Boston strangler (2013) 13 கொடூர கொலைகள்! கொலைகாரன் யார்?

 ”வெளியே பல ஆல்பர்ட் டிசால்வோஸ் உலாவுகிறார்கள். உங்கள் பாதுகாப்பான சிறிய உலகம் என்பது வெறும் மாயை. ஆண்கள் பெண்களைக் கொல்கிறார்கள். இது ஆல்பர்ட்டிலிருந்து மட்டும் தொடங்கவில்லை. நிச்சயமாக நரகம் அவனுடன் முடிவடையாது.”

- படத்திலிருந்து…

***

1964. அமெரிக்காவின் பிரபல பத்திரிக்கை ஒன்றில் நாயகி பத்திரிக்கையாளராக வேலை செய்கிறார். அந்த கால கட்டத்தில், ஒரு அலுவல் வேலை போல, பெண் பத்திரிக்கையாளர்களுக்கு சில குறிப்பிட்ட பகுதிகளை மட்டும் ஒதுக்குகிறார்கள். நாயகிக்கு மூன்று குழந்தைகள், கணவனுடன் வாழ்ந்தாலும், புதிதாக சாதிக்கவேண்டும் என நினைக்கிறார்.

பாஸ்டன் நகரத்தில் தனித்து வாழும் மூன்று வயதான பெண்கள் கழுத்தை நெறித்து கொலை செய்யப்படுகிறார்கள். மூன்றும் சம்பந்தமில்லாமல் தனித்தனி செய்தியாக வெளியாகிறது. மூன்று கொலைகளின் ஒற்றுமையை கவனித்த நாயகி, இதுப் பற்றி தான் எழுதுவதாக அனுமதி கேட்டால், மறுக்கிறார்கள். வழக்கமான வேலைகளை செய்துகொண்டே கூடுதலாக இந்த வழக்குகளையும் தொடர்கிறேன் என சொல்கிறாள். ஏற்றுக்கொள்கிறார்கள்.

அசுவாரசியமான அந்த கொலை வழக்குகள், அடுத்து ஒரு கொலை என அதே போல நடக்க, இவள் எல்லாவற்றையும் தொடர்புப்படுத்தி எழுதிக்கொடுத்த செய்தி தலைப்பு செய்தியாக வர பர பரவென நகரத்தில் மக்களிடத்தில் பற்றிக்கொள்கிறது. தனியாக வாழும் பெண்கள் எல்லாம் பதறிப்போகிறார்கள். போலீசை குடைந்து கேள்வி கேட்கிறார்கள்.

வயதான பெண்கள் என ஆரம்பித்த கொலைகள், பிறகு இளம்பெண்களும் கொலை செய்யப்படுகிறார்கள். இன்னும் பரபரப்பாகிவிடுகிறது.

கொலைகளை யார் செய்தார்கள்? எதற்காக செய்தார்கள்? என்ற உண்மைகளை கண்டறிந்தார்களா என்பதை விரிவாக சொல்லியிருக்கிறார்கள்.

இந்தப் படம் உண்மைச் சம்பவங்களை கொண்டு கதை எழுதப்பட்டுள்ளது. அதனால் அதற்குரிய தன்மைகளுடன் தான் படமும் இருக்கிறது.

தொடர்கொலைகள். ஒரு சைக்கோ கொலைகாரனோடு முடிந்துவிட்டால் பரவாயில்லை. Boston Strangler என்பது ஒரு கட்டதில் Boston stranglers என மாறும் பொழுது தான் அதிர்ச்சி. இந்த வசனத்தை கூர்ந்து கவனியுங்கள். இதன் தீவிரம் புரியும். மேலும் சொன்னால், ஸ்பாய்லராகிவிடும். ஆகையால்

நிறுத்திக்கொள்ளலாம்.

”வெளியே பல ஆல்பர்ட் டிசால்வோஸ் உலாவுகிறார்கள். உங்கள் பாதுகாப்பான சிறிய உலகம் என்பது வெறும் மாயை. ஆண்கள் பெண்களைக் கொல்கிறார்கள். இது ஆல்பர்ட்டிலிருந்து மட்டும் தொடங்கவில்லை. நிச்சயமாக நரகம் அவனுடன் முடிவடையாது.”

