மொபைலும் மனிதர்களும்!

 

ஊரிலே ஒரு காலத்தில் சிலர் வெற்றிலைப் பாக்கு இல்லாமல் இருக்க மாட்டார்கள். காலை எழுந்ததும் பாக்கு. சாப்பிட்டதும் பாக்கு. பேருந்து காத்திருந்தால் பாக்கு.

 

அவர்களிடம், "ஒரு நாள் பாக்கு போடாமல் இருங்கள்" என்று சொன்னால், "அதற்கு என்ன, இருக்கலாம்!" என்று சொல்வார்கள். ஆனால் மறுநாள் மதியத்திற்குள், பாக்கு கடையைத் தேடி நடந்து கொண்டிருப்பார்கள்.

 

அடிமைத்தனம் என்பது, "என்னால் இல்லாமல் இருக்க முடியாது" என்று சொல்லும் நிலை அல்ல. *"என்னால் எப்போது வேண்டுமானாலும் நிறுத்த முடியும்" என்று  சொல்லிக் கொண்டே நிறுத்த முடியாத நிலை.*

 

மொபைலும் அப்படித்தான். உங்களுக்கு மொபைல் அடிமைத்தனம் இருக்கிறதா என்று தெரிந்துகொள்ள ஒரு சின்ன சோதனை. ஒரு ஞாயிற்றுக்கிழமை தேர்ந்தெடுங்கள்.

 

காலை 8 மணிக்கு மொபைலை அணைத்துவிட்டு அலமாரிக்குள் வைத்துவிடுங்கள்.  பிறகு உங்கள் மனதை கவனியுங்கள். பத்து நிமிடத்திற்கு ஒருமுறை, "யாராவது அழைத்திருப்பார்களோ?" என்று தோன்றுகிறதா? கையில் இல்லாத மொபைலைத் தேடி பையைத் திறக்கிறீர்களா? அறிவிப்பு ஒலி கேட்காத போதிலும் கேட்டது போல உணர்கிறீர்களா?

 

ஐந்து நிமிடங்கள் சும்மா உட்கார்ந்திருக்க முடியாமல் ஏதோ ஒன்று குறைவது போல இருக்கிறதா? அப்படியென்றால், பிரச்சினை மொபைலில் இல்லை. உங்கள் மனம் அமைதியாக இருக்க பழகியிருக்கவில்லை.

 

இன்னொரு சோதனை. தேநீர் குடிக்கும்போது மொபைல் இல்லாமல் குடியுங்கள். உணவு சாப்பிடும்போது மொபைல் இல்லாமல் சாப்பிடுங்கள். ஒரு நண்பரைச் சந்திக்கும்போது மேசை மீது மொபைலை வைக்காமல் பேசுங்கள்.

 

அப்போது நேரம் நீளமாகத் தோன்றுகிறதா? உரையாடல் சலிப்பாகத் தோன்றுகிறதா?

அமைதி தாங்க முடியாததாகத் தோன்றுகிறதா? அப்படியானால் நீங்கள் மொபைலைப் பயன்படுத்தவில்லை.

 

*மொபைல்தான் உங்களைப் பயன்படுத்திக் கொண்டிருக்கிறது* உண்மையில் மொபைல் அடிமைத்தனத்தின் பெரிய அறிகுறி திரை நேரம் அல்ல.*

 

*வெறுமையைத் தாங்க முடியாமை.*

 

முன்பெல்லாம் மனிதர்கள் பேருந்து நிறுத்தத்தில் நின்று வானத்தைப் பார்த்தார்கள். ரயிலில் ஜன்னலுக்கு வெளியே பார்த்தார்கள். மர நிழலில் சும்மா உட்கார்ந்தார்கள். இப்போது ஐந்து விநாடி வெறுமை கிடைத்தாலும் மொபைலை எடுக்கிறார்கள்.

 

மனிதன் தனியாக இருக்கப் பயப்படும்போது, அடிமைத்தனம் கதவைத் தட்ட ஆரம்பிக்கிறது. ஆகவே மொபைல் அடிமைத்தனத்தை அளவிட வேண்டுமென்றால் ஒரு கேள்வி மட்டும் போதும்:

"ஒரு மணி நேரம் எதுவும் செய்யாமல், மொபைல் இல்லாமல், நான் என்னோடு நானே இருக்க முடியுமா?"

 

அதற்கான பதில்தான் உங்கள் திரை நேர அறிக்கையை விட உண்மையானது.

 

-          இரா. முனியசாமி