போர் தொழில் (2023) அருமையான திரில்லர்

திருச்சியைச் சுற்றி இளம்பெண்கள் கொடூரமாக வரிசையாக கொலை செய்யப்படுகிறார்கள். கொலையாளியை பிடிக்க ஒரு சிறப்பு குழுவை நியமிக்கிறார்கள். கறாரான, மிக இறுக்கமான ஒரு மூத்த அதிகாரியையும், அவருக்கு உதவியாக ஒரு இளம் அதிகாரியையும், தொழில்நுட்ப உதவிக்கு இளம் பெண் அதிகாரியையும் நியமிக்கிறார்கள்.

ஒரு துப்பும் இல்லாத கொலைகள். மெல்ல மெல்ல நூல் பிடித்து இருவரும் வேறு வேறு வழிகளில் குற்றவாளியை நெருங்கும் பொழுது, ஒரு சடரென திருப்பம். இறுதியில் கொலையாளியை கண்டுபிடித்தார்களா என்பதை திரில்லராக அருமையாக சொல்லியிருக்கிறார்கள்.

****

வெறும் கொலைகள். துப்பறிவது என்பதோடு இல்லாமல், கொலைகளுக்கு பின்னால் உள்ள உளவியல் காரணம் என்ன என்பதையும் சரியான விதத்தில் படம் முழுக்க தூவியிருக்கிறார்கள்.

அனுபவமுள்ள மூத்த அதிகாரி, கத்துக்குட்டிக்குமான இடைவெளி. புரிந்துகொள்வதின் மூலம் மெல்ல மெல்ல அந்த இடைவெளி களைவது, போலீசு துறைக்குள் இருக்கும் சின்ன சின்ன முரண் எல்லாவற்றையும் நன்றாக காட்டியிருக்கிறார்கள்.

துவக்கம் முதல் இறுதி வரை அருமையாக இருக்கும் திரில்லர் வகைகளில் தாராளமாய் இதையும் சேர்க்கலாம். மூத்த அதிகாரியாக சரத்குமார், இளம் அதிகாரியாக அசோக் செல்வன், சரத்பாபு என முக்கிய பாத்திரங்களும், துணைப் பாத்திரங்களும் அனைவருமே நன்றாக உணர்ந்து நடித்திருக்கிறார்கள். மற்ற தொழில்நுட்ப கலைஞர்களும் சிறப்பு. விக்னேஷ் ராஜா சிறப்பாக இயக்கியிருக்கிறார்.

பாடல்கள் இல்லை. சண்டைகள் இல்லை. அது இன்னும் சிறப்பு. பார்க்கவேண்டிய படம்.

இன்று தான் திரையரங்குகளில் வெளியாகியிருக்கிறது. ஓடிடி வர இன்னும் ஒரு மாதமாகலாம்.