு காரணம் என்ன? ஒரு போலீஸ் போகிற போக்கில் தன் சக போலீசிடம் சொல்கிறார். “இது ஒரு பொருளாதார பிரச்சனை. ஒரு குறிப்பிட்ட செக்டார் தான் நிறைய பணத்தை கொண்டு வருகிறார்கள். அவர்களைப் பார்த்து பணம் இல்லாதவர்களுக்கு கோபம் வருகிறது. அதனால் எடுத்துக்கொள்ள பார்க்கிறார்கள். அவர்களுக்கு இழப்பதற்கு ஏதும் இல்லை”. இந்த சம்பவத்தில் பெரும்பாலும் படிக்காதவர்கள், ஏதுமற்றவர்கள் அதனால் இப்படி பதில் சொல்கிறார். படித்த உயர்தட்டு இளைஞர்கள் இப்படி ஒரு சம்பவத்தில் ஈடுபட்டதில்லையா? படத்திலேயே “நல்ல வேளைக்கு இந்த கொடூரத்தை செஞ்சவங்க பெரிய இடத்து பிள்ளைகளா இல்லை!” ஒரு வசனம் வரும். அப்பொழுது இந்த பதில் பொருந்துமா? பொருந்தாது.

இங்கிலீஷில் “Tip of Iceberg” என்பார்கள். வெளியே தெரிவது ஒரு சின்ன முனை. அந்த முனையை பிடித்து கடலின் உள்ளே சென்றால் இமயமலையை விட பெரிய மலை இருக்கலாம் என்பார்கள். இந்த சம்பவமும் ஒரு சின்ன முனை தான். இங்கு நிலவும் பிற்போக்கு உற்பத்தி முறையும், அதனால் எழும் பிற்போக்கு சிந்தனையான ஆணாதிக்கத்தோடு சேர்ந்த பெண்களைப் பற்றிய சிந்தனை தான் அடிப்படை. ஒருவனை கைது செய்து அழைத்து, ஆற்றை கடக்கும் பொழுது, தப்பிப்பான். ”உங்க அம்மா கிட்ட சொல்லிருவேன்” என போலீஸ் கத்தும். உடனே சரணடைந்துவிடுவான். இன்னொரு குற்றவாளி “எங்கம்மாவிற்கு இன்னேரம் தெரிந்திருக்கும். அவர்கள் தற்கொலை செய்திருப்பார்கள்” என கையை அறுத்து தற்கொலைக்கு முயல்வான். அதெப்படி அம்மாவை தெய்வமாகவும், அம்மாவை போல ஒரு பெண்ணை கொடூரமாக பாலியல் பலாத்காரம் செய்ய முடிகிறது? அது வேறு டிப்பார்மெண்ட். இது வேறு டிப்பார்மெண்ட்.

ஒரு கொடூர பாலியல் சம்பவம். விளைவு அந்த பெண், மருத்துவர்களின் கடுமையான போராட்டத்திற்கு பிறகு, சிங்கப்பூர் அழைத்து சென்றும் இறந்துவிடுவாள். ஒரு ஆள் சிறையில் இருக்கும் பொழுதேதற்கொலை (!) செய்துகொள்வான். ஒரு பையன் மைனர் என்பதால், அதிகப்பட்சம் தண்டனையான மூன்று ஆண்டுகளோடு தப்பித்துக்கொள்வான். மீதி நால்வருக்கு சட்டத்தில் உள்ள எல்லா வாய்ப்புகளும் அளிக்கப்பட்டு, தண்டனை கொடுக்கப்பட்டுவிட்டது. அவ்வளவு தானா?

நாம் நம்மோடு வாழும் சக பெண்களை எப்படி கருதுகிறோம்? எப்படி நடத்துகிறோம்? என ஒவ்வொருவரும் சிந்தித்து பார்க்க வேண்டிய தருணமிது! இல்லையெனில் இன்னொரு நிர்பயா இப்பொழுது எங்கோ ஒரு மூலையில் நிர்கதியாய் போராடிக்கொண்டிருப்பாள்.

