மாணவர்கள் முட்டை சாப்பிடுவதற்கு அழுவார்கள்!

நேற்று உறவினர் வீட்டில், சத்துணவு ஆசிரியர் ஒருவரிடம் பேசிக்கொண்டிருந்தேன். அவர் தென் மாவட்டத்தின் ஒரு கிராமப்புற நடுநிலைப் பள்ளியில் சத்துணவு பொறுப்பாளராக பணியாற்றுகிறார். அநேகமாக இன்னும் ஓராண்டில் ஓய்வு பெற்றுவிடுவேன் என்றார்.

25 ஆண்டு பணி அனுபவத்தைப் பற்றி கேட்கும் பொழுது அவர் சொன்ன சில தகவல்கள் பள்ளிகளின், அரசின் நடவடிக்கைகளைப் புரிந்துகொள்ள உதவியாக இருந்தது.

உங்கள் பள்ளியில் எத்தனை மாணவர்கள் இருக்கிறார்கள்? அனைவருக்குமே சத்துணவு உண்டா? அல்லது ஏதேனும் விதிமுறைகளில் சிலருக்கு கிடையாதா?

எங்கள் பள்ளி நடுநிலைப் பள்ளி. பள்ளியில் 90 மாணவர்கள் இருக்கிறார்கள். அனைவருக்குமே சத்துணவு உண்டு.

நான் பள்ளியில் படிக்கிற 90 களில் வெள்ளைச் சோறு, காய்கறிகள் போட்ட சாம்பார் ஊற்றுவார்கள். தனியாக காய்கறி என எதுவும் இருக்காது. இப்பொழுது எப்படி?

இப்பொழுது சாம்பார் சோறு, தக்காளிச் சோறு, கறிவேப்பிலை சோறு, புளிச்சோறு, புலாவு என எங்களுக்கென ஒரு பட்டியல் இருக்கிறது. அதன்படி சமைத்து மாணவர்களுக்கு கொடுப்போம். எல்லா நாளிலுமே வேகவைத்த முட்டையும் தருவோம்.

எல்லா மாணவர்களும் முட்டை சாப்பிட சிரமப்படுவார்களே?

அதை ஏன் கேட்கிறீங்க! முட்டை வேண்டாம் என சிலர் அழுவார்கள். சொல்லி சொல்லி சாப்பிட வைப்போம். சில பிள்ளைகள் மஞ்சள் கருவை மட்டும் சாப்பிடுவார்கள். சில பிள்ளைகள் வெள்ளை பகுதியை மட்டும் சாப்பிடுவார்கள்.

முட்டை என்பது கையாள்வது சிரமம். அரசிடமிருந்து எப்படி விநியோகிக்கிறார்கள்?

நீங்கள் சொல்வது சரிதான். 90 பேர் என்றால்…100 முட்டைகள் கொடுப்பது தான் சரி. அப்பொழுது தான் சேதாரம் போக சரியாக வரும். ஆனால் 90 கூட சரியாக வராது. நாலைந்து முட்டைகள் குறையும்.

இப்படி எண்ணிக்கையில் குறைவதை எப்படி சமாளிக்கிறீர்கள்?

எட்டாவது வரை படிக்கிற பள்ளியல்லவா! சில குழந்தைகள் உடல்நிலை சரியில்லை என வராது. புல் அட்டண்டன்ஸ் (Full attendance) இருக்கவேண்டும் அரசு தொடர்ந்து வலியுறுத்துவதால், எல்லா பிள்ளைகளும் வந்ததாய் எழுதுவார்கள். வராத குழந்தைகளின் முட்டைகளை வைத்து கணக்கை சரி செய்வோம்.

முட்டையில் கமிசன் நிறைய போகிறது என புகார்கள் எழுகின்றன. வழக்கமாக நாம் கடைகளில் வாங்கும் முட்டைகளின் அளவில் இருக்குமா?

நீங்கள் சொல்வது சரிதான். அதிமுக ஆட்சி, திமுக ஆட்சி இரண்டு ஆட்சிகளிலுமே ஒரு முட்டை பேரலுக்கு இரண்டு மூன்று முட்டைகள் மட்டுமே நாம் சாதாரணமாக கடைகளில் வாங்கும் முட்டைகளின் அளவில் இருக்கும். பெரும்பாலும் சின்ன முட்டைகளாய் தான் இருக்கும்.

அரிசி ரேசன் கடைகளில் மக்களுக்கு கொடுப்பதை தான் தருவார்களா? மற்ற பருப்பு, மளிகை சாமான்களின் நிலவரம் என்ன?

ரேசன் கடையில் போடும் அரிசியை விட, நல்ல அரிசி தான் பள்ளிக்கு வரும். முட்டை குறைவதைப் போல தான், பருப்பு, மளிகை சாமான்களின் நிலையும். முட்டைகளில் சமாளிப்பதைப் போலவே, இதற்கும் சமாளிப்போம்.

உங்களுக்கு சம்பள நிலவரம் எப்படி? தொகுப்பூதியமா? அரசு ஊழியருக்கான சம்பளமா?

நான் 95ல் வேலைக்கு வந்தேன். என்னுடைய முதல் மாத சம்பளம் ரூ. 300. ஒவ்வொரு வருடமும் சிறிது சிறிதாக கூடி, இப்பொழுது 25வது ஆண்டில், 20 ஆயிரம் சம்பளம் வாங்குகிறேன். இந்த 20 ஆயிரம் சம்பளத்தை வாங்குவதற்கே, நிறைய போராட்டங்களை எங்களது சங்கத்தின் மூலமாக செய்திருக்கிறோம்.

சமைப்பதற்கு மற்ற வேலைகளுக்கென எவ்வளவு வேலையாட்கள் தருகிறார்கள்?

சமையல் செய்பவர், ஒரு உதவியாளர் என அரசு விதிகளின்படி நியமிக்கவேண்டும். ஆனால், சமையல் செய்யும் ஒருவரை மட்டுமே பல பள்ளிகளில் நியமித்துள்ளார்கள். உதவியாளரை தருவதில்லை. ஆகையால் ஒருவரை வைத்தே எல்லா வேலைகளையும் செய்ய வேண்டிய நெருக்கடி இருக்கிறது.

சமைப்பவர்கள் எப்படி சமைப்பார்கள்? பிள்ளைகளுக்கு பிடிக்குமா?

குழந்தைகளுக்கென சாப்பாடு என்பதால், கவனமாகத் தான் சமைப்போம். சில நேரங்களில் சமைப்பவர் வேகமாக சமைக்கவேண்டும் என காய்கறிகளை நன்றாக கழுவதில் சுணக்கம் காட்டுவார்கள். காய்கறிகளையும், பருப்பையும் தனித்தனியாக வேகவைத்தால் தான், சுவையாக இருக்கும். இரண்டையும் சேர்த்து வேகவைப்பார்கள். ஆகையால் நாம் உடனிருந்து கவனித்து செய்வதால், தவறு ஏதும் நடக்காமல் கவனமாய் இருக்கிறோம்.

பள்ளிகளில் காலை உணவு தரப்போவதாக அறிவிப்பு வந்ததே? இப்பொழுது கொடுக்கிறீர்களா? அதையும் நீங்களே பொறுப்பேற்க வேண்டுமா?