அதே போல பெண்கள் வெளியே வேலைக்கு வந்துவிட்டாலும், அவர்களை இன்னும் குடும்பம் பின்னுக்கு இழுத்துக்கொண்டு தான் இருக்கிறது. வேலை என்பதைத் தாண்டி, இத்தனைப் பெண்கள் கொலை செய்யப்படுகிறார்களே என்கிற ஆதங்கம் நாயகியைத் தொற்றிக்கொள்ளும். முதலில் ஒத்துழைத்த கணவன், பிறகு அவள் தொடர்ச்சியாக பகலும், இரவு, வெளியூர் என அலையும் பொழுது, சிக்கலாவான். உண்மையில், பிறகு பிரிந்துவிட்டிருக்கிறார்கள்.

காதல் வேறு. குடும்பம் வேறு. சமூகத்தில் குடும்பம் என்பது ஒரு நிறுவனம். அது ஒரு ஒழுங்கை கோரும். குடும்பத்தில் வாழும் நபர்கள் அந்த ஒழுங்கை மீறும் பொழுது, சிக்கலாகும். முதலாளித்துவம் தன் லாபத்திற்காக பெண்களை வீட்டிலிருந்து வெளியே தன் ஊழியர்களாக கொண்டு வந்துவிட்டது. ஆனால் குடும்பம் இன்னும் பழைய முறையிலிருந்து வெளியே வருவதற்கான எந்த ஏற்பாடுகளையும் செய்து தரவில்லை. ஆகையால் ஏகப்பட்ட குழப்பங்கள். குழந்தைகளை இலவசமாகவோ, நியாயமான ஒரு விலையில் குழந்தைகளை பாதுகாப்பதற்கான காப்பகங்களை உருவாக்கித் தரவில்லை. வீட்டு பராமரிப்பு, சமையல் வேலைகளிலிருந்தும் விடுவிக்கவில்லை. சமூகத்தில் இந்த சிக்கல்களை எதிர்கொள்ள முடியாமல், புதிய தலைமுறையில் ஒரு பிரிவினர் ”குடும்பம்” என்ற நிறுவனத்தையே எதிர்க்கிறார்கள். சமீபத்தில் சீன அரசு, இளந்தலைமுறையினர் குடும்பம், குழந்தைகள் என வாழ உற்சாகப்படுத்தி நிறைய சலுகைகளை அறிவித்தது நினைவுக்கு வருகிறது.

அமெரிக்க ஹாலிவுட் படங்கள் அமெரிக்காவில் தொலைந்து போன ”குடும்பம்”த்தை மீட்டெடுக்க, படாத பாடு படுகிறது. ஊருக்கொரு காதலி வைத்திருக்கும் ஜேம்ஸ்பாண்ட், கடைசியாய் வந்த படத்தில் தன் ”குடும்பத்திற்காக” தற்கொலை செய்துகொள்கிறார். மார்வல் படங்களில் வரும் தன் திறன்களால் புகழ்பெற்ற Wanda கடைசியாய் வந்த Doctor Strange in the Multiverse of Madness படத்தில் இழந்த தன் குடும்பத்தை மீட்க எந்த லெவலுக்கும் கீழே இறங்கி வேலை செய்கிறார்.

குடும்பத்தை ”காப்பாற்ற” நினைக்கும் முதலாளித்துவம் தோற்றுத்தான் போகும். ஏனெனில் அது நேர்மையாக மக்களின் நலனிலிருந்து ஒருபோதும் சிந்திக்காது. அதற்கு இலக்கு லாபம். இன்னும் லாபம். மேலும் லாபம் மட்டுமே! உலகமே அழிந்தாலும் அதற்கு கவலையில்லை. நாம் தாம் முதலாளித்துவ மாயைகளிலிருந்து விடுபடவேண்டும். மாற்று சமூகம் குறித்து சிந்திக்கவேண்டும்.

படத்தில் நடித்த அனைவரும் சிறப்பாக நடித்திருக்கிறார்கள். மற்ற தொழில்நுட்ப குழுக்களான ஒளிப்பதிவு, அந்த காலக்கட்டத்தை நம் முன் கொண்டு வந்திருக்கிற கலை இயக்குநர் என சிறப்பு. The Boston Stranger என 1968லேயே ஒரு படம் எடுத்து வெற்றி பெற்றிருக்கிறார்கள். இப்பொழுது மீண்டும் எடுத்திருக்கிறார்கள். ஹாட் ஸ்டாரில் இங்கிலீஷ் சப் டைட்டில்களுடன் கிடைக்கிறது.