மற்றபடி, அந்த குற்றவாளியின் மனநிலையான அம்மாவை ”தெய்வமாகவும்”, மற்ற பெண்களை இழிவாகவும், வீட்டிற்குள் அடைத்து வைக்கிற மனநிலையுடன் இருக்கிற ஆட்களாகவும் இருக்கிற மனநிலை தான் இந்துத்துவ வெறியர்கள் தான் ஒன்றிய அரசிலும், சில மாநிலங்களின் ஆட்சியிலும் இருக்கிறார்கள்.  கடந்த ஏழு ஆண்டுகளில் முன்பை விட பெண்கள் மீதான பாலியல் சீண்டல்கள், பலாத்காரங்கள், தாக்குதல்கள் அதிரித்திருக்கின்றன.

மாநிலங்கள் வாரியாக சேகரித்து ஒன்றிய அரசு வெளியிட்ட புள்ளி விவரங்களே அதனை நிரூபிக்கின்றன. இதில் பாஜகவின் ட்ரோல் படை பெண்கள் மீது சமூக வலைத்தளங்களில் நிகழ்த்துகிற தாக்குதல்கள் எல்லாம் இந்த பட்டியலில் விடுப்பட்டு போயிருக்கின்றன என நிச்சயமாய் சொல்லலாம்.

”இந்தியாவில் 2019 ஆம் ஆண்டில் பெண்களுக்கு எதிராக 4,05,861 குற்றங்கள் பதிவாகியுள்ளன, ஒவ்வொரு நாளும் சராசரியாக 87 கற்பழிப்பு வழக்குகள் பதிவாகியிருக்கின்றன. இது 2018 ஆம் ஆண்டைவிட  ஏழு சதவீதத்திற்கும் மேலானது என தேசிய குற்ற ஆவணக் காப்பகம் வெளியிட்டுள்ள சமீபத்திய புள்ளிவிவரம் காட்டுகிறது.

ஒரு லட்சம் பெண்கள் மக்கள் தொகையில் பதிவு செய்யப்பட்ட குற்ற விகிதம் 2019 ஆம் ஆண்டில் 62.4 சதவீதமாக உள்ளது, இது 2018 ஆம் ஆண்டின் 58.8 சதவீதத்திலிருந்து அதிகரித்துள்ளது. 2018 ஆம் ஆண்டில் நாட்டில் பெண்களுக்கு எதிரான குற்றங்கள் 3,78,236 பதிவாகியுள்ளன. 2018 ஆம்

ஆண்டில், நாடு முழுவதும் 33,356 கற்பழிப்புகள் பதிவாகியுள்ளன, இது 2017 ஆம் ஆண்டில் 32,559 ஆக இருந்தது.

2019 ஆம் ஆண்டில் பெண்களுக்கு எதிராக 4,05,861  குற்றங்கள் பதிவாகியுள்ளன. இந்திய தண்டனைச் சட்டத்தின் கீழ் இந்த வழக்குகளில் பெரும்பாலானவை 'கணவர் அல்லது அவரது உறவினர்களால் கொடுமை' (30.9 சதவீதம்), பெண்கள் மீதான தாக்குதல்' (21.8 சதவீதம்), பெண்கள் கடத்தல் (17.9 சதவீதம்).

பெண்கள் மட்டுமல்ல, குழந்தைகளுக்கு எதிரான குற்றங்களுடன் தொடர்புடைய வழக்குகளும் அதிகரித்து உள்ளன. 2018 ஆண்டடைவிட 2019ஆம் ஆண்டில்  குழந்தைகளுக்கு எதிரான குற்றங்கள் 4.5 சதவீதம் அதிகரித்துள்ளன.