விரைவில் எங்கள் பள்ளியில் கொண்டுவரப்படும் என சொல்லியிருக்கிறார்கள். இல்லை. வேறு ஆட்கள் வந்து சமைப்பார்கள் என சொல்கிறார்கள். ஆனால், நாங்கள் பயன்படுத்தும் கேஸ் சிலிண்டர் மற்ற விசயங்களையும் பயன்படுத்துவார்கள் என சொல்கிறார்கள். குழப்பம் தான். அமுல்படுத்திய பிறகு பேசி சரி செய்துகொள்ளலாம் என நினைத்திருக்கிறோம்.

குழந்தைகளின் ஆரோக்கியமும், கல்வியும் தான் இந்த நாட்டின் எதிர்காலம். ஆகையால், அதில் சமரசமில்லாமல் மிகுந்த கவனம் வேண்டும். எந்த கட்சி ஆட்சிக்கு வந்தாலும், நேர்மையாக நடந்துகொள்ள வைப்பதில், பொதுமக்கள் தான் மிகுந்த பொறுப்புடன் குறைபாடுகளை சுட்டிக்காட்டி நேர் செய்யவேண்டும்.

உங்கள் அனுபவம் எப்படி?

”அழகிய” சுவர்களும், கேள்வி கேட்டு குடைச்சலைத் தருகிற சுவரொட்டிகளும்!

கடந்த இரு வாரங்களுக்குள் சென்னை மாநகராட்சிக்குட்பட்ட பகுதிகளில் பொது இடங்களில் விதிகளை மீறி சுவரொட்டி ஒட்டியதற்காக ஒரு லட்சம் வரை அபராதம் வசூலித்திருக்கிறது சென்னை மாநகராட்சி. கூடுதலாக ஒட்டியவர்கள் மீது 451 வழக்குகளையும் போட்டிருக்கிறது.

 

சுவரொட்டிகள் என்ன செய்யும்?

 

சுவரொட்டிகள் மக்களின் உரிமைகளை உரத்துப்பேசும்.. அநீதிக்கு எதிராக நியாய குரலை எழுப்பும். அரசின் அலட்சியங்களை கண்டிக்கும்.  சமூக பிரச்சனைகளுக்கு தீர்வைத் தேடுபவர்களுக்கு வழிகாட்டும்.  ஒரு சரியான அமைப்பை கண்டறிய உதவும்.

 

தேர்தல் கட்சிகளும் சுவரொட்டிகளும்

.

தேர்தல் கட்சிகள் அரசியல் ரீதியாக நீர்த்துப்போய்விட்டன. அதனால், சென்னையில் பல பகுதிகளின் சுவர்களில் தங்கள் தலைவர்களின் பெயர்களை பெரிது பெரிதாக எழுதி வைத்திருக்கிறார்கள். தலைவர்களின் முகங்களை பெரிது பெரிதாக வரைந்து வைத்திருக்கிறார்கள். சுவரொட்டிகள் ஒட்டினாலும், அதையே செய்கிறார்கள்.

 

தேர்தல் கட்சிகள் தேசிய நீரோட்டத்தில் ஒன்று கலந்ததால், பதவி, பணம், செல்வாக்கு என எதற்கும் பஞ்சமில்லாமல் வளர்ந்துவிட்டார்கள்.  அதனால் பத்திரிக்கைகளை நடத்துகிறார்கள்.  தொலைக்காட்சி ஊடகங்களை வைத்திருக்கிறார்கள்.  தங்களுக்கு சாதகமான செய்திகளை பார்த்து, பார்த்து வெளியிடுகிறார்கள். தங்களை தொந்தரவு செய்கிற செய்திகளை கவனமாக தவிர்த்துவிடுகிறார்கள்.

 

தமிழக முதல்வரும் சுவரொட்டியும்

 

சமீபத்தில் சென்னை ஸ்டெல்லா மேரிஸ் கல்லூரியில் முதல்வர் பேசும் பொழுது, தன் இளமைக் காலத்தில் தமது தோழருடன் சுவரொட்டி ஒட்டியதாகவும், போலீசு அழைத்து சென்று எச்சரித்து அனுப்பியதாகவும் தன் நினைவுகளைப் பகிர்ந்துகொண்டார்.

 

அப்பொழுது திமுக எதிர்க்கட்சி. அதனால் ஆளும் கட்சியின் செயல்பாடுகளை கண்டித்து சுவரொட்டி ஒட்டி, சுவர்களின் வழியே மக்களிடம் அரசியல் பேசினார். இப்பொழுது ஆட்சி அதிகாரத்திற்கு வந்த பிறகு சுவர்கள் பேசும் அரசியலின் வீரியம் மற்றவர்களை விட அவருக்கு நன்றாகவே புரியும் அல்லவா! அதனாலேயே சென்னை மாநகரம் முழுவதும் தமிழக பண்பாட்டு அடையாளங்களை வரைந்து ”அழகிய” சுவர்களாக மாற்ற உத்தரவிட்டுவிட்டார்.  மீறுபவர்களை தண்டிக்கிறார்.

 

அழகிய சுவர்கள் வேண்டுமா? ஆரோக்கியமான சமூகம் வேண்டுமா?

 

தேசிய நீரோட்டத்தில் கலக்காததாலும், மக்கள் பிரச்சனைகளைப் பேசுவதாலும், ஆளும் அரசுகளைப் பார்த்து ஓயாது கேள்விகளை எழுப்புவதாலும், ஜனநாயக, முற்போக்கு, புரட்சிகர அமைப்புகளின் செய்திகளை ஊடகங்களில் கவனமாக மறைத்துவிடுகிறார்கள். சமூகப் பிரச்சனைகளைப் விவாதிக்கும் பொழுது அழைப்பதை தவிர்க்கிறார்கள்.

 

ஆக அவர்களுக்கு தான் மக்களிடம் பேசுவதற்கு சுவர்கள் தேவை. அந்த சுவர்களைத் தான் மாநகராட்சி ”அழகிய” சுவர்களாக்கி தடை செய்து வைத்திருக்கிறது.  

 

ஓவியங்கள் நிறைந்த ”அழகிய” சுவர்கள் வேண்டுமா, ஏன் எதற்கு எப்படி என சுவரொட்டி மூலம் கேள்விகள் கேட்டு சிந்திக்கும் சமுதாயமாக மாற வேண்டுமா என மக்கள் தான் முடிவு செய்யவேண்டும்.

-

நடத்துநர் கொலை : டாஸ்மாக் கணக்கில் தான் சேரும்!

சென்னையிலிருந்து அதிகாலையில் விழுப்புரம் நோக்கி பேருந்து கிளம்பியது. மதுராந்தகம் புறவழிச்சாலையில் ஒரு பயணி ஏறுகிறார். பீணாம்மேட்டுக்கு டிக்கெட் கேட்கிறார். பேருந்து அந்த ரூட்டில் போகாது. மேல்மருவத்தூர் இறங்கி மாறிக்கொள்ளுங்கள் என நடத்துநர் சொன்னதை பயணி ஏற்கவில்லை. குடிபோதையில் இருந்த அவர் பீணாம்மேட்டில் தான் இறக்கிவிடவேண்டும் என அடம்பிடிக்கிறார்.

