Old Boy, Driving Licence, Athiran - ஒரு பார்வை

 

Old Boy (2003) தென்கொரியா

ஒருவனைப் பிடித்துக்கொண்டுப்போய், 15 வருடம் ஒரு அறையில் அடைத்து வைக்கிறார்கள். வெளியே வந்து, கொலை வெறியோடு யாரென தேடித்திரிகிறான். என்ன ஆனது என்பதை வலியோடு சொல்லியிருக்கிறார்கள்.

"புறங்கூறாமை" குறித்து நம்ம தாத்தா வள்ளுவர் ஒரு அதிகாரமே எழுதியிருக்கிறார். புறம் பேசுவது எப்பொழுதுமே ஆபத்து என்பதை அழுத்தமாக சொல்லியிருக்கிறார்கள். முக்கியமான கொரியன் படங்களில் இதுவும் ஒன்று என்கிறார்கள். இதன் வெற்றியில் இந்தியில் கொஞ்சம் கதையை மாற்றி எடுத்திருக்கிறார்கள்.

Driving Licence (2019) மலையாளம்

ஒரு பிரபல திரை நட்சத்திரம். அவருடைய ஓட்டுநர் உரிமம் தொலைந்துவிடுகிறது. ஒரு படத்தின் இறுதிக்காட்சிக்காக ஓட்டுநர் உரிமம் தேவைப்படுகிறது. பிரதி எடுக்க வாய்ப்பில்லை. புதிதாக தான் எடுக்கவேண்டிய கட்டாயம். அதை எடுக்கப் போக, அந்த நட்சத்திரத்தின் ரசிகரே அதிகாரியாக இருக்கிறார். ஒரு குழப்பத்தில், இருவருக்கும் மோதல் ஏற்படுகிறது. இறுதியில் என்ன ஆனது என்பதை விறுவிறுப்பாக சொல்லியிருக்கிறார்கள்.

ஒரு பிரபலத்தின் புகழ், அதனால் வரும் குழப்பம், அந்த பிரபலம் நிதானம் இழப்பது அதை தொடர்ந்து என்னென்ன சிக்கல்களை அடுக்கடுக்காய் உருவாக்குகிறது என்பது சுவாரசியம். பிரபல நடிகர் Vs பரம ரசிகர் என உருவாக்கியது இன்னும் ஆச்சர்யம் தந்தது. பிரதிவிராஜ், சுராஜ் இருவரும் பிரதான பாத்திரங்கள். அருமையாக செய்திருக்கிறார்கள். ”அய்யப்பனும் கோஷியும்” எடுத்த சாக்சி இந்த படத்தின் திரைக்கதை ஆசிரியர். அவரை இழந்தது பெரிய இழப்பு தான்.

Athiran (2019) மலையாளம்

ஒரு காட்டுப்பங்களாவில் ஒரு மனநல மருத்துவமனை. அந்த மருத்துவமனையை ஆய்வு செய்ய நாயகனான மருத்துவர் வருகிறார். அங்கு சில மர்மங்கள் இருப்பதை அறிகிறார். ஒரு பெண்ணை அடைத்து வைத்திருப்பதை அறிகிறார். அந்த பெண்ணை மீட்க போராடுகிறார். இறுதியில் மீட்டாரா என்பது முழு நீளக்கதை.

படத்தில் என்னமோ இருக்கிறது போலவே பில்டப் கொடுக்கிறார்கள். கடைசி வரை ஜவ்வாக இழுத்து 10 நிமிடம் ட்விஸ்டை சொல்லி முடிக்கிறார்கள். முடியல! பகத் பாசில், சாய் பல்லவி இருந்தும் தேறவில்லை. படம் பார்க்கும் பொழுது, Shutter Island நினைவுக்கு வந்து போனது. நீங்களும் எதிர்பார்த்து ஏமாந்துவிடாதீர்கள் என்பதற்காக தான் இந்த பதிவை எழுதுகிறேன்.