The Flash (2023)

Flash – (DCயினுடைய நாயகர்களில் ஒருவன்.) மின்னல் எதைச்சையாக தாக்கியதால், கிடைத்த ஆற்றலால், மின்னல் வேகத்தில் செயல்படக்கூடியவன். இப்பொழுது ஒரு ஆய்வகத்தில் வேலை செய்து வருகிறான்.

தனியாக வாழ்வதால், பழைய நினைவுகள் அவனை துரத்திக்கொண்டே இருக்கின்றன. அவன் சிறுவனாய் இருக்கும் பொழுது அம்மாவை யாரோ ஒரு திருடன் கத்தியால் குத்திவிட்டு ஓடிப்போக, அப்பா அங்கே வர, அவர் மீது கொலைப்பழி விழுகிறது. ஆகையால் சிறையில் இருக்கிறார். அவரை அந்த வழக்கில் இருந்து மீட்க முயன்றாலும் முடியவில்லை. அம்மா, அப்பா இருவரின் இழப்பும் அவனை எப்பொழுதும் வாட்டுகிறது.

வெறுத்துப்போய் கண் மண் தெரியாமல் ஓடும் பொழுது, அவனுடைய சக்தியால் முந்தைய காலத்துக்கு சிறிது தூரம் பயணிக்கிறான். இதைப் பற்றி பேட் மேனிடம் சொல்லும் பொழுது, ”இழப்பை ஏற்றுக்கொள். பழையதை மாற்ற முயலாதே! ஏகப்பட்ட குழப்பங்கள் வந்துவிடும்” என எச்சரிக்கிறார். ஆனால், அவன் கேட்கவில்லை. காலத்தின் வழியே பயணம் செய்து, அம்மாவை காப்பாற்றிவிடலாம் என சிந்திக்கிறான். அதன் பின்விளைவுகள் பற்றி அவன் சிந்திக்கிற நிலைமையில் அவனில்லை.

கால வழிப்பயணத்தில் போய், அவன் செய்த மாற்றங்களால், அவன் அம்மாவை காப்பாற்றினா? அதனால் என்னென்ன குழப்பங்கள் வந்தன? என்பதை உணர்வுப்பூர்வமாகவும், சுவாரசியமாகவும் சொல்லியிருக்கிறார்கள்.

***

Flash ஒரு சுவாரசியமான பாத்திரம். அதை வைத்து, இந்த படத்தில் மல்டி யுனிவர்ஸை தொட்டு இருக்கிறார்கள். அதை சிக்கல் இல்லாமல், சுவாரசியமாக புரிய வைத்திருப்பது நல்ல விசயம்.

கால வழிப்பயணத்தில் இவன் செய்த மாற்றங்களால், ஒவ்வொரு காலக்கட்டத்திலும் பேட் மேன் வெவ்வேறு ஆளாக மாறுவது சுவாரசியம். என்ன தான் மாற்ற முயன்றாலும், பெரிய விளைவை உருவாக்க முடியவில்லை. வாழ்வு தந்த காயத்தின் தழும்புகளை எதிர்கொள்வதால், இப்பொழுதுள்ள நம் ஆளுமையே உருவாகிறது. அந்த தழும்பிற்கான காரணங்களை மாற்றினால், மொத்த வாழ்வும் மாறிவிடும் என்பதை மறந்துபோகிறோம். நம் பார்வையை எதிர்காலத்தில் கவனம் செலுத்துவது தான் சரியானது என்கிற பாடத்தை சொல்லியிருக்கிறார்கள்.

பொதுவாக கொரியன் படங்களில் உணர்ச்சியை சரியாக பொருத்திவிடுவார்கள். இப்பொழுது ஹாலிவுட் படங்களிலும் அதை சரியாக செய்ய முயல்கிறார்கள்.

திரையரங்குகளில் வெளியாகி ஓடிக்கொண்டிருக்கிறது. தமிழிலும் வெளியிட்டிருக்கிறார்கள். பாருங்கள்.