வாய்த்தகராறு அடிதடிக்கு போக, பயணி தாக்கியதில் தலையில் அடிப்பட்டு மயக்கமாகிறார். மருத்துவமனைக்கு போகும் வழியில் நடத்துநர் இறந்துவிடுகிறார். அரசு இப்பொழுது பத்து லட்சம் இழப்பீடு அறிவித்திருக்கிறது.

தமிழ்நாடு முழுவதும் தினந்தோறும் பத்தாயிரம் வழித்தடங்களில், இருபதினாயிரத்துக்கும் மேற்பட்ட பேருந்துகள் குறுக்கும் நெடுக்குமாய் பயணிக்கின்றன. ஒரு கோடிக்கு மேற்பட்ட பயணிகள் தமிழ்நாடு முழுவதும் பயணிக்கிறார்கள். போக்குவரத்து தொழிலாளர்கள் தினந்தோறும் எதிர்கொள்ளும் சில்லறை பிரச்சனை போலவே, குடிகாரர்களையும் எதிர்கொள்கிறார்கள். மன உளைச்சல்களுக்கு உள்ளாகிறார்கள். இப்படி எதிர்கொள்ளும் பொழுது, சில நேரங்களில் கைமீறிப் போகும் பொழுது கொலையாகிவிடுகிறது.

காலை பணிரெண்டு மணியிலிருந்து இரவு பத்து மணி வரைக்கும் டாஸ்மாக் கடைகள் குடிகாரர்களுக்கு சேவை செய்கின்றன. அதற்கு பிறகு குடிகாரர்கள் தட்டுத் தடுமாறி வீட்டுக்கு போய்விடக்கூடாது என்றெண்ணி, டாஸ்மாக் அருகே உள்ள பாரில் கூடுதல் விலைக்கு விற்று சம்பாதிக்கிறார்கள். பாருக்கென்று நேரம் தீர்மானிக்கவில்லையா என்று அப்பாவியாய் கேட்காதீர்கள்.

திருவள்ளூர் மாவட்டத்தில் 140 டாஸ்மாக் கடைகள் இருக்கின்றன. இதில் அரசு

அனுமதியுடன் 36 பார்கள் இயங்குகின்றன. மீதி 104 கடைகள் அனுமதி இல்லாமலேயே இயங்குகின்றன என பத்திரிக்கைகள் வெளிப்படையாக எழுதுகின்றன. ஆக, பாரிலிருந்து கணிசமான பணம் போலீசுக்கு போவதால், கண்டுகொள்வதேயில்லை. அதுவும் பார் வைத்திருப்பவர் அரசியல் செல்வாக்கோடு இருந்தால், சொல்லவே தேவையில்லை. ஆக 24 மணி நேரமும் குடிகாரர்கள் மனம் கோணாமல் இந்த அரசு ஊத்திக்கொடுத்துக்கொண்டே இருக்கிறது.

”குடி” நேரடியாக குடிப்பவர்களின் உடலை, சிந்தனையை, செயல்பாட்டை பாதிக்கிறது என்றால், பக்க விளைவாக போக்குவரத்து தொழிலாளர்களை போலவே, மொத்த சமூகமும் பாதிக்கப்பட்டுக்கொண்டிருக்கிறது. அரசுக்கு மக்களின் நலனைப் பற்றி சிந்திப்பதற்கெல்லாம் நேரமேயில்லை. கல்லா கட்டுவதில் மட்டும் குறியாக இருக்கிறார்கள். மக்கள் தான் போராடி பிரச்சனையை தீர்க்கவேண்டும்.

தடை செய்யப்பட்ட லாட்டரியும் தாராளமாய் கிடைக்கும் லாட்டரியும்!

"கவுன்சிலரின் கணவரே லாட்டரி ஏஜென்சி நடத்தினார் என்றால் போலீசாரின் ஆசியும் தாராளமாக கிடைத்துவிடுகிறது. பிறகென்ன, லாட்டரி ”சட்டபூர்வமாகி”விடுகிறது."

***

ஈரோட்டில் கருங்கல் பாளையத்தில் நூல்வியாபாரி 13/05/22 அன்று தன் உறவினர்களுக்கும், நண்பர்களுக்கும் ஒரு காணொளியை பதிவு செய்து அனுப்பிவிட்டு தன் உயிரை மாய்த்துள்ளார்.

”இதுவரை லாட்டரியில் 62 லட்சம் தொலைத்துவிட்டேன், ஆகையால் ஏகப்பட்ட சிக்கல்களில் மாட்டிக்கொண்டேன். இனிமேலும் உயிரோடு இருந்தால், மீண்டும் லாட்டரி வாங்குவேன், ஆகையால் தற்கொலை செய்துகொள்கிறேன். தான் வசிக்கும் பகுதியில் திமுக கவுன்சிலரின் கணவர் தான் லாட்டரி ஏஜென்சி நடத்திவருகிறார். அவரிடம் 30 லட்சத்தை வாங்கி என் குடும்பத்திற்கு தாருங்கள். எப்படியாவது லாட்டரியை ஒழித்துக்கட்டுங்கள்” என அழுதுகொண்டே பேசியுள்ளார்.

”விழுந்தால் வீட்டுக்கு விழாவிட்டால் நாட்டுக்கு” என பஞ்ச் வசனம் பேசி துவக்கி வைக்கப்பட்ட லாட்டரி பல உழைப்பாளர்களின் உழைப்பை உறிஞ்சியது. கடன் வலையில் விழவைத்தது. தற்கொலைகளுக்கு தள்ளியது. 90களில் தற்கொலைகள் உச்சத்துக்கு சென்ற பொழுது, மக்களும் போராடினார்கள். 2003ல் ஆட்சியில் இருந்த ஜெ. தடை செய்தார்.

தடை செய்த பிறகும், தமிழகத்தின் பல பகுதிகளில் லாட்டரி தாராளமாக கிடைக்கின்றன. ஈரோடு மாவட்டத்தில் கடந்த ஜூன் முதல் இன்றைக்கு வரை 147 வழக்குகள் போட்டிருக்கிறார்கள். 215பேர் கைது செய்யப்பட்டுள்ளதாக உடனே அறிக்கை விடுகிறார்கள். ஒவ்வொரு ஆண்டும் இப்படி மாவட்ட வாரியாக பெயரளவில் போடப்படும் வழக்குகளும், கைதுகளுமே லாட்டரி தாராளமாய் விற்பதற்கான வாழும் சாட்சிகளாக இருக்கின்றன.

கவுன்சிலரின் கணவரே லாட்டரி ஏஜென்சி நடத்தினார் என்றால் போலீசாரின் ஆசியும் தாராளமாக கிடைத்துவிடுகிறது. பிறகென்ன, லாட்டரி ”சட்டபூர்வமாகி”விடுகிறது.