2019 ஆம் ஆண்டில் குழந்தைகள் மீதான குற்றங்கள் மொத்தம் 1.48 லட்சம்  பதிவு செய்யப்பட்டுள்ளன, அவற்றில் 46.6 சதவீதம் கடத்தல் வழக்குகள்

மற்றும் 35.3 சதவீத வழக்குகள் பாலியல் குற்றங்கள் தொடர்பானவை.”

-    - மாலைமலர், 3/09/2020

PK (2014) இந்தி

நம்ம பூமியை ஆய்வு செய்ய வேற்று கிரகத்திலிருந்து நாயகன் வருகிறார். வந்த உடனேயே தனது கிரகத்தை தொடர்பு கொள்ள வைத்திருக்கும் ரிமோட் டாலரை ஒரு திருடனிடம் பறிகொடுக்கிறார். அதன் துணை இல்லாமல் தன் கிரகத்தை தொடர்புகொள்ள முடியாது. ஆகையால், தேட துவங்குகிறார்.

தேடும் பொழுது “ஆண்டவன் தான்யா உனக்கு உதவவேண்டும்” என பலரும் சொல்ல, எல்லா கடவுள்களையும் கும்பிட துவங்குகிறார். ஆனால் கிடைத்தபாடில்லை. நாயகி ஒரு செய்தி தொலைக்காட்சியில் பணிபுரிகிறார். இவருடைய நடவடிக்கைகளில் ஈர்க்கப்பட்டு, விசாரித்து உதவ முன்வருகிறார்.

அந்த ரிமோட் ஒரு கார்ப்பரேட் சாமியாரிடம் சிக்கி இருப்பது தெரியவருகிறது. அந்த சாமியார் “அது சிவனிடமிருந்து கிடைத்தது” என மக்களிடம் அள்ளிவிட்டுக்கொண்டிருக்கிறார். அதை மீட்டார்களா? தனது சொந்த கிரகத்துக்கு போனாரா என்பதை பல கலாட்டாக்களுடன் சொல்லியிருக்கிறார்கள்.

******

முன்னாபாய் எம்பிபிஎஸ் (தமிழில் வசூல் ராஜா எம்பிபிஎஸ்), 3 இடியட்ஸ் (தமிழில் நண்பன்) படங்களின் இயக்குநர் இராஜ்குமார் ஹிரானி தான் இந்தப்படத்தையும் எடுத்திருக்கிறார். அவர் எடுத்தது சில படங்கள் என்றாலும் பல விருதுகளை பெற்றுள்ளன. பல மொழிகளில் மீண்டும் எடுக்கப்பட்டுள்ளன.

ஒரு ஏலியன் மனிதன் கதாப்பாத்திரத்தை வைத்து திரில்லர், ஆக்சன் என பல படங்களை எடுத்து கல்லாக் கட்டிக்கொண்டிருக்கும் பொழுது, சமூக அக்கறையுடன் சமூகத்தில் உள்ள அம்சங்களை குறிப்பாக மதம் சம்பந்தப்பட்ட விசயங்களை விவாதித்தது அருமையான விசயம்.

எல்லா கடவுள்களையும் நெக்குறுகி வேண்டினாலும், அவருடைய வேண்டுதல் நிறைவேறாதது போல... இந்த நாட்டில் பல கோடிக்கணக்கான மக்கள் விதவிதமான கடவுள்களை வேண்டினாலும், அவர்களுடைய பிரார்த்தனைகள் எல்லாம் காற்றில் எழுதியது போல கரைந்து போய்விடுகின்றன. சற்றும் சளைக்காத விக்கிரமாதித்தன் போல தங்களுடைய வேண்டுதல்களை கேட்டுக்கொண்டே இருக்கிறார்கள்.

