EPF : தொழிலாளிகளுக்கான பிரத்யேகமான தளத்தை ஒரு தொழிலாளி எவ்வாறு பயன்படுத்துவது? – அத்தியாயம் 7

 

தொழிலாளிக்கான பிரத்யேகமான பி.எப் தளத்தின் முகவரி

https://unifiedportal-mem.epfindia.gov.in/memberinterface/

இதற்கு முந்தைய ஆறு அத்தியாயங்களை GSTPS தளத்தில் கீழ்க்கண்ட முகவரியில் சென்று படிக்கலாம்.

https://gstprofessionalssociety.blogspot.com/2023/10/gstps-how-to-use-employee-pf-site.html

https://gstprofessionalssociety.blogspot.com/2023/11/epf-2.html

https://gstprofessionalssociety.blogspot.com/2023/12/epf-3.html

https://gstprofessionalssociety.blogspot.com/2024/01/epf-4.html

https://gstprofessionalssociety.blogspot.com/2024/02/epf-5.html

https://gstprofessionalssociety.blogspot.com/2024/03/epf-6.html

 

கடந்த ஆறாவது அத்தியாத்தில் ஓய்வூதியம் பெறுகிற தொழிலாளி உயிரோடு இருக்கிறாரா, அவர் தான் ஓய்வூதியம் தொடர்ந்து  பெற்றுக்கொண்டிருக்கிறாரா என்பதை உறுதி செய்ய ஆண்டுக்கு ஒருமுறை குறிப்பாக நவம்பர் 30க்குள் வாழ்வு சான்றிதழை (Life Certificate) தர கோருகிறது. அதைப் பற்றி பார்க்கலாம் என முடித்திருந்தோம்.

 

முன்பு இந்த வாழ்வு சான்றிதழை பதிவு செய்வதற்கு நேரடியாக பி.எப். அலுவலகம் வரவேண்டியிருக்கும்.  வழக்கமாகவே பி.எப். அலுவலகத்தில் மக்களின் வரவு அதிகமாக இருக்கும்.   ஆண்டின் இறுதி மாதத்தில் கூட்டம் அலைமோதும்.

 

இந்தப் பிரச்சனையை சமாளிக்க சில வருடங்களுக்கு முன்பு…  டிஜிட்டலாக வாழ்வு சான்றிதழை சமர்ப்பிக்க ஒரு வழி கண்டுப்பிடித்தது.  அந்த அரசு இணையத் தளத்தின் பெயர்.  https://jeevanpramaan.gov.in/

 

இந்தத் தளத்தின் வழியாக 127 லட்சம் தங்களது வாழ்வு சான்றிதழ்களை பெற்றிருக்கிறார்கள் என தளமே முதல் பக்கத்தில் தகவலாக தருகிறது.

தளத்தின் உள்ளே நுழைவதற்கு சம்பந்தப்பட்ட பணியாளின் மின்னஞ்சலை கொடுத்தால்…  நம்முடைய மின்னஞ்சலை உறுதிப்படுத்த ஒரு ஓடிபி (One Time Password) வந்து சேரும். நமது மின்னஞ்சலைத்  திறந்து, அந்த ஓடிபியை எடுத்து தளத்தில் பதியவேண்டும்.  அதற்கு பிறகு,  நமக்கு மென்பொருளை (Software) அனுப்பிவைப்பார்கள்.

 

இந்த வாழ்வு சான்றிதழை தருபவர்கள் ஓய்வுப் பெற்றவர்களாக, பெரும்பாலும், வயதானவர்களாக இருப்பதால், அவர்களாகவே தளத்தின் வழியே சான்றிதழை பெறுவதற்காக சிரமப்படுவார்கள் என்பதற்காக..  இசேவா மையம், வங்கிகள் என சில ஏற்பாடுகளை செய்து தந்திருக்கிறது. அங்கு  இந்த சேவையை பெறலாம்.  இந்த தளத்திலேயே பணியாளருடைய மாநிலம், மாவட்டத்தைத் தேர்ந்தெடுத்தால், உங்கள் அருகில் உள்ள மையத்தை அதுவே உங்களுக்கு காட்டுகிறது. பயன்படுத்திக்கொள்ளலாம்.