இதற்காக பொங்கியுள்ள எடப்பாடி தாங்கள் ஆட்சியில் லாட்டரியை இரும்புக்கரம் கொண்டு அடக்கியதாக புளுகுகிறார். 2011, 2016 இரண்டு தேர்தலிலும் விழுப்புரம் நகர்ப்புற தொகுதியில் அதிமுகவைச் சார்ந்த சி.வி. சண்முகம் தான் எம்.எல்.ஏயாக ஜெயித்தார். அந்த தொகுதியில் 2019ல் லாட்டரியால் கடன்பட்ட நகை தொழிலாளி அருண் என்பவர் தன் துணைவியார், மூன்று பெண் குழந்தைகளோடு சயனைடு சாப்பிட்டு தற்கொலை செய்துகொண்டார். சாகும் பொழுது அவரும் காணொளி ஒன்றை பதிவு செய்து நண்பர்களுக்கும், உறவினர்களுக்கும் அனுப்பினார். அப்பொழுதும் போடப்பட்ட வழக்குகள் இத்தனை, கைது செய்யப்பட்டவர்கள் இத்தனை பேர் என வழக்கம் போல ஒரு அறிக்கை வெளியிட்டார்கள்.

ஏற்கனவே தொழில் நசிவால், வேலை இல்லாமல் வாடி வரும் உழைக்கும் மக்கள் ஏதாவது லாட்டரி அடித்தால் தங்கள் துன்ப, துயரங்களில் இருந்து தங்களை விட்டு மீண்டுவிடமாட்டோமா என்ற நப்பாசையில் தான் லாட்டரிகளை வாங்குகிறார்கள். கடன்படுகிறார்கள். மீண்டும் மீண்டும் விச சுழலுக்குள் சிக்கிக்கொள்கிறார்கள்.

ஆளும் கட்சியினரும், எதிர்க்கட்சியினரும் இப்படி அறிக்கைப்போர் நடத்திக்கொண்டே இருப்பார்கள். இவர்களை நம்பி பலனில்லை.

டாஸ்மாக் கடைகளை மக்கள் அடித்து நொறுக்கியது போல, புரட்சிகர அமைப்புகளும், ஜனநாயக சக்திகளும் மக்களை திரட்டி களத்தில் இறங்கி சட்டத்திற்கு புறம்பாக இயங்கும் கடைகளை அடித்து நொறுக்கினால் தான் இந்த பிரச்சனை முடிவுக்கு வரும்.

பெட்ரோல், டீசல், எரிவாயு, சுங்கச்சாவடி கட்டண உயர்வு – பிஜேபியின் தேர்தல் பரிசு!

பாஜக அதிகாரத்தில் இருக்கும் ஒன்றிய அரசு கார்ப்பரேட்டுகளை செல்லப்பிள்ளைகளாகவும், பெரும்பான்மை மக்களை மாற்றாந்தாய் மனப்பான்மையுடன் தான் நடத்துகின்றன.

****

ஏப்ரல் ஒன்றாம் தேதியிலிருந்து சுங்கச்சாவடிகளில் வரிகளை அதிகரிப்பதாக அறிவிப்பு கொடுத்திருக்கிறார்கள். சர்வதேச விலைக்கு ஏற்ப பெட்ரோல் விலையை பெட்ரோலிய நிறுவனங்கள் தான் விலையை தீர்மானிக்கிறார்கள். ஒன்றிய அரசுக்கும் எண்ணெய் நிறுவனங்களுக்கு, விலை நிர்ணயம் செய்வதில் சம்பந்தமில்லை என்ற பொய்யை திரும்ப திரும்ப சொல்லிக்கொண்டே இருக்கிறார்கள். ஆனால், மாநில தேர்தலோ, ஒன்றிய தேர்தலோ நடக்கும் பொழுதெல்லாம், ஒரே விலையிலேயே விலை நொண்டியடிக்கிறது. ரசியா உக்ரைன் போர் காலத்தில் சர்வதேச அளவில் கச்சா பேரல் விலை ஏறிய பொழுது கூட விலையை அதிகப்படுத்தவில்லை. தேர்தல் முடிந்ததும், இதோ விலையை உயர்த்த துவங்கிவிட்டார்கள்.

சென்னையில் ஒரு லிட்டர் பெட்ரோலின் இன்றைய விலை 107.43. இந்தியாவில் அதிகப்பட்ச விலை மகாராஷ்டிரா மாநிலத்தின் ஒரு பகுதியில் ரூ. 119 விற்கிறார்கள். ரூ. 150க்கு கொண்டுவராமல் ஓயமாட்டார்கள் போலிருக்கிறது. ஏற்கனவே பெட்ரோல், டீசல் விலையின் உயர்வால் விலைவாசி ஏறிக்கொண்டே போய்க்கொண்டிருக்கிறது. இப்பொழுது இன்னும் அதிகப்படுத்திக்கொண்டே செல்கிறார்கள். இப்பொழுது சுங்கச்சாவடி கட்டணங்களையும் அதிகப்படுத்தப்படுவதால், அத்தியாவசிய பொருட்களின் விலைகள் இன்னும் ஏறுவதற்கு ஒன்றிய அரசு வழிவகுத்திருக்கிறது. கடந்த ஐந்து மாநில தேர்தல்களில் நான்கில் ஆட்சி அதிகாரத்தில் அமர வைத்திருப்பதற்கு மக்களுக்கு ”பரிசாக” கொடுத்திருக்கிறார்கள்.

சுங்கச்சாவடிகளில் கொள்ளை

தேசிய நெடுஞ்சாலைகளில் சுங்கச்சாவடிகள் அமைக்கப்பட்டிருக்கிறன. தனிநபர்கள் ஓட்டும் பைக்குகளைத் தவிர அனைத்து வண்டிகளுக்களுக்கும் அந்த சாலை வழியாக செல்லும் பொழுதெல்லாம், வரியாக பணம் செலுத்துகிறார்கள். சுங்கச்சாவடிகள் அரசுக்கு பணமழை கொட்டும் மையங்களாக இருக்கின்றன.

இந்திய தேசிய நெடுஞ்சாலைகள் ஆணையத்தின் கீழ் தமிழ்நாட்டில் 48 சுங்கச்சாவடிகள் உள்ளன. இவற்றில் ஆண்டுதோறும் ஏப்ரல் 1ம் தேதி முதல் 26 சுங்கச் சாவடிகளிலும் மற்றவற்றில் செப்டம்பர் 1ம் தேதி முதல் சுங்க கட்டணத்தை மாற்றி அமைப்பது வழக்கம். இதன்படி, ஏப்ரல் ஒன்றாம் தேதியில் இருந்து ரூ. 5 லிருந்து அதிகப்பட்சம் ரூ. 120 வரை அதிகப்படுத்தியிருக்கிறார்கள்.