படத்தின் துவக்கத்தில் ”பாகிஸ்தானி முஸ்லீம் என தெரிந்தும் அமைதியாகிவிட்டீர்களே!” என்பார் நாயகியிடம்! இதோ மாநாடு படத்திலும் நாயகன் கேட்கிறார். “முசுலீம்னு தெரிஞ்சிருந்தா பேசியிருக்க மாட்டீங்க! அப்படித்தானே!” என்பார். இரண்டு படங்களுக்கான கால இடைவெளி ஏழு வருடம் தான். ஆனால், இந்த இடைவெளி இடைப்பட்ட காலத்தில் எவ்வளவு பெரிதாக ஆக்கப்பட்டிருக்கிறது! துயரம்.

ஏலியனாகவே வாழ்ந்திருக்கும் அமீர்கான், கெளரவ வேடத்தில் வரும் சஞ்சய் தத், நாயகி அனுஷ்கா சர்மா, சமீபத்தில் இறந்த சுஷாந்த் என எல்லோருமே சிறப்பாக செய்திருக்கிறார்கள்.

அருமையான படம். வந்த புதிதிலேயே பார்த்து கல கலவென சிரிக்க வைத்தும், சிந்திக்கவும் வைத்தப்படம். யூடியூப்பில் தமிழில் சப் டைட்டிலுடன் இலவசமாக இருக்கிறது. கண்டிப்பாய் பார்க்க வேண்டிய படம்.

விநோதய சித்தம் (2021) ஒரு பார்வை

முகநூலில் இந்தப்படத்தைப் பற்றி சிலர் பாராட்டி எழுதியிருந்தார்கள்.  Zee5 தயாரித்து, இயக்குநர் சமுத்திரகனி இயக்கிய படத்தை தங்கள் சானலிலேயே வெளியிட்டும் இருக்கிறார்கள்.
 
கதையை ஒரு பறவைப் பார்வை பார்த்தால்…. 50+ ஐ கடந்த நாயகன் ஒரு பெரிய நிறுவனத்தின் முக்கிய பொறுப்பில் இருக்கிறார். அவருக்கு 20+ வயதில் பையன். இரண்டு பெண்பிள்ளைகள்.  எப்பொழுதும் பிசியாக இருக்கிறார்.  தான் இல்லாமல் நிறுவனத்திலோ, வீட்டிலோ அசையாது என்ற ‘நம்பிக்கையில்’ இருக்கிறார்.
 
தொழில் விசயமாய் வெளியூர் போயிருக்கும் பொழுது, ஒரு மோசமான விபத்து ஏற்படுகிறது. அதில் இறந்துவிடுகிறார்.  ’உயிரை’ எடுத்துக்கொண்டு போக காலன் வருகிறார்.  இன்னும் தன் பிள்ளைகள் யாருக்கும் திருமணம் செய்யவில்லை. ஏகப்பட்ட வேலைகள் இருக்கின்றன. இப்போதே அழைத்துக்கொண்டு போனால் எப்படி? என காலனிடம் பதைபதைப்புடன் சண்டையிடுகிறார். (அவர் மூலம் மக்களுக்கு பல விசயங்கள் சொல்லலாம் என்ற காலனின் முடிவால்) எவ்வளவு காலம் வேண்டும் என பேரத்தில், 90 நாட்கள் என முடிவு செய்கிறார்கள்.
 
இந்த 90 நாட்களில் என்ன ஆனது? என்பதை நகைச்சுவையாகவும், உணர்ச்சிப்பூர்வமாகவும் கதை சொல்லியிருக்கிறார்கள்.
 
நேரம் இல்லை. நேரம் இல்லை என சொல்லிக்கொண்டு நிகழ்கால கணத்தை ‘ரசிக்காமல்’ கடப்பது!  மனிதர்கள் எல்லாம் தன்னால் தான் எல்லாம் நடக்கின்றன என ‘அப்பாவித்தனமாய்’ நம்பிக்கொண்டிருப்பது! பிள்ளைகளிடம் அன்பாய், மதித்து நடக்காமல் இருப்பது என இந்த கதையின் மூலம் சொல்லப்படுகிறது.   இப்படி சில நல்ல விசயங்களை படம் முழுவதும் தூவியிருக்கிறார்கள். அதைத்தான் பலரும் பாராட்டி எழுதிக்கொண்டிருக்கிறார்கள்.
 