 

சம்பந்தப்பட்ட இசேவை (E seva) மையத்துகாரர்கள் என்ன செய்கிறார்கள் என பார்த்தால், முதலில் தளம் தருகிற ஒரு மென்பொருளை கணிப்பொறியில் பொருத்திக்கொள்ளவேண்டும் (Install).  அதற்கு பிறகு, அந்த ஆபரேட்டர் தன்னுடைய ஆதார், மொபைல் எண், மின்னஞ்சல் ஐடியை கொடுக்கிறார். ஆதார் ஓடிபியைப் பெற்று அதைக் கொடுத்ததும், முதல் நிலையில் சரிப்பார்த்தால் முடிந்துவிடுகிறது.  அடுத்து, எந்த பணியாளருக்கு பதிவு செய்யப்போகிறாரோ, அவருடைய ஆதார், மொபைல் எண், மின்னஞ்சல் வைத்திருந்தால் மின்னஞ்சல் கொடுக்கலாம்.  

 

அடுத்து, பணியாளருடைய அடிப்படை விவரங்கள் கொடுக்கவேண்டியிருக்கும்.  பெயர், என்ன வகையான பென்சன் பெறுகிறார்? பணியாளர் பெறுகிற ஓயூதியமா? அல்லது அவர்களுடைய குடும்பத்தினர் பெறுகிற ஓய்வூதியமா?  என்கிற விவரங்களில் ஒன்றை தேர்ந்தெடுக்கவேண்டும்.  

 

அவருக்கு ஓய்வூதியம் வழங்கும் அமைப்பு எது?  (இந்த வாழ்வு சான்றிதழ் என்பது பி.எப். தளத்திற்கு மட்டுமில்லை.  பி.எப். ஓய்வூதியம் வழங்குவது போலவே, மத்திய அரசு, மாநில அரசு,  தனியார் நிறுவனங்கள் என பல அமைப்புகள் வழியாக  பென்சன் வழங்குவதற்கும் வாழ்வு சான்றிதழை இந்த தளத்தைத் தான் பயன்படுத்துகிறார்கள் என்பதை புரிந்துகொள்ளவேண்டும்.) பணியாளருக்கு எந்த வங்கி மூலம் ஓய்வூதியம் பெறுகிறார் என்பதை பதிவு செய்யவேண்டும்.  அவருடைய அடையாள எண் ஓய்வூதிய அடையாள எண் (PPO – Payment Pension order Number) எது? என்கிற அடிப்படை விவரங்களை பதியவேண்டும்.

அடுத்த நிலையில், இரண்டு கேள்விகளை எழுப்பும்.  ஒரு பணியாளர் ஓய்வுக்கு பிறகும், வேலையை தொடர வாய்ப்பிருக்கிறது.  அப்படி தொடர்கிறீர்களா? என கேட்கும். அதற்கு பொருத்தமான பதிலை தரவேண்டும்.  இரண்டாவது கேள்வி, ஒரு பணியாளர் இறந்தநிலையில் அவருடைய துணைவியார்/வாரிசுகள் ஓய்வூதியம் பெற்றுக்கொண்டிருப்பார்கள். அவருடைய துணைவியாராக இருந்தால்… மறுமணம் புரிந்துகொண்டீர்களா? என கேட்கும். அதற்கும் பொருத்தமான பதிலை தரவேண்டியிருக்கும்.

 

அடுத்த நிலையில் பணியாளருடைய விரல் ரேகையை அவர்கள் வைத்திருக்கும் ஸ்கேனரில் வைத்து பதிவு செய்யவேண்டும்.   அது வெற்றிகரமாக நடந்தேறியதும், ஒரு சான்றிதழ் உருவாகிவிடும். அதை பிரிண்டரில் எடுத்து தந்துவிடுவார்கள். அதைப் பாதுகாப்பாக பணியாளர் வைத்துக்கொள்ளவேண்டும்.