தேசிய நெடுஞ்சாலையை போடுகிறோம். பராமரிக்கிறோம் என்று தான் வரியாக வாங்குகிறது. ஆனால் தேசிய நெடுஞ்சாலைகளை சரியாக பராமரிப்பதில்லை என்ற குற்றச்சாட்டை பல தரப்பு சங்கங்களும் தொடர்ச்சியாக புகார் சொல்லிக்கொண்டே இருக்கிறார்கள். ஒன்றிய அரசிடம் சுங்கவரி அதிகமாக இருக்கிறது என முறையிடும் பொழுதெல்லாம், நல்ல சாலை வேண்டுமென்றால், வரிகளை கட்டித்தான் ஆகவேண்டும் என எகத்தாளமாக பதில் சொல்கிறது. அதே போல சுங்கச்சாவடிகளில் நிறைய நேரம் காத்திருக்கவேண்டியிருக்கிறது. நேரடியாக பணம் வாங்குவதால், சுங்கச்சாவடிகள் ஊழல் செய்கிறார்கள். ஆகையால் ”ஒரே கல்லில் இரண்டு மாங்கா” என வரி செலுத்துவதை “Fast Tag” இணைய வழியில் செலுத்தும் முறையை கொண்டு வந்தார்கள். முன்பு பணமாய் செலுத்தியதற்கும், இணைய வழியில் செலுத்துவதற்குமான வசூல் இடைவெளி பல மடங்கு என ஆர்.டி.ஐ. வழியில் கேள்விகளுக்கு கொடுத்த பதில்கள் மூலம் தெரிய வந்திருக்கிறது.

கோடிகளில் கொட்டும் சுங்க சாவடி மையங்களை பல ரோடு காண்ட்ராக்ட் நிறுவனங்கள் தங்கள் நிறுவனத்திற்கு சாதகமாக பயன்படுத்தி கிடைக்கும் இடங்களில் எல்லாம் சுங்கசாவடி மையங்களை உருவாக்கி மக்களிடம் வசூல் செய்கிறார்கள் என மாநிலங்களைவியில் கேள்வி எழுப்பப்பட்டது. அதற்கு ஒன்றிய போக்குவரத்து துறை அமைச்சர் நிதின் கட்கரி “சட்டத்திற்கு புறம்பாக சுங்க சாவடி மையங்கள் அமைத்து வசூல் செய்வது தவறு. அரசு சுங்க சாவடி மையங்களிடம் இருந்து வரி வாங்கும் ஒரே காரணத்திற்காக மக்கள் அவதிப்பட வேண்டிய அவசியமில்லை. 60 கிமீ தொலைவிற்கு குறைவாக உள்ள சுங்க சாவடிகள் மூன்று மாதத்திற்குள் மூடப்படும்” என பதிலளித்தார். இது தான் இவர்களின் லட்சணம். ஒரு விதிமுறை உருவாக்கி, அதன்படி நடக்கிறதா என கண்காணிப்பது தான் அரசுக்கு வேலை. அந்த வேலையை செய்வதற்கு தானே மக்கள் இவர்களை தேர்ந்தெடுத்துள்ளார்கள். இதில் நடவடிக்கை எடுப்பதற்கு எதற்கு 90 நாட்கள்?

கார்ப்பரேட்டுகளுக்கு வரி குறைப்பு : பெரும்பாலான மக்கள் மீது வரிகளுக்கு மேல் வரி

ஒருநாட்டிற்கு வரி தான் எல்லாமும்! வரியை வைத்துக்கொண்டு தான் எல்லா திட்டங்களையும் அமுல்படுத்துகிறது. வரிகளைப் பொறுத்தவரை வருமானத்திற்கு ஏற்றவாறு வசூலிப்பது வருமான வரி என்பது நேரடி வரியை சார்ந்தவை. பெட்ரோல், டீசல், சுங்கச்சாவடி எல்லாம் மறைமுக வரி. மக்கள் மீது அக்கறை கொண்ட அரசென்றால், நேரடி வரியை அதிகப்படுத்தி, மறைமுக வரியை குறைத்து வசூலிக்கும்.

பாஜக அதிகாரத்தில் இருக்கும் ஒன்றிய அரசு கார்ப்பரேட்டுகளை செல்லப்பிள்ளைகளாகவும், பெரும்பான்மை மக்களை மாற்றாந்தாய் மனப்பான்மையுடன் தான் நடத்துகின்றன. ஒரு இந்திய குடிமகன் பத்து லட்சத்திற்கு மேலாக நம் நாட்டில் லாபம் சம்பாதித்தால், ரூ.100க்கு ரூ. 30 வரியாக செலுத்தவேண்டும். அதுவே கார்ப்பரேட்டாக இருந்தால் ரூ. 25 செலுத்தினால் போதுமானது. இப்பொழுது போடப்பட்ட பட்ஜெட்டில் கார்ப்பரேட்டுகளுக்கு போடப்பட்டிருந்த உப (Surcharge) வரி 12%த்தையும் 5% குறைத்து 7%யாக குறைத்திருக்கிறது.

கொரானா முதல் அலை, இரண்டாம் அலைகளில் தொடர்ச்சியான ஊரடங்கினால் சிறுக சிறுக சேமித்த அத்தனை சேமிப்புகளையும் தொலைத்து நிற்கும் இந்த நெருக்கடியான காலத்திலும், எரிகிற வீட்டில் கிடைத்த வரை லாபம் என பாஜக மோடி அரசு கொள்ளையடித்துக்கொண்டு இருக்கிறது. “இந்துக்கள், இந்துக்கள்” என பேசிப் பேசி, ஆட்சிக்க்கு வந்த பிஜேபிக்காரர்கள் பெரும்பான்மை ”இந்துக்கள்” மீது எந்தவித கவலையும் இல்லாமல், விலையை அதிகரித்துக்கொண்டே செல்கிறார்கள். இந்த உண்மையை அவர்கள் தான் புரிந்துகொள்ளவேண்டும்.

இன்று காலையில் சென்னை அண்ணா ஆர்ச் அருகே ஒரு ஷேர் ஆட்டோ ஓட்டுநர் வழக்கமாக வாங்கும் ரூ15 லிருந்து டீசல் விலை உயர்வால், ரூ. 5 உயர்த்தி ரூ. 20யாக கேட்டிருக்கிறார். இதைச் சொல்லித்தான் கேட்டிருக்கிறார். ஆனால் அந்த பெண் அதெப்படி கூட்டிக்கேட்கலாம் என கடும் கோபத்துடன் பேசிக்கொண்டிருந்தார். அங்கிருந்தவர்கள் சமாதானம் சொல்லி அனுப்பினோம்.

மோடி அரசு ஆட்சிக்கு வந்த ஏழு ஆண்டுகளில் பெட்ரோல் டீசலில் அடித்த கொள்ளை மட்டும் 21 லட்சம் கோடிகள் என்கின்றன பத்திரிக்கைகள். கார்ப்பரேட்டுகளும், மோடி அரசும் இணைந்து தேசத்தை கூட்டுக்கொள்ளை அடித்துக்கொண்டிருக்கிறார்கள். இவர்களிடம் சண்டை போடாமல், அறியாமையால் நமக்குள் நாமே சண்டை போட்டுக்கொள்கிறோம்.

புத்தாண்டை உற்சாகமாக வரவேற்போம்! அரசு தரப்பு அபத்தங்களை அம்பலப்படுத்துவோம்!

கொரானா மீண்டும் ஒரு புதிய அலை எழுந்து வருவதாக தொடர்ச்சியாக செய்திகளில் சொல்லப்படுகிறது. இன்னும் கவனமாக இருங்கள் என மத்திய அரசு மாநிலங்களுக்கு வலியுறுத்துகிறார்கள்.