படத்தின் அடிநாதம் அதுவல்ல! காலனாக வருபவர் அழுத்தம் கொடுத்து துவக்கத்திலிருந்து சொல்வது!  இந்த பூமியில் வாழும் எல்லா மனிதர்களுக்கும் ஒரு ‘கணக்கு’ இருக்கிறது. நாயகனுக்கு கணக்கு முடிந்துவிட்டது.  அந்த பாரில் மொடா குடியாய் குடித்துக்கொண்டிருக்கும் மது பிரியருக்கு இன்னும் முப்பது ஆண்டுகள் வாழ்வு இருக்கிறது என்கிறார்.   உங்களுக்கு ஒரு நல்ல வேலை வைத்திருந்தோம்.  ஆனால், நீங்கள் மோசமாய் ஒருவரை ஏமாற்றி, அந்த வேலையை பெற்றுக்கொண்டீர்கள். உங்களால் ஏமாற்றப்பட்ட அந்த ஏழை ஐயங்கார் அதற்கு பிறகு உங்களை விட 100 மடங்கு பணமும், புகழும் சம்பாதித்தார். அவருடைய பையன் உங்களுக்கு மேலே உயரதிகாரியாய் வந்து அமர்ந்தார்.  ஆக, எல்லாமே கணக்கு தான்.  அது தெரியாமல் மனிதர்கள் தைய்யா, தக்கா என குதித்துகொண்டிருக்கிறீர்கள் என படம் போதித்து கொண்டேயிருக்கிறது.
 
இங்கு எல்லாமே ”கணக்கு” தான். யார் யாரை எங்கு வைக்கவேண்டும் என சொல்லும் பொழுது, நமக்கு சட்டென்று தோணவில்லையா? இந்த குரல் தமிழக மண்ணில் இரண்டாயிரம் வருடமாய் சமூகத்தில் எங்கெங்கு திரும்பினாலும் ஒலித்துக்கொண்டிருக்கும் மனுதர்மத்தின் குரல் அல்லவா! இது தானே சாதிய கட்டுமானத்தை நியாயப்படுத்துகிறது. இது தானே எல்லா சாதிய ஒடுக்குமுறைகளுக்கும் காரணமாக இருக்கிறது. உழைக்கும் வர்க்கத்தை ஒன்று சேர்க்கவிடாமல் தடுத்துக்கொண்டிருக்கிறது.
 
கதையை ஸ்ரீவத்சன் எழுதி, மேடை நாடகமாக பலமுறை மேடை ஏறியிருப்பதாக சொல்கிறார்கள். இதில் சமுத்திரக்கனி உள்ளே புகுந்து நல்ல விசயங்களை தூவி, பலருக்கும் சென்று சேரும்படியான படமாக சேர்த்திருக்கிறார்.   ’ஸ்ரீவத்சன்கள்’ எப்பொழுதும் ’கவனமாக’ தான் நமக்கு கதை சொல்கிறார்கள். நாம் தாம் ’கவனமில்லாமல்’ விழுந்துவிடுகிறோம்.

”ஒரு ட்ரையல் பார்க்கட்டுமா சார்!”

வண்டியை வழக்கமாய் விடும் மெக்கானிக்கிடம் சர்வீஸ்க்கு விட்டிருந்தேன். எடுக்க போகும் பொழுது, அங்கு ஒரு சான்றிதழ் போல தொங்கவிட்டிருந்தார்

என்னவென்று தூசி துடைத்து படித்த பொழுது, ஒரு பைக் காணாமல் போனதாக போலீஸ் தந்த ரசீது அது. என்னவென்று கேட்டேன்.

