Dial M for Murder (1954)

"ஒரு பர்ஃபெக்ட் கொலையை யாராலும் திட்டமிட முடியாது"

- ஆல்பிரட் ஹிட்ச்காக்கின் புகழ்பெற்ற திரில்லர்!

கதை. எளிய கதைதான். கணவன் மனைவி உறவில் வேறு ஒரு எழுத்தாளர் வருகிறார். கணவர் ஒரு வருடமாக திட்டமிட்டு தன் மனைவியை கொலை செய்ய பார்த்து பார்த்து எல்லா ஏற்பாடுகளையும் செய்து முடித்து, கொலை செய்ய ஒரு ஆளையும் ஏற்பாடு செய்கிறார்.

திட்டமிட்ட நாளில், நேரத்தில் கொலை நடக்கிறது. ஆனால் அதில் ஒரு டுவிஸ்ட். இருப்பினும் கணவர் கொஞ்சமும் சளையாமல் அதையும் தனக்கு சாதகமாக பயன்படுத்திக் கொள்கிறான். கொலையாளி கண்டுபிடிக்கப்பட்டரா என்பது முழு நீள கதை.

****

ஒன்னே முக்கால் மணி நேரம் போனதே தெரியவில்லை. அருமையான திரில்லர்.

கொலை செய்ய சொல்லி, கன்வின்ஸ் செய்யும் இடம் அருமை.

நாடகத்திற்காக எழுதப்பட்ட கதை என்பதால் அதிகபட்சம் மூன்று இடங்களில் மட்டுமே காட்சிகள் நடைபெறுகின்றன. அதிலும் வீட்டின் வரவேற்பறையில் தான் பெரும்பான்மை காட்சிகள் நடக்கிறது. முக்கிய கதாபாத்திரங்கள் நான்கு தான். கதையை வலுவாக நம்பிக்கைக் எடுத்ததால் திரைக்காக எந்த மாற்றமும் செய்யவில்லை.

இந்த படத்திற்காக சில விமர்சனங்களை படித்த பொழுது பலரும் 'கள்ளக்காதலன்' என எழுதியிருந்தார்கள். மனைவி திருமண ஒப்பந்தத்தை மீறி விட்டாளே என்ற கோபத்தை விட மனைவி தன்னை விவாகரத்து செய்து விட்டால் தெருவுக்கு வந்து விடுவோம் என்கிற பதட்டம் தான் கணவனுக்கு அதிகம். அதை அவனே ஓரிடத்தில் சொல்வான்.

சத்யராஜை வைத்து சாவி என்ற பெயரில் தமிழில் எடுத்திருந்தார்கள். அந்த படம் எடுபடவில்லை என்றே நினைக்கிறேன்.

பார்க்க வேண்டிய படம் பாருங்கள். தமிழிலும் கிடைக்கிறது.