அதனடிப்படையில் தமிழ்நாட்டில் புத்தாண்டு கொண்டாட்டங்கள் தடை செய்யப்பட்டு இருக்கின்றன. புத்தக கண்காட்சி தள்ளிப்போயிருக்கிறது. இன்னும் சில கட்டுப்பாடுகள் விதிக்கப்பட்டிருக்கின்றன. ஆனால், கோவிலுக்கு கூட்டம் கூட்டமாய் போய்வருகிறார்கள். இருக்கட்டும்.

பாண்டிச்சேரியில் புத்தாண்டு கொண்டாட்டங்கள் வழக்கமான உற்சாகத்துடன் கொண்டாடியுள்ளார்கள். அவர்களுக்கு சரக்கு தான் முக்கிய வருமானம். ஆண்டின் துவக்கத்திலேயே வருமானத்தை விட்டுவிட முடியாது. ஆகையால் கொரானா கட்டுப்பாடுகளை காற்றில் பறக்கவிட்டு, கொண்டாட அனுமதிக்கிறார்கள். ஆனால், புதிய தலைமுறையில் எப்படி செய்தி சொல்கிறார்கள் என்றால்…. “இரண்டு தடுப்பூசிகள் போடப்பட்டுள்ளதா என சோதித்து அனுமதித்து இருப்பதாக” என கூசாமல் பேசுகிறார்கள். எல்லோரையும் சோதிப்பது சாத்தியமா? அப்படி செய்தார்களா? என ஒரு ஊடகமாக சோதிக்காமல், அரசு தரப்பு செய்திகளை வாந்தி எடுப்பது எந்த விதத்தில் சரி?

புத்தாண்டில் மக்களே விழிப்புணர்வுடன் இருப்போம்! அப்பொழுது தான் அரசு தரப்பு அபத்தங்களையும் நாம் கண்டிக்கமுடியும்!

பெட்ரொல், டீசல் விலை உயர்வு : பா.ஜ.க மோடி தேர்தல் வாக்குறுதியாக சொன்னது என்ன? ஏழு ஆண்டுகளில் செய்ததும் என்ன?

ஏழு ஆண்டுகளுக்கு முன்பு பா.ஜ.க தேர்தல் நேரத்தில் பிரதம வேட்பாளர் மோடி முதல், பா.ஜ.க தொகுதி வேட்பாளர் வரை மக்களின் வாழ்க்கை சுமையை குறைப்போம். குறிப்பாக பெட்ரோல், டீசல், கேஸ் சிலிண்டர் விலையைக் குறைப்போம் என வாக்களித்தனர்.

தேர்தல் நேரத்தில் ”பெட்ரோல் விலை பதறவைக்கிறது. சிலிண்டர் விலை கவலைக்குள்ளாக்குகிறது” என பாஜக பிரமுகர் தமிழிசை ஒரு காணொளியில் பொங்கி பொங்கி பேசியது அனைவருக்கும் நினைவிருக்கும். போன தேர்தலில் பெட்ரோல், டீசல் விலையை குறைக்கிறேன் என சொன்ன வாக்குறுதியை பிஜேபி நிறைவேற்றவில்லை. ஆகையால், இந்த தேர்தலில் பிஜேபிக்கு ஆதரவாக பிரச்சாரம் செய்யமாட்டேன் என பாபா ராம்தேவ் சொன்னது எல்லாம் நினைவில் வந்து போகிறது.

இப்படி வாக்குறுதி கொடுத்து ஆட்சிக்கு வந்தவர்கள், கடந்த ஆறரை ஆண்டுகளில் (டிசம்பர் 2020 வரை) பெட்ரொல், டீசல், இயற்கை எரிவாய் மூலம் மக்களிடம் அடித்த கொள்ளை மட்டும் 19 லட்சம் கோடி.

ஒன்றிய அரசின் பட்ஜெட்டில் பெட்ரோல், டீசல் வருமானத்தின் அளவு 2014-15ல் 5.4% தான் அதாவது ரூ. 74,158 கோடி. ஆனால், 2020 – 21 ஆண்டில் 12.2% யாக ரூ. 2.95 லட்சம் கோடியாக அதிகரித்திருக்கிறது.

ஜூன் 2014ல் கச்சா எண்ணெய் ஒரு பேரல் விலை 109 டாலராக இருந்தது. அப்பொழுது ஒரு லிட்டர் பெட்ரோல் விலை ரூ. 71.51. ஒரு லிட்டர் டீசல் விலை ரூ. 57.28.

ஜூன் 2021ல் கச்சா எண்ணெய் ஒரு பேரல் விலை 61 டாலராக இருக்கிறது. இப்பொழுது ஒரு லிட்டர் பெட்ரோல் விலை ரூ. 96.71. ஒரு லிட்டர் டீசல் விலை ரூ. 90.92.

பெட்ரொல், டீசல், சிலிண்டர் விலை அதிகரிக்க, அதிகரிக்க அத்தியாவசிய பொருட்களின் விலை அதிகரித்துக்கொண்டே செல்கிறது. ஏற்கனவே இந்த கொரானா முதல், இரண்டாம் அலைகளில் வருமானம் இழந்து, வேலை இழந்து, மருத்துவத்திற்காக தாங்கள் சிறுக சிறுக சேமித்த மொத்த சேமிப்பையும் தொலைத்துவிட்டு நிற்கும் இந்த நெருக்கடியான காலத்திலும், எரிகிற வீட்டில் கிடைத்த வரை லாபம் என பா.ஜ.க மோடி அரசு பெட்ரொல், டீசல் விலையை ஏற்றிக்கொண்டே செல்கிறார்கள்.

’இந்துக்கள். இந்துக்கள்’ என பேசி பேசி ஆட்சிக்கு வந்த பிஜேபிகாரர்கள், பெரும்பான்மை ’இந்துக்களை’ பற்றிய எந்தவித கவலையும் இல்லாமல், கொள்ளையடித்து கொண்டே இருக்கிறார்கள். பெரும்பான்மை ’இந்துக்கள்’ தான் இந்த உண்மையை புரிந்துகொள்ளவேண்டும்.

****

பெட்ரோல், டீசல் விலை உயர்வு ஏன்? - நான்காவது அத்தியாயம்.

#வினைசெய்

மயிரிழையில்...!

காரைக்குடி வரை சொந்தவேலையாக போயிருந்தேன். 15 வருடங்கள் ஓடிவிட்டன. பெரிதாய் மாற்றமில்லை. எங்கேயாவது போகலாம் என தேடிப்பார்த்தால்.. சுற்றி சுற்றி கோயில்கள் தான் இருந்தன.

இரவு 9 மணிக்கு பழைய பேருந்து நிலையம் சென்றேன். அரசு பேருந்தில் ஏற்கனவே பதிவு செய்திருந்தேன்.

பேருந்துக்கு வாசல் அருகே, இரண்டு ஆச்சிகள் "இதெல்லாம் இருக்கைகளா? இதில் ஏறி, சென்னை வரை எப்படி போகமுடியும்? நாளைக்கு போய் எந்த வேலையாவது செய்யமுடியுமா?" என கோபமாய் பேசிக்கொண்டு இருந்தார்கள். எட்டிப்பார்த்தேன். படுமோசமாக தான் இருந்தன. நடத்துநர் ஏதும் பேசவேயில்லை.