”யாரும் படிக்க மாட்டங்க! நீங்க கேட்கிறீங்க! நான் பழைய வண்டிகளை வாங்கி விற்பது உங்களுக்கு தெரியும் அல்லவா! அப்படி ஒரு ஆள் வந்து, ஒரு பல்சர் பைக்கை ட்ரையல் பார்க்கட்டுமா! என கேட்டார். போன ஆள் அப்படியே எஸ்கேப் ஆயிட்டான்!” என்றார்.

”அவனோட டாக்குமெண்ட்ஸ் உங்ககிட்ட இருக்கும் அல்லவா!” என்றேன்.

“போன் அடிச்சா எடுக்கல! ஆதாரில் உள்ள அயப்பாக்கம் முகவரியில் போய் பார்த்தால், ஆள் அங்கு குடியிருக்கவில்லை! பக்கத்து கடைக்காரர் ”வண்டியை எடுத்துட்டு போய் என்ன செய்வான் தெரியலை! ஒரு கம்ப்ளைண்ட் கொடுத்துடு! உனக்கு தான் நல்லது”ன்னு சொன்னார்! அந்த புகாரை பதிவு பண்ணி ரசீது வாங்குறதுக்குள்ளே நான் பட்ட பாடு இருக்கே! என ரெம்பவும் அலுத்துக்கொண்டார்.

“பணம் ஏதும் கேட்டாங்களா!” என்றேன்.

”நாலு மணிக்கு எஸ்கேப் ஆனான். இரவு பத்து மணிக்கு புகார் கொடுக்க போனேன். என்ன இப்ப வர்றே! என அந்த போலீஸ்காரம்மா என்கிட்ட கேட்கிறாங்க! அவனை தேடி அலைஞ்சேங்கன்னு விளக்கம் கொடுத்தேன். ரசீது கேட்டா, இரண்டு நாள் கழிச்சு வா! இரண்டு நாள் கழிச்சு வா! என தொடர்ந்து அலையவிட்டாங்க! ஒரு நாள், “எந்த ஆதாரமும் இல்லாம புடி! புடின்னு கேட்கிறேயே! எப்படி புடிக்கிறது?”ன்னு என்கிட்டயே அந்த போலீஸ்காரம்மா கேட்டாங்க! எனக்கு சிரிப்பு வந்திருச்சு! ஒரு வழியாக மூணு மாசம் கழிச்சு தான் ரசீதே கிடைச்சது!”

வண்டியை காணாம போனது ஒரு துயரம்னா, வண்டி காணாமல் போனதற்கு கம்ப்ளைண்ட் கொடுத்து, புகார் வாங்கிறது அத விட துயரமாப் போச்சு! இதை விட இன்னொரு துயரம் என்னான்னா? வண்டியை எடுத்துட்டு போன ஆளோட முகத்தை பார்க்கனும்னு இந்த தெருவில் சிசிடிவி எந்த வீட்டுல இருக்குன்னு போய் விசாரிச்சு, அந்த வீடியோ புட்டேஜை கேட்டு வாங்கினேன். ஒரு நாள் கழிச்சு, ஒரு போலீஸ்காரர் வந்து என்னைத் தேடி வந்து கேட்கிறார். ”முந்தா நேத்து இதே தெருவில் ஒரு வீட்டுல நகை, பணம் எல்லாம் திருடு போயிருக்கு! நீங்க எதுக்கு சிசிடிவி புட்டேஜை கேட்டீங்கன்னு” என்னை திருடன் போல கேட்டார். அது தான் இன்னும் துயரம்!

"இப்ப எல்லாம் தெரியாதவங்களுக்கு வண்டியை டிரையல் பார்க்க கொடுக்கிறதே இல்ல சார்!"

