Colombiana (2011) பழிவாங்கும் படலம்

கொலாம்பியா. மாபியா உலகம். ஏதோ ஒரு பிசகில், சிறுமியாய் இருக்கும் நாயகியின் கண் முன்னாலேயே பெற்றோர்களை போட்டுத்தள்ளுகிறார்கள்.

 

அமெரிக்காவிற்கு வந்து சேர்கிறாள். தன் மாமாவிற்கு உதவியாய் சில இரகசிய வேலைகளை செய்து வந்தாலும், பெற்றோரை கொன்றவர்களை விடக்கூடாது என்கிற உணர்வு மாறவில்லை.

 

வில்லன் தொடர்பான ஆட்களை ஒவ்வொருவராய் கொலை செய்ய துவங்குகிறாள். அதற்கு அடையாளமாக கொலம்பியாவின் புகழ்பெற்ற மலரான கேட்டாலியா மலரை அடையாளமிடுகிறாள். அவள் பெயரும் அதுதான்.

 

அவள் தான் என எதிரி புரிந்துகொள்கிறான். அவர்கள் இவளைச் சார்ந்தவர்களை வேட்டையாட ஆரம்பிக்கிறார்கள். வரிசையாய் கொலைகள் என்பதால் ஒருபக்கம் FBI துப்பறிய ஆரம்பிக்கிறது.

 

பிறகு என்ன ஆனது என்பதை அதிரடி சண்டைக் காட்சிகளுடன் சொல்லியிருக்கிறார்கள்.

***

Ballerina வில் உள்ள போதாமைகளைப் பார்த்து வருத்தத்தில் இருந்தவனுக்கு இந்தப் படத்தை சக பதிவரான Muthuvel அறிமுகப்படுத்தினார்.

 

துவக்கத்தில் இருந்து இறுதி வரை, கிரிப்பாக இருந்தது.  லாஜிக் இருந்தது. சண்டைக் காட்சிகளும் அருமை.

மாபியா உலகம் என்கிறார்கள்.  பொல்லாதவன் படத்தில் வரும் புகழ்பெற்ற வசனம் தான் நினைவுக்கு வருகிறது. “தொழிலுக்காக செய்கிறியா! செய்” என்பது இவர்களுக்கு பொருந்தாதா என்ன? மற்றபடி வெற்றிப்பட எளிய பார்முலாவாக பழிவாங்கல் இருப்பது என்பதால் எடுக்கிறார்கள் போல.

 

நாயகி அவதாரில் நேத்ரிக்கு உருவம் தந்த Zoe Saldana தான் படம் முழுவதும் ஆக்கிரமித்திருந்தார். மொத்தப் படத்தையும் தாங்கியிருந்தார். இயக்குநர் Oliver Megaton. இந்தப் படத்தின் வெற்றிக்கு பிறகு தான் புகழ்பெற்ற Taken2, 3 படங்களை இயக்கியிருக்கிறார்.

 

தமிழிலும் கிடைக்கிறது. ஒரு நல்ல பழிவாங்கல் படம் பார்க்கவேண்டும் ஆவல் இருப்பவர்கள் பார்க்கலாம். என்னைப் போல Ballarina பார்த்து வருத்தப்பட்டவர்களும் பார்க்கலாம். இப்போதைக்கு எந்த ஓடிடியிலும் இல்லை. வேறு வழிகளில் முயலுங்கள்.