ஆச்சிகளிடமே கேட்டேன். இது 9.30 மணியா? என்றேன். 9 மணி என்றார். மயிரிழையில் தப்பித்தேன். "முன்னாடியெல்லாம் குறைவா இருந்தது. இப்பத்தான் தனியார் அளவிற்கு வாங்குகிறார்களே? பிறகென்ன ஒழுங்கா பராமரிக்கலாமே!" என்றார் என்னைப் பார்த்து! பெரிதாய் தலையாட்டி ஆமோதித்தேன்.

தமிழ்நாட்டில் அண்ணா காலத்தில் அரசுடைமையாக்கினார்கள். பட்டி தொட்டியெல்லாம் அரசு பேருந்துகள் ஓடின. மக்கள் பயன்பெற்றார்கள். 20 வருடங்கள் பிரச்சனையேயில்லை. லாபம் அதிகமாய் வந்து, போக்குவரத்து கழகம் சார்பில் சில கல்லூரிகள் கட்டியிருக்கிறார்கள். ஆராய்ச்சிக்கெல்லாம் காசு செலவழித்திருக்கிறார்கள்.

அடுத்த 20 வருடங்கள். தனியார்மய காலம். புதுசு புதுசா கிரியேட்டிவா சிந்தித்து பல்லாயிரம் கோடிகள் கடனாளியாக்கிவிட்டார்கள். 60% க்கும் மேலாக காலாவதியான பேருந்துகளை உயிரை கையில் பிடித்து கொண்டு, வண்டிகளை ஓட்டுகிறார்கள். அவர்களுடைய வைப்பு நிதியையும் தின்று தீர்த்துவிட்டார்கள். கடுப்பாகி பழனியில் ஒரு ஊழியர் மோசமான பேருந்துகளை காணொளியாக்கி சமூக வலைத்தளத்தில் வெளியிட்டதற்காக தற்காலிக பணிநீக்கம் செய்யப்பட்டார்.

அரசு பள்ளியில் படித்த முன்னாள் மாணவர்களை பள்ளிகளுக்கு உதவ சொல்லி அவ்வப்பொழுது அமைச்சர் கெஞ்சிக் கொண்டிருக்கிறார். அது போல போக்குவரத்து கழகத்தில் பயணித்த முன்னாள் பயணிகளிடம் கெஞ்சமுடியாது அல்லவா!

அரசுத்துறைகளை தனியார்மயமாக்குவதை மத்திய மாநில அரசுகள் கவனமாக செய்துவருகிறார்கள். அதற்காக மக்களுடைய மனதையும் தயார் செய்துவருகிறார்கள். கோபமாய் பேசிய ஆச்சி கூட "நாம் டிக்கெட் போடும் பொழுதே வேணாம்னு சொன்னேன். நீ தான் கேட்கலை" என்றார் சக ஆட்சியிடம்!

கல்யாணம், கருமாதிக்கு ஊர்ப்பக்கம் போய்வருகிறேன். வெகுசீக்கிரத்தில் அதுக்கும் வழியில்லாமல் செய்துவிடுவார்கள்.

இ.எஸ்.ஐ மருந்து ஊழல்!

கடந்த வாரம் வெளிவந்த செய்தியை கீழே தந்துள்ளேன்.

கடந்த இரண்டு வாரங்களில் இரண்டுமுறை இ.எஸ்.ஐ மருத்துவனை சென்றிருந்தேன்.

நோயாளிகளுக்கு தரப்படுகிற பெரும்பாலான மருந்துகள் பெரும்பாலும் அடுத்த மாதம் அல்லது மூன்று மாதங்களில் அதன் வாழ்வு (Expiry Date) முடிந்துவிடுபவையாக இருக்கின்றன. அவையெல்லாம் அபூர்வ மருந்துகள் அல்ல! வலி நிவாரணம், ஒவ்வாமை மற்றும் சத்து மாத்திரைகள் தான்!

உதாரணத்திற்கு வைட்டமின் பி12 மாத்திரைகளை ஒவ்வொரு நோயாளிக்கும் தினம் மூன்று விதம் 10 நாட்களுக்கு 30 மாத்திரைகள் என அள்ளித்தருகிறார்கள்.

அவைகளின் வாழ்வு (Expiry Date) அடுத்த மாதத்தோடு முடிய இருக்கின்றன. படம் பாருங்கள்.

எடப்பாடி, மோடி ஆட்சியில் ஊழல் மலிவாய் இருக்கிறது. அவர்கள் மருத்துவ துறையையும் விடவில்லை.

தொழிற்சங்கங்கள் இந்த ஊழலை தொழிலாளர்களிடமும், பொதுமக்களிடமும் எடுத்து செல்லவேண்டும். இ.எஸ்.ஐ காப்பாற்றப்படவேண்டும்.

****

தமிழக காங்கிரஸ் தலைவர் கே.எஸ். அழகிரி வெளியிட்டுள்ள அறிக்கையில் கூறியிருப்பதாவது:-

அரசு தொழிலாளர் காப்பீட்டு கழக மருத்துவமனை தொடங்கப்பட்டு 68 ஆண்டுகள் ஆகின்றன. தொழிலாளர்களுக்கும், அவர்களது குடும்பங்களுக்கும் மருத்துவ வசதிகள் செய்து தருவதற்காகவே உருவாக்கப்பட்டதுதான் இ.எஸ்.ஐ. மருத்துவமனைகள். ஆனால் அனைத்துதுறைகளிலும் ஊழல் செய்வதை ஒரு முக்கிய வேலையாக கருதி செயல்பட்டு வருகிற அ.தி.மு.க. ஆட்சியில் மருத்துவத்துறை விதிவிலக்கல்ல.

தமிழகத்திலுள்ள 65 இ.எஸ்.ஐ. மருத்துவமனைகளில் கடந்த ஆகஸ்ட் 2017 முதல் ஜூலை 2018 வரை மருந்துகள் கொள்முதல் செய்ததில் மிகப்பெரிய அளவில் ஊழல் நடைபெற்றிருப்பதாக செய்திகள் வெளிவந்துள்ளன. இ.எஸ்.ஐ. மருத்துவமனைகளுக்கு தேவையான மருந்துகள் வாங்குவதற்கு கொள்முதல் திட்டம் ரூ.13.13 கோடி என நிர்ணயம் செய்யப்பட்டது.

ஆனால் மத்திய மருத்துவ சேமிப்பு கிடங்கின் கண்காணிப்பாளர் மருந்துகளுக்கான கொள்முதல் தொகையை ரூ.40.29 கோடியாக தேவையில்லாமல் உயர்த்தி, தனியார் மருந்து நிறுவனங்களுக்கு கொள்முதல் ஆணை பிறப்பித்திருக்கிறார்.