***

இந்த ட்ரையல் கதை கேட்டதும் எனக்கு மோடி தான் பளிச்சென நினைவுக்கு வந்து போனார். இதுநாள் வரைக்கும் காங்கிரசுக்கும், மற்றவர்களுக்கும் ஓட்டு போட்டீங்களே! எங்களுக்கு இந்த முறை ஓட்டு போடுங்க! நாங்க ட்ரையல் பார்க்கிறோம் என கேட்டார்.

ஆட்சி கிடைத்ததும், சிபிஐ, உச்சநீதிமன்றம், ரிசர்வ் பேங்க், பிஎம் கேர் பணம், தேர்தல் ஜனநாயகம் என இருக்கிற எல்லா பர்னிச்சரையும் உடைச்சது தான் ஞாபகத்துக்கு வந்தது.

கொரானா சாவுகளை மூடிமறைக்கும் குஜராத் அரசு!

குஜராத் இந்த ஆண்டு மார்ச் 1ந் தேதி முதல் மே 10 வரை அறிவித்த கோவிட் இழப்புகள் 4218 மட்டும். ஆனால், மக்களிடம் இறப்பு சான்றிதழ்கள் வழங்கியதோ 1.23 லட்சம்.

குஜராத்திலிருந்து வரும் சமீபத்திய செய்திகள் கவலைக்குரியதாக இருக்கின்றன. ’திவ்ய பாஸ்கர்’ என்ற செய்தி நிறுவனம் பல்வேறு மாவட்டங்களிலிருந்து கோவிட் உயிரிழப்புகளையும், வழங்கப்பட்ட சான்றிதழ்களிலும் பெரும் எண்ணிக்கை முரண்பாடு இருப்பதாக வெளியிட்ட செய்தியை இப்பொழுது ஸ்கிரோல் தளம் செய்தி வெளியிட்டிருக்கிறது.

கோவிட் உயிரிழப்புகள் குறித்து குஜராத் முதல்வர் சமாளிப்பதற்கு ஏதோதோ விளக்கம் கொடுத்துக்கொண்டிருக்கிறார். எதிர்கட்சிகள் இப்பொழுது இந்த செய்தியை முன்னிலைப்படுத்தி இதுகுறித்த விரிவான விசாரணை தேவை என கோரிக்கை வைத்திருக்கிறார்கள்.

குஜராத்தை பல ஆண்டுகளாக ஆண்ட மோடி குஜராத்தை தூக்கி நிறுத்தினார். அதே போலவே இந்தியாவைவும் தூக்கி நிறுத்துவார் என்று தான் பொய்யான பிரச்சாரத்தை நாடு முழுவதும் திட்டமிட்டே பரப்பினார்கள்.

குஜராத்தில் உள்ள பொது சுகாதார கட்டமைப்பு எவ்வளவு பலவீனமாக இருக்கிறது என்பதை இப்போதைய கொரானா உயிரிழப்புகள் பல்லிளிக்க செய்துவிட்டன. குஜராத்தை ஆண்ட மோடி இந்தியாவை எவ்வளவு மோசமாக ஆண்டு கொண்டிருக்கிறார் என்பதை சர்வதேச ஊடகங்கள் கிழித்து தொங்கவிடுகின்றன.

ஒரு மோசமான பிரதமர் இருந்தால், எவ்வளவு உயிர்ச்சேதம் ஆகும் என்பதை கண் முன்னே பார்த்துக்கொண்டிருக்கிறோம். இன்னும் எவ்வளவு மோசமான காட்சிகளை பார்க்க போகிறோம் என்பதை நினைக்கும் பொழுது கதி கலங்குகிறது.

கொலைகார மோடியே,

பதவியிலிருந்து விலகு!

விரிவாக படிக்க....

https://scroll.in/latest/994906/gujarat-is-undercounting-covid-19-deaths-shows-divya-bhaskar-report?fbclid=IwAR0wwW5U2QVhM0uTaSVUcAFtvT0NL27S60NKKahnY2SDW-kbj9KPhEZdvNw