Wildlife of Karnataka (2019)

 

கர்நாடக வன விலங்குகள்   ஆவணப்படம் – 52 நிமிடங்கள்

 

கர்நாடக வனப்பகுதியில் புலி, யானை என பெருமிருகங்களையும், தவளை, நண்டு என சின்ன உயிரினங்களையும், அவைகளுடைய இயல்புகளையும், வாழ்வையும் அருமையாக படம் பிடித்து இருக்கிறார்கள்.

 

எட்டிப்பழம் ஒன்று ஒரு மனிதனை கொல்லும் அளவிற்கு வீரியம் உண்டாம். ஆகையால் மற்ற பறவையினங்கள், விலங்குகள் அந்த மரத்தைத் தெறித்து ஓடும் பொழுது, இருவாச்சி பறவைகள் மட்டும் அதனை உணவாக உட்கொள்கிறது. அதையும் செரித்து விடுகிற ஆற்றல் அந்த பறவைக்கு இருக்கிறது.

 

இப்படி நுட்பமான தகவல்களையும் ஆங்காங்கே தூவி செல்கிறார்கள்.  பல மொழிகளில் உருவாக்கியிருந்தாலும், தமிழில்  இதற்கு அருமையாக குரல் கொடுத்து மெருகேற்றியிருக்கிறார் நடிகர் பிரகாஷ் ராஜ். 

 

நிலப்பரப்பில் இந்தியாவின் 6வது மாநிலம் கர்நாடகா.   இதில் வனப்பகுதி 20.19% என்பது ஆச்சரியமான செய்தி.   இங்கு இந்திய யானைகளில் 25% இங்கு இருக்கிறதாம்.  புலி 20% இருக்கிறதாம்.  தமிழ்நாட்டின், கேரளாவின் மேற்குத் தொடர்ச்சி மலைப்பகுதியிலும் பயணித்திருக்கிறேன்.  கர்நாடகவின் மேற்குத் தொடர்ச்சி மலைப்பகுதிக்குள் போனதில்லை. அவசியம் போகவேண்டும்.

 

1500 நாட்கள். 15000 மணி நேர படப்பிடிப்பு.   நவீன 20 கேமராக்கள்.  2400 நிமிடங்கள் என ஒரு நீள பட்டியல் சொல்கிறார்கள். உண்மையான நிகழ்வு என்பதால், நிச்சயம் காலம் பிடித்திருக்கும்.  இதில் டிரோன் காட்சிகள் அதிகம்.  இந்தப் படத்தின் சிறப்பான அம்சம் கூட.

 

தேசிய விருதுகள் உட்பட நிறைய விருதுகளை வென்றிருக்கிறது.  முதன்முதலாக இப்படி ஒரு ஆவணப்படத்தை திரையரங்குகளில் வெளியிட்டிருக்கிறார்கள்.  இந்தப் படத்தை நிச்சயம் திரையரங்கில் பார்ப்பது ஒரு நல்ல அனுபவமாகத் தான் இருந்திருக்கும்.

 

காடுகளில் உள்ள பாதிப்பு, மாறிவரும் காலநிலை அதன் பாதிப்பு எவ்வளவு என்பதை படம் எட்டிப்பார்க்கவேயில்லை.  அதை நாம் தாம் தேடிப்பார்க்கவேண்டும்.

 

இப்போதைக்கு எந்த ஓடிடியிலும் இல்லை. நான் முன்பு தரவிறக்கி இப்பொழுது பார்த்தேன்.

 

இயற்கை அழகும், பட்டி டிங்கரிங்கும்!

Karwar railway station karnataka

சமீபத்தில் ஒரு திருமண ஆல்பம் பார்த்தேன்.

மணமக்கள் போலவே கூட நிற்கிற அனைவருக்கும் பட்டி டிங்கரிங் பார்த்து 'அழகாய்' காட்சியளித்தார்கள்.

அது போல இப்பொழுது இயற்கை படங்களுக்கும் பட்டி, டிக்கரிங் பார்க்கிறார்களோ என சந்தேகம் வருகிறது.

Incendies (2010) பிரெஞ்சு

அம்மா நினைவுகள் தப்பி, இறந்துவிடுகிறாள். தனது இரட்டைப் பிள்ளைகளான மகன், மகளுக்கு ஒரு பொறுப்பை தருகிறாள். பிள்ளைகள் அறியாத (முன்னாள்) கணவனுக்கு ஒரு கடிதம். அவருக்கு பிறந்த ஒரு பையனுக்கு ஒரு கடிதம். அந்த கடிதங்களை சேர்த்தப் பிறகு தான், தன் கல்லறையில் பெயரை எழுதவேண்டும் என உயில் எழுதி வைத்திருக்கிறார்.

மகன் கடுப்பாகிறான். மகள் தன் அம்மா கொடுத்த பொறுப்பை நிறைவேற்ற முடிவெடுத்து, கிளம்புகிறாள்.

அரபு நாடுகளில் ஒன்று அம்மாவின் தாயகம். தாய் வீடு அவளை இனிதே வரவேற்கவில்லை.

அம்மா கிறிஸ்துவ குடும்பத்தில் பிறந்து...ஒரு முசுலீம் அகதியை காதலித்து... இது தெரிந்ததும் சகோதரர்கள் அவரை சுட்டு கொன்றுவிடுகிறார்கள்.

தன் பாட்டியின் ஆதரவில்.. குழந்தையை பெற்றெடுக்கிறாள். அந்த குழந்தைக்கு காலில் ஒரு அடையாளமிட்டு அனாதை ஆசிரமத்திற்கு அனுப்பிவிடுகிறார்கள்.

அங்கு அரசியல் சூழலால் நிலைமை மோசமடைகிறது. அவளின் வாழ்க்கையும் அதில் சிக்கிக்கொள்கிறது.

அவள் தன் மகனைத் தேடிக்கொண்டே இருக்கிறாள். பின்னாட்களில் தான் தன் இரு குழந்தைகளுடன் கனடா வந்து சேர்கிறாள்.

தன் அம்மாவைப் பற்றிய தேடலில்.. தன் தந்தை யார்? தனது மூத்த சகோதரன் யார்? என்பது மட்டுமில்லாமல், அதன் வழியே தங்களுடைய வரலாறையும் அறிந்து... அதிர்ச்சி அடைகிறார்கள்.

****

புகழ்பெற்ற "இடிபஸ்" நாடகத்தின் அடிப்படையாக கொண்டு, ஒரு நவீன நாடகமாக எழுதப்பட்டு, அதை படமாக்கியிருக்கிறார்கள்.

இயல்பு வாழ்வில் நடக்க சாத்தியமில்லாத ஒரு கதை. ஆனால் மத ரீதியான மோதல் சூழலில்... இந்தக் கதை சாத்தியமாவது தான் வாழ்வின் பெருந்துயரம்.

கடவுள் மீதான நம்பிக்கை தனிநபர் நம்பிக்கையாக இருக்கும்வரை, ஏதும் பிரச்சனையில்லை. மதம் ஒரு அமைப்பாய், அதிகாரத்தில் அமரும் பொழுது, மதம் பிடித்துவிடுகிறது. மனிதர்களை ஈவிரக்கமின்றி கா வு வாங்க துவங்கிவிடுகிறது.

கதையைப் புரிந்து அனைவரும் நடித்திருக்கிறார்கள். படம் பல விருதுகளை வென்றிருக்கிறது.

அவசியம் பார்க்கவேண்டிய படம்.