இன்னும் வளரும்.

No tears for the dead (2014) தென்கொரியா

"பாவம் செய்வதில், ஒவ்வொரு மனிதனும் அனைவருக்கும் எதிராகப் பாவம் செய்கிறான், ஒவ்வொரு மனிதனும் மற்றொருவரின் பாவத்திற்காக குறைந்தபட்சம் ஓரளவு குற்றவாளி. தனித்த பாவம் இல்லை”

-          எழுத்தாளர் தஸ்தாவெஸ்கி

 

பணத்துக்காக கொலை செய்கிற ஆள் நாயகன்.  அப்படி ஒரு ”வேலையாக” கொலைகள் செய்யும் பொழுது, தவறுதலாக ஒரு எட்டு வயது சின்னப் பெண்ணையும் தவறுதலாக சுட்டுக்கொன்றுவிடுகிறான்.

அதனால் ஏற்படுகிற குற்ற உணர்வு அவனை வாட்டுகிறது.  அதற்கு பிறகு எந்த வேலையும் செய்யாமல் இருக்கிறான். அவனின் பாஸ் அவனை விடுவதாயில்லை. 

இவன் மறுத்தாலும், அவனை மிரட்டி இன்னொரு வேலையை கொடுக்கிறான்.   அது அவன் ”கொலை” செய்த  அந்த பெண்ணின் அம்மாவை கொலை செய்வது!

வேண்டா வெறுப்பாக போகிறான். அவளைச் சந்திக்கிறான். அங்கு ஏகப்பட்ட களேபரங்கள் நடக்கின்றன.  பிறகு என்ன ஆனது என்பதை உணர்வுப்பூர்வமாக சொல்லியிருக்கிறார்கள்.

***

 

கொரியப் படங்கள் எவ்வளவு பரபர சண்டைப்படமாக இருந்தாலும் சரியான விகிதத்தில் உணர்வுகளையும் கலந்துகொடுத்துவிடுகிறார்கள். அதற்கு இந்தப் படமும் ஒரு உதாரணம்.

 

மிஷ்கினின் ஓநாயும் ஆட்டுக்குட்டியும் (2013) படத்தைப் பார்த்துவிட்டு, தனது பாணியில் படம் எடுத்தது போல இருந்தது இந்தப் படம்.   இரண்டுப் படங்களின் ஒன் லைனும் ஒன்று தான்.  கதையும், காட்சிகளும் தான் வேறுவேறு.

 

தான் கொன்ற அந்த சின்ன பையனின் கண் தெரியாத குடும்பத்தை எப்படியாவது காப்பாற்றிவிடவேண்டும் என்ற பரிதவிப்பையும், அந்தப் போராட்டத்தையும், மிஷ்கின் கடத்தியிருப்பார்.

 

அந்த குற்ற உணர்வுக்கு அடிப்படை என்ன என்பதையும், அவனுடைய சிறு பிராயத்து சில காட்சிகளை பொருத்தமாக வைத்திருப்பார்கள்.

 

குற்றவுணர்வில் அலையும் நாயகன், மகளின் நினைவில் வாடும் அம்மா, இரு பாத்திரங்களும் முக்கியப் பாத்திரங்கள். மற்றவை எல்லாம் அதகள காட்சிகளில் வருபவர்கள் தான். எல்லோரும் சரியாக பொருந்திருக்கிறார்கள்.

 

இப்போதைக்கு எந்த ஓடிடியிலும்  இல்லை. நான் முன்பு வைத்திருந்த பட்டியலில் வைத்திருந்த படம். வேறு வகைகளில் முயலுங்கள்.

 

Gyeongseong creature (2023) தென்கொரியா

1940களில் நடக்கும் கதை. ஜப்பான் காலனிய ஆட்சி செய்த நாடுகளில் கொரியாவும் ஒன்று. அங்கு ஒரு மருத்துவமனை கட்டி, அந்த மருத்துவமனையின் கீழ் ஜப்பானின் இராணுவம் ஒரு விநோதமான ஆய்வில் ஈடுபடுகிறது. அதற்கு அங்கு வாழும் அப்பாவி மக்களை சட்ட விரோதமாக கைது செய்து, அவர்களிடம் மருத்துவ பரிசோதனை செய்கிறது. இதில் பலரும் கொல்லப்படுகிறார்கள்.

மனிதர்களின் உடலில் நாஜின் என்ற கிருமியை செலுத்துகிறார்கள். அதில் அவர்களுக்கு ஏற்படுகிற வலியில் பலர் தற்கொலை செய்துகொள்கிறார்கள். அதில் ஒரே ஒரு பெண்மணி பிழைத்துக்கொள்கிறார். அவருடைய உடலுக்குள் புகுந்த அந்த உயிரினம், அவருடைய மூளையும் கட்டுப்படுத்துகிறது. மனிதனை விட பலசாலியாய், தனக்கு ஏற்படுகிற காயங்களை தானே குணப்படுத்துகிற, நிலைமைகளை புரிந்துகொண்டு கையாள்கிற ஒரு விநோத ஜந்துவாய் பெரிதாய் வளர்ந்து நிற்கிறது.

அந்த பகுதியில் நாயகன் ஒரு பெரிய அடகுகடை ஒன்றை நடத்துகிறார். பொருளாதாரத்தில் வலுவாக இருப்பதால், அதிகாரத்திலும் சமூகத்திலும் ஒரு அந்தஸ்து இருக்கிறது. அதைப் பயன்படுத்தி மேலும் தன்னை வளர்த்துகொள்கிறார். ஆட்களைப் பற்றிய தகவல்களையும் சேகரித்து தருகிறார். அதற்கான பலனையும் பெற்றுக்கொள்கிறார்.

இப்பொழுது அவருக்கு ஒரு ஆபத்து வருகிறது. தலைமை போலீசு அதிகாரியின் காதலி ஒருத்தி நிறைமாத கர்ப்பிணியாய் இருந்தவள் திடீரென காணாமல் போகிறார். நாயகனை அழைத்து ”அவளை கண்டுப்பிடித்து தரவேண்டும். இல்லையெனில் கட்டாய இராணுவ சேவைக்கு அனுப்பிவிடுவேன். போர்க்காலம் என்பதால், சாவு நிச்சயம். மேலும் போராளிகளுடம் கூட்டு வைத்திருந்ததாக சொல்லி, உன் அனைத்து சொத்தையும் பறிமுதல் செய்துவிடுவேன். இந்த வசந்த காலம் முடிவதற்குள் செய்ய வேண்டும்” என மிரட்டுகிறான்.

நாயகியின் அம்மா பத்து ஆண்டுகளுக்கு முன்னால் திடீரென காணாமல் போகிறார். அதனால், நாயகியும், அவளுடைய அப்பாவும் வெவ்வேறு பிரதேசங்களில் தொடர்ந்து தேடுகிறார்கள். இதில் காணாமல் போனவர்கள் பற்றி யாராவது தேடச் சொன்னால், அதையும் செய்கிறார்கள். இவர்கள் அந்த பகுதிக்கு வர, நாயகனை சந்திக்கிறார்கள். அவன் காணாமல் போன பெண்ணைப் பற்றி தேடித்தர சொல்கிறான்

நாயகன் தேடும் பெண், நாயகி தேடும் அம்மா, அந்த பகுதியில் காணாமல் போகும் மக்கள் என எல்லாவற்றிக்கும் காரணமாய் அந்த மருத்துவமனையாய் இருக்கிறது. இவர்கள் உள்ளே போகிறார்கள்.

அதற்கு பிறகு நடக்கும் களேபரங்களும், உணர்ச்சிப்பூர்வமான காட்சிகளும் தான் முழு நீளக்கதை.

போர்க்கால பின்னணி என்பதால், கதை கொஞ்சம் அழுத்தமாய் வந்திருக்கிறது. 1945 காலத்தில் ஜப்பான் ஏகாதிப்பத்தியம் தோல்வி முகத்தில் இருந்த கால கட்டம். எதைத் தின்றால் பித்தம் தீரும் என்ற மனநிலையில் இருந்த அதன் பின்னணியில் தான் இப்படி பொருத்தமான கதையை தீர்மானித்திருக்கிறார்கள்.

நாயகனின் அம்மா, போலீசின் பிடியில் கொல்லப்படுகிறார். கொல்லப்படுவதற்கு முன்பு, ”எப்படியாவது பிழைத்துக்கொள்” என அந்த பையனிடம் செல்கிறார். அந்த ஒத்தச் சொல்லைப் பிடித்துக்கொண்டு பொருளாதாரத்தில் மேலே மேலே வந்துவிடுகிறார். அந்த அதிகாரி கொடுக்கும் நெருக்கடி, நாயகியைப் பார்த்து, காதல் வந்த பிறகு, அவருடைய எண்ணம், செயல்பாடு எல்லாம் மெல்ல மெல்ல மாறுவதை நன்றாக காட்டியிருக்கிறார்கள்.

அம்மாவை தேடும் நாயகி. எந்த ஆபத்தான இடமென்றாலும், பூனையைப் போல நுழைந்துவிடும் லாவகம், எதிரியை எதிர்கொண்டால், சாவதற்கெல்லாம் துளிகூட பயம் இல்லாது துணிவோடு எதிர்கொள்வது, எங்கேயும் தன்னை விட்டுக்கொடுக்காது நகரும் குணம், உணர்வுப்பூர்வமான காட்சிகளிலும் அருமையாய் பொருந்தியிருக்கிறார்.

ஜப்பான் ஏகாதிப்பத்தியம் மற்ற ஏகாதிப்பத்தியங்களை விட மிகவும் கொடூரமானவர்கள் என வரலாறு படிக்கும் பொழுது உணரமுடியும். சீனாவைச் சேர்ந்த மாவோ சீனாவில் அவர்கள் எவ்வளவு கேவலமாகவும், கொடூரமாக ஆட்சி செய்தார்கள் என்பதையும் பதிந்திருக்கிறார். அதை இந்த சீரிசிலும் சரியாக பதிந்திருக்கிறார்கள்.

அந்த கிரியேச்சர் தான் கதையை பேண்டசி ஆக்குகிறதே தவிர, அதைத் தூக்கிவிட்டால், ஒரு அருமையான சுதந்திர போராட்ட கதையாய் மலர்ந்திருக்கும்.

சின்ன சின்ன கதாப்பாத்திரங்களை கூட கவனமாய் எழுதியிருக்கிறார்கள். பலரும் நினைவில் நிற்கிறார்கள். சிஜி தொழில்நுட்பம் உட்பட எல்லோரும் சிறப்பாக செய்திருக்கிறார்கள்.

முதல் சீசனில் மொத்தம் பத்து அத்தியாயங்கள். ஒவ்வொரு அத்தியாயமும் ஒரு மணி நேரம் நீள்கிறது. சில நேரங்களில் மட்டும் கொஞ்சம் தொய்வடைகிறது. ஏழு அத்தியாயங்களை எடுத்திருந்தால் இன்னும் சிறப்பாக வந்திருக்கும். இந்த தொடர் வெற்றி பெற்றதால், அடுத்த தொடரை எடுத்துக்கொண்டிருக்கிறாரகள். விரைவில் வெளியாகும்.

2023ல் தொலைக்காட்சிகளில் வெளியாகி, இப்பொழுது நெட்பிளிக்சில் தமிழில் மொழிமாற்றம் செய்யப்பட்டு கிடைக்கிறது. வாய்ப்புள்ளவர்கள் பாருங்கள்.