இந்த ஆணை பிறப்பித்திருப்பதற்கு பின்னாலே மருத்துவதுறையின் உயர் அதிகாரிகள் செயல்பட்டிருக்கின்றனர். தேவைக்கு அதிகமாக கொள்முதல் செய்யப்பட மருந்துகள் கொண்ட நூற்றுகணக்கான அட்டைபெட்டிகள் மதுரை பிராந்திய இ.எஸ்.ஐ. மருத்துவமனையின் அலுவலர் அறையில் அடுக்கி வைக்கப்பட்டுள்ளன. இந்த அட்டைபெட்டிகளை வைப்பதற்கு இடமில்லாத காரணத்தால் பயன்படுத்தாத கழிவறைகளில் இவை வைக்கப்பட்டுள்ளன.

கடந்த 6 மாதங்களுக்கு முன்பாகவே இ.எஸ்.ஐ. மருத்துவமனைகளில் ரூ.27.16 கோடிக்கு தேவைக்கு அதிகமாக கொள்முதல் செய்ததில் நடைபெற்ற ஊழல் குறித்து தமிழக ஊழல் தடுப்பு மற்றும் கண்காணிப்பு இயக்குனரகம் விசாரணை தொடங்கியது. ஆனால் அந்த விசாரணை தொடக்க நிலையில் இருந்து எந்த முன்னேற்றமும் அடையவில்லை.

தமிழகத்தில் அமைய விருக்கிற புதிய ஆட்சியில் தொழிலாளர்களுக்காக நடத்தப்படுகிற இ.எஸ்.ஐ. மருத்துவமனைக்காக மருந்து கொள்முதலில் ஊழல் செய்த மருத்துவதுறை அதிகாரிகள் உரிய விசாரணைக்கு உட்படுத்தப்பட்டு தண்டிக்கப்படுவார்கள்

கண்ணுக்குத் தெரியாமல் களவு போகும் நீர்

நிறைய புள்ளி விவரங்களுடனும், 35 பக்கங்கள் கொண்ட இந்த புத்தகத்தை ஒருமணி நேரத்தில் படித்து முடித்துவிட்டேன். குழந்தைகளிடம் சுற்றுச்சூழல் குறித்த விழிப்புணர்வை உருவாக்குவதற்காக, அவர்களும் படிப்பதற்காக உருவாக்கிய புத்தகம் என்பதை பிறகு அறிந்துகொண்டேன்.

அடுத்த உலகப்போர் நீருக்காகத்தான் என கணித்திருக்கிறார்கள் சில அறிஞர்கள் என துவங்குகிறது புத்தகம். அந்த நீர் அரசியலைப் பற்றி விரிவாக விவாதிக்கிறது இந்த சின்னப் புத்தகம்.

புத்தகத்திலிருந்து சில பகுதிகள்…

சவுதி அரேபியா கோதுமை உற்பத்தியில் தன்னிறைவு பெற்று ஏற்றுமதியும் செய்துகொண்டிருந்தது.  ஆனால், தற்பொழுது கோதுமையை இறக்குமதி செய்கிறது. ஏன்?

சீனர்களுக்கு பிடித்த உணவு பன்றிக் கறி. ஆனால், இப்பொழுது பன்றிக்கறி உற்பத்தியை கட்டுப்படுத்தி வருகிறது. ஏன்?

சிக்கன நீர்ப்பாசனத்துக்கு பெயர் பெற்ற இஸ்ரேல் ஆரஞ்சு பழங்களை மட்டும் ஏற்றுமதி செய்வதில்லை. காரணம்?

எல்லாவற்றிக்கும் மறைநீர் தான் காரணம்.

மறை நீர் என்றால்?

கோதுமை விளைவிக்க நீர் தேவை. விளைந்தவுடன் அந்த நீர் காணப்படுவதில்லை.  காணாமல் போன நீர் அந்த கோதுமை மணிகளுக்குள் உட்பொதிந்துள்ளது அல்லது மறைந்துள்ளது என்பது உண்மை தானே! அதுதான் மறைநீர்.

தண்ணீர் அதிகமாக தேவைப்படும் வேளாண் பொருட்கள் மற்ற பொருட்களையும் வளர்ந்த நாடுகள் எல்லாம் மூன்றாம் உலக நாடுகளிலிருந்து இறக்குமதி செய்துகொள்கின்றன என்கிறார்.

திருப்பூர் பின்னலாடை உற்பத்தியும், தமிழகத்தில் திண்டுக்கல், வாணியம்பாடி பகுதிகளில் செய்யப்படும் தோல் பதனிடும் தொழிலும், கார் உற்பத்தியும் நமக்கு கிடைத்தது மறைநீர் தான் காரணம்!

1.1டன் எடையுள்ள கார் தயாராக 4 லட்சம் லிட்டர் நீர் தேவை!

ஒரு பின்னலாடை தயாரிக்க 2700 லிட்டர் தேவை!

*****

இந்த உலகத்தின்  97% கடல் நீர்.

மீதமுள்ள 3% நீரில் 68.7% பனிக்கட்டியாக!

30.1% நிலத்தடியில் கடின நீராக பயன்படுத்தமுடியாத படி!

0.3% நீர் தான் மேற்பரப்பு நீராக இருக்கிறது!

அந்த 0.3% நீரில் 87% ஏரியில்!

11% குளங்களில்!

2% தான் ஆற்று நீர்.

இந்த 2% தான் உலகத்தில் உள்ள எல்லா உயிரினங்களும் பயன்படுத்திக்கொள்ளவேண்டும்.

****

தமிழ்நாட்டின் நீர் வளம் ரெம்ப மோசம்.  இந்தியாவில் பாலைவனம் உள்ள மாநிலமான இராஜஸ்தானுக்கு அடுத்து மழை குறைவாக பெய்யும் மாநிலம் தமிழ்நாடு.  தமிழ்நாட்டில் உள்ள குடிநீரில் 72% குடிக்க லாயக்கற்றது என பொதுப்பணித்துறை அறிவித்துள்ளது.

****

  

“ஆசிய மக்களின் மறைநீர் நாளென்றுக்கு 1400 லிட்டர்.

அமெரிக்க, ஐரோப்பிய மக்களின் மறைநீர் 4000 லிட்டர்”

-Daniel Zimmer, 2003

“மறைநீர் வணிகம் மற்றும் புவிஅரசியல்” என்ற தலைப்பின்கீழ் உலக நீர் மன்றத்தின் இயக்குநர் தான் டேனியல் சிம்மர்.

இப்படி பல அதிர்ச்சியான செய்திகளோடு நகரும் புத்தகம், தீர்வாக பசுமை பொருளாதாரத்தை முன்வைக்கிறார்.

பசுமை பொருளாதாரத்தை நிறைவேற்ற வேண்டுமென்றால் கூட சமூக மாற்றம் இல்லாமல் சாத்தியமில்லை என்பது யதார்த்தம்.

வெளியீடு : ஒசூர் அன்புக்கரங்கள் அறக்கட்டளை

எனக்கு ஒரு தோழர் படிக்க தந்தார். புத்தகத்தின் விலையை புத்தகத்த்தில் எங்கும் குறிப்பிடவில்லை. இணையத்தில் தேடும் பொழுது, உடுமலை.காம் ரூ.15 என விலை நிர்ணயம் செய்துள்ளது!