கொலை (2023)

ஒரு இளவயது பாடகி. முதல் காட்சியிலேயே தன் வீட்டில் கழுத்தை நெறித்து கொலை செய்யப்பட்டு கிடக்கிறார்.

நாயகன் துப்பறிவதில் நிபுணர். பல வழக்குகளை வெற்றிகரமாக கண்டுபிடித்து கொடுத்திருக்கிறார். ஆனால் இப்பொழுது சொந்த பிரச்சனைகளினால் ஒதுங்கி நிற்கிறார். அவரின் மாணவியான ஐ.பி.எஸ் அதிகாரி கேட்டுக்கொண்டதின் பேரில் வழக்கை விசாரிக்க வருகிறார்.

பாடகி என்றாலும், தோற்றத்தில் மாடல் போல இருப்பதால், மாடலிங் துறையில் இருந்து அழைப்பு வருகிறது. மெல்ல மெல்ல புகழ் பெறுகிறார். அந்த துறையில் உள்ள சில அம்சங்கள் பிடிக்காமல் போக, அங்கிருந்தும் துண்டித்து கொள்கிறார். வேறு சில விசயங்களிலும் தலையிடுகிறார். எங்கெல்லாம் முரண்பட்டாரோ அங்கெல்லாம் பகைவர்கள் உருவாகிறார்கள்.

விசாரணையில் அவளுடைய நண்பன், புகழ்பெற்ற புகைப்படக்காரர், மாடலிங் நிறுவனத்தில் வேலை செய்யும் நபர் என சிலர் சந்தேக வலையில் சிக்குகிறார்கள். இறுதியில் கொன்றது யார் என விடை சொல்கிறார்கள்.

****

கடந்த நூற்றாண்டின் துவக்கத்தில் வந்த ஒரு இங்கிலீஷ் படத்தை தழுவி எடுத்திருக்கிறார்கள். ஒவ்வொரு காட்சியையும் நிறைய மெனக்கெட்டு செதுக்கியிருக்கிறார்கள். ஒளிப்பதிவு, இசை, ஓப்பனை, எல்லாம் வடிவத்தில் கைகூடினாலும், திரைக்கதை பலவீனத்தால் படம் நம்மை ஒட்டவிடாமல் வெளியே தள்ளிவிடுகிறது.

அந்த பெண்ணே தன் சம்பந்தப்பட்ட சம்பவங்களை சொல்வது போல ஆங்காங்கே காட்சிகள் விரிந்தாலும், அழுத்தம் இல்லை. அதனால், எவன் கொன்னா நமக்கென்ன என்ற உணர்வு வருவதை தவிர்க்க முடியவில்லை. கொலைக்காக சொல்லப்படும் காரணமும் வலுவாக இல்லை.

பல மொழிகளுக்கு யோசித்து எடுத்திருப்பார்கள் போல! நடிகர்களின் தேர்வு அப்படி இருக்கிறது. ஐ.பி.எஸ் பெண் அதிகாரியாக வரும் ரித்திகா நாயகனான விஜய் ஆண்டனிக்கு துணைக்கு வந்து போகிறார். விஜய் ஆண்டனியாவது நன்றாக செய்தாரா என்றால், ம்ஹூம். அவரும் வந்து போகிறார். ஈர்க்கவில்லை. ஒரு நகைச்சுவை நினைவுக்கு வந்தது. “நீ என்னடா பண்ணுற! எங்க அப்பாவிற்கு உதவியாக இருக்கிறேன். உங்க அப்பா என்னடா பண்றார்? அவர் சும்மா இருக்கிறார்”. நாயகி மட்டும் நல்ல தேர்வு.

பாலாஜி கே. குமார் இயக்கி ”விடியும் முன்” என்ற படத்தை பார்த்திருக்கிறேன். அந்தப் படமும் வடிவத்தில் நல்ல மெனக்கெடல் இருக்கும். அந்தப் படத்தின் திரைக்கதை கொஞ்சம் நன்றாக இருந்ததால், தப்பித்துவிட்டது.

பிரைமில் இருக